Mīnākṣīstotra (vanivilas)
Version of Minakshistotra (Mīnākṣīstotra)
- Language
- Sanskrit
- Date
- 700–750 CE
- Extent
- 11 passages, 116 words
- Text
- complete digital text
- Source
- ambuda · The Works of Sri Sankaracharya, Volume 18 (Stotras, Vol. 2). Srirangam: Sri Vani Vilas Press, 1910 · CC0 1.0 Universal (public domain dedication) — "Distributed by Ambuda under a Creative Commons CC0 1.0…; sa.wikisource · CC BY-SA 4.0 (Wikisource transcription; the work itself is in the public domain)
Contents
Text
subtitle
|| śrīḥ ||
title
|| mīnākṣīstotram ||
1
śrīvidye śivavāmabhāganilaye śrīrājarājārcite
śrīnāthādigurusvarūpavibhave cintāmaṇīpīṭhike |
śrīvāṇīgirijānutāṅghrikimale śrīśāṃbhavi śrīśive
madhyāhne malayadhvajādhipasute māṃ pāhi mīnāmbike || 1 ||
2
cakrasthe'capale carācarajagannāthe jagatpūjite
ārtālīvarade natābhayakare vakṣojabhārānvite |
vidye vedakalāpamaulividite vidyullatāvigrahe
mātaḥ pūrṇasudhārasārdrahṛdaye māṃ pāhi mīnāmbike || 2 ||
3
koṭīrāṅgadaratnakuṇḍaladhare kodaṇḍabāṇāñcite
kokākārakucadvayoparilasatprālambahārāñcite |
śiñjannūpurapādasārasamaṇīśrīpādukālaṃkṛte
maddāridryabhujaṃgagāruḍakhage māṃ pāhi mīnāmbike || 3 ||
4
brahmeśācyutagīyamānacarite pretāsanāntasthite
pāśodaṅkuśacāpabāṇakalite bālenducūḍāñcite |
bāle bālakuraṅgalolanayane bālārkakoṭyujjvale
mudrārādhitadaivate munisute māṃ pāhi mīnāmbike || 4 ||
5
gandharvāmarayakṣapannaganute gaṅgādharāliṅgite
gāyatrīgaruḍāsane kamalaje suśyāmale susthite |
khātīte khaladārupāvakaśikhe khadyotakoṭyujjvale
mantrārādhitadaivate munisute māṃ pāhi mīnāmbike || 5 ||
6
nāde nāradatumburādyavinute nādāntanādātmike
nitye nīlalatātmike nirupame nīvāraśūkopame |
kānte kāmakale kadambanilaye kāmeśvarāṅkasthite
madvidye madabhīṣṭakalpalatike māṃ pāhi mīnāmbike || 6 ||
7
vīṇānādanimīlitārdhanayane visrastacūlībhare
tāmbūlāruṇapallavādharayute tāṭaṅkahārānvite |
śyāme candrakalāvataṃsakalite kastūrikāphālike
pūrṇe pūrṇakalābhirāmavadane māṃ pāhi mīnāmbike || 7 ||
8
śabdabrahmamayī carācaramayī jyotirmayī vāṅmayī
nityānandamayī nirañjanamayī tattvaṃmayī cinmayī |
tattvātītamayī parātparamayī māyāmayī śrīmayī
sarvaiśvaryamayī sadāśivamayī māṃ pāhi mīnāmbike || 8 ||
trailer
iti śrīmatparamahaṃsaparivrājakācāryasya śrīgovindabhaga- vatpūjyapādaśiṣyasya śrīmacchaṃkarabhagavataḥ kṛtau mīnākṣīstotraṃ saṃpūrṇam ||