Pramāṇa · Search · About · API

Matsya 41

Matsya 41

Language
Sanskrit

Contents

41.1

vasumānuvāca || || pṛcchāmyahaṃ vasumānauṣada
thiryadyasti loko divi mahyaṃ narendra || yadyantarikṣe prathito mahātmankṣetrajñaṃ tvāṃ tasya dharmmasya manye

41.2

yayātiruvāca || || yadantarikṣaṃ pṛthivī
diśaśca yattejasā tapate bhānumāṃśca || lokāstāvanto divi saṃsthitā vai te tvāṃ bhavantaṃ pratipālayanti

41.3

vasumānuvāca || || tāṃste dadāmi
pat mā prapātaṃ ye me lokāstava te vai bhavantu || krīṇīṣvaināṃstṛṇakenāpi rājanpratigrahaste yadi samyakpraduṣṭaḥ

41.4

yayātiruvāca || || na
mithyāhaṃ vikrayaṃ vai smarāmi mayā kṛtaṃ śiśubhāve'pi rājan || kuryyāṃ na caivākṛtapūrvvamanyairvivitsamāno vasu manna sādhu

41.5

vasumānuvāca
tāṃstvaṃ lokānpratipadyasva rājanmayā dattānyadi neṣṭaḥ krayaste || nāhaṃ tānvai pratigantā narendra sarvve lokāstāvakā vai bhavantu

41.6

śiviruvāca
pṛcchāmi tvāṃ śivirauśīnaro'haṃ mamāpi lokā yadi santi tāta || yadyantarikṣe yadi vā diviśritāḥ kṣetrajñaṃ tvāṃ tasya dharmmasya manye

41.7

yayātiru
vāca || || na tvaṃ vācā hṛdayenāpi rājanparīpsamāno bhāvamaṃsthā narendra || tenānantā divi lokāḥ sthitā vai vidyudrūpāḥ svanavanto mahāntaḥ

41.8

śiviruvāca || || tāṃstvaṃ lokānpratipadyasva rājanmayā dattānyadi neṣṭaḥ krayaste || na cāhaṃ tānpratipadya dattvā yatra tvaṃ tāta gantāsi loke

41.9

yayātiruvāca || || yathā tvamindrapratimaprabhāvaste cāpyanantā naradeva lokāḥ || tathādya loke na rame'nyadatte tasmācchibe nābhinandāmi
vācam

41.10

aṣṭaka uvāca || || na cedekaikaśo rājam̐llokānnaḥ pratinandasi || sarvve pradāya tām̐llokāngantāro narakaṃ vayam

41.11

yayātiruvāca || || yadarhāstadvadadhvaṃ vaḥ santaḥ satyādidarśinaḥ || ahantu nābhigṛhṇāmi yatkṛtaṃ na mayā purā

41.12

alipsamānasya tu
me yaduktaṃ na tattathāstīha narendrasiṃha || asya pradānasya yadeva yuktaṃ tasyaiva cānantaphalaṃ bhaviṣyam

41.13

aṣṭaka uvāca || || kasyaite
pratidṛśyante rathāḥ pañca hiraṇmayāḥ || uccaiḥ santaḥ prakāśante jvalanto'gniśikhā iva

41.14

yayātiruvāca || || bhavatāṃ mama caivaite rathā bhā
nti hiraṇmayāḥ || āruhyaiteṣu gantavyaṃ bhavadbhiśca mayā saha

41.15

aṣṭaka uvāca || || ātiṣṭhasva rathaṃ rājanvikrasva vihāyasā || vayama
pyanuyāsyāmo yadā kālo bhaviṣyati

41.16

yayātiruvāca || || sarvvairidānīṃ gantavyaṃ saha svargo jito yataḥ || eṣa vo virajāḥ panthā
dṛśyate devasaṅgamaḥ

41.17

śaunaka uvāca || || te'bhiruhya rathaṃ sarvve prayātā nṛpate nṛpāḥ || ākramanto divaṃ bhānti dharmmeṇāvṛtya rodasī

41.18

aṣṭaka uvāca || || ahaṃ manye pūrvvameko'bhigantā sakhā cendraḥ sarvvathā me mahātmā || kasmādevaṃ śivirauśīnaro'yameko'tyayātsarvvavege
na vāhān

41.19

yayātiruvāca || || adadāddevayānāya yāvadvittamaninditaḥ || uśīnarasya putro'yaṃ tasmācchreṣṭho hi vaḥ śibiḥ

41.20

dānaṃ śaucaṃ satyamatho hyahiṃsā hrīḥ śrīstitikṣā samatā''nṛśaṃsyam || rājanyetānyatha sarvāṇi rājñi śivau sthitānyapratimeṣu buddhyā || evaṃ vṛttaṃ hīni
ṣevī bibhartti tasmācchivirabhigantā rathena

41.21

śaunaka uvāca || || athāṣṭakaḥ punarevānvapṛcchanmātāmahaṃ kautukādindrakalpam || pṛcchā
mi tvāṃ nṛpate brūhi satyaṃ kutaśca kaścāsi kathaṃ tvamāgāḥ || kṛtaṃ tvayā yaddhi na tasya karttā loke tvadanyo brāhmaṇaḥ kṣatriyo vā

41.22

yayāti
ruvāca || || yayātirasmi nahuṣasya putro pūroḥ pitā sārvabhaumastvihāsam || guhyaṃ mantraṃ mā kebhyo bravīmi mātāmaho bhavatāṃ suprakāśaḥ

41.23

sarvvāmimāṃ pṛthivīṃ nirjigāya ṛddhāṃ mahīmadadāṃ brāhmaṇebhyaḥ || medhyānaśvāñchakre śastānmurūpaॉstadā devāḥ puṇyabhājo bhavanti

41.24

adāmahaṃ
pṛthivīṃ brāhmaṇebhyaḥ pūrṇāmimāmakhilātraiḥ praśastām || gobhiḥ suvarṇaiśca dhanaiśca mukhyairaśvāḥ sanāgāḥ śataśastvarbudāni

41.25

satyena me dyauśca vasundharā
ca tathaivāgnirjvalate mānuṣeṣu || na me vṛthā vyāhṛtameva vākyaṃ satyaṃ hi santaḥ pratipūjayanti

41.26

sādhvaṣṭaka prabravīmīha satyaṃ pratarddanaṃ vasumantaṃ śi
biśca || sarve devā munayaśca lokāḥ satyena pūjyā iti me manogatam

41.27

yo naḥ svargajitaṃ sarvvaṃ yathāvṛttaṃ nivedayet || anasūyurdvijāgrebhyaḥ sa
bhajennaḥ salokatām

41.28

śaunaka uvāca || || evaṃ rājansamahātmā yayātiḥ svadauhitraistārito mitravaryeḥ || tyaktvā mahīṃ paramodārakarmā
svargaṃ gataḥ karmabhirvyāpya pṛthavīm

41.29

evaṃ sarvvaṃ vistarato yathāvadākhyātaṃ te caritaṃ nāhuṣasya || vaṃśo yasya prathitaḥ kauraveyo yasmiñjātastvaṃ
manujendrakalpaḥ

41.29.p1

iti śrīmātsye mahāpurāṇe somavaṃśe yayāticarite dvicatvāriṃśo'dhyāyaḥ

Linked texts (2)