Shadvargaphalaprakasha 4

Ṣaḍvargaphalaprakāśa 4

Language: Sanskrit

4.1

tatrādau lagnagatadreṣkāṇa phalāni
dreṣkāṇe divaseśvarasya malinaḥ śūro'ṅganāvallabhaḥ
krūraḥ sāhasikaḥ kukarmakuśalo mūrkhaḥ kupakṣagrahaḥ
hrāsī gurutalpago'lpatanayo dyūtakriyāsaṃrataḥ
pāpātmā kṛpaṇaḥ khalo'timukharaḥ saḥ syādadṛśyo naraḥ

4.2

anyacca
tryaṃśo yadā vāsarapasya lagne tadā sutīvraṃ janayenmanuṣyam
kalipriyaṃ dānarataṃ viśālaṃ vidveṣaśīlaṃ dvijadevatānām

4.3

dreṣkāṇe rajanīkarasya sutanuḥ sampūrṇacandrānanaḥ
śilpajño bahubhāṣaṇo vidhurapūrṇaścetkadāpi kṣayī
śāstre mandaratiḥ suśīlahṛdayo vandhvarcitaścaṃcalo,
dharmādharmarato videśakuśalo sa syādadṛśyo naraḥ

4.4

anyacca
candrasya lagne tu yadā tribhāgastadā prasūte khalu bhāgyavantam
śriyānvitaṃ bhaktiparaṃ gurūṇāṃ vikhyātakīrtiḥ sutamitrayuktam

4.5

dreṣkāṇe dharaṇīsutasya malinaḥ krūro vihīno dhanaiḥ
pāpātmā piśunaḥ sutārtharahitaḥ syānniṣṭhuro nirdayaḥ
duḥśīlo bahubhāṣaṇo kṣatatanuścātmaṃbhariḥ krodhayuk
rogārto parasevako guṇagaṇaḥ santyājito mānavaḥ

4.6

anyacca
tryaśāṃśako bhūmīpatestu lagne karoti martyaṃ kṣatajātideham
krūrasvabhāvaṃ hatabandhudāraṃ pratāpahīnaṃ viṣayārditaṃ ca

4.7

dreṣkāṇe śaśijasya buddhikuśalaḥ kṣamāpālapūjyaḥ sadā
dīrghāyurvalavānapatyabahulaḥ śāṃto yaśasvī śuciḥ
dharmajñānarataḥ pramādarahito nityaṃ satāṃ vallabhaḥ
śāstrajñaḥ kulabhūṣaṇo bahudhanatyāgī ca tuṣṭo naraḥ

4.8

anyacca
tṛtīyabhāgaḥ śaśijasya lagne karoti saumyaṃ sarujaṃ manuṣyam
na dīrghasūtraṃ na ca vittahīnaṃ sasyādikaṃ bhūridhanaṃ sadaiva

4.9

dreṣkāṇe dhiṣaṇasya yaḥ śiśurabhūt dīrghāyuravyādhito
buddhīśaḥ priyadarśano guṇanidhirmuktāśayordhārmikaḥ
mokṣajñānaparaḥ kṛpāluyatanuḥ śāntaḥ suśīlaḥ śuciḥ
sukṣīsneharato'nyadāranirataḥ syātsundaraḥ śrīmayaḥ

4.10

anyacca
tryaṃśo yadā devapurohitasya lagne prayātaḥ prakaroti martyam
tejasvinaṃ sarvasukhādhivāsaṃ sudhārmikaṃ prītikaraṃ svapakṣe

4.11

dreṣkāṇe bhṛgunandanasya sutanu pātraṃ dharitrīpateḥ
sarvajño'pi janānurāgakuśalo dātā satāṃ pālakaḥ
muktāratnavarāṅganātmajaghanaiḥ sphītaḥ kṛpāluḥ śuciḥ
śāntaḥ satyarato'pi muktahṛdayo dharmānurakto naraḥ

4.12

anyacca
dreṣkāṇasaṃsthaśca bhṛgorvilagne vittānvitaṃ saṃjanayenmanuṣyam
śāstrānuraktaṃ gatarogapāpaṃ nṛpapriyaṃ devaguruprasaktam

4.13

dreṣkāṇe ravinandanasya malinaḥ krūro mṛdustaskaro
duḥśīlaḥ kṛpaṇaḥ sutārtharahitaḥ preṣyairguṇairvarjitaḥ
pāpātmā gurutalpago'pi piśunaḥ syāt krodhano nirdayaḥ
śokārto mukharaḥ svarūparahitaḥ kāmāturo mānavaḥ

4.14

anyacca
śanaiścaraścāpi tribhāgasaṃstho lagnasya sūte kṛpaṇaṃ gatasvam
dharmārthahīnaṃ sahajaṃ na saukhyaṃ dayāvihīnaṃ ca karoti nūnam

4.15

iti lagnagatadreṣkāṇaphalam
atha pṛthak dreṣkāṇaphalāni
tatrādau meṣasya
dātā hartā dīptaḥ kṣayodayī saṅgarapracaṇḍaḥ syāt
priyavigrahatribhāge meṣāgre bandhuṣūgradaṇḍaśca

4.16

strīcañcalo vihārī ratimān gītapriyo manasvī syāt
mitrārthabhāk surūpaḥ strīvittardhaci dvitīye ca

4.17

guṇavān paradoṣakaro balasattvayuto narendrasevī syāt
svajanapriyo'tidharmaṃstṛtīyabhāge priyādaro'jñaśca

4.18

vṛṣasya
priyapānabhojyanārīviyogatapto vṛṣasya pūrvāṃśe
vastrā'laṃkārayuto yuvatiprakṛtānusārī syāt

4.19

saumyavapustrīsubhago mahādharo rūpadhanayuktaḥ
dhanavān sthiro manasvī lubdhastrīṇāṃ priyo dvitīye syāt

4.20

caturo'lpabhāgyavīro malīmasaḥ syāddhanānyupādāya
santapya te tu paracādvṛṣabhasya bhāge tṛtīye ca

4.21

mithunasya
mithunādime dṛgāṇe pṛthūttamāṅgo dhanānvitaḥ prāṃśuḥ
kitavo guṇī vilāsī nṛpāsamāno vacasvī syāt

4.22

hrasvānanasvarūpaḥ saumyavapuḥ sūkṣmamūrddhajatanuḥ syāt
dhanyo mṛdurmahādhīrdvitīyabhāge pratāpavān suyaśāḥ

4.23

strīdveṣiṇo vapuṣmān mahāśirāḥ śatrusaṃyutaḥ prāṃśuḥ
rūkṣanakhāṅghrī karatalaścalārdhavibhūto dṛḍhastṛtīye syāt

4.24

karkasya
karkaṃṭakādimabhāge devabrāhmaṇarataścalāgauraḥ
kṛtyakaraśca pareṣāṃ sudhīḥ sumūrtiḥ śubhāṅganaḥ śubhagaḥ

4.25

lubdhasyādvadanaparaḥ svapnarataḥ strījito'bhimānī syāt
sahajānvito vilāsī capalo bahurug dvitīye ca

4.26

strīcañcalo'rthabhāgī videśanirataḥ priyāsavaḥ sādhuḥ
kānananatoyānurato dudṛṣṭirmālyavāṃstṛtīye syāt

4.27

siṃhasya
siṃhādidreṣkāṇe dātā bhartārirnijigīṣuḥ syāt
bahudhanayoṣitsu suhṛdbahunṛpasevakaḥ susatvaśca

4.28

surucirakārī dātā sthiro vapuṣmān raṇepsuḥ syāt
sukhabhāk śrutidharmarucirvistīrṇamatirdvitīye ca

4.29

lubdhaḥ parasvaharaṇe kalyaḥ stabdho mahāmatiḥ kitavaḥ
nāyatatanumūrtiḥ syānnaikāpatyaḥ pragalbho'ntye

4.30

kanyāyāḥ
śyāmaḥ suvāgvinītaḥ prāṃśuḥ sukumāramūrtirabalādye
strībhyo'rthabhāganiṣṭho dīrghaśirā madhusamākṣaśca

4.31

dhīro videśabhāgī śilpakathāpaṇḍitaḥ samaraśauṇḍaḥ
vācāṭaḥ śrutavākyo vanaukasāṃ sammato dvitīye syāt

4.32

gītāparārddhabhāgī saṅgītaratirnarendradayitaḥ syāt
hrasvasvarūpaveṣaścānte pṛthudṛk śiraskaśca

4.33

tulāyāḥ
kandarparūpanipuṇastulādibhāge'dhvasevajñaḥ
śyāmakalā paṇyarato niyogadhīraḥ sumedhāvī

4.34

paṅkajaviśālanetraḥ surūpavāk sāhasaḥ vilāsī syāt
khyātaḥ svavaṃśavardhitavṛddhānucaro dvitīye ca

4.35

capalaḥ śaṭhaḥ kṛtaghno virūpajihyopacitamūrtiḥ
naṣṭasuhṛddraviṇayaśāḥ svalpamatirbhāgake tṛtīye syāt

4.36

vṛścikasya
gauraḥ sthiraḥ pracaṇḍo raṇotkaṭaḥ syānnaro viśālākṣaḥ
sthūlaviśālaśarīraḥ kalipriyo vṛścikādyāṃśe

4.37

mṛṣṭānnapānacaturaścalakṣaṇo hemagauramūrtiḥ syāt
kāntaḥ paravittayutaḥ śīlakalāvān dvitīye'śe

4.38

niśrumaśruromahiṃsraḥ piṅgākṣamahodaraḥ praharttā ca
sahajacyutastṛtīye pīvarabāhuḥ sudhīrahṛdayaśca

4.39

dhanuṣaḥ
parimaṇḍalākṣavaktro gaṇeṣu mukhyo dhanurddagāṇādye
svopacitasvācārastathā mṛdurbhavati sañjātaḥ

4.40

śāstrārthavit pravaktā kratuśatahartā dvitīye ca
mantrabhṛtāṃ śreṣṭhatamastvanekatīrthāyatanacārī

4.41

bandhupradhānacaturaḥ satāṃ gatirdharmabhāk tṛtīye'pi
kāmī parāṅganābhāk rūpayaśobhājano vijiṣṇuśca

4.42

makarasya
vyālambabhujaḥ śyāmaḥ prathitayaśo rūpakāntiśaṭhaḥ smitabhāṣī
makarādye strīṣujito valguceṣṭadhanayuktaḥ

4.43

alpavadanaśca madhye calaḥ parastrīdhanāpahartā syāt
caturaḥ satāṃ gatijñaḥ pradānaśīlo durantapādaḥ syāt

4.44

vācālaḥ kaluṣakraśo dīrghāṅgapitṛviyuśca
labhate videśagamanādvyasanāni mṛgamukhasyānte

4.45

kumbhasya
śrīmānayaśobhūtiḥ sphītaprabhavo ghaṭasyādye
prāṃśuḥ karmasu niṣṭho dhanavānnṛpasevako jātaḥ

4.46

lubdhaḥ samarthamadhuro gauraḥ piṅgoddhatākṣahāsyadhanaḥ
uddṛṣṭavacā matimān bahumitraḥ syād dvitīye tu

4.47

dīrghaḥ śaṭhaḥ pratāpī kṛśo'lpabāhuḥ sutārthabhāk stabdhaḥ
bahvanṛto'ntarviṣamo vidāritākṣo rativindantye

4.48

mīnasya
madhupiṅgākṣo gauro medhāvī satkriyā ratijñaśca
sukhabhāgī mīnādye jalacarayugale vinītaśca

4.49

nāryupacārapravaro mṛṣṭānnaratiḥ parārddhakāmī
strīsañjanātidayito vadatāṃ śreṣṭho dvitīye tu

4.50

śyāmaḥ kalāsu nipuṇaḥ pṛthupādasuhṛtapradānaśca
mṛṣṭānnapānahāsyo mīnayugāntye bhavetpuruṣaḥ

4.51

itīrito'yaṃ svaguṇasvabhāvaiḥ, dreṣkāṇakānāṃ guṇa cinhakalpyaḥ
drekkāpatau vīryavatīṣṭadṛṣṭe drekkāphalaṃ nirvikalaṃ vidadhyāt

Linked texts (4)

Sārāvalī — Kalyāṇavarman, Sanskrit
Sārāvalī — Varāha, Sanskrit
Phalasārasamuccaya — Sanskrit
Jātakasāradīpa — Nṛsiṃha, Sanskrit