[Pramāṇa](https://indike.org/pramana/) › [Indian literature](https://indike.org/pramana/in) › [Astronomy & Mathematics](https://indike.org/pramana/in.astro) › [Military Astrology (royal expeditions)](https://indike.org/pramana/in.astro.yatra) › [Medieval and Early Modern Martial Astrology](https://indike.org/pramana/in.astro.yatra.samara) › [Ranadipika](https://indike.org/pramana/in.astro.yatra.samara.ranadipika) › 2 # Ranadipika 2 Raṇadīpikā 2 - **Language:** Sanskrit ## Contents - [2.49](https://indike.org/pramana/in.astro.yatra.samara.ranadipika.2.49) — 1 part ### [2.1](https://indike.org/pramana/in.astro.yatra.samara.ranadipika.2.1) atha saṃkṣepato vakṣye saṃrambhāya ca lakṣaṇam yātrāyāṃ pūrvaśāstrebhyaḥ sārasaṃgrahadhīraham ### [2.2](https://indike.org/pramana/in.astro.yatra.samara.ranadipika.2.2) yātrāmuhūrte ye yogā yāni bhāni ca rāśayaḥ proktā yāstithayaḥ pūrvaiḥ śastā yāne raṇāya ca ### [2.3](https://indike.org/pramana/in.astro.yatra.samara.ranadipika.2.3) pi(trā ? tryā)diśravaṇāntāni yāni bhāni kadācana prācyāmudīcyāṃ yātrāyāṃ naiva sarvāṇi tānyapi ### [2.4](https://indike.org/pramana/in.astro.yatra.samara.ranadipika.2.4) vasvādivihvagāntāni varjitāni maharṣibhiḥ yātrāyāṃ dakṣiṇasyāṃ ca pratīcyāmapi sarvadā ### [2.5](https://indike.org/pramana/in.astro.yatra.samara.ranadipika.2.5) vāyavyāgneyakoṇasthaḥ parighākhyaḥ suduḥkhadaḥ yojanādūrato yāne manīṣī taṃ na laṅghayet ### [2.6](https://indike.org/pramana/in.astro.yatra.samara.ranadipika.2.6) tamatikramya yo yuddhaṃ karoti raṇabhūtale mṛtimāpnoti bhūpālaścaturaṅgabalo'pi saḥ ### [2.7](https://indike.org/pramana/in.astro.yatra.samara.ranadipika.2.7) phaṇinaṃ bhairavaṃ caiva yoginīṃ ca divākaram śivaṃ ca pṛṣṭhe saṃsthāpya gacchet sarvatra sarvadā ### [2.8](https://indike.org/pramana/in.astro.yatra.samara.ranadipika.2.8) yasyāṃ diśi sthitā nityā gulikārkajaviṣṭayaḥ na tāṃ prati diśaṃ yāyāt pṛṣṭhagāste jayāvahāḥ ### [2.9](https://indike.org/pramana/in.astro.yatra.samara.ranadipika.2.9) praṇamya gaṇanādhaṃ ca gaurīṃ ca parameśvaram smaran grahendraṃ diṅnāthaṃ manasā ca mahīpatiḥ ### [2.10](https://indike.org/pramana/in.astro.yatra.samara.ranadipika.2.10) pratoṣya viprānagnīṃśca svarṇairapi dhanañjayam samarcya haviṣā yāto labhate sadhanaṃ jayam ### [2.11](https://indike.org/pramana/in.astro.yatra.samara.ranadipika.2.11) yātrākāle yathā sthitvā parīkṣeta mahīpatiḥ svadehapadmakuhare sthitaṃ devaṃ samīraṇam ### [2.12](https://indike.org/pramana/in.astro.yatra.samara.ranadipika.2.12) pradhānāḥ sarvanāḍīnāṃ daśa nāḍyaḥ prakīrtitāḥ tāsāṃ tisraḥ pradhānāḥ syustāsāmekā ca nāḍikā ### [2.13](https://indike.org/pramana/in.astro.yatra.samara.ranadipika.2.13) mūlādibrahmarandhrāntaṃ dehamadhye vyavasthitā nāsāśrayā suṣumnākhyā sā ca yogapathānugā ### [2.14](https://indike.org/pramana/in.astro.yatra.samara.ranadipika.2.14) tasyā dakṣiṇapārśvasthā piṅgalākhyā prakīrtitā iḍeti vāmapārśvasthā nāsikāntegate hi te ### [2.15](https://indike.org/pramana/in.astro.yatra.samara.ranadipika.2.15) pradhānaḥ sarvavāyūnāṃ prāṇo vāyuḥ prakīrtitaḥ tamārūḍho mahānātmā karotyeva śubhāśubham ### [2.16](https://indike.org/pramana/in.astro.yatra.samara.ranadipika.2.16) sūryo dakṣiṇagaḥ proktaḥ somo vāmagatastathā pāvako dvandvago devaḥ sa ca kāryavināśakṛt ### [2.17](https://indike.org/pramana/in.astro.yatra.samara.ranadipika.2.17) samastu candramāḥ prokto vijñeyo viṣamo raviḥ candraḥ strī puruṣaḥ sūryaścandraḥ kṛṣṇo raviḥ sitaḥ ### [2.18](https://indike.org/pramana/in.astro.yatra.samara.ranadipika.2.18) puro vāmordhvagaścandro dakṣādhaḥ pṛṣṭhago raviḥ yasyāṃ diśi sthito devastāṃ diśaṃ gantumarhati ### [2.19](https://indike.org/pramana/in.astro.yatra.samara.ranadipika.2.19) vāmacārapravāhe tu na gacchedū yāmyapaścimau dakṣacārapravāhe tu na gacchet pūrvamuttaram ### [2.20](https://indike.org/pramana/in.astro.yatra.samara.ranadipika.2.20) nirgame tu śubhā vāmā praveśe dakṣiṇā śubhā śubhakārye śubhā vāmā dakṣiṇā krūrakarmaṇi ### [2.21](https://indike.org/pramana/in.astro.yatra.samara.ranadipika.2.21) jape ca niyame dāne yātrāpūjotsaveṣu ca vivāhayajñayoḥ śāntikarmaṇyabjaḥ praśasyate ### [2.22](https://indike.org/pramana/in.astro.yatra.samara.ranadipika.2.22) sannāhe maithune dyūte vivāde kalahe'pica uccāṭanādikāryeṣu dīpto bhānuḥ praśasyate ### [2.23](https://indike.org/pramana/in.astro.yatra.samara.ranadipika.2.23) raṇāyāpi ca yātrādau niśānāthaḥ śubhapradaḥ praveśe raṇabhūdeśe divānātho jayapradaḥ ### [2.24](https://indike.org/pramana/in.astro.yatra.samara.ranadipika.2.24) viṣuvasyodaye yātrāṃ manasāpi na kārayet sarvakarmāṇi saṃnyasya saṃ smaredīśvaraṃ tadā ### [2.25](https://indike.org/pramana/in.astro.yatra.samara.ranadipika.2.25) pañca bhūtāḥ svarāḥ pañca pakṣiṇaḥ pañca pañca ca tithayo'pi jagat sarvaṃ vikhyātaṃ pāñcabhautikam ### [2.26](https://indike.org/pramana/in.astro.yatra.samara.ranadipika.2.26) tasmād bhūtān parīkṣeta pūrvābhivadanaḥ sudhīḥ stanadvayaṃ ca saṃvīkṣya śvāsaṃ vakṣasi recayet ### [2.27](https://indike.org/pramana/in.astro.yatra.samara.ranadipika.2.27) puṭayorapi daṇḍasthā sthirā toyamadhaḥsthitam kṛśānurūrdhvaṃ pārśvasthaḥ samīro madhyame'mbaram ### [2.28](https://indike.org/pramana/in.astro.yatra.samara.ranadipika.2.28) kaṇṭhordhvataḥ sthito vahnirmābhimūle prabhañjanaḥ jānūrdhvataḥ sthitā pṛthvī pādayoḥ salilaṃ tathā ### [2.29](https://indike.org/pramana/in.astro.yatra.samara.ranadipika.2.29) pṛthivyāṃ sthirakarmāṇi calakarmāṇi vāruṇe kurvīta saṅgaraṃ vahnau māraṇoccāṭane'nile ### [2.30](https://indike.org/pramana/in.astro.yatra.samara.ranadipika.2.30) vyomni kevalamātmānaṃ manasā saṃsmaret tathā cāndre toye pṛthivyāṃ ca yāyāt sarvatra bhūpatiḥ ### [2.31](https://indike.org/pramana/in.astro.yatra.samara.ranadipika.2.31) pūrṇabhāgaṃ puraskṛtya kṛtvā śūnye raṇe ripum karoti vindate yuddhaṃ jayaṃ rājyaṃ ca bhūpatiḥ ### [2.32](https://indike.org/pramana/in.astro.yatra.samara.ranadipika.2.32) cakoradarśanaṃ puṇyaṃ dakṣabhāge viśeṣataḥ tadbhāge tasya śabdaṃ ca susvaraṃ ca taduttamam ### [2.33](https://indike.org/pramana/in.astro.yatra.samara.ranadipika.2.33) tiryaggato vāyaso'pi vāmato dakṣiṇe śubhaḥ anyo'pi śobhanaḥ puṃsāṃ kṛṣṇavarṇastathaiva ca ### [2.34](https://indike.org/pramana/in.astro.yatra.samara.ranadipika.2.34) pakṣiṇī pītavarṇā ca śvetavarṇā ca vāmagā śobhanā munibhiḥ khyātā śabdastatra śubhastathā ### [2.35](https://indike.org/pramana/in.astro.yatra.samara.ranadipika.2.35) vayo'nugānaṃ śubhadaṃ dakṣe vāme'nyathā śubham śyeno'pi vāmago mānyo māṃsayukto viśeṣataḥ ### [2.36](https://indike.org/pramana/in.astro.yatra.samara.ranadipika.2.36) dakṣato vāmagoścāpi śobhano jambuko'nyathā vāme na śobhanaḥ puṃsāṃ kṛkalāsaḥ śubho'nyathā ### [2.37](https://indike.org/pramana/in.astro.yatra.samara.ranadipika.2.37) tiryaggataḥ śubho naiva tathā kṛṣṇasahasrapāt tasyāgamaṃ śubhaṃ vidyāt tathā kanyāgamaṃ gavām ### [2.38](https://indike.org/pramana/in.astro.yatra.samara.ranadipika.2.38) śaṅkhanādaṃ śubhaṃ vidyācchubhaṃ vedaravaṃ tathā śabdaṃ maṅgalavādyānāṃ śubhaśabdaṃ nṛṇāmapi ### [2.39](https://indike.org/pramana/in.astro.yatra.samara.ranadipika.2.39) pūrṇakumbhaḥ surā takraṃ dadhi dīpitapāvakaḥ māṃsakhaṇḍo naro veśyā teṣāmāgamanaṃ śubham ### [2.40](https://indike.org/pramana/in.astro.yatra.samara.ranadipika.2.40) riktapāṇirdvijo rājā vaidhakirgaṇakoragau paṅguraṅgavihīnaśca daṇḍapāṇistathaiva ca ### [2.41](https://indike.org/pramana/in.astro.yatra.samara.ranadipika.2.41) tailahastastadabhyakto nagno muktaśiroruhaḥ pāṣaṇḍī cārdravāsāśca patitaśca kuṭhārabhṛt ### [2.42](https://indike.org/pramana/in.astro.yatra.samara.ranadipika.2.42) kāyastho muṇḍito rogī rudan vedanayā saha malinaśchinnavāsāśca nārī ca vidhavā tathā ### [2.43](https://indike.org/pramana/in.astro.yatra.samara.ranadipika.2.43) aśastacintāvacano mārjāro gardabho'pi vā teṣāmāgamanaṃ varjyaṃ gamane sarvadikṣvapi ### [2.44](https://indike.org/pramana/in.astro.yatra.samara.ranadipika.2.44) muhūrtaṃ śakunaiḥ sārdhaṃ śubhamāha bṛhaspatiḥ vāyūdayaṃ pradhānaṃ tu kapilaḥ siddhanāyakaḥ ### [2.45](https://indike.org/pramana/in.astro.yatra.samara.ranadipika.2.45) gārgyaḥ prabhātamityāha vedavyāso manoratim upaśrutiṃ mahānatrirvipravākyaṃ janārdanaḥ ### [2.46](https://indike.org/pramana/in.astro.yatra.samara.ranadipika.2.46) ityādi lakṣaṇaṃ sarvaṃ vijñāyaiva narādhipaḥ yuddhāya raṇabhūdeśaṃ gacchet saha balairapi ### [2.47](https://indike.org/pramana/in.astro.yatra.samara.ranadipika.2.47) ekāṃśasthitayoścandrabhaumayoḥ svasvavargayoḥ ārabheta mahīpālo lagne yadi tadā raṇam ### [2.48](https://indike.org/pramana/in.astro.yatra.samara.ranadipika.2.48) bhaumodaye ca taddvāre parasenāṃ prati dhruvam yadā viṣaghaṭīkāle sāyakaṃ visṛjet tadā ### [2.49](https://indike.org/pramana/in.astro.yatra.samara.ranadipika.2.49) viṣṭerabhyudaye kāle tasyāṃ diśi ca saṃsthitaḥ śarān vimuñcan bhūpālo jayaṃ prāpnoti saṅgare ### [2.49.p1](https://indike.org/pramana/in.astro.yatra.samara.ranadipika.2.49.p1) iti raṇadīpikāyāṃ yātrāviveko dvitīyo'dhyāyaḥ ## Discussed in (1) - [Census of the Exact Sciences in Sanskrit, Series A](https://indike.org/pramana/ins.science.pingree-1970.v2.c10.202) — Pingree 1970, English --- Source: [https://indike.org/pramana/in.astro.yatra.samara.ranadipika.2](https://indike.org/pramana/in.astro.yatra.samara.ranadipika.2) · Pramāṇa