[Pramāṇa](https://indike.org/pramana/) › [Indian literature](https://indike.org/pramana/in) › [Astronomy & Mathematics](https://indike.org/pramana/in.astro) › [Genethlialogy (natal astrology)](https://indike.org/pramana/in.astro.hora) › [Viramitrodaya](https://indike.org/pramana/in.astro.hora.viramitrodaya) › 10.p45 # Viramitrodaya 10.p45 Vīramitrodaya 10.p45 - **Language:** Sanskrit ### [10.p45](https://indike.org/pramana/in.astro.hora.viramitrodaya.10.p45) iti śeṣamūrttilakṣaṇam | atha sūryyamūrttilakṣaṇam | brahmāṇḍapurāṇe, bāhye cābhyantare vāpi cakradvādaśasaṃyutā | sūryyamūrttiriti khyātā sarvavyādhivināśinī || iti | iti sūryyamūrttilakṣaṇam | atha haihayamūrttilakṣaṇam | tatraiva, garbhāgāre tu cakre dve padme dakṣiṇato bahiḥ | padmapatrākṛtirvāpi hemavarṇasamākulā || haihayastu sadā goptā sarvasiddhipradāyakaḥ | iti | iti haihayamūrttilakṣaṇam | atha garuḍamūrttilakṣaṇam | padmapurāṇe, pakṣākāre ca paṅkī dve madhye lambā ca rekhikā | garuḍaḥ sa tu vijñeyaḥ-iti | brahmāṇḍapurāṇe, dvipakṣābhyāmupetaṃ yadgāruḍaṃ bhuvi durlabham | viṣamacakraṃ durlabhaṃ samacakraṃ kalau na hi || kalmaṣaughavināśi syāddalayākārarekhayā | suvarṇanibhayā dvitricatuṣṭayasametayā || saṃyuktā śubhadātrī syācchyāmā nīlā sitāpi vā | iti | garuḍamūrttiriti śeṣaḥ | iti garuḍamūrttilakṣaṇam | viśeṣāntaramuktam--padmapurāṇe, viṣṇuruvāca | nivasāmi sadā brahman śālagrāmodbhavāśmani | tatraiva varṇacakrādibhedānnāmāni me śṛṇu || śuklo raktastathā kṛṣṇo dvivarṇo bahuvarṇavān | ekacakrasya ca tathā saṃjñāḥ pañca yathākramam || puṇḍarīkaḥ pralambaghno rāmo vaikuṇṭha eva ca | viṣvaksena iti brahman phalaṃ cāsyārcane śṛṇu || mokṣaṃ mṛtyuṃ viṣādaṃ ca dāridryamaṭanaṃ tathā | dadāti pūjito nṛṇāṃ tasmād jñātvārcayennaraḥ || śuklādivarṇasaṃyukto dvicakraḥ padmasambhavaḥ | vāsudevo jagadyoniḥ kṛṣṇaḥ pītāmbaro'vyayaḥ || cakre dvāri sthite jñeyaḥ saukhyaikaphalado'rcitaḥ | cakre tu madhyadeśasthe teṣāmākhyāntaraṃ śṛṇu || parameṣṭhyajitakrodhastathā nārāyaṇo'ntakaḥ | anantaśceti vijñeyo nānāttiṃśca yo bhavet || rājyaṃ mṛtyuṃ dhanaṃ caiva hāniṃ vai vāñchitārthakam | dadāti pūjito loke tasmād jñātvārcayennaraḥ || iti | etāścoktalakṣaṇalakṣitāḥ sarvā api śālagrāmaśilāmūrttayo dvividhā jñeyāḥ | taduktambrahmāṇḍapurāṇe, mūrttayo dvividhāḥ proktā jalajāḥ sthalajāstathā | jalasthāḥ komalāḥ snigdhāḥ sthalasthāḥ paruṣāḥ smṛtāḥ || iti| pūrvoktalakṣaṇalakṣitāsu śālagrāmaśilāmūrttiṣu sūkṣmā etanmūrttayaḥ phalādhikyātpūjanīyāḥ | tāsāṃ pūjane praśastataratvāt | tathā coktampadmapurāṇe, śālagrāmaśilālakṣaṇamuktvāetalakṣaṇayuktāstu śālagrāmaśilāḥ punaḥ | yāśca tāsvapi sūkṣmāḥ syustāḥ praśastatarāḥ smṛtāḥ || yathā yathā śilā sūkṣmā mahatpuṇyaṃ tathā tathā | tasmāttāṃ pūjayennityaṃ dharmakāmārthasiddhaye || tatrāpyāmalakītulyā sūkṣmā cātīva yā bhavet | tasyāmeva sadā brahman śriyā saha vasāmyaham || iti | skandapurāṇe'pyevameva | atra varṇabhedena pūjane mūrttiviśeṣaḥ paṭhyate hemādrauviṣṇuprokte, 'brāhmaṇairvāsudevastu nṛpaiḥ saṅkarṣaṇastathā | pradyumnaḥ pūjyate vaiśyairaniruddhastu śūdrajaiḥ || catvāro brāhmaṇaiḥ pūjyāstrayo rājanyajātibhiḥ | vaiśyairdvāveva sampūjyau tathaikaḥ śūdrajātibhiḥ || iti | brahmāṇḍapurāṇe, vāsudevo viprajanairupāsyaḥ pūjane sadā | saṅkarṣaṇaḥ kṣatriyasya pradyumno vaiśyapūjitaḥ || aniruddhastu śūdrāṇāṃ pūjyaḥ sarvaphalapradaḥ | viprāṇāṃ mūrttayaḥ sarvāḥ pūjanīyāḥ prayatnataḥ || kṣatriyasya trayaḥ pūjyā vaiśyasya dvayameva hi | śūdrasyaikā bhavettārkya sarvadā sarvasiddhidā || iti | vṛddhagautamena tu viśeṣo'bhihitaḥ | lakṣmīnārāyaṇānantanṛsiṃhācyutakeśavāḥ | hiraṇyagarbhapradyumnagopālagaruḍadhvajāḥ || rāmāniruddhavakrāsyadāmodaragadādharāḥ | caturbhujamahānīlamukundapuruṣottamāḥ || pītāmbaraharibrahmakṛṣṇaśrīdharamādhavāḥ | vāsudeveti cākhyātāścaturviṃśatayaḥ śilāḥ - [Previous: 10.p44](https://indike.org/pramana/in.astro.hora.viramitrodaya.10.p44) - [Next: 10.p46](https://indike.org/pramana/in.astro.hora.viramitrodaya.10.p46) - [Up: 10](https://indike.org/pramana/in.astro.hora.viramitrodaya.10) ## Commentaries (2) - [Āhnikaprakāśa](https://indike.org/pramana/in.astro.hora.viramitrodaya!mitramisra) — Mitramiśra, Sanskrit - [Āhnikaprakāśa](https://indike.org/pramana/in.astro.hora.viramitrodaya!mitra-misra-alias-mitraparasurama-misra) — Mitra Miśra alias Mitraparaśurāma Miśra, Sanskrit ## Linked texts (6) - [Haribhaktivilāsa](https://indike.org/pramana/in.sampradaya.vaisnava.gaudiya.acara.haribhaktivilasa.5.360) — Gopāla Bhaṭṭa Gosvāmin & Sanātana Gosvāmin 1535, Sanskrit - [Vidyārṇavatantra](https://indike.org/pramana/in.sampradaya.saiva.agama.srividya.vidyarnavatantra.17.1) — Sanskrit - [Nirṇayasindhu](https://indike.org/pramana/in.niti.dharma.nibandha.nirnaya.nirnayasindhu.44.2-3) — Kamalākarabhaṭṭa 1612, Sanskrit - [Lakṣaṇaprakāśa (Mitramiśra)](https://indike.org/pramana/in.niti.dharma.nibandha.laksanaprakasa.11.p34) — Mitramiśra, Sanskrit - [Devatāmūrttiprakaraṇa](https://indike.org/pramana/in.art.silpa.marugurjara.devatamurttiprakarana.4.31) — Maṇḍana Sūtradhāra, Sanskrit - [Devatāmūrtiprakaraṇa (Maṇḍana Miśra)](https://indike.org/pramana/in.art.silpa.marugurjara.devatamurtiprakarana.4.31) — Maṇḍana Miśra, Sanskrit --- Source: [https://indike.org/pramana/in.astro.hora.viramitrodaya.10.p45](https://indike.org/pramana/in.astro.hora.viramitrodaya.10.p45) · Pramāṇa