Bhojanakutuhala 18: atheśuprakaraṇam
Bhojanakutūhala 18
- Language
- Sanskrit
atheśuprakaraṇam
18.p1
nighaṇṭau— sitekṣuḥ kaṭhino rucyo guruśca kaphamūtrakṛt | dīpanaḥ kaphadāhaghno vipāke koṣṇadaḥ smṛtaḥ
18.p2
suṣeṇaḥsnigdhaśca santarpaṇabṛṃhaṇaśca saṃjīvanaḥ svādurasaśramaghnaḥ | vṛṣyaśca pittāsrasamīrahārī hyantarvidāhī kaphakṛtsitekṣuḥ || tadvacca kṛṣṇo'pi bhavet guṇaiśca dāhapahastarpaṇakṛcca vṛṣyaḥ | kṣāraśca kiñcinmadhuro rasena śoṣāpahartā vraṇaśophakartā || tadvat kāṣṭhekṣuvat | nighaṇṭau tukṛṣṇastu rūkṣo madhuraśca pāke svāduḥ suhṛdyaḥ kaṭuko rasāḍhyaḥ | tridoṣahārī samavīryadaśca sa vīryadāyī bahuvīryadāyī || kāḷāṃūsa | puṇḍro'timadhuraḥ śītaḥ kaphakṛn pittanāśanaḥ | dāhaśramaharo vṛṣyo rase santarpaṇaḥ paraḥ || puṃḍāūsa | suṣeṇastu - puṇḍrakastu rasālaḥ syāt rasekṣussukumārakaḥ | karburo miśravarṇaśca nepāḷaśceti saptadhā || iti vāgbhaṭaḥ | tatra pauṇḍrakaḥ - śaityaprasādamādhuryaiḥ varastamanu vāṃśikaḥ | śataparvakanepāḷakāntārādyāstataḥ kramāt || sakṣārāḥ sakaṣāyāśca soṣṇāḥ kiñcidvidāhinaḥ | iti | lohitekṣuśca madhuraḥ pāke syāt picchalo mṛduḥ | pittadāhaharo vṛṣyastejobalavivardhanaḥ || tāṃbaḍāūsa
18.p3
karaṅgaśālirmadhuraḥ śītalo rucikṛnmṛduḥ | pittadāhaharo vṛṣyastejobalavivardhanaḥ
18.p4
mūlādūrdhvaṃ tu madhurā madhye'timadhurāstathā | ikṣavaste'grabhāge tu tathā lavaṇanīra̍sāḥ || abhukte pittahantāro bhukte pittaprakopannāḥ | bhuktimadhye gurutamā itīkṣūṇāṃ guṇāstrayaḥ || atha dantaniṣpīḍitekṣuguṇāḥ | vṛṣyo raktāsrapittaśramaśamanapaṭuḥ śītalaḥ śleṣmado'lpasnigdho hṛdyaśca rucyo racayati ca mudaṃ mūtraśuddhiṃ vidhatte | kāntiṃ dehasya datte balamatikurute vṛhaṇastṛptidāyī dantairniṣpīḍya kāṇḍe mṛduratirasivo mohanaścekṣudaṇḍaḥ || tathā — pīyūṣopamitaṃ tridoṣaśamanaṃ syāddantaniṣpīḍitaṃ tadvaccedbahuyantrajaṃ tadaparaṃ viṣṭambhi gurvagnikṛt | kiñcitkāladhṛtaṃ ca vātajananaṃ jāḍyapratiśyāyadaṃ proktaṃ paryuṣitaṃ kaphānilakaraṃ pānīyamikṣūdbhavam
18.p5
atha tāpitarasaguṇāḥ | ikṣurasaḥ paritaptaḥ snigdhaḥ syātkaphavināśano'tiguruḥ | atipākena vidāhaṃ tanute pittāsradoṣadoṣāṃśca
18.p6
ikṣoragramayaṃ kāṇḍaṃ prataptaṃ dṛḍhavahninā | rasastadudbhavaiḥ kuryādatisāraṃ balakṣayam
18.p7
madhuro lavaṇaḥ kṣāraḥ snigdhoṣṇaśca rucipradaḥ | yūpyo vātakaphaghnaśca yāvanālekṣujo rasaḥ
18.p8
madhyaparvadalanācca tatkṣaṇātpīyate yadi ca yāntriko rasaḥ | vātapittaśamanastadā bhavettarpaṇaśca malamūtraśodhanaḥ
18.p9
itīkṣuprakaraṇam
18.p10
guḍaḥ samadhuraḥ kṣāro guruṣṇaḥ kaphavātanut | ahitaḥ pittarakte ca jīrṇaścaiva rasāyanaḥ
18.p11
pittaghnaḥ pavanārttijidrucikaro hṛdyastridoṣāpahaḥ saṃyogena viśeṣato jvaraharaḥ santāpaśāntipradaḥ | viṇmūtrāmayaśodhano'gnijananaḥ pāṇḍupramehāntakaḥ snigdhaḥ svādutaro laghuḥ śramaharaḥ pathyaḥ purāṇo guḍaḥ || iti navapurāṇaguḍaḥ
18.p12
abhivyaktimādhuryaṃ phāṇitaṃ bṛṃhaṇaṃ guru | śukrakṛt kaphahṛccaiva pittaghnaṃ ca viśeṣataḥ || rūkṣaṃ madhukapuṣpotthaḥ phāṇito vātapittakṛt | dīrghatantrī madhuraḥ pāke vipāke vastidūṣaṇaḥ
18.p13
nātiśleṣmakaro dhautaḥ sṛṣṭamūtraśakṛd guḍaḥ
18.p14
prabhūtakṛmimajjāsṛṅmedomāṃsaprada
18.p15
hṛdyaḥ purāṇaḥ pathyaśceti | pathyaḥ svasya hitaḥ
18.p16
navaḥ śleṣmāgnisasādakṛt | agnisāmo'gnimāndyam | anyatra guḍasya bhedāḥ guṇāścocyante
18.p17
saṃvatsaroṣitaguḍa. purāṇa iti kathyate | varṣatrayoṣita so'pi prapurāṇa. prakīrttitaḥ || prapurāṇo varastasmāt sarvadoṣaharo laghu
18.p18
ariṣṭāyeṣu sarveṣu prapurāṇaṃ prayojayet | caturvarṣātparastasmāt nirvīryo niṣphalo guḍaḥ || śvāsabhāgādikān sarvān janayet sa viśeṣataḥ | iti navapurāṇaguḍaḥ || syādyāvanālarasapākabhavo guḍo'yaṃ kṣāraḥ kaṣāyamadhuraḥ kaphavātahārī | pittapradaḥ satatameṣa niṣevyamāṇaḥ kaṇḍūtikuṣṭhajananò'mlavidāhadāyī
18.p19
atha śarkarā — śuddhasphaṭikasaṅkāśā nirmalā sitaśarkarā | śarkarā jvarapittāsṛṅmūrcchāccharditṛṣāpahā || śvāsāṅgamardahṛllāsaśaityaśūlaharāmikait | tatra — snigdhā puṇḍrakaśarkarā hitakarī kṣīṇe kṣaye'rocake cakṣuṣyā balavṛṃhaṇī sumadhurā rūkṣā ca vaṃśekṣujām̐ | vṛṣyā vṛttimalapradā śramaharā śyāmekṣujā śītalā snigdhā śāntikarī rasālajanitā raktekṣujā pittajit
18.p20
macchaṇḍikādilakṣaṇamāha keyyadevaḥ - ikṣo rasasya samaṃlatryaṃśārdhāṅghrimalāvahāḥ | vikārāḥ phāṇitaguḍamacchaṇḍīkhaṇḍaśarkarāḥ || iti | guṇāśca - macchaṇḍī grāhiṇī balyā kaṣāyā vātajid guruḥ | khaṇḍaṃ guru saraṃ rucyaṃ vātaghnaṃ balapuṣṭidam || sitopalā sarā gurvī vātaghnī na kaphapradā || iti | vṛṣyā kṣatakṣīṇahitā raktapittānilāpahāḥ | macchaṇḍikākhaṇḍasitāḥ krameṇa guṇavattarāḥ
18.p21
tadguṇā tiktamadhurā kaṣāyā yāsaśarkarā | tridoṣaghnī pittakāsesṛgdarbhacchadamambhavā
18.p22
abhiṣyandyatimadhuraṃ phāṇitaṃ bṛṃhaṇaṃ guru | śukrakṛt kaphakṛccaiva pittaghnaṃ ca viśeṣataḥ || phāṇitaṃ gurvābhiṣyandi cayakṛnmūtraśodhanam | avṛṣyaṃ bṛṃhaṇaṃ kṣāraṃ vīryoṣṇaṃ sarvadoṣakṛt
18.p23
śarkarā tu sitopalā | sitā ca madhudhūlistu khaṇḍastadvikṛtiḥ punaḥ || ‘macchaṇḍikā phāṇitaṃ cāpi’ iti haimanaḥ | rūkṣo madhūkapuṣpotthaḥ phāṇito vātapittakṛt | kaphaghno madhuraḥ pāke vipāke vastidūṣaṇaḥ || śarkekṣuvikārāṇāṃ phāṇitaṃ ca varāvare | himajā śarkarā gaulyā so'lpā tiktā tvapicchalā
18.p24
vātaghnī sārikā rucya dāhapittāsradāyinī
18.p25
sitakhaṇḍo'timadhuraḥ ślakṣṇaścharddināśanaḥ | kuṣṭhavraṇakaphaśvāsahikkāpittāsradoṣajit
18.p26
vṛṣyā kṣatakṣīṇahitā raktapittānilāpahāḥ | matsyaṇḍikākhaṇḍasitāḥ krameṇa guṇavattarāḥ
18.p27
tadguṇā tiktamadhurā kaṣāyā yāsaśarkarā
18.p28
yadguṇaṃ yanmadhu proktaṃ tadguṇā tasya śarkarā | viśeṣāttarpaṇī balyā puṣṭyā ca kṣīṇadehinām
18.p29
vahnipākāt kālapākādvā śarkarāūpatāṃ gataṃ madhu madhuśarkarā | tadguṇā madhusadṛśaguṇā | sāmānyaśarkarāguṇamāha vāgbhaṭaḥ — dāhatṛṭchardimūrcchāsṛkpittaghnyaḥ sarvaśarkarāḥ
18.p30
śuddhasphaṭikasaṅkāśā nirmalā mitaśarkarā | śarkarā jvarapittāsṛṅmūrcchātṛcchardiviṣāmahā || śvāsāṅgamardahṛcchvāsaśvaityaśūlaharāgnikṛt
18.p31
snigdhā puṇḍrakaśarkarā hitakarī kṣīṇe kṣaye'rocake cakṣuṣyā balavṛṃhaṇī sumadhurā rūkṣā ca vaṃśekṣujā
18.p32
vṛṣyā tṛptibalapradā śramaharā śyāmekṣujā śītalā snigdhā śāntikarī rasālajanitā raktekṣujo pittajit || tridoṣaghnī sitā kāśekṣudarbhacchadasaṃbhavā | kṣatakṣayaharā dāharaktapittatṛṣāpahā | snigdhā pathyā himā svādvī sakṣārā guḍaśarkarā
18.p33
sitakhaṇḍo'timadhuraścakṣuṣyaśchardināśanaḥ | kuṣṭhavraṇakaphaśvāsahikkāpittāsradoṣajit
18.p34
tavarājo'timadhuraḥ pittaśramavṛṣāpahaḥ | vṛṣyo vidāhamūrcchārtibhrāntiśrāntikaraḥ saraḥ
18.p35
dāhaṃ nivārayati tāpamapānaroti tṛṣṇāṃ niyacchati nihanti ca mohamūrcchām | śvāsaṃ nivārayati tarpayatīndriyāṇi śītassadā sumadhuraḥ khalu miṣṭakhaṇḍaḥ
18.p36
atha madhu | teṣa — mākṣikaṃ bhrāmaraṃ kṣaudraṃ pauttikaṃ chātrakaṃ tathā | ārghyamauddālakaṃ dālamityaṣṭau madhujātayaḥ || nānāpuṣparasāhārāḥ kapilā navamakṣikāḥ | yāḥ sthūlāstābhirutpannaṃ madhu mākṣikamucyate || ye snigdhāñjanagoḷābhāḥ puṣpāsavaparāyaṇāḥ | bhramarairjanitaṃ taistu bhrāmaraṃ madhu bhaṇyate || piṅgalā makṣikāssūkṣmāḥ kṣudrā iti hi tāḥ smṛtāḥ | tābhirutpāditaṃ yattu tat kṣaudraṃ madhu kathyate || mahatyo makṣikāḥ piṅgāḥ pūtikā iti kīrttitāḥ | tajjātaṃ madhu dhīmadbhiḥ pauttikaṃ samudāhṛtam || 4 || chatrākāraṃ tu paṭalaṃ saraghāḥ pītapiṅgalāḥ | yat kurvanti tadutpannaṃ madhu chātrakamīritam
18.p37
madya navaṃ sarvavikārahetu sarvaṃ ca vātādikadoṣadāyi | jīrṇaṃ tu sarvaṃ sakalāmayaghnaṃ vṛṣyaṃ ca sandīpanamuktametat
18.p38
dīpanaṃ rocanaṃ madyaṃ tīkṣṇoṣṇaṃ tuṣṭipuṣṭidam | susvādu tiktakaṭukamamlapākarasaṃ saram || sakaṣāyaṃ svarārogyapratibhāvarṇakṛllaghu | naṣṭanidrātinidrebhyo hitaṃ pittāsradūṣaṇam || kṛśasthūlahitaṃ rūkṣaṃ sūkṣmaṃ srotoviśodhanam | vātaśleṣmaharaṃ yuktyā pītaṃ viṣavadanyathā
18.p39
madyaṃ na peyaṃ vā peyaṃ svalpaṃ subahuvāri vā | anyathā śothaśaithilyadāhamohān karoti (ca) || drākṣaikṣavaḥ sakharjūraḥ śālipiṣṭaṃ yavasya vā | pañca madyākarāḥ śreṣṭhāḥ drākṣā teṣā viśiṣyate
18.p40
madyaprayogaṃ kurvīta śūdrādiṣu mahārtiṣu
18.p41
māṃsaṃ khaḍgamṛgotthaṃ tu balakṛd bṛṃhaṇaṃ guru | gavayasyāmiṣaṃ balyaṃ rucyaṃ vṛṣyaṃ ca bṛṃhaṇam
18.p42
īṣallaghu syādapi bṛṃhaṇaṃ ca māṃsaṃ baliṣṭhaṃ vanamāhiṣasya | snigdhaṃ nidrākaraṃ pittahāri grāmyasya cāmiṣam
18.p43
ruroḥ kravyaṃ guru snigdhaṃ vātalaṃ śleṣmakārakam | bahupuṣṭipradaṃ gātramāmiṣaṃ vahnimāndyadam || aśvamāṃsaṃ bhaveduṣṇaṃ vātaghnaṃ baladaṃ laghu | pittadāhapradaṃ nṛṇāṃ tadevoṣṇātisevanāt || auṣṭraṃ māṃsaṃ tu śiśiraṃ tridoṣaśamanaṃ laghu | balapuṣṭipradaṃ rucyaṃ madhuraṃ vīryavardhanam || gardabhaprabhavaṃ māṃsaṃ kiñcidguru balapradam | rucyaṃ tu vanyajaṃ hyatyantavīryabalapradam
18.p44
mṛgasya māṃsaṃ laghu śītahṛdyaṃ tridoṣahṛt paṭurasaṃ ca rucyam | kuraṅgamāṃsaṃ madhuraṃ ca hṛdyaṃ kaṣāyakaṃ pittaharaṃ ca mārutam
18.p45
tridoṣahāri caiṣāṃ syāllaghu vṛṣyaṃ suśītalam
18.p46
sāraṅgaṃ viśiśrutaṃ snigdhaṃ madhuraṃ laghu tṛpyadam
18.p47
citalaprabhavaṃ māṃsaṃ laghu hṛdyaṃ balapradam || varāhamāṃsaṃ guru vātahāri vṛṣyaṃ balasvedakaraṃ vanottham | tasmād guru grāmyavarāhamāṃsaṃ tanoti medobalavīryavṛddhim || chāgamāṃsaṃ guru snigdhaṃ nātiśītaṃ rucipradam | nirdoṣaṃ vātapittaghnaṃ madhuraṃ balapuṣṭidam || chāgapalotbhavaṃ māṃsaṃ laghu śītaṃ pramehajit | īṣallaghu balaṃ datte tadeva tṛṇacāriṇaḥ || bhāraṅgasyāpi māṃsaṃ tu guru snigdhaṃ kaphapradam | balyaṃ vṛṣyakaraṃ puṣṭipradaṃ vātakaraṃ param
18.p48
āvikaṃ madhuraṃ māṃsaṃ kiñcidguru balapradam | bṛṃhaṇaṃ kaphakṛd vṛṣyaṃ paraṃ viṣṭambhi śītalam || godhāmāṃsaṃ tu vātaghnaṃ śvāsakāsaharaṃ ca tat
18.p49
śaśamāṃsaṃ tridoṣaghnaṃ dīpanaṃ śvāsakāsanut | picchalaṃ nākulaṃ māṃsaṃ vātakṛcchleṣmapittakṛt
18.p50
āraṇyakukkuṭakravyaṃ dṛṣṭyaṃ śleṣmaharaṃ laghu | grāmyastu śleṣmalo guruḥ | hārītaṃ palalaṃ svādu kaphapittāsradoṣajit | vardhanaṃ vīryabalayostadvadeva kapotajam
18.p51
pārāvatapalaṃ snigdhamadhuraṃ guru śītalam | pipāsādāhanud valyaṃ vīryavṛddhikaraṃ param
18.p52
rucyaṃ tittirijaṃ māṃsaṃ laghu vīryabalapradam | kapāyamadhuraṃ śītaṃ tridoṣaśamanaṃ param
18.p53
tadvacca lāvaka māṃsaṃ pathyaṃ grāhi balapradam | caṭakasyāgrijillītaṃ laghu vṛṣyaṃ balapradam
18.p54
tadvadāraṇyacaṭakakravyaṃ laghu ca pathyakam | rucya kāpiñjala kravyaṃ śītalaṃ bṛṃhaṇaṃ guru || cārūpastvakalopā ca jñeyā varṇo-vaśādayaḥ | tatra | kṛṣṇaḥ śalkī śvetakukṣristu matsyo yaḥ śreṣṭho'sau rohito vṛttavaktraḥ | koṣṇaṃ balyaṃ rohitasyāpi māṃsaṃ vātaṃ hanti snigdhamṛdhnāti vīryam | rohitamatsya | yaḥ pītavarṇo'pi ca picchilāṅgaḥ pṛṣṭhe ca rekhābahulaḥ sa śalkaḥ | sa gargaro gargaranādavaśyo jaḍaśca śītaḥ kaphavātadāyī || gāgaru | pṛṣṭhe pakṣau dvau gale pucchake cet sarpābhaḥ syāt puṣkaro vṛttatuṇḍaḥ | jñeyaḥ śalkī matsyako bhīruruktaḥ snigdho vṛṣyo durjaro vātakārī || ahīra | nātisthūlo vṛttavaktro'pi cāsye dhatte dantān śmaśrulo dīrghakāyaḥ | triḥsandhyāyāṃ rātribrandśeṣe trivarṇaḥ prokto vālaḥ pathyabalyaḥ suvṛṣyaḥ || vālāṃbu | pṛṣṭhe kukṣau kaṇṭakī dīrghatuṇḍaḥ sarpābho yaḥ so'pyayaṃ varbarākhyaḥ | vātāṭopaṃ so'pi datte'ntrajāḍyaṃ snigdho balyo durjaro vīryakārī | bābīra | śvetaṃ sukāyaṃ samadīrghavṛttaṃ niścaśkalkaṃ chāgalakaṃ vadanti | dvikaṇṭako'sau khalu pṛṣṭhavaṃśe kaṇṭhyastupathyo rucidaśca vailyaḥ || sagalu
18.p55
yo raktāṅgo nātidīrgho na cālpo nātisthūlo raktamatsyaḥ sa uktaḥ | śīto rucyaḥ puṣṭikṛd dīpano'sau nāśaṃ datte kiñca doṣatrayasya
18.p56
yaḥ kṛṣṇo dīrghakāyaḥ syāt sthūlaśalkī ca sannitaḥ | matsyo māhiṣanāmāsau dīpano balavīryadaḥ
18.p57
śuklāṅkastāmrapakṣo yaḥ svalpāṅgaśca trilāhvayaḥ | sa rucyo madhuro balyo guṇāḍhyo vīryapuṣṭidaḥ
18.p58
yaḥ sthūlāṅgo māhiṣākārako yastālusthāne kṣīrajābhāṃ dadhāti | śalkaṃ sthūlaṃ dhatte cārurūpo'sau datte vīryaṃ dīpano vṛṣyadāyī
18.p59
nissnehamānaḥ śvetāṅgaḥ sūkṣmaśalkaḥ sa dīpanaḥ | alamosāhvayo matsyo balavīryāṅgapuṣṭidaḥ
18.p60
vidyutāṅgo'lpakṛṣṇāṅgaḥ śalkī varṇavaśābhidhaḥ | dīpanaḥ pācanaḥ pathyo vṛṣyo'sau balapuṣṭidaḥ
18.p61
iti dvādaśabhedānāṃ guṇā rūpaṃ ca varṇitam | tathā— niśśalkā ninditā matsyāḥ sarve śalkayutā hitāḥ
18.p62
balapuṣṭikarā vīryavapuḥsthairyavivardhanāḥ || atha sthānaviśeṣeṇa guṇāḥ | kṣārāṃbumatsyā guravo vidāhino viṣṭambhadāste lavaṇārṇavādijāḥ | hradakulyājalanirjharataḍāgavāpījaleṣu ye matsyāḥ | te'tijaḍā nādeyā yathottaraṃ laghutarāstu nādeyāḥ || suṣeṇaḥ - jaḍāstaṭākasambhūtāḥ snigdhāḥ svādurasāḥ smṛtāḥ || kaupā vṛṣyāḥ śleṣmalāḥ saṃpradiṣṭāḥ gulmāṣṭhīlānāhakuṣṭhapradāḥ syuḥ | taḍāgavanirjharajāśca medhyāścakṣussthirāyuṣyabalapradāśca | mahāhradeṣu balinaḥ svālpāmbhasyabalā matāḥ | sāmudro guruṣṇarūkṣamadhuraḥ syācchleṣmalo vātahā syātsnehābhivivardhano naravaraṣvādhmānaviṣṭambhakṛt | pittodrekakaphātyayeṣu vihito matsyo'nindyassadā viṣṭambhaṃ janayecca śītapavanaṃ vyāpādayetparvataiḥ || tathā - ṛtuprabhau nirjhareṣu prajātā matsyā hitā grīṣmakāle tu cauṇḍyāḥ | taḍāgajāḥ prāvṛṣi sarva eva te hi baliṣṭhāśca sṛjanti doṣān || śaradṛtau nirjharajāśca kūpajātā himatau śiśire ca śastāḥ || rasaraktādidhātūnāṃ guru syāduttarottaram | maidūṃ kaṭiyakṛnmāṃsaṃ vārṣaṇaṃ cātimātrataḥ
18.p63
pakvaṃ māṃsaṃ hitaṃ sarvaṃ balavīryavivardhanam | bhṛṣṭamāṃsaṃ vidāhi syādasravātādidoṣakṛt
18.p64
pūrvārdhaṃ puruṣasya ced gurutaraṃ paścārdhabhāgaḥ striyāḥ strī gurvī kila garviṇī yadi tathā yoṣit ca tulyā laghuḥ | pakṣī cet puruṣo laghuḥ sphikśiraḥskandhāṃsapṛṣṭhe kramānmāṃsaṃ yacca kaṭisthitaṃ tadakhilaṃ gurveva sarvātmanām
18.p65
iti māṃsaprakaraṇam
Linked texts (12)
- Rājanighaṇṭu (Nighaṇṭurāja, Abhidhānacūḍāmaṇi) — Narahari Paṇḍita, Sanskrit
- Aṣṭāṅgasaṃgraha — Vāgbhaṭa, Sanskrit
- Vāgbhaṭasaṃhitā — Vāgbhaṭa, Sanskrit
- Āyurvedamahodadhi (Annapānavidhi section) — Suṣeṇa 1622, Sanskrit
- Bhojanakutūhala — Raghunātha, Sanskrit
- Annapānavidhi — Suṣeṇa, Sanskrit
- Hṛdayapriyā — Pāñcumnattadu 1790, Sanskrit
- Yogataraṅgiṇī (Trimalla) — Trimalla, Sanskrit
- Śāligrāmanighaṇṭubhūṣaṇa — Śāligrāma Vaiśya, Sanskrit
- Āyurvedasaukhya — Ṭoḍaramalla 1565, Sanskrit
- Bhāvasvabhāva — Mādhavadeva 1688, Sanskrit
- Dravyaguṇasaṃgraha — Cakrapāṇidatta, Sanskrit