Pramāṇa · Search · About · API

Yogayatra 9

Yogayātrā 9

Language
Sanskrit

9.1

janmarkṣam ādyaṃ daśaman tu karmaṃ sāṃghātikaṃ ṣoḍaśam ṛkṣam ādyāt/
aṣṭādaśaṃ syāt samudāyasaṃjñaṃ vaināśikaṃ viṃśatibhāt tṛtīyam//

9.2

yat pañcaviṃśaṃ khalu mānasaṃ tat ṣaḍṛkṣa evaṃ puruṣas tu sarvaḥ/
rājño navarkṣāṇi vadanti jātideśābhiṣekaiḥ sahitāni tāni//

9.3

rājño 'bhiṣekarkṣam uśanty amiśraṃ sādhāraṇe dve saha ṣaḍbhir ādyaiḥ/
kimtv atra doṣāś ca guṇāś ca sarve pradhānam ekaṃ puruṣaṃ bhajante//

9.4

kūrmopadiṣṭāni hi deśabhāni rājño 'bhiṣekāhani ca ''bhiṣekam/
yā jātayaś bhasya bhavanty atas tā vargāṃś ca vakṣyāmi yathākrameṇa//

9.5

pūrvātrayaṃ sānalam agrajānāṃ rājñāṃ tu puṣyeṇa sahottarāṇi/
sapauṣṇamaitraṃ pitṛdaivataṃ ca prajāpater bhaṃ ca kṛṣīvalānām//

9.6

ādityahastābhijidāśvināni vaṇigjanānāṃ pravadanti bhāni/
mūlatrinetrānilavāruṇāni bhāny ugrajāteḥ prabhaviṣṇutāyāḥ//

9.7

saumyendracitrāvasudaivatāni sevājanasvāmyam upāgatāni/
sārpaṃ viśākhāśravaṇe bharaṇyaś cāṇḍālajāter abhinirdiśanti//

9.8

raviravisutabhogam āgataṃ kṣitisutabhedanavakradūṣitaṃ/
grahaṇagatam atho 'lkayā hataṃ niyatamukhākarapīḍitaṃ ca yat//

9.9

tad upahatam iti pracakṣate prakṛtiviparyayajātam eva vā/
nigaditaparavargadūṣitaṃ kathitaviparyayagaṃ samṛddhaye//

9.10

rogābhiyāgamavittanāśakalahā sampīḍite janmabhe
siddhiṃ karma na yāti karmaṇi hate bhedās tu sāṃghātike/
dravyasyopacitasya sāmudayike saṃpīḍite saṃkṣayo
vaināśe tu bhavanti kāyavipadaś cittāsukhaṃ mānase//

9.11

nirupadrutabho nirāmayaḥ sukhabhāg puṣṭatanur dhanānvitaḥ/
ṣaḍupadrutabho vinaśyati tribhir anyaiś ca saha 'vanīśvaraḥ//

9.12

na bhavati śarīrapīḍā yasya vinā śāntibhir bhapīḍāyām/
tasya śarīravipattiḥ pākānte devalaḥ prāha//

9.13

sarveṣāṃ pīḍāyāṃ dinam ekam upoṣito 'nalaṃ juhuyāt/% VḍhP 1.89.1--13
sāvitryā kṣīrataroḥ samidbhir amaradvijānuraktaḥ//

9.14

gokṣīrasitavṛṣabhaśakṛnmūtraiḥ patraiś ca pūrṇakośāyāḥ/
snānaṃ janmani duṣṭe svācāravatāṃ harati pāpam//

9.15

karmaṇi madhughṛtahomo daśāham akṣāramadyamāṃsādaḥ/
dūrvāpriyaṃgusarṣapaśatapuṣpaśatāvarīsnānam//

9.16

sāṃghātike 'bhitapte māṃsamadhukrauryamanmathāṃs tyaktvā/
snāto dūrvāṃ juhuyād dānaṃ dadyād yathāśakti//

9.17

sāmudayike 'pi dadyāt kāñcanarajatāny upahate dhiṣṇye/
vaināśike 'nnapānaṃ vasudhāṃ ca guṇāṇvite dadyāt//

9.18

mānasatāpe homaḥ saroruhaiḥ pāyasair dvijāḥ pūjyāḥ/
gajamadaśirīṣacandanabalātibalavāriṇā snānam//E18% ḥere Kern's version ends.

Linked texts (3)

Discussed in (1)