[Pramāṇa](https://indike.org/pramana/) › [Indian literature](https://indike.org/pramana/in) › [Astronomy & Mathematics](https://indike.org/pramana/in.astro) › [Genethlialogy (natal astrology)](https://indike.org/pramana/in.astro.hora) › [Early Greek-derived and classical foundational texts](https://indike.org/pramana/in.astro.hora.yavana) › [Bṛhajjātaka](https://indike.org/pramana/in.astro.hora.yavana.brhajjataka) › [Dashadhyayi](https://indike.org/pramana/in.astro.hora.yavana.brhajjataka!govindabhatta) › 9.8.1 # Brihajjataka 9.8.1 Daśādhyāyī 9.8.1 - **Language:** Sanskrit ### [9.8.1](https://indike.org/pramana/in.astro.hora.yavana.brhajjataka!govindabhatta.9.8.1) 'iti nigadita'miti - evaṃ cāraphalamūhyam| athāṣṭakavargaphalamucyate 'iti nigaditamiṣṭam' ityādi viśeṣādadhikaphalavipākamiti| grahacāreṇa vā daśāyāṃ vā ca iṣṭaphalamaṣṭakavargeṇa ca iṣṭaścettadviśeṣāt śubhameva bhavati| uktaviparītatve viśeṣādaśubhameva bhavati| athavā 'iti nigaditamiṣṭaṃ neṣṭamanyat' ityuktayoriṣṭāniṣṭayorviśeṣādantarāt yadadhikaṃ phalaṃ tasya vipākaṃ dadyuriti| 'janmanā'mityatra janmaśabdaprasaṅgāt janmakālīnagrahairetadaṣṭakavargaphalaṃ nirūpyata iti sūcitaṃ bhavati| atra 'dadyu'riti rāśau yatra bhāge phalapātaḥ tatra caranto grahāḥ tatphalavipākaṃ dadyuriti| phalapāto'pi prastārādvijñāyate| prastāraṃ vināpi aṣṭakavargaphalapātabhāvaṃ vijñātumupāyo'sti| sa ucyate| rāśyaṣṭamāṃśotra pañcaviṃśatyuttaraśatadvayaliptātmakaḥ| teṣvaṣṭamāṃśeṣu śanaiścarādīnāṃ kakṣyākramasiddhānāṃ saptānāṃ grahāṇāṃ lagnasya phalapāto vijñāyate| tasmin aṣṭamāṃśe'ṣṭakavargaphalaṃ yasya grahasya vidyate tasmin bhāge saḥ grahaśśubhaḥ| aṣṭakavargasiddhaphalaṃ śanaiścarasya cet sa grahastasmin rāśau prathamāṣṭamāṃśe śubhaḥ| guroścet dvitīyāṣṭamāṃśe bhaumasya cet tṛtīyāṣṭamāṃśe arkasya cet caturthāṣṭamāṃśe śukrasya cet pañcamāṣṭamāṃśe budhasya cet ṣaṣṭhāṣṭamāṃśe candrasya cet saptamāṣṭamāṃśe lagnasya cedaṣṭamāṣṭamāṃśe iti prastāraphalavijñānopāyaḥ| athavā 'viśeṣādadhikaphala'mityatra viśeṣaśabdena śodhanamucyate| trikoṇaśodhanamekādhipatyaśodhanañca śāstrāntarādavagamya tasmin kṛte ya'dadhikaṃ' śiṣṭaṃ tasya 'vipākaṃ' dadyuriti | trikoṇekādhipatyaśodhanamatrocyate | - [Previous: 9.7](https://indike.org/pramana/in.astro.hora.yavana.brhajjataka!govindabhatta.9.7) - [Next: 9.8.2](https://indike.org/pramana/in.astro.hora.yavana.brhajjataka!govindabhatta.9.8.2) - [Up: 9.8](https://indike.org/pramana/in.astro.hora.yavana.brhajjataka!govindabhatta.9.8) ## Linked texts (1) - [Bṛhajjātaka](https://indike.org/pramana/in.astro.hora.yavana.brhajjataka.9.8) — Varāhamihira, Sanskrit --- Source: [https://indike.org/pramana/in.astro.hora.yavana.brhajjataka!govindabhatta.9.8.1](https://indike.org/pramana/in.astro.hora.yavana.brhajjataka!govindabhatta.9.8.1) · Pramāṇa