Yogayatra 7

Yogayātrā 7

madayantikā 'śvagandhā madanaphalavacāmadhūni śasyante/
prathamarkṣe bharaṇīṣu ca siddhārthakabhadradāruvacāḥ//

nyagrodhaśirīṣāśvatthapatragandhāś ca kṛttikāsnāne/
bahubījapraśastatoyair jayārthino rohiṇīsnānam//

muktākāñcanamaṇisaṃyuktena 'mbhasā mṛigāṅkarkṣe/
raudre vacāśvagandhāpriyaṃgumiśrair jalaiḥ kathitam//

āditye gomayagoṣṭhamṛdbhir atha gauraśālibhiḥ puṣye/
siddhārthasahasradvayapriyaṃgumadayantikābhiś ca//

valmīkaśatān mṛdbhiḥ nāge pitrye ca devanirmālyaiḥ/
pūrvāsu phalgunīṣu ca salavaṇaghṛtaśāḍvalaiḥ proktam//

śatapuṣpayā priyaṃgvā mustābhiś cottarāsu kruvīta/
haste sarogirimṛdā citrāyāṃ devanirmālyaiḥ//

svātau jalaruhakusumair aindrāgnye matsyapadmakakṣaudraiḥ/
maitre saridubhayamṛdā haritālamṛdā ca māhendre//

bhadrāsane śamīmayapatrasahasradvayāmbubhir mūle//
samadhūkapadmamatsyaiḥ snānam aṣāḍhāsu pūrvāsu//

kuryād uśīracandanapadmakamiśreṇa vāriṇā vaiśve/
nadyubhayakūlasaṃgamamṛtkanakaiḥ kīrtyate śravaṇe//

ghṛtabhadradārumadhubhiś ca vāsave vārune ghṛtakṣaudraiḥ/
samadanaphalasahadevāmbuśūkamadayantikāmiśraiḥ//

śrīvāsakaḥ priyaṃguś ca ''je syād uttarāsv agurugandhāḥ/
śastāḥ sapadmakośīracandanā mānavendrāṇām//

revatyāṃ vṛṣabhadvipaviṣāṇakośaiḥ ca sarpimadhupūrṇaiḥ/
gorocanāñjanayutaiḥ salilaiś ca yiyāsataḥ puṃsaḥ//

girivalmīkanadīmukhakūladvayaśakrapādamṛdbhir ataḥ/
dvipavṛṣaviṣāṇapārthivagaṇikādvārāhṛtābhiś ca//

giriśikharān mūrdhānaṃ valmīkamṛdā ca śodhayet karṇau/
nadyubhayakūlasaṃgamamṛdbhiḥ prakṣālayet pārśve//

indrasthānād grīvāṃ bāhū karivṛṣabhayor vishāṇāt/
hṛdayaṃ ca nṛpadvārāt kaṭim api veśyāghṛhadvārāt//

akṣatamāṣāḥ svinnāstilasahitās taṇdulā dadhi ca gavyam/
vṛṣatapiśitaṃ mṛgasya ca pañcānām āśvinādīnām//

rudhiravilāpanapāyasavihagamāṃsāni śāṃkarādīnām/
pitrye tilaudanaṃ ṣaṣṭikānnam ṛkṣadvaye parataḥ//

prāśyāḥ priyaṃgucitrāṇḍajaphalaṃ yāvakaṃ kulatthāś ca/
madhusasarpiṣī ca hastān mūlāny āpaḥ [mūlāmbhaḥ] saktavo 'pi mūlāt//

śravaṇādīnāṃ adyāt śāliśākaṃ biḍālamāṃsaṃ ca/
ājaṃ yatheṣṭamāṃsaṃ ca śaktavo māṣasaṃpṛktāḥ//

prācīṃ gajena yāyād rathena yāmyāṃ hayena vāruṇyām/
narayānenodīcīṃ sarvaṃ datvā digīśāya//

prācyādi ghṛtaṃ tilaudanaṃ matsyāṇ kṣīraṃ iti pradakṣiṇam/
adyān nrpatir yathādiśaṃ nakṣatrābhihitaṃ ca siddhaye//

asvādu cyutamakṣikānuviddhaṃ
durgandhi kṣayakṛd abhūri yac ca daghdam/
susvinnaṃ śuci ruciraṃ mano 'nukūlaṃ
svādv annaṃ bahu vijāya yānakāle//E22

Discussed in (1)