Matsya 150

cha
sūta uvāca || || surāsurāṇāṃ sammardastasminnatyantadāruṇe || tumūlo'timahānāsītsenayorubhayorapi

garjjatāṃ devadaityānāṃ
śaṅkhabherīraveṇa ca || tūryāṇāñcaiva nirghoṣairmātaṅgānāñca bṛṃhitaiḥ

hreṣatāṃ hayabṛndānāṃ rathanemisvanena ca || jyāghoṣeṇa ca śūrāṇāṃ
tamulo'timahānabhūt

samāsādyobhaye sene parasparajayaiṣiṇām || roṣeṇātiparītānāṃ tyaktajīvitacetasām

samāsādya tu te
'nyonyaṃ prakrameṇa vilomataḥ || rathenāsaktapādāto rathena ca turaṅgamaḥ

hastī padātisaṃyukto rathinā ca kvacidrathī || mātaṅgenāparo hastī
turaṅgairrahubhirgajaḥ

padātireko bahubhirgajairrmataiśca yujyate || tataḥ prāsāśanigadābhindipālaparaśvadhaiḥ

śaktibhiḥ paṭṭiśaiḥ śūlairmudgaraiḥ
kuṇapairgadaiḥ || cakraiśca śaṅkubhiścaiva tomarairaṅkuśaiḥ sitaiḥ

karṇinālīkanārācavatsadantādrdhacandrakaiḥ || bhallaiśca śatapatraiśca śukatuṇḍaiśca nirmalaiḥ

vṛṣṭiratyadbhutākārā gagane samadṛśyata || sampracchādya diśaḥ sarvvāstamomayamivākarot

na prājñāyata te'nyo'nyaṃ tasmiṃstamasi saṅkule
alakṣyaṃ visṛjantaste hetisaṅghātamuddhatam

patitaṃ senayormadhye nirīkṣante parasparam || tato dhvajairbhujaiścchatraiḥ śirobhiśca sakuṇḍalaiḥ

gajaisturaṅgaiḥ pādātaiḥ patadbhiḥ patitairapi || ākāśasaraso bhraṣṭaiḥ paṅkajairiva bhūrrttatā

bhagnadantā bhinnakumbhāśchinnadīrghamahākarāḥ
gajāḥ śalanibhāḥ peturdharaṇyāṃ rudhirasravāḥ

bhagneṣādaṇḍacakrākṣā rathāśca śakalīkṛtāḥ || petuḥ śaphalatāṃ yātāsturaṅgāśca sahasraśaḥ

tato'sṛgpaṅkadustārā pṛthivī samajāyata || nadyaśca rudhirāvarttā harṣadāḥ piśitāśinām || vetālākrīḍamabhavattatsaṅkalaraṇājiram

iti śrīmātsye mahāpurāṇe tārakāsuropākhyāne devāsurayuddhaṃ nāmaikonapañcāśadadhikaśatatamo'dhyāyaḥ

Linked texts (7)