[Pramāṇa](https://indike.org/pramana/) › [Indian literature](https://indike.org/pramana/in) › [Buddhist Literature](https://indike.org/pramana/in.bauddha) › [The Pāli Canon](https://indike.org/pramana/in.bauddha.theravada) › [Basket of Discourses](https://indike.org/pramana/in.bauddha.theravada.sp) › [The Minor Collection](https://indike.org/pramana/in.bauddha.theravada.sp.khuddaka) › [Dhammapada](https://indike.org/pramana/in.bauddha.theravada.sp.khuddaka.dhammapada) › [Commentary on the Dhammapada](https://indike.org/pramana/in.bauddha.theravada.sp.khuddaka.dhammapada!dhammapadatthakatha) › 6.1.76\_2 # Verses on Dhamma 6.1.76\_2 Dhammapadaṭṭhakathā 6.1.76\_2 - **Language:** Pāli ### [6.1.76\_2](https://indike.org/pramana/in.bauddha.theravada.sp.khuddaka.dhammapada!dhammapadatthakatha.6.1.76_2) Tattha nidhīnanti tattha tattha nidahitvā ṭhapitānaṃ hiraññasuvaṇṇādipūrānaṃ nidhikumbhīnaṃ. Pavattāranti kicchajīvike duggatamanusse anukampaṃ katvā ‘‘ehi, sukhena jīvanūpāyaṃ dassessāmī’’ti nidhiṭṭhānaṃ netvā hatthaṃ pasāretvā ‘‘imaṃ gahetvā sukhena jīvā’’ti ācikkhitāraṃ viya. Vajjadassinanti dve vajjadassino ‘‘iminā naṃ asāruppena vā khalitena vā saṅghamajjhe niggaṇhissāmī’’ti randhagavesako ca, aññātaṃ ñāpanatthāya ñātaṃ anuggahaṇatthāya sīlādīnamassa vuddhikāmatāya taṃ taṃ vajjaṃ olokanena ullumpanasabhāvasaṇṭhito ca. Ayaṃ idha adhippeto. Yathā hi duggatamanusso ‘‘imaṃ gaṇhāhī’’ti tajjetvāpi pothetvāpi nidhiṃ dassente kopaṃ na karoti, pamudito eva hoti, evameva evarūpe puggale asāruppaṃ vā khalitaṃ vā disvā ācikkhante kopo na kātabbo, tuṭṭheneva bhavitabbaṃ, ‘‘bhante, mahantaṃ vo kammaṃ kataṃ, mayhaṃ ācariyupajjhāyaṭṭhāne ṭhatvā ovadantehi punapi maṃ vadeyyāthā’’ti pavāretabbameva. Niggayhavādinti ekacco hi saddhivihārikādīnaṃ asāruppaṃ vā khalitaṃ vā disvā ‘‘ayaṃ me mukhodakadānādīhi sakkaccaṃ upaṭṭhahati, sace naṃ vakkhāmi, na maṃ upaṭṭhahissati, evaṃ me parihāni bhavissatī’’ti vatthuṃ avisahanto na niggayhavādī nāma hoti. So imasmiṃ sāsane kacavaraṃ ākirati. Yo pana tathārūpaṃ vajjaṃ disvā vajjānurūpaṃ tajjento paṇāmento daṇḍakammaṃ karonto vihārā taṃ nīharanto sikkhāpeti, ayaṃ niggayhavādī nāma seyyathāpi sammāsambuddho. Vuttañhetaṃ – ‘‘niggayha niggayhāhaṃ, ānanda, vakkhāmi, pavayha pavayha, ānanda, vakkhāmi, yo sāro so ṭhassatī’’ti (ma. ni. 3.196). Medhāvinti dhammojapaññāya samannāgataṃ. Tādisanti evarūpaṃ paṇḍitaṃ bhajeyya payirupāseyya. Tādisañhi ācariyaṃ bhajamānassa antevāsikassa seyyo hoti, na pāpiyo vaḍḍhiyeva hoti, no parihānīti. - [Previous: 6.1.76](https://indike.org/pramana/in.bauddha.theravada.sp.khuddaka.dhammapada!dhammapadatthakatha.6.1.76) - [Next: 6.1.76\_3](https://indike.org/pramana/in.bauddha.theravada.sp.khuddaka.dhammapada!dhammapadatthakatha.6.1.76_3) - [Up: 6.1](https://indike.org/pramana/in.bauddha.theravada.sp.khuddaka.dhammapada!dhammapadatthakatha.6.1) ## Linked texts (1) - [Dhammapada](https://indike.org/pramana/in.bauddha.theravada.sp.khuddaka.dhammapada.76) — Pāli --- Source: [https://indike.org/pramana/in.bauddha.theravada.sp.khuddaka.dhammapada!dhammapadatthakatha.6.1.76_2](https://indike.org/pramana/in.bauddha.theravada.sp.khuddaka.dhammapada!dhammapadatthakatha.6.1.76_2) · Pramāṇa