<!-- Pramāṇa, a library of Indian primary sources · https://indike.org/pramana/in.bauddha.theravada.sp.digha.16.3.35 -->

[Pramāṇa](https://indike.org/pramana/) › [Indian literature](https://indike.org/pramana/in) › [Buddhist Literature](https://indike.org/pramana/in.bauddha) › [The Pāli Canon](https://indike.org/pramana/in.bauddha.theravada) › [Basket of Discourses](https://indike.org/pramana/in.bauddha.theravada.sp) › [Dīghanikāya](https://indike.org/pramana/in.bauddha.theravada.sp.digha) › [Mahaparinibbanasutta](https://indike.org/pramana/in.bauddha.theravada.sp.digha.16) › 3.35

# Mahaparinibbanasutta 3.35

Mahāparinibbānasutta 3.35

- **Language:** Pāli

### [3.35.1](https://indike.org/pramana/in.bauddha.theravada.sp.digha.16.3.35.1)

‘Na tāvāhaṃ, pāpima, parinibbāyissāmi, yāva me bhikkhū na sāvakā bhavissanti viyattā vinītā visāradā bahussutā dhammadharā dhammānudhammappaṭipannā sāmīcippaṭipannā anudhammacārino, sakaṃ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānīkarissanti, uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessanti.

> ‘Wicked One, I shall not be fully extinguished until I have monk disciples …  
> — The Great Discourse on the Buddha’s Extinguishment

### [3.35.2](https://indike.org/pramana/in.bauddha.theravada.sp.digha.16.3.35.2)

Na tāvāhaṃ, pāpima, parinibbāyissāmi, yāva me bhikkhuniyo na sāvikā bhavissanti viyattā vinītā visāradā bahussutā dhammadharā dhammānudhammappaṭipannā sāmīcippaṭipannā anudhammacāriniyo, sakaṃ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānīkarissanti, uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessanti.

> nun disciples …  
> — The Great Discourse on the Buddha’s Extinguishment

### [3.35.3](https://indike.org/pramana/in.bauddha.theravada.sp.digha.16.3.35.3)

Na tāvāhaṃ, pāpima, parinibbāyissāmi, yāva me upāsakā na sāvakā bhavissanti viyattā vinītā visāradā bahussutā dhammadharā dhammānudhammappaṭipannā sāmīcippaṭipannā anudhammacārino, sakaṃ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānīkarissanti, uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessanti.

> layman disciples …  
> — The Great Discourse on the Buddha’s Extinguishment

### [3.35.4](https://indike.org/pramana/in.bauddha.theravada.sp.digha.16.3.35.4)

Na tāvāhaṃ, pāpima, parinibbāyissāmi, yāva me upāsikā na sāvikā bhavissanti viyattā vinītā visāradā bahussutā dhammadharā dhammānudhammappaṭipannā sāmīcippaṭipannā anudhammacāriniyo, sakaṃ ācariyakaṃ uggahetvā ācikkhissanti desessanti paññapessanti paṭṭhapessanti vivarissanti vibhajissanti uttānīkarissanti, uppannaṃ parappavādaṃ sahadhammena suniggahitaṃ niggahetvā sappāṭihāriyaṃ dhammaṃ desessanti.

> laywoman disciples who are competent, educated, self-assured, learned.  
> — The Great Discourse on the Buddha’s Extinguishment

### [3.35.5](https://indike.org/pramana/in.bauddha.theravada.sp.digha.16.3.35.5)

Na tāvāhaṃ, pāpima, parinibbāyissāmi, yāva me idaṃ brahmacariyaṃ na iddhañceva bhavissati phītañca vitthārikaṃ bāhujaññaṃ puthubhūtaṃ yāva devamanussehi suppakāsitan’ti.

> I shall not be fully extinguished until my spiritual path is successful and prosperous, extensive, popular, widespread, and fully revealed among gods and humans.’  
> — The Great Discourse on the Buddha’s Extinguishment

## Translations (5)

- [Большое наставление об окончательной ниббане](https://indike.org/pramana/in.bauddha.theravada.sp.digha.16~ru-khantibalo.3.35.1) — Russian
- [Die große Lehrrede vom Erlöschen des Buddha](https://indike.org/pramana/in.bauddha.theravada.sp.digha.16~de-sabbamitta.3.35.1) — German
- [Dugi govor o konačnom oslobođenju](https://indike.org/pramana/in.bauddha.theravada.sp.digha.16~sr-brankokovacevic.3.35.1) — sr
- [The Great Discourse on the Buddha’s Extinguishment](https://indike.org/pramana/in.bauddha.theravada.sp.digha.16~en-sujato.3.35.1) — English
- [The Book of the Great Decease (Mahâ-parinibbâna-suttanta)](https://indike.org/pramana/in.bauddha.theravada.sp.digha.16~en-rhysdavids1881.3.45) — English

---
Source: [https://indike.org/pramana/in.bauddha.theravada.sp.digha.16.3.35](https://indike.org/pramana/in.bauddha.theravada.sp.digha.16.3.35) · Pramāṇa