Viramitrodaya 1.p121.1

1.p121.1

śūraḥ syānmahiṣagrīvo mṛgagrīvo bhayāturaḥ | hrasvagrīvastu dhanavān sa sukhī bhogavāṃstathā || grīvāyāṃ viralā yasya kamburekhāḥ samāhitāḥ | sa bhavetpārthivo bhūmau sarvaduṣṭanibarhaṇaḥ || dīrghagrīvāḥ bakagrīvāḥ śaśagrīvāśca ye narāḥ | śuṣkaṃgrīvā kṛśagrīvāḥ sarve te nirddhanāḥ smṛtāḥ || iti | kambugrīvalakṣaṇaṃ spaṣṭamevāha— utpale samudraḥ, valitrayaracitagrīvaḥ kambugrīvo hi kathyate | iti | garuḍapurāṇe, nimnāśvipiṭakaṇṭhaḥ syāt śirāśuṣkagalaḥ sukhī | nimno nīcaḥ nikṛṣṭa iti yāvat | śirāśuṣkagalaḥ śirāśuṣkaḥ śirārahitaḥ galaḥ kaṇṭho yasyeti saḥ | śūraḥ syānmahiṣagrīvaḥ śastrānto mṛgakaṇṭhakaḥ | kambugrīvo'tha nṛpatirlambakaṇṭho'tibhakṣaṇaḥ || iti | jaganmohane samudraḥ, grīvā syādvarttulā yasya pūrṇakumbhasamā bhavet | sudhanaṃ taṃ vijānīyādāyuṣmantaṃ ca mānavam || iti | utpale samudraḥ, śūrastu mahiṣagrīvaḥ śastrānto vṛṣakandharaḥ | iti | sāmudratilake, piśuno vakragrīvaḥ śastravināśo mṛgagrīvaḥ | rāsabhakarabhagrīvo duḥkhī syāddāmbhiko bakagrīvaḥ || śuṣkaśirālagrīvaścipiṭagrīvaśca dhanavihīnaḥ | iti | iti grīvālakṣaṇam | atha cibukalakṣaṇam | adharādadhaḥ kaṇṭhopari cibukam | tallakṣaṇamuktam— utpale samudreṇa, nirmāṃsaiścibukairdīrghairnidrvyāścādhvavāsinaḥ | samāṃsairdhanopetā bahuputrasamanvitāḥ || iti | sāmudratilake, puṇyavatāmiha cibukaṃ vṛttaṃ māṃsalamadīrghalaghumṛdulam | atikṛśadīrghasthūlaṃ dvidhāgrabhāgaṃ daridrāṇām || iti ! iti cibukalakṣaṇam | atha hanulakṣaṇam | sāmudratilake, hanuyugalaṃ suśliṣṭaṃ cibukobhayapārśvasthitaṃ puṃsām |