[Pramāṇa](https://indike.org/pramana/) › [Indian literature](https://indike.org/pramana/in) › [Buddhist Literature](https://indike.org/pramana/in.bauddha) › [Buddhist Sanskrit literature](https://indike.org/pramana/in.bauddha.sanskrit) › [Monastic discipline of the Indian schools](https://indike.org/pramana/in.bauddha.sanskrit.vinaya) › [The Vinaya of the Mūlasarvāstivādins](https://indike.org/pramana/in.bauddha.sanskrit.vinaya.mulasarvastivada) › [Vinayavastu](https://indike.org/pramana/in.bauddha.sanskrit.vinaya.mulasarvastivada.vinayavastu) › [Carmavastu](https://indike.org/pramana/in.bauddha.sanskrit.vinaya.mulasarvastivada.vinayavastu.carma) › 13 # Carmavastu 13 Carmavastu 13 - **Language:** Sanskrit ### [13](https://indike.org/pramana/in.bauddha.sanskrit.vinaya.mulasarvastivada.vinayavastu.carma.13) sa saṃprasthitaḥ / yāvat paśyati sūryasyāstaṃgamanakāle vimānaṃ catasro 'psarasaḥ abhirūpāḥ prāsādikā darśanīyāḥ / ekaś ca puruṣo 'bhirūpo darśanīyaḥ prāsādikaḥ aṅgadakuṇḍalavicitramālyābharaṇānulepanas tābhiḥ sārdhaṃ krīḍati ramate paricārayati / sa tair dūrata eva dṛṣṭaḥ / te taṃ pratyavabhāṣitum ārabdhāḥ / svāgataṃ śroṇa māsi tṛṣito bubhukṣito vā / sa saṃlakṣayati / nūnaṃ devo 'yaṃ vā nāgo vā yakṣo vā bhaviṣyati / āha ca / ārya tṛṣito 'smi bubhukṣito 'smi / sa taiḥ snāpito bhojitaḥ / sa tasmin vimāne tāvat sthito yāvat sūryasyābhyudgamanakālasamayaḥ / sa tair uktaḥ / śroṇa avatara ādīnavo 'tra bhaviṣyati / so 'vatīrya ekānte prakramyāvasthitaḥ / tataḥ paścāt sūryasyābhyudgamanakālasamaye tad vimānam antarhitam\* / tā apy apsaraso 'ntarhitāś catvāraḥ śyāmaśavalāḥ kukkurāḥ prādurbhūtāḥ / tais taṃ puruṣam avamūrdhakaṃ pātayitvā tāvat pṛṣṭhavaṃśāny utpāṭyotpāṭya bhakṣitāni yāvat sūryasyāstaṃgamanakālasamayaḥ / tataḥ paścāt punar api tad vimānaṃ prādurbhūtaṃ tā āpsarasaḥ prādurbhūtāḥ / sa ca puruṣo 'bhirūpo darśanīyaprāsādiko 'ṅgadakuṇḍalavicitramālyābharaṇānulepanas tābhiḥ sārdhaṃ krīḍati ramate paricārayati / sa teṣāṃ sakāśam upasaṃkramya kathayati / ke yūyaṃ kena ca karmaṇā ihopapannāḥ / te procuḥ / śroṇa duṣkuhakā jambudvīpakā manuṣyā nābhiśraddadhāsyanti / sa cāha / ahaṃ pratyakṣadarśī kathaṃ nābhiśraddadhāsye / śroṇa ahaṃ vāsavagrāmake aurabhrikaḥ (MSV IV 172) āsīt\* / urabhrān praghātya praghātya māṃsaṃ vikrīya vikrīya jīvikāṃ kalpayāmi / āryaś ca mahākātyāyano mamānukampayā āgatya kathayati / bhadramukha aniṣṭo 'sya karmaṇaḥ phalavipākaḥ / virama tvam asmāt pāpakād asaddharmāt\* / nāhaṃ tasya vacanena viramāmi / bhūyo bhūyaḥ sa māṃ vicchandayati / bhadramukāniṣṭo 'sya karmaṇaḥ phalavipākaḥ / virama tvam asmāt pāpakād asaddharmāt\* / tatrāpy ahaṃ na prativiramāmi / (83v = GBM 6.749) sa māṃ pṛcchati / bhadramukha kiṃ tvam etān urabhrān divā praghātayasyāhosvid rātrau / mayoktaḥ / ārya divā praghātayāmīti / sa kathayati / bhadramukha rātrau śīlasamādānaṃ kiṃ na gṛhṇāsi / mayā tasyāntikād rātrau śīlasamādānaṃ gṛhītam\* / yat tad rātrau śīlasamādānaṃ gṛhītaṃ tasya karmaṇo vipākena rātrāv evaṃvidhaṃ divyaṃ sukhaṃ pratyanubhavāmi / yan maya divā urabhrāḥ praghātitās tasya karmaṇo vipākena divā evaṃvidhaṃ duḥkhaṃ pratyanubhavāmi / gāthāṃ ca bhāṣate / - [Previous: 12](https://indike.org/pramana/in.bauddha.sanskrit.vinaya.mulasarvastivada.vinayavastu.carma.12) - [Next: 14](https://indike.org/pramana/in.bauddha.sanskrit.vinaya.mulasarvastivada.vinayavastu.carma.14) ## Linked texts (2) - [Divyāvadāna](https://indike.org/pramana/in.bauddha.sanskrit.avadana.divyavadana.6.2) — Sanskrit - [འདུལ་བ་གཞི](https://indike.org/pramana/in.bauddha.sanskrit.vinaya.mulasarvastivada.vinayavastu*bo.5.10) — Classical Tibetan --- Source: [https://indike.org/pramana/in.bauddha.sanskrit.vinaya.mulasarvastivada.vinayavastu.carma.13](https://indike.org/pramana/in.bauddha.sanskrit.vinaya.mulasarvastivada.vinayavastu.carma.13) · Pramāṇa