Viramitrodaya 10.p120

10.p120

lohādyaṃ chinnabhinnārṅgaṃ sandhāya sthāpayetpunaḥ | bāhupādaśirohīnāṃ karṇanāsāsthihīnikām || tādṛśīṃ parivārāṇāṃ pratimāṃ parivarjayet | yaddravyaṃ yatpramāṇaṃ ca liṅgaṃ vā pratimāpi vā || tyaktaṃ tattena mānena taddravyeṇa prakalpayet | kārayennānyamānena nānyadravyeṇa tadbudhaḥ || nānyākāraṃ ca nānyatra sthāpayettadguruttamaḥ | srotasāpahṛte liṅge prāsāde vā tadanyataḥ || tatsamaupagate deśe sthāpayedbādhavarjite | prākāre patite harmye gopure maṇḍapādike || tadākāraṃ ca taddravyaṃ tanmānaṃ tatra kārayet | karmayogyāḥ śilā grāhyā dṛḍhakāśca tathāvidhāḥ || hīnadravyakṛtaṃ harmyaṃ śreṣṭhairdravyaiḥ samācaret | hīnaṃ vāpyadhikaṃ mānaṃ prākāraṃ vā na kārayet || evamuktena mārgeṇa doṣairuktairvicārya ca | liṅgapīṭhādikaṃ jīrṇaṃ taduddhāraṃ tadācaret || vidhinakṣatravārādīṃstadarthaṃ na vicārayet | jīrṇaṃ coddhārayejjīrṇamajīrṇaṃ rakṣayedbudhaḥ || iti | agnipurāṇe, susthitaṃ duḥsthitaṃ vāpi śivaliṅgaṃ na cālayet | śatena sthāpanaṃ kuryātsahasreṇa tu cālanam || iti | susthitaduḥsthitalakṣaṇamapi tatraivoktampūjādibhiśca saṃyuktaṃ jīrṇāyamapi susthitam | pūjayā rahitaṃ yattadaduṣṭamapi duḥsthitam || iti | aduṣṭamajīrṇam | hīnaṃ pūjādibhirliṅgamajīrṇamapi duḥsthitamiti siddhāntaśekhare uktatvāt | ajīrṇaṃ dṛḍhamanekakālasthitiyogyamityarthaḥ | duḥsthitaviṣaye tatraiva viśeṣaḥ | diggūḍhaṃ sthāpitaṃ liṅgaṃ mohānnimnatvamāgatam | talliṅgaṃ duḥsthitaṃ vāpi tantrajñairiti niścitam || śatena sthāpanaṃ kuryātsrahasreṇa tu cālanam | iti | asya cārthaḥ siddhāntaśekhare uktaḥsahasrādhikahomena tasya cālanamīpsitam | sthāpanaṃ śatahomena tasya liṅgasya coditam || iti | atijīrṇaṃ liṅgaṃ syāccettadā tajjale nikṣipya tatrānyalliṅgaṃsthāpayet | etadvidhiścaagnipurāṇe uktaḥvisṛjya svarṇapāśena vṛṣaskandhasthayā tathā | rajjvā baddhvā tayā nītvā śaivaṃ mantraṃ gṛṇan śanaiḥ || tajjale nikṣipanmantrī puṣṭyarthaṃ juhuyācca tam | tṛptaye dikpatīnāṃ ca vāstuśuddhyai śataṃ śatam || rakṣāṃ vidhāya taddhāmni mahāpāśupatāstrataḥ | liṅgamanyattatastatra vidhivatsthāpayedgṛha || iti