Pramāṇa · Search · About · API

Viramitrodaya 9.p78

Vīramitrodaya 9.p78

Language
Sanskrit

9.p78.1

dveṣeṇāpi ca lobhena dambhena kapaṭena vā | sālagrāmodbhavaṃ devaṃ dṛṣṭvā pāpātpramucyate || aśucirvā durācāraḥ satyaśaucavivarjitaḥ | sālagrāmaśilāṃ spṛṣṭvā sadya eva śucirbhavet || tilaprasthaśataṃ bhaktyā yo dadāti dine dine | tatphalaṃ samavāpnoti sālagrāmaśilārcanāt || patraṃ puṣpaṃ phalaṃ mūlaṃ toyaṃ dūrvākṣatāḥ suta | jāyate meruṇā tulyaṃ sālagrāmaśilārpitam || vidhihīno'pi yaḥ kuryāt kriyāmantravivarjitaḥ | cakrapūjāmavāpnoti samyakśāstroditaṃ phalam || skandhe kṛtvā tu yo'dhvānaṃ vahate śailanāyakam | teneṣṭaṃ tu bhavetsarvaṃ trailokyaṃ sacarācaram || brahmahatyādikaṃ pāpaṃ yatkiñcitkurute naraḥ | tatsarvaṃ nirdahatyāśu sālagrāmaśilārcanam || pādme kārtikamāhātmye, sālagrāmaśilāyāṃ tu yairnaraiḥ pūjito hariḥ | saṃśodhya teṣāṃ pāpāni muktaye siddhido bhavet || kārtike mathurāyāṃ tu sārūpyaṃ diśate hariḥ | dṛśyate hareriti pāṭhāntaram | sālagrāmaśilāyāṃ vai pitṝnuddiśya pūjitaḥ | kṛṣṇaḥ samuddharettasya pitṝnetān salokatām || iti | garuḍapurāṇe, sālagrāmaśilā yatra devo dvārāvatībhavaḥ | ubhayoḥ saṅgamo yatra tatra muktirna saṃśayaḥ || sālagrāmo dvārakā ca naimiṣaṃ puṣkaraṃ gayā | vārāṇasī prayāgaṃ ca kurukṣetraṃ ca puṣkaram || gaṅgā ca narmadā godā candrabhāgā sarasvatī | puruṣottamo mahākālastīrthānyetāni śaṅkara || sarvapāpaharāṇyeva bhuktimuktipradāni vai | iti | bṛhannāradīye yajñadhvajopākhyānānte, sālagrāmaśilārūpī yatra tiṣṭhati keśavaḥ | na bādhante'surāstatra bhūtavetālakādayaḥ || sālagrāmaśilā yatra tattīrthaṃ tattapovanam |

9.p78.2

śataṃ vā pūjitā bhaktyā tadā syādādhikaṃ phalam || iti | tathā ca hemādrau kaścidviśeṣaḥ smaryate | sūryacandragrahe prāpte yatkiñcitkriyate gṛhe | tīrthe koṭiguṇaṃ puṇyaṃ sālagrāmaśilāgrataḥ || nityaṃ ca puṣkaraṃ tatra prayāgaṃ ca pṛthūdakam | prabhāsaṃ ca kurukṣetraṃ tathā piṇḍārakaṃ punaḥ || koṭitīrthamiti proktaṃ śukvatīrthaṃ tathaiva ca | vārāṇasī gayā caiva mathurā naimiṣaṃ tathā || gaṅgādvāraṃ saukaraṃ ca gaṅgāsāgarameva ca | oṃkāraṃ narmadāyāṃ ca kedāraṃ cāvimuktakam || avantī dvārakā kāñcī yamunā ca sarasvatī | godāvarī tuṅgabhadrā gaṅgā ca narmadā tathā || nadī rūpavatī puṇyā nadī vetravatī tathā | aṭṭahāsaṃ mahākālaṃ devaṃ viśveśvaraṃ tathā || mahādevaṃ mahānādaṃ devaṃ rāmeśvaraṃ tathā | rudraṃ mahālayaṃ caiva tathaiva śaśiśekharam || bhairavaṃ bhṛgutuṅgaṃ ca bhīmanādaṃ tathaiva ca | bhūteśvaraṃ bhasmagātraṃ yāni liṅgāni bhūtale || svarge ca yāni pātāle cāntarikṣe yudhiṣṭhira | sālagrāmaśilāyāṃ tu pratyahaṃ nivasanti ca || brahmatīrthāni sarvāṇi sūryatīrthāni yāni ca | surasiddhamunīndrāṇāṃ triṣu lokeṣu yāni ca || vasanti tatra rājendra pratyahaṃ pāṇḍunandana | sālagrāmaśilāyāṃ tu samīpe keśavasya hi || vedāstrayo makhāḥ sarve aśvamedhādayaśca ye | vratāni yānyanekāni purāṇāni tathā''gamāḥ || tapāṃsi niyamāḥ sarve tridaśāḥ pāṇḍunandana | sālagrāmaśilā yatra tatra tiṣṭhanti pratyaham || tīrthāpekṣā na tatrāsti yatra dvāravatī śilā | sālagrāmaśilāmudrā yatra cakrāṅkitā bhavet || kurukṣetreṇa kiṃ tasya samprāpte grahaṇe ravau |

9.p78.3

sālagrāmaśilā yatra dṛśyate cakralāñchitā || prabhāse yatphalaṃ proktaṃ graste rātrau niśākare | kṛte dāne bhavetpuṇyaṃ sālagrāmaśilāgrataḥ || sālagrāmaśilāṃ hitvā yo'nyaṃ dharmamapekṣate | kalikole viśeṣeṇa muṣṭo'sau pāpaskaraiḥ || sulabhaṃ kiṃ na seveta sālagrāmaśilājalam | yasya sparśanamātreṇa pūto bhavati mānavaḥ || yo dadāti śilāṃ viṣṇoḥ sālagrāmaśilodbhavām | vaiṣṇavo viṣṇubhaktāya teneṣṭaṃ kratubhiḥ śataiḥ || sālagrāmaśilādānaṃ yaḥ karoti hi pārthiva | agniṣṭomādibhiryajñaisteneṣṭaṃ tu dine dine || sālagrāmaśilādānaṃ kṛtaṃ yena ca pārthiva | svarge martye ca pātāle pūjyate vai sa pārthiva || sālagrāmaśilāgrāvā nāsti nāsti punaḥ punaḥ | narāṇāṃ durlabhā loke sālagrāmodbhavā śilā || prāpyate na vinā puṇyaiḥ kalikole viśeṣataḥ | sa dhanyaḥ puruṣo loke saphalaṃ tasya jīvitam || sālagrāmamayī mudrā gṛhe yasya supūjitā | jalamannaṃ haviṣyaṃ ca patraṃ puṣpaṃ phalādikam || yatkiñciddṛśyate gehe vastrābharaṇamānuṣam | gomahiṣyādikaṃ yacca kṛmikīṭādikaṃ tathā || sālagrāmasya sānnidhyātsarvaṃ yāti surālayam | saurivāhanaśṛṅgāgrairbhidyate tasya no tanuḥ || sauriryamaḥ | matiśca jāyate yasya sālagrāmaśilārcane | āyānti ca na pāpāni kṛtāni subahūnyapi || vrajanti na pathaṃ saureḥ sālagrāmaśilārcanāt | sālagrāmodbhavaṃ śailaṃ gṛhe yasya na vidyate || sa sīdati na sandehaḥ paṅke magno yathā gajaḥ | sālagrāmaśilāyāṃ tu sarvadā vasate hariḥ || pratyakṣamarcitastena devadevo janārdanaḥ | sālagrāmodbhavaṃ liṅgaṃ pūjitaṃ yena bhūpate || dadhnā ghṛtena payasā madhunā tīrthavāribhiḥ |

9.p78.4

yaḥ snāpayati deveśaṃ sālagrāmasamudbhavam || tasya puṇyaṃ pravakṣyāmi indradyumna nibodha me | vaiṣṇavo'si mahābhāga sadā bhāgavatapriya || manvantaraṃ tu vasatāṃ vārāṇasyāṃ tu yatphalam | vāmarekena tatpuṇyaṃ snānaṃ dattvā tu keśave || dvādaśyāṃ śatasāhasraṃ parvakāle tato'dhikam | pañcāmṛtena kartavyaṃ tasmātsnānaṃ prayatnataḥ || madhudagdhāprabhāvena ghṛtasya ca narādhipa | kṣīrasnānena caikena sarvaṃ sampūrṇatāṃ vrajet || sālagrāmaśilāsparśaṃ ye kurvanti dine dine | vāñchanti karasaṃsparśaṃ teṣāṃ devāḥ savāsavāḥ || yaḥ paśyati naro bhaktyā sālagrāmaśilārcanam | janmāyutamahasrāṇāṃ kṛtastenātha saṅkṣayaḥ || prāyaścittasahasrāṇi kṛtvā vrataśatāni ca | kalau gacchanti pāpāni na viṣṇoḥ smaraṇaṃ vinā || kāle vā yadi vā'kāle sālagrāmaśilārcanam | bhaktyā vā yadi vā'bhaktyā yaḥ karoti sa puṇyabhāk || dveṣeṇa vātha lobhena dambhena kapaṭena vā | sālagrāmodbhavaṃ devaṃ dṛṣṭvā pāpaiḥ pramucyate || aśuciścāpyanācāraḥ satyaśaucavivarjitaḥ | sālagrāmodbhavaṃ devaṃ dṛṣṭvā pāpaiḥ pramucyate || aśuciścāpyanācāraḥ satyaśaucavivarjitaḥ | sālagrāmodbhavaṃ śailaṃ smṛtvā so'pi śucirbhavet || patraṃ puṣpaṃ phalaṃ toyaṃ bhaktyā dūrvāṅkuraṃ nṛpa | jāyate meruṇā tulyaṃ sālagrāmaśilārpitam || vidhihīno'pi yāṃ kāṃ citkriyāṃ mantravivarjitām

Commentaries (2)

Linked texts (2)