Pathikasutta 1.18

1.18.1

‘Api nu, sunakkhatta, tathāgato taṃ vācaṃ bhāseyya yā sā vācā dvayagāminī’ti?

‘Sunakkhatta, would the Realized One make an ambiguous statement?’

1.18.2

‘Kiṃ pana, bhante, bhagavatā acelo pāthikaputto cetasā ceto paricca vidito—

‘But sir, did you make that statement after encompassing Pāṭikaputta’s mind with your mind?

1.18.3

abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ.

1.18.4

Sacepissa evamassa—

1.18.5

ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti?

1.18.6

Udāhu, devatā bhagavato etamatthaṃ ārocesuṃ—

Or did deities tell you about it?’

1.18.7

abhabbo, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ.

1.18.8

Sacepissa evamassa—

1.18.9

ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyā’ti?

1.18.10

‘Cetasā ceto paricca vidito ceva me, sunakkhatta, acelo pāthikaputto—

‘Both, Sunakkhatta.

1.18.11

abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ.

1.18.12

Sacepissa evamassa—

1.18.13

ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti.

1.18.14

Devatāpi me etamatthaṃ ārocesuṃ—

1.18.15

abhabbo, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ.

1.18.16

Sacepissa evamassa—

1.18.17

ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti.

1.18.18

Ajitopi nāma licchavīnaṃ senāpati adhunā kālaṅkato tāvatiṃsakāyaṃ upapanno.

For Ajita the Licchavi general has recently passed away and been reborn in the host of the thirty-three.

1.18.19

Sopi maṃ upasaṅkamitvā evamārocesi—

He came and told me this,

1.18.20

alajjī, bhante, acelo pāthikaputto;

“The naked ascetic Pāṭikaputta is shameless, sir,

1.18.21

musāvādī, bhante, acelo pāthikaputto.

he is a liar.

1.18.22

Mampi, bhante, acelo pāthikaputto byākāsi vajjigāme—

For he has declared of me in the Vajjian capital:

1.18.23

ajito licchavīnaṃ senāpati mahānirayaṃ upapannoti.

‘Ajita the Licchavi general has been reborn in the Great Hell.’

1.18.24

Na kho panāhaṃ, bhante, mahānirayaṃ upapanno;

But that is not true—

1.18.25

tāvatiṃsakāyamhi upapanno.

I have been reborn in the host of the thirty-three.

1.18.26

Alajjī, bhante, acelo pāthikaputto;

The naked ascetic Pāṭikaputta is shameless, sir,

1.18.27

musāvādī, bhante, acelo pāthikaputto;

he is a liar.

1.18.28

abhabbo ca, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ.

Pāṭikaputta is not capable of meeting the Buddha face to face, otherwise

1.18.29

Sacepissa evamassa—

1.18.30

ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti.

his head may explode.”

1.18.31

Iti kho, sunakkhatta, cetasā ceto paricca vidito ceva me acelo pāthikaputto abhabbo acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā mama sammukhībhāvaṃ āgantuṃ.

Thus I both made that statement after encompassing Pāṭikaputta’s mind with my mind,

1.18.32

Sacepissa evamassa—

1.18.33

ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti.

1.18.34

Devatāpi me etamatthaṃ ārocesuṃ—

and deities told me about it.

1.18.35

abhabbo, bhante, acelo pāthikaputto taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā bhagavato sammukhībhāvaṃ āgantuṃ.

1.18.36

Sacepissa evamassa—

1.18.37

ahaṃ taṃ vācaṃ appahāya taṃ cittaṃ appahāya taṃ diṭṭhiṃ appaṭinissajjitvā samaṇassa gotamassa sammukhībhāvaṃ gaccheyyanti, muddhāpi tassa vipateyyāti.

1.18.38

So kho panāhaṃ, sunakkhatta, vesāliyaṃ piṇḍāya caritvā pacchābhattaṃ piṇḍapātapaṭikkanto yena acelassa pāthikaputtassa ārāmo tenupasaṅkamissāmi divāvihārāya.

So Sunakkhatta, I’ll wander for alms in Vesālī. After the meal, on my return from almsround, I’ll go to Pāṭikaputta’s monastery for the day’s meditation.

1.18.39

Yassadāni tvaṃ, sunakkhatta, icchasi, tassa ārocehī’ti.

Now you may tell him, if you so wish.’