Matsya 71

brahmovāca || || bhagavanpuruṣasyeha striyāśca virahādikam || śokavyādhibhayaṃ
duḥkhaṃ na bhavedyena tadvada

śrībhagavānuvāca || || śrāvaṇasya dvitīyāyāṃ kṛṣṇāyāṃ madhusūdanaḥ || kṣīrārṇave sapatnīkaḥ sadā vasati keśavaḥ

tasyāṃ sampūjya govindaṃ sarvvānkāmānsamaśnute || gobhūhiraṇyādānādi saptakalpaśatānugam

aśūnyaśayanaṃ nāma dvitīyā samprakīrttitā
tasyāṃ sampūjayedviṣṇumebhirmantrairvidhānataḥ

śrīvatsadhāriñchrīkānta śrīdhāmañchrīpate'vyaya || gārhasthyaṃ mā praṇaśaṃ me yātu dharmārthakāmadam

agnayo mā praṇaśyantu devatāḥ puruṣottama || pitaro mā praṇaśyantu mā'stu dāmpatyabhedanam

lakṣmyā viyujyate deva na kadācidyathā
bhavān || tathā kalatrasambandho deva mā me viyujyatām

lakṣmyā na śūnyo varada śayyāṃ tvaṃ śayanaṃ gataḥ || śayyā mamāpyaśūnyā'stu tathaiva madhusūdana

gītāvāditranirghoṣaṃ devadevasya kīrttayet || ghaṇṭā bhaveddaśaktasya sarvvavādyamayī yataḥ

evaṃ sampūjya govindamaśrīyāttailavarjitam || nakta
makṣāralavaṇaṃ yāvattatsyāccatuṣṭayam

tataḥ prabhāte sañjāte lakṣmīpatisamanvitām || dīpāntrabhājanairyuktāṃ śayyāṃ dadyādvilakṣaṇām

pādukopānahacchatracāmarāsanasaṃyutām || abhīṣṭopaskarairyuktāṃ śuklapuṣpāmbarāvṛtām

sopadhānakaviśrāmāṃ phalairnānāvidhairyutām || tathābhara
ṇadhānyaiśca yathāśaktyā samanvitām

avyaṅgāṅgāya viprāya vaiṣṇavāya kuṭumbine || dātavyā vedaviduṣe bhāvenāpatitāya ca

tatropaviśya
dāmpatyamalaṅkṛtya vidhānataḥ || patnyāstu bhājanaṃ dadyādakṣayabhojyasamanvitam

brāhmaṇasyāpi sauvarṇīmupaskarasamanvitām || pratimāṃ devadevasya
sodakumbhāṃ nivedayet

evaṃ yastu pumānkuryyādaśūnyaśayanaṃ hareḥ || vittaśāṭhyena rahito nārāyaṇaparāyaṇaḥ

nārī vā vidhavā brahma
nyāvaccandrārkatārakam || na virūpau na śokārttau dampatī bhavataḥ kvacit

na putrapaśuratnāni kṣayaṃ yānti pitāmaha || saptakalpasahasrāṇi
saptakalpaśatāni ca || kurvvannaśūnyaśayanaṃ viṣṇuloke mahīyate

iti śrīmātsye mahāpurāṇe'śūnyaśayanavrataṃ nāmaikasaptatitamo'dhyāyaḥ

Linked texts (6)