[Pramāṇa](https://indike.org/pramana/) › [Indian literature](https://indike.org/pramana/in) › [Buddhist Literature](https://indike.org/pramana/in.bauddha) › [Buddhist Sanskrit literature](https://indike.org/pramana/in.bauddha.sanskrit) › [Dharmapada anthologies](https://indike.org/pramana/in.bauddha.sanskrit.dharmapada) › [Udānavarga](https://indike.org/pramana/in.bauddha.sanskrit.dharmapada.udanavarga) › [Ched du brjod pa'i tshoms (Kangyur, Toh 326)](https://indike.org/pramana/in.bauddha.sanskrit.dharmapada.udanavarga*bo) › 1.2 # Udanavarga 1.2 Ched du brjod pa'i tshoms (Kangyur, Toh 326) 1.2 - **Language:** Classical Tibetan ### [1.2](https://indike.org/pramana/in.bauddha.sanskrit.dharmapada.udanavarga*bo.1.2) མི་རྣམས་སྲོག་ཀྱང་དེ་བཞིན་ནོ། །དཔེར་ན་ཐགས་ནི་བརྐྱང་བ་ལ། །སྤུན་ནི་གང་དང་གང་བཅུག་པའི། །སྤུན་གྱིས་རྟིང་ལ་གཏུགས་པ་ལྟར། །མི་རྣམས་སྲོག་ཀྱང་དེ་བཞིན་ནོ། །དཔེར་ན་ངེས་པར་བསད་པ་དག །གོམ་པ་གང་དང་གང་བོར་བས། །གསད་སའི་དྲུང་དུ་བསྙེན་པ་ལྟར། །མི་རྣམས་སྲོག་ཀྱང་དེ་བཞིན་ནོ། །ཆུ་ཀླུང་དྲག་ཏུ་འབབ་པའི་རྒྱུན། །ལྡོག་པ་མེད་པ་ཇི་ལྟ་བར། །དེ་བཞིན་མི་ཡི་ཚེ་འགྲོ་བ། །སླར་ནི་ལྡོག་པར་འགྱུར་བ་མེད། །དཀའ་བ་ཉིད་དང་ཐུང་བ་དང་། །དེ་ཡང་སྡུག་བསྔལ་ལྡན་པ་དག །མྱུར་བ་ཁོ་ནར་འཇིག་འགྱུར་ཏེ། །ཆུ་ལ་དབྱུག་གུས་བྲིས་པ་བཞིན། །དཔེར་ན་ཕྱུགས་རྗི་དབྱུག་ཐོགས་ཀྱིས། །ཕྱུགས་རྣམས་གནས་སུ་ཕྱིན་བྱེད་ལྟར། །དེ་བཞིན་ནད་དང་རྒ་བ་ཡིས། །མི་རྣམས་འཆི་བདག་དྲུང་དུ་སྐྱེལ། །ཆུ་བྲན་གྱི་ནི་ཆུ་ལྟ་བུར། །ཉིན་དང་མཚན་མོ་འདས་པ་ཡིས། །མི་རྣམས་ཚེ་ཡང་ཟད་འགྱུར་ཞིང་། །སྲོག་ཀྱང་ཉེ་བར་འཇིག་པར་འགྱུར། །མེལ་ཙེ་བྱེད་ལ་མཚན་མོ་རིང་། །ལམ་གྱིས་དུ་བ་ལ་རྒྱང་གྲགས་རིང་། །དམ་ཆོས་རྣམ་པར་མི་ཤེས་པའི། །བྱིས་པ་རྣམས་ལ་འཁོར་བ་རིང་། །བདག་ལ་བུ་ཡོད་དེ་བཞིན་དུ། །ནོར་ཡོད་ཅེས་པས་བྱིས་པ་བརླག །ཕྱི་རོལ་ནང་ན་བདག་མེད་ན། །སུ་ཡི་བུ་ཡིན་ཅི་ཞིག་ནོར། །སྐྱེས་པ་བུད་མེད་རྣམས་ཀྱི་རིགས། །བརྒྱ་དང་སྟོང་ཕྲག་མང་པོ་དང་། །ལོངས་སྤྱོད་ལེགས་པར་བསྒྲུབས་པ་ཡང་། །འཆི་བདག་དབང་དུ་འགྲོ་བར་འགྱུར། །བསགས་པ་ཀུན་གྱི་མཐའ་ཟད་ཅིང་། །བསླང་བའི་མཐའ་ནི་འགྱེལ་བར་འགྱུར། །ཕྲད་པའི་མཐའ་ནི་འབྲལ་བ་སྟེ། །གསོན་པའི་མཐའ་ནི་འཆི་བ་ཡིན། །གསོན་མཐའ་འཆི་བ་ཡིན་པས་ན། །སེམས་ཅན་ཐམས་ཅད་འཆི་འགྱུར་ཞིང་། །དགེ་སྡིག་འབྲས་བུར་ཉེར་འགྲོ་བའི། །ཇི་བཞིན་ལས་ཀྱི་རྗེས་སུ་འབྲང་། །སྡིག་པའི་ལས་ཀྱིས་དམྱལ་བ་དང་། །བསོད་ནམས་བྱས་པས་བདེ་འགྲོ་སྟེ། །གཞན་དག་གིས་ནི་ལམ་བསྒོམས་པས། །ཟག་མེད་མྱ་ངན་འདས་པར་འགྱུར། ། > All that is gathered will disperse. > What has risen will ultimately fall. > The end of meeting is separation. > Whoever lives will ultimately die. > — Adam Pearcey 2004, Popular Quotations from the Udānavarga > བསགས་པ་ཀུན་གྱི་མཐའ་ཟད་ཅིང༌། ། > བསླང་བའི་མཐའ་ནི་འགྱེལ་བར་འགྱུར། ། > ཕྲད་པའི་མཐའ་ན་བྲལ་བ་སྟེ། ། > གསོན་པའི་མཐའ་ནི་འཆི་བར་འགྱུར། ། > — Adam Pearcey 2004, Popular Quotations from the Udānavarga - [Previous: 1.1](https://indike.org/pramana/in.bauddha.sanskrit.dharmapada.udanavarga*bo.1.1) - [Next: 1.3](https://indike.org/pramana/in.bauddha.sanskrit.dharmapada.udanavarga*bo.1.3) - [Up: 1](https://indike.org/pramana/in.bauddha.sanskrit.dharmapada.udanavarga*bo.1) ## Translations (2) - [Popular Quotations from the Udānavarga](https://indike.org/pramana/in.bauddha.sanskrit.dharmapada.udanavarga*bo~en-pearcey.p4) — Adam Pearcey 2004, English - [English (machine translation)](https://indike.org/pramana/in.bauddha.sanskrit.dharmapada.udanavarga*bo~en-mt.1.2) — English, machine translation ## Other recensions (1) - [Sanskrit text (after Bernhard 1965; input M. Tokunaga)](https://indike.org/pramana/in.bauddha.sanskrit.dharmapada.udanavarga*sa.1.2) — Sanskrit --- Source: [https://indike.org/pramana/in.bauddha.sanskrit.dharmapada.udanavarga*bo.1.2](https://indike.org/pramana/in.bauddha.sanskrit.dharmapada.udanavarga*bo.1.2) · Pramāṇa