Sharadastotra (Nrisimha Bharati Svamin) 2

Śāradāstotra (Nṛsiṃha Bhāratī Svāmin) 2

Language: Sanskrit

2.39 — 1 part

2.1

iti śrīmatparamahaṃsetyādisamastabirudāṅkita śrījagadguru śṛṅgagiri
śrī saccidānandaśivābhinavanṛsiṃhabhāratīsvāmibhiḥ śṛṅgapuryāṃ
śrīśāradāsannidhau navarātryutsavasamaye
viracitaṃ
śāradāstotram
samāptam
śrīḥ
śāradāstotram
śiśumiva pada़natalokaṃ
parirakṣāmīti bodhanāyaiva
aṅke nidhāya bālaṃ
bhātīyaṃ paṅkajātabhavadayitā

2.2

purāṇavastrāṇi na dhārayāmi
navāmbarāṇyyeva tu dhārayāmi
iti prabodhāya janasya nūnaṃ
navāmbarāṇyyeva dadhāti vāṇī

2.3

ekamevāmbaraṃ vāṇi
virūpaṃ ca vadanti hi
navāmbarāṇi dhatse tvaṃ
surūpāṇi kathaṃ vad

2.4

ākāśavatsarvagataśca nitya
ityādi vede'mba kilāmbarasya
pratnatvamekatvamapi prasiddhaṃ
kathaṃ navatvaṃ samabhūdamuṣmin

2.5

haṃsaireva paraiḥ sevyā
nāhamanyairjanairiti
prabodhanakṛte mātaḥ
haṃsaṃ vāhaṃ karoṣi kim

2.6

haṃse hi śabde kimu mukhyavṛttyā
sthitāhameveti vibodhanāya
vibhāsi haṃse jagadambike tvamityasmadīye hṛdaye vibhāti

2.7

haṃso bāhyāndhakārapradalanacaturo hyahni modapradāyī
padmānāmeṣa me'ntaḥsthitatimiratatervārayitryāśca rātrau
apyāmodapradātryā natahṛdayasarojātapaṅkteradhastāddhūto hītyeva bodhaṃ racayitumiva kiṃ haṃsamārohasīśe

2.8

vṛṣaṃ purastātkuruṣe kimadya
vṛṣapradānāya namajjanebhyaḥ
drutaṃ payojanmabhavapramodapayodhirākāśaśibimbapaṅke

2.9

śārdūlacarma parivīkṣya bhavāṅgasaṃsthaṃ
bhītaḥ palāyya tavasannidhimāgataḥ kim
ukṣādhipaḥ sarasijāsanadharmapatni
brūhyadya saṃśayanimamramatermamāśu

2.10

kartumātmani sārthī kiṃ
vṛṣendraḥ pura etu naḥ
ityādikāṃ śrutiṃ vāṇi
purastātkuruṣe vṛṣam

2.11

vṛṣabho vṛṣabho nocetkathaṃ tava padāmbujam
vāṇi sevitumarhaḥ syāttasmādvṛṣabha eva hi

2.12

śikhisūryacandramukhyānahamevāsthāya pālayāmīdam
jagaditi vibodhanārthaṃ
vāgīśvari bhāsi śikhinamāsthāya

2.13

śaṃbhau santi śaśāṅkasūryaśikhino netrāpadeśātsadā
sāgarbhyaṃ ta ime nirīkṣya girijānāthasya mātastvayi
vaktrāraktapaṭīsuvāhmiṣataḥ sevāṃ sadā kurvate
modādeva hi tena cātra viśayaḥ kaścidgirāṃ devate

2.14

śikhivacchuddha eveti
nāmnaivāha yataḥ śikhī
tasmāttadvāhatā cāsya
yuktaiva vidhivallabhe

2.15

śikhī muṇḍī jaṭītyādyāḥ
sarve tvatsevakā iti
dyotanāya śikhī kiṃ vā
mātastvāmeva sevate

2.16

niśamya saṃpreṣitavān mayūramuddharṣa ityeva pitṛṣvasuḥ kim
ṣaḍānano brūhi girāṃ savitri
namrasya saṃdehayujo mamāśu

2.17

kekā na pūjayeyustvāṃ
bhuvane'smin mahotsave vāṇi
iti nāmnaiva hi vaktuṃ
bhāti tvatsaṃnidhau kekī

2.18

vinatātanūdbhavatvaṃ
prakaṭaṃ prabhavedvinatyaiva
iti buddhyā khagarāṭ kiṃ
vinatastvatpādapadmayorvāṇi

2.19

mānasaviharaṇaśīlāṃ
devī tyaktvānyadevatāsevā
naivociteti khagarāḍvahati tvāṃ tādṛśīṃ nūnam

2.20

suvarṇanīkāśabhavatpratīkakānteḥ pariṣvaṅgata eva sārdhā
suparṇatetyātmana ākālayya
khageṭ karotyamba tavāṅghrisevām

2.23

viṣṇau vīkṣya jaḍādhivāsamatha ca svāmitraśāyitvamapyaṇḍodbhūtapatirvihāya tamimaṃ vijñānarūpāmayam
tvāmevādya niṣevate khalu mudā vāgdevi yuktaṃ ca tatko vā śatrusahāsikāṃ hi sahate lokeṣu vidvajjanaḥ
bhūtākāśacareṭ tvameva bhuvane siddhaṃ hi kā tena me
buddhiścābhavadityavetya khagarāṇnūnaṃ girāṃ devate
hārdākāśacarādhipatyamapi me bhūyāditīcchāvaśāttatprāptyai tava pādapaṅkajayugīsevā karotyādarāt
loke hyekaḥ pakṣaḥ
śuklaścānyaśca kṛṣṇa eveha
dvāvapi śuklau pakṣau
dhatte garuḍaḥ kimamba tava vāhaḥ

2.24

hastāntarasthaparaśuṃ
śaṃbhorbhūṣārthamāhṛtānnāgāna
dṛṣṭvā bhīto hariṇaścaraṇaṃ śaraṇaṃ jagāma tava vāṇi

2.25

samāśrayeyaṃ yadi puṣkarasthamaṅkaṃ tadāsyātpatanaṃ hi darśaṃ
mameti matvā mṛgaśābako'yaṃ
padābjamevāśrayate tavāmba

2.27

pibeyurapi māṃ surā yadi vasāmi candre tadtyapāyarahitaṃ padaṃ jigamiṣuściraṃ saṃcarana
apāyavacanojjhitaṃ tava padābjayorantaraṃ
vilokya mṛgaśābako vasati tatra vāgdevi kima
lālayati vāṇi kiṃ tvāṃ
pañcāsyaskandhamāropya
yuktamidaṃ bhrātṝṇāṃ
sodaryālālanaṃ loke

2.28

nāthasyāpi mamānivedya hariṇaḥ sevāṃ kathaṃ prātanodvāgdevyāścaraṇāmbajayoriti ruṣā sāraṅgabālaṃ bhṛśam
tvā śīghrapalāyanotsavaparaṃ sevāṃ karotyādarādṛśyakaḥ svayamityavaimi karuṇāvārānidhe śārade

2.29

viṣṇvardhatvātpālakatvaṃ mamāste
saṃhartṛtvaṃ naijamevāsti kiṃtu
sraṣṭurbhāvo vāṇi nāstīti matvā
tatprāptyai tvāṃ sevate pañcavaktraḥ

2.30

unnamya pādadvitayaṃ turaṅgo
vadannitīvāsti girāṃ savitri
vilaṅghya tāṃ kiṃ saridīśvaro'yamutplutya gaccheyamathāmbaraṃ vā

2.31

pade pade dānavavaśyatā me
bhavecchacīnāthasamīpavāse
uccaiḥśravā ityadhigamya mātastavāṅghrisevāṃ prakaroti kiṃ vā

2.32

kuraṅgavegastava dṛṣṭapūrvasturaṅgavegaṃ paripaśya vāṇi
itīva garvādadhigamya mātasturaṅgamastvāṃ parisevate kim

2.33

vihaṅgaṃ kuraṅgaṃ turaṅgaṃ ca vāhaṃ
vidhāyāśugaṃ śrāntimāsādya kiṃ tvam
gajaṃ mandagaṃ vāhyamadyātanoṣi
praṇamrasya me brūhi vācāmadhīśe

2.34

jambhārau kauśikatvaṃ hyatha ca tadanuje vīkṣya samyaggharittvaṃ
tyaktvā hrīsādhvasābhyāmayamabhikularāṭ tau śaraccandraśubhraḥ
indropendrādisevyāmapi sakalasurārādhyapādāravindāṃ
tvāmevātipramodātkamalajadayite sevate nūnametat

2.35

nateṣṭadānāya sadā jalārdrakarāmbujā tvaṃ yata eva vāṇi
tasmādibho'pyeṣa tavāṅ‌ghrisaṃgāddānambusaṃsiktakaro vibhāti

2.37

matpādābjapraṇamaṃ naramavitarasā sevate cebhamukhyā
lakṣmīrhastāgrarājadvarakanakamayasragdharetyeva bodham
kartuṃ hastāgrarājadvarakanakasaraṃ nāgarājaṃ pradhatse
vāṇi prabrūhi kiṃ tvaṃ kamalajahṛdayāmbhojasūryaprabhe me
tyakṣāmi naiva rāgaṃ
kālatritaye'pi namravargeṣu
iti bodhanāya vāṇī
raktasumānāṃ trayaṃ dhatte