Pramāṇa · Search · About · API

Matsya 273

Matsya 273

Language
Sanskrit

Contents

273.1

sūta uvāca || || bṛhadra
theṣvatīteṣu vītihotreṣvavantiṣu || pulakaḥ svāminaṃ hatvā svaputramabhiṣekṣyati

273.2

miṣatāṃ kṣatriyāṇāñca bālakaḥ pulakodbhavaḥ || sa vai praṇatasāmanto
bhaviṣyo na ca dharmmataḥ

273.3

trayoviṃśatsamā rājā bhavitā sa narottamaḥ || aṣṭāviṃśativarṣāṇi pālako bhavitā nṛpaḥ

273.4

viśākhayūpo
bhavitā tripañcāśattathā samāḥ || ekaviṃśatsamā rājā sūryyakastu bhaviṣyati

273.5

vārāṇasyāṃ sutaṃ sthāpya śrayiṣyati girivrajam || śiśunā
kastu varṣāṇi catvāriṃśadbhaviṣyati

273.6

kākavarṇaḥ sutastasya ṣaḍviṃśatprāpsyate mahīm || ṣaṭtriṃśaccaiva varṣāṇi kṣemadhomā bhaviṣyati

273.7

caturviṃśatsamāḥ so'pi kṣemajit prāpsyate mahīm || aṣṭāviṃśativarṣāṇi vindhyaseno bhaviṣyati

273.8

bhaviṣyati samā rājā nava kāṇvāyane
nṛpaḥ || bhūmimitraḥ sutastasya caturdaśa bhaviṣyati

273.9

ajātaśatrurbhavitā saptaviṃśatsamā nṛpaḥ || caturviṃśatsamā rājā vaṃśakastu bhaviṣyati

273.10

udāsī bhavitā tasmāttrayastriṃśat samā nṛpaḥ || catvāriṃśatsamā bhāvyo rājā vai nandivarddhanaḥ

273.11

catvāriṃśattrayaścaiva mahānandī bhaviṣyati
ityete bhavitāro vai daśa dvau śiśunākajāḥ

273.12

śatāni trīṇi pūrṇāni ṣaṣṭivarṣādhikāni tu || śiśunākā bhaviṣyanti rājānaḥ kṣatrabandhavaḥ

273.14

etaiḥ sārddhaṃ bhaviṣyanti yāvatkalinṛpāḥ pare|| tulyakālaṃ bhaviṣyanti sarvve hyete mahīkṣitaḥ||13||caturviṃśattathaikṣvākāḥ pāñcālāḥ saptaviṃśatiḥ|| kāśeyāstu
caturviṃśadaṣṭāviṃśattu haihayāḥ

273.15

kaliṅgāścaiva dvātriṃśadaśmakāḥ pañcaviṃśatiḥ || kuravaścāpi ṣaḍviṃśadaṣṭāviṃśāstu maithilāḥ

273.16

śūrasenāstrayo
viṃśadvītihotrāśca viṃśatiḥ || ete sarvve bhaviṣyanti ekakālaṃ mahīkṣitaḥ

273.17

mahānandisutaścāpi śūdrāyāṃ kalikāṃśajaḥ || utpatsyate mahāpadmaḥ
sarvvakṣatrāntako nṛpaḥ

273.18

tataḥprabhṛti rājāno bhaviṣyāḥ śūdrayonayaḥ|| ekarāṭ sa mahāpadmo ekacchatro bhaviṣyati

273.19

aṣṭāśīti tu varṣāṇi
pṛthivyāñca bhaviṣyati || sarvvakṣatramathotsādya bhāvināthena coditaḥ

273.20

sukalpādifigurestā hyaṣṭau samā dvādaśa te nṛpāḥ || mahāpadmasya paryāye
bhaviṣyanti nṛpāḥ kramāt

273.21

uddhariṣyati kauṭilyaḥ samādvādaśabhiḥ sutān || bhuktvā mahīṃ varṣaśataṃ tato mauryān gamiṣyati

273.22

bhavitā śatadhanvā ca tasya putrastu ṣaṭ samāḥ || bṛhadrathastu varṣāṇi tasya putraśca saptatiḥ

273.23

ṣaṭtriṃśattu samā rājā bhavitā śaka eva ca
saptānāṃ daśa varṣāṇi tasya naptā bhaviṣyati

273.24

rājā daśaratho'ṣṭau tu tasya putro bhaviṣyati || bhavitā nava varṣāṇi tasya putraśca saptatiḥ

273.25

ityete daśa mauryāṃstu ye bhokṣyanti vasundharām || saptatriṃśacchataṃ pūrṇaṃ tebhyaḥ śuṅgān‍gamiṣyati

273.26

puṣyamitrastu senānīruddhṛtya sa bṛhadrathān
kārayiṣyati vai rājyaṃ ṣaṭtriṃśatisamā nṛpaḥ

273.27

bhavitāpi vasujyeṣṭhaḥ sapta varṣāṇi vai nṛpaḥ || vasumitrastathā bhāvyo daśa varṣāṇi vai tataḥ

273.28

tato'ndhakaḥ same dve tu tasya putro bhaviṣyati || bhaviṣyati samāstasmātrīṇyevaṃ sa pulindakaḥ

273.29

bhavitā vajramitrastu samā rājā punarbhuvaḥ
dvātriṃśattu samābhāgaḥ samābhāgāttato nṛpaḥ

273.30

bhaviṣyati sutastasya devabhūmiḥ samā daśa || daśaite kṣudrarājāno bhokṣyantīmāṃ vasundharām

273.31

śataṃ pūrṇaṃ śate dve ca tataḥ śuṅgān‍gamiṣyati || amātyo vasudevastu prasahya hyavanīṃ nṛpaḥ

273.32

devabhūmimathotsādya śauṅgastu bhavitā nṛpaḥ
bhaviṣyati samā rājā nava kāṇvāyano nṛpaḥ

273.33

bhūmimitraḥ sutastasya caturdaśa bhaviṣyati || nārāyaṇaḥ sutastasya bhavitā dvādaśaiva tu

273.34

suśarmmā tatsutaścāpi bhaviṣyati daśaiva tu || ityete śuṅgabhṛtyāstu smṛtāḥ kāṇvāyanā nṛpāḥ

273.35

catvāriṃśaddvijā hyete kāṇvā bhokṣyanti vai
mahīm || catvāriṃśattapañca caiva bhokṣyantīmāṃ vasundharām

273.36

ete praṇatasāmantā bhaviṣyā dhārmmikāśca ye || yeṣāṃ paryyāyakāle tu bhūmirandhāngamiṣyati

273.36.p1

iti śrīmatsye mahāpurāṇe rājavaṃśānukīrttane dvisaptatyadhikadviśatatamo'dhyāyaḥ

Linked texts (3)