Pramāṇa · Search · About · API

Matsya 185

Matsya 185

Language
Sanskrit

Contents

185.1

maheśvara uvāca || || sevitaṃ bahubhiḥ siddhairapunarbhavakāṅkṣibhiḥ || viditvā tu paraṃ kṣetrama
vimuktanivāsinām

185.2

tadguhyaṃ devadevasya tattīrthaṃ tattapovanam || paraṃ sthānantu te yānti sambhavanti na te punaḥ

185.4

jñāne vihitaniṣṭhānāṃ paramānanda
micchatām || yā gatirvihitā sadbhiḥ sāvimukte mṛtasya tu||3||bhavasya prītiratulā hyavimukte hyanuttamā || asaṃkhyeyaṃ phalaṃ tatra hyakṣayā ca gatirbhavet

185.5

paraṃ guhyaṃ samākhyātaṃ śmaśānāmiti saṃjñitam || avimuktaṃ na sevante vañcitāste narā bhuvi

185.6

avimukte sthitaiḥ puṇyaiḥ pāṃśubharvāyuneritaiḥ
api duṣkṛtakarmmāṇo yāsyanti paramāṃ gatim

185.7

merumandaramātro'pi rāśiḥ pāpasya karmmaṇaḥ || avimuktaṃ samāsādya tatsarvvaṃ vrajati kṣayam

185.8

śmaśānamiti vikhyāta mavimuktaṃ śivālayam || tadguhyaṃ devadevasya tattīrthaṃ tattapovanam

185.9

tatra brahmādayo devā nārāyaṇapurogamāḥ || yoginaśca tathā
sādhyā bhagavantaṃ sanātanam

185.10

upāsante śivaṃ muktā madbhaktā matparāyaṇāḥ || yā gatirjñānatapasāṃ yā gatiryajñayājinām

185.11

avimukte
mṛtānāntu sā gatirvihitā śubhā || saṃharttāraśca karttārastasminbrahmādayaḥ surāḥ

185.12

samrāḍvirāṇmayā lokā jāyante hyapunarbhavāḥ || maharjana
stapaścaiva satyalokastathaiva ca

185.13

manasaḥ paramo yogo bhūtabhavyabhavasya ca || brahmādisthāvarāntasya yonau sāṃkhyādimokṣayoḥ

185.14

ye'vi
muktaṃ na muñcanti narāste naiva vañcitāḥ || uttamaṃ sarvvatīrthānāṃ sthānānāmuttamañca yat

185.15

kṣetrāṇāmuttamañcaiva śmaśānānāṃ tathaiva ca || taṭā
kānāñca sarvveṣāṃ kūpānāṃ srotasāṃ tathā

185.16

śailānāmuttamañcaitattaḍāgānāṃ tathottamam || puṇyakṛdbhavabhaktaiśca hyavimuktantu sevyate

185.17

brahmaṇaḥ paramaṃ sthānaṃ brahmaṇādhyāsitañca yat || brahmaṇā sevitaṃ nityaṃ brahmaṇā caiva rakṣitam

185.18

atraiva saptabhuvanaṃ kāñcano merurvvataḥ || manasaḥ
paramo yogaḥ prītyarthe brahmaṇaḥ sa tu

185.19

brahmā tu tatra bhagavāntrisandhyañceśvare sthitaḥ || puṇyātpuṇyatamaṃ kṣetraṃ puṇyakṛdbhirniṣevitam

185.20

ādityopāsanaṃ kṛtvā viprāścāmaratāṃ gatāḥ|| anye'pi ye trayo varṇā bhavabhaktyā samāhitāḥ

185.21

avimukte tanuṃ tyaktvā gacchanti paramāṃ gatim
aṣṭau māsānvihārasya yatīnāṃ saṃyatātmanām

185.22

ekatra caturo māsānmāsau vā nivasetpunaḥ || avimukte praviṣṭānāṃ vihārastu na vidyate

185.23

na deho bhavitā tatra dṛṣṭaṃ śāstre purātane || mokṣo hyasaṃśayastatra pañcatvantu gatasya vai

185.24

striyaḥ pativratā yāśca bhavabhaktāḥ samāhitāḥ
avimukte vimuktāstā yāsyanti paramāṃ gatim

185.26

anyā yāḥ kāmacāriṇyaḥ striyo bhogaparāyaṇāḥ || kālena nidhanaṃ prāptā gacchanti paramāṃ
gatim

185.26-2

yatra yogaśca mokṣaśca prāpyate durlabho naraiḥ || avimuktaṃ samāsādya nānyadgacchettapovanam

185.27

sarvātmanā tapaḥ sevyaṃ brāhmaṇairnātra saṃśa
yaḥ || avimukte vasedyastu mama tulyo bhavennaraḥ

185.28

yato mayā na muktaṃ hi tvavimuktaṃ tataḥ smṛtam || avimuktaṃ na sevante mūḍhā ye tamasāvṛtāḥ

185.29

viṇmūtraretasāṃ madhye te vasanti punaḥpunaḥ || kāmaḥ krodhaśca lobhaśca dambhastambho'timatsaraḥ

185.30

nidrā tandrā tathālasyaṃ paiśunyamiti te daśa
avimukte sthitā vighnāḥ śakreṇa vihitā svayam

185.31

vināyakopasargāṃśca satataṃ mūrdhni tiṣṭhati || puṇyametadbhavetsarvvaṃ bhaktānāmanukampayā

185.32

paraṃ guhyamiti jñātvā tataḥ śāstrānudarśanāt || vyāhṛtaṃ devadevaistu munibhistattvadarśibhiḥ

185.33

medasā viplutā bhūmiravimukte tu varjjitā
pūtā samabhavatsarvī mahādevena rakṣitā

185.34

saṃskārastena kriyate bhūmeranyatra sūribhiḥ || ye bhaktyā varadaṃ devamakṣaraṃ paramaṃ padam

185.35

devadānavagandharvvayakṣarakṣomahoragāḥ || avimuktamupāsante tanniṣṭhāstatparāyaṇāḥ

185.36

te viśanti mahādevamājyāhutirirvānalam || taṃ vai prāpya
mahādevamīśvarādhyuṣitaṃ śubham

185.37

avimuktaṃ kṛtārtho'smītyātmānamupalabdhayate || ṛṣidevāsuragaṇairjapahomaparāyaṇaiḥ

185.38

yatibhi
rbhokṣakāmaiśca hyavimuktaṃ niṣevyate || nāvimukte mṛtaḥ kaścinnarakaṃ yāti kilviṣī

185.39

īśvarānugṛhītā hi sarvve yānti parāṃ gatim
dviyojanamathārddhañca tatkṣetraṃ pūrvvapaścimam

185.40

arddhayojanavistīrṇa dakṣiṇettarataḥ smṛtam || vārāṇasī tadīyā ca yāvacchukranadī tu vai

185.41

eṣa kṣetrasya vistāraḥ prokto devena dhīmatā || labdhvā yogañca mokṣañca kāṅkṣanto jñānamuttamam

185.42

avimuktaṃ na muñcanti tanniṣṭhāstatparāyaṇāḥ
tasminvasanti ye martyā na te śocyāḥ kadācana

185.43

yogakṣetraṃ tapaḥkṣetraṃ siddhagandharvvasevitam || saritaḥ sāgarāḥ śailā nāvimuktasamā bhuvi

185.44

bhūrloke cāntarikṣe ca divi tīrthāni yāni ca || atītya varttate cānyadavimuktaṃ prabhāvataḥ

185.45

ye tu dhyānaṃ samāsādya muktātmānaḥ samāhitāḥ
sanniyamyendriyagrāmaṃ japanti śatarudriyam

185.46

avimukte sthitā nityaṃ kṛtārthāste dvijātayaḥ || bhavabhaktiṃ samāsādya ramante tu suniścitāḥ

185.47

saṃhṛtya śaktitaḥ kāmānviṣayebhyo bahiḥ sthitāḥ || śaktitaḥ sarvvato muktāḥ śaktitastapasi sthitāḥ

185.48

karaṇānīha cātmānamapunarbhavabhāvitāḥ
taṃ vai prāpya mahātmānamīśvaraṃ nirbhayāḥ sthitāḥ

185.49

na teṣāṃ punarāvṛttiḥ kalpakoṭiśatairapi || avimukte tu gṛhyante bhavena vibhunā svayam

185.50

utpāditaṃ mahākṣetraṃ siddhyante yatra mānavāḥ || uddeśamātraṃ kathita| avimuktaguṇāstathā

185.51

samudrasyeva ratnānāmavimuktasya vistaram || mohanaṃ
tadbhaktānāṃ bhaktānāṃ bhaktivarddhanam

185.52

mūḍhāste tu na paśyanti śmaśānamiti mohitāḥ || hanyamāno'pi yo vidvānvasedvighnaśatairapi

185.53

sa yāti paramaṃ sthānaṃ yatra gatvā na śocati || janmamṛtyujarāmuktaḥ paraṃ yāti śivālayam

185.54

apunarmaraṇānāṃ hi sā gatirmokṣakāṅkṣiṇām || yāṃ
prāpya kṛtakṛtyaḥ syāditi manyeta paṇḍitaḥ

185.55

na dānairna tapobhirvā na yajñairnāpi vidyayā || prāpyate gatiriṣṭā yā hyavimukte tu labhyate

185.56

nānāvarṇā vivarṇāśca caṇḍālā ye jugupsitāḥ || kilbiṣaiḥ pūrṇadehāśca prakṛṣṭaiḥ pātakaistathā

185.57

bheṣajaṃ paramaṃ teṣāmavimuktaṃ vidurbudhāḥ || jātya
ntarasahasreṣu hyavimukte mriyeta yaḥ

185.58

bhakto viśveśvare deve na sa bhūyo'bhijāyate || yatra ceṣṭaṃ hutaṃ dattaṃ tapastaptaṃ kṛtañca yat

185.59

sarvvamakṣayametasminnavimukte na saṃśayaḥ || kālenòparatā yānti bhave sāyujyamakṣayam

185.60

kṛtvā pāpasahasrāṇi paścātsantāpametya vai || yo'vimukte
viyujyeta sa yāti paramāṃ gatim

185.61

uttaraṃ dakṣiṇañcāpi ayanaṃ na vikalpayet || sarvvesteṣāṃ śubhaḥ kālo hyavimukte mriyanti ye

185.62

na tatra kālo mīmāṃsyaḥ śubho vā yadi vā'śubhaḥ || tasya devasya māhātmyasthānamadbhutakarmaṇaḥ || sarvveṣāmeva nāthasya sarvveṣām vibhunā svayam

185.63

śrutvedaṃ ṛṣayaḥ sarvve skandena kathitaṃ purā || avimuktāśramaṃ puṇyaṃ bhāvayatkaraṇaiḥ śubhaiḥ

185.63.p1

iti śrīmātsye mahāpurāṇe'vimuktamāhātmyaṃ nāma caturaśītyadhikaśatatamo'dhyāyaḥ

Linked texts (5)