[Pramāṇa](https://indike.org/pramana/) › [Indian literature](https://indike.org/pramana/in) › [Astronomy & Mathematics](https://indike.org/pramana/in.astro) › [Mathematical Astronomy](https://indike.org/pramana/in.astro.siddhanta) › [Handbooks for practical computation](https://indike.org/pramana/in.astro.siddhanta.karana) › [Karanakaustubha](https://indike.org/pramana/in.astro.siddhanta.karana.karanakaustubha) › 9\_23 # Karanakaustubha 9\_23 Karaṇakaustubha 9\_23 - **Language:** Sanskrit ### [9\_23](https://indike.org/pramana/in.astro.siddhanta.karana.karanakaustubha.9_23) athaiṣa ānandāśramamudraṇālaye karaṇakaustubhanāmā jyoti:śāstrīyagranthaḥ prakāśyate . so'yaṃ gobrāhmaṇapratipālaketyādibirudāvalīvirājite śivarāyābhidhe maharāje mahīṃ praśāsati sati tadanuśāsanena jyotirvidā kṛṣṇadaivajñenaṃ viracita iti bālakṛṣṇātmajaśaṃkaradīkṣitairbhāratīyajyotiḥśāsranāmni granthe (pṛ 0290.291) ityatra pratipāditam . tata evedamadhunātanānāṃ mahārāṣṭravācakānāṃ viditamabhūt . nanu grahalāghavādiprabhṛtibahuvidheṣu karaṇagrantheṣu satsu kimarthamayaṃ kṛṣṇadaivajña etadgranthakaraṇe pravṛtto'bhūt . kimarthaṃ ca śivarāyeṇāyaṃ tādṛgrantharacanāyāṃ pravartitaḥ iti cecchṛṇu . yadyapi grahalāghavādayaḥ karaṇagranthāḥ svalpāyāsasādhya gaṇitāḥ sulabhāvabodhāśca santi tathā'pi āsetu āhimācalaṃ sarvatra mahīmaṇḍale pañcāṅganirmāṇe prāyaḥ śiṣṭairgrahalāghava evā''driyate . sa ca grahalāghavanāmā grantho gaṇeśadaivajñena netravedābdhibhūmite (1442 ) śake prāṇāyi . tata ārabhya bhūtadvīnduparimiteṣu (125) vatsareṣu vyatīteṣu grahalāghavasādhyagāṇitaṃ na samīcīnyena dṛkpratyayatulyatāmavataratīti grahalāghavaviṣaye ākṣepavādo loke pravṛttaḥ . atha cāyogyakāle anuṣṭhīyamānamapi karma saphaḻe sukhodarkaṃ ca na bhavati . loke'pi yathākāla eva kṛtaṃ karma phaladaṃ bhavati . yathā bījāvāpādi kṛṣikarma prāvṛṭkāle kṛtaṃ cettadaiva phaladaṃ bhavati . anyathākāle kṛtaṃ cettatra vṛṣṭerabhāvāddhānyalābho na bhavatītyetāvadeva na kiṃntūptaṃ bījaṃ nāṅkuramapyāsādayatīti sabījasya lābhasya hāniriti spaṣṭam . tathā śarīre candanānulepanamuṣṇakāle kriyamāṇameva sukhaparyavasāyi dṛśyate nānyakāle kriyamāṇam . pratyuta śītakāle śītopacāraḥ kriyamāṇo himajvarādikaṃ niṣpādayedityapi saṃbhavatīti mahadaniṣṭaṃ pratīyate . tathāca vyavahāraviṣaye'pi avyavasthā prasajyetetyanusaṃdhāyemāmavyavasthāṃ parihartuṃ yathā mahārāṣṭrīyabhāṣāśuddhyarthaṃ rājavyavahārakośanāmā grantho rājavyavahārakuśalairniṣpāditastathā pañcāṅgaśuddhyā eva karaṇakaustubhanāmā granthaḥ saṃkṣiptaḥ sansulabho'pi dṛkpratyayagaṇitayostulyatāmāpādayañchrīśivarāyamahārājena kṛṣṇadaivajñena kārita iti - [Previous: 9\_22](https://indike.org/pramana/in.astro.siddhanta.karana.karanakaustubha.9_22) - [Next: 9\_24](https://indike.org/pramana/in.astro.siddhanta.karana.karanakaustubha.9_24) --- Source: [https://indike.org/pramana/in.astro.siddhanta.karana.karanakaustubha.9_23](https://indike.org/pramana/in.astro.siddhanta.karana.karanakaustubha.9_23) · Pramāṇa