Matsya 75

īśvara uvāca
viśokasaptamīṃ tadvadvakṣyāmi munipuṅgava || yāmupoṣya naraḥ śokaṃ na kadācidihāśnute

māghe kṛṣṇatilaiḥ snātvā ṣaṣṭhyāṃ vai śuklapakṣataḥ
kṛtāhāraḥ kṛsarayā dantadhāvanapūrvakam || upavāsavrataṃ kṛtvā brahmacārī bhavenniśi

tataḥ prabhāta utthāya kṛtasnānajapaḥ śuciḥ
kṛtvā tu kāñcanaṃ padmamarkāyeti ca pūjayet || karavīreṇa raktena raktavastrayugena ca

yathā viśokaṃ bhuvanaṃ tvayaivāditya sarvvadā || tathā viśokatā
me'stu tvadbhaktiḥ pratijanma ca

evaṃ sampūjya ṣaṣṭhyāntu bhaktyā sampūjayedvijān || suptvā samprāśya gosūtramutthāya kṛtanaityakaḥ

sampūjya
viprānannena guḍapātrasamanvitam || tadvastrayugmaṃ padmañca brāhmaṇāya nivedayet

atailalavaṇaṃ bhuktvā saptamyāṃ maunasaṃyutaḥ || tataḥ purāṇaśravaṇaṃ karttavyaṃ
bhūtimicchatā

anena vidhinā sarvvamubhayorapi pakṣayoḥ || kṛtvā yāvat punarmāghaśuklapakṣasya saptamī

vratānte kalaśaṃ dadyātsuvarṇaka
malānvitam || śayyāṃ sopaskarāṃ dadyātkapilāñca payasvinīm

anena vidhinā yastu vittaśāṭhyavivarjitaḥ || viśokasaptamīṃ kuryyātsa yāti
paramāṃ gatim

yāvajjanmasahasrāṇāṃ sāgraṃ koṭiśataṃ bhavet || tāvanna śokamabhyeti rogadaurgatyavarjitaḥ

yaṃ yaṃ prārthayate kāmaṃ taṃ tamāpnoti
puṣkalam || niṣkāmaḥ kurute yastu sa paraṃ brahma gacchati

yaḥ paṭhecchṛṇuyādvāpi viśokākhyāñca saptamīm || so'pīndralokamāpnoti na duḥkhī
jāyate kvacit

iti śrīmātsye mahāpurāṇe viśokasaptamīvrataṃ nāma pañcasaptatitamo'dhyāyaḥ

Linked texts (5)