[Pramāṇa](https://indike.org/pramana/) › [Indian literature](https://indike.org/pramana/in) › [Philosophy](https://indike.org/pramana/in.darsana) › [Logic and epistemology](https://indike.org/pramana/in.darsana.nyaya) › [A Cluster of Nyāya Flowers](https://indike.org/pramana/in.darsana.nyaya.nyayamanjari) › 1.4 # A Cluster of Nyāya Flowers 1.4: caturthamāhnikam—śabdaparīkṣā Nyāyamañjarī 1.4 - **Language:** Sanskrit ### caturthamāhnikam—śabdaparīkṣā ### [1.4.1](https://indike.org/pramana/in.darsana.nyaya.nyayamanjari.1.4.1) evaṃ kṛtakatve varṇānāṃ sādhite sati varṇātmanaḥ padāt prabhṛti sarvatra puruṣasya svātantryaṃ siddhaṃ bhavati .. ### [1.4.2](https://indike.org/pramana/in.darsana.nyaya.nyayamanjari.1.4.2) padanityatvapakṣe'pi vākye tadracanātmake . kartṛtvasaṃbhavāt puṃsaḥ, vedaḥ kathamakṛtrimaḥ .. 1 .. ### [1.4.3](https://indike.org/pramana/in.darsana.nyaya.nyayamanjari.1.4.3) tathā ca vaidikyo racanāḥ kartṛpūrvikāḥ, racanātvāt, laukikaracanāvat . eṣa ca pañcalakṣaṇo hetuḥ, prayojakaśceti gamaka eva, na hetvābhāsaḥ .. ### [1.4.4](https://indike.org/pramana/in.darsana.nyaya.nyayamanjari.1.4.4) na tāvadayamasiddho hetuḥ; śanno devīrabhiṣṭaye atha. saṃ. 1-6-1 ityādiṣu vedavākyasandarbheṣu padaracanāyā svarakramādiviśeṣavatyāḥ pratyakṣatvena pakṣe hetoḥ vartamānatvāt .. ### [1.4.5](https://indike.org/pramana/in.darsana.nyaya.nyayamanjari.1.4.5) nāpi viruddhaḥ; kartṛpūrvakatvavati sapakṣe kumārasambhavādau racanātvasya vidyamānatvāt .. ### [1.4.6](https://indike.org/pramana/in.darsana.nyaya.nyayamanjari.1.4.6) nāpyanaikāntikaḥ; kartṛrahiteṣu gaganādiṣu, gaganakusumādiṣu vā racanāyā adṛṣṭatvāt .. ### [1.4.7](https://indike.org/pramana/in.darsana.nyaya.nyayamanjari.1.4.7) etadāhnike ṭippaṇīsthalānāṃ viralatvāt sujñānārthaṃ tāni cihnairyojitāni ### [1.4.8](https://indike.org/pramana/in.darsana.nyaya.nyayamanjari.1.4.8) nāpi kālātyayāpadiṣṭaḥ; pratyakṣeṇa, āgamena vā vede vaktrabhāvaniścayānutpādāt .. ### [1.4.9](https://indike.org/pramana/in.darsana.nyaya.nyayamanjari.1.4.9) nāpi satpratipakṣaḥ; prakaraṇacintāhetoḥ sthāṇupuruṣaviśeṣānupalabdheriva hetutvenānabhidhānāt .. ### [1.4.10](https://indike.org/pramana/in.darsana.nyaya.nyayamanjari.1.4.10) nāpi paramāṇvanityatāyāmiva mūrtatvaṃ aprayojakamidaṃ sādhanam; racanāvyāpārāṇāṃ kartṛvyāpārasādhyatvāvadhāraṇāt . yathā dhūmasya jvalanādhīna ātmalābhaḥ; jñaptistu dhūmādagneḥ—tathā kartradhīnā racanānāmabhinirvṛttiḥ, pratītistu tābhyaḥ karturiti . tasmāt prayojaka evāyaṃ hetuḥ .. ### [1.4.11](https://indike.org/pramana/in.darsana.nyaya.nyayamanjari.1.4.11) nanu ! satpratipakṣatve vivadante . tathā ca mīmāṃsakaiḥ pratiheturiha gīyate ślo. vā. 1-1-7-366— vedasyādhyayanaṃ sarvaṃ gurvadhyayana pūrvakam . vedādhyayanavācyatvāt adhunā'dhyayanaṃ yathā iti—naitadyuktam—evaṃprāyāṇāṃ prayogāṇāmaprayojakatvāt . na hi tacchabdavācyatvakṛtaṃ anāditvamupapadyate .. ### [1.4.12](https://indike.org/pramana/in.darsana.nyaya.nyayamanjari.1.4.12) anaikāntikaścāyaṃ hetuḥ, bhārate'pyevamabhidhātuṃ śakyatvāt . bhāratādhyayanaṃ sarvaṃ gurvadhyayanapūrvakam, bhāratādhyayanavācyatvāt, idānīṃtanabhāratādhyayanavat iti .. ### [1.4.13](https://indike.org/pramana/in.darsana.nyaya.nyayamanjari.1.4.13) nanu ! bhārate kartṛsmṛtiravigītā vidyate; yadyevaṃ vede'pi prajāpatiḥ kartā smaryata eva .. ### [1.4.14](https://indike.org/pramana/in.darsana.nyaya.nyayamanjari.1.4.14) atha vaidikamantrārthavādamūleyaṃ prajāpatikartṛtvasmṛtiḥ; prajāpatinā catvāro vedā asṛjyanta, catvāro varṇāḥ catvāra āśramāḥ iti tatra pāṭhāditi—ucyate—hanta tarhi bhārate'pi tatratyavacanamūlaiva pārāśaryasmṛtiriti śakyate vaktum .. ### [1.4.15](https://indike.org/pramana/in.darsana.nyaya.nyayamanjari.1.4.15) yathā prajāpatirvede tatra tatra praśasyate . bhārate'pi tathā vyāsaḥ tatra tatra praśasyate .. 2 .. ### [1.4.16](https://indike.org/pramana/in.darsana.nyaya.nyayamanjari.1.4.16) atha praṇetā vedasya na dṛṣṭaḥ kenacit kvacit . dvaipāyano'pi kiṃ dṛṣṭaḥ bhavatpitṛpitāmahaiḥ .. 3 .. ### [1.4.17](https://indike.org/pramana/in.darsana.nyaya.nyayamanjari.1.4.17) sarveṣāmavigītā cet smṛtiḥ satyavatīsute . prajāpatirapi sraṣṭā loke sarvatra gīyate .. 4 .. ### [1.4.18](https://indike.org/pramana/in.darsana.nyaya.nyayamanjari.1.4.18) āha—kimiti sadasadvivekavikalaśākaṭikādipravādavipralabdhaḥ evaṃ bhrāmyasi ? kila svalpamapi karma pitrā mātrā vopadiśyamānaṃ tadvacanapratyayādanuṣṭhīyate . tadayamiyān anekakleśavittavyayādinirvartyo vaidikaḥ karmakalāpaḥ evameva tadupadeśinamāptaṃ saṃsmṛtvaiva kriyate iti mahān pramādaḥ .. ### [1.4.19](https://indike.org/pramana/in.darsana.nyaya.nyayamanjari.1.4.19) evañca sati uccāvacakaviracitajaratpustakalikhitakāvyavat asmaryamāṇakartṛkeṇa vedena vyavahārānupapatteḥ avaśyasmaraṇīyaḥ tatra kartā syāt . na ca kadācana vedeṣu vyavahāravicchedaḥ saṃbhāvyate, yena tatkṛtaṃ jaratkūpārāmādiṣviva teṣu kartrasmaraṇaṃ syāt . tasmādavaśyaṃ smaryeta kartā . na ca saṃsmaryate, smartuṃ śakyate vā ? smṛtirhi bhavantī tadanubhavamūlā bhavati . na ca mūle'pi kartranubhavaḥ kasyacijjātaḥ, sargāderabhāvāt . bhāve vā karturaśarīratvena darśanayogyatvābhāvāt .. ### [1.4.20](https://indike.org/pramana/in.darsana.nyaya.nyayamanjari.1.4.20) saśarīratvapakṣe vā puruṣaḥ ko'pi tādṛśaḥ . tadānīṃ dṛśyamāno'pi vedaṃ kurvanna dṛśyate .. 5 .. ### [1.4.21](https://indike.org/pramana/in.darsana.nyaya.nyayamanjari.1.4.21) adhīyamāne dṛṣṭe'smin tadā saṃśerate janāḥ . kimeṣa racayedvedaṃ uta vā'nyakṛtaṃ paṭhet ? .. 6 .. ### [1.4.22](https://indike.org/pramana/in.darsana.nyaya.nyayamanjari.1.4.22) yatkṛtaṃ vā paṭhedeṣaḥ tasminnapi hi saṃśayaḥ . bhaṅgyā cedamanāditvaṃ unmīladiva dṛśyate .. 7 .. ### [1.4.23](https://indike.org/pramana/in.darsana.nyaya.nyayamanjari.1.4.23) asatyādipramāṇe ca kartṛtā'nubhavaṃ prati . smṛtiḥ prabandhasiddhā'pi spṛśatyandhaparamparām .. 8 .. ### [1.4.24](https://indike.org/pramana/in.darsana.nyaya.nyayamanjari.1.4.24) yogibhirgrahaṇaṃ kartuḥ ityetadapi durvacam . kartṛtā hṛdi durbodhā kathaṃ gṛhyeta tairapi ? .. 9 .. ### [1.4.25](https://indike.org/pramana/in.darsana.nyaya.nyayamanjari.1.4.25) yogibhissā gṛhīteti vayametanna manmahe . amanvānāśca gacchema visrabdhāstatpathaṃ katham ? .. 10 .. ### [1.4.26](https://indike.org/pramana/in.darsana.nyaya.nyayamanjari.1.4.26) vedāt kartravabodhe tu spaṣṭamanyonyasaṃśrayam . tato vedapramāṇatvaṃ vedāt kartuśca niścayaḥ .. 11 .. ### [1.4.27](https://indike.org/pramana/in.darsana.nyaya.nyayamanjari.1.4.27) tasmāt paurvāparyaparyālocanārahitayathāśrutamantrārthavādamūlā bhrāntireṣā, na punaḥ paramārthataḥ kaścit kañcit vedasya kartāraṃ smarati . tasmāt akṛtakā vedāḥ; avaśyasmaraṇīyasyāpi kartuḥ asmaraṇāt . na ca vyadhikaraṇo hetuḥ; asmaryamāṇakartṛkatvādityevaṃ sādhanaprayogāt .. ### [1.4.28](https://indike.org/pramana/in.darsana.nyaya.nyayamanjari.1.4.28) atrocyate—api tat gurvadhyayanapūrvakatvaṃ sādhanamupekṣitaṃ yājñikaiḥ ! ayamabhinavo hetuḥ asmaryamāṇakartṛkatvāt iti prayuktaḥ ! ### [1.4.29](https://indike.org/pramana/in.darsana.nyaya.nyayamanjari.1.4.29) tasmādastu nāma ! nainān hetbantaropanyāsinaḥ nigṛhṇīmaḥ . akṣudakatheyaṃ prastutā .. ### [1.4.30](https://indike.org/pramana/in.darsana.nyaya.nyayamanjari.1.4.30) ayamapi asmaryamāṇakartṛkatvāditi hetuḥ kiṃ svatantra evākartṛkatvasiddhaye prayujyate ? uta asmaduparacitaracanātvapratighātāya ? iti .. ### [1.4.31](https://indike.org/pramana/in.darsana.nyaya.nyayamanjari.1.4.31) tatra na tāvadanumānaṃ anumānāntaraparipanthi kathayitumucitam; pratyakṣāgamavat anumānasyāpyanumānabādhakatvānupapatteḥ . na hi tulyabalayoḥ anumānayoḥ bādhyabādhakabhāvaḥ, tulyabalatvādeva . atulyabalatve tu yatkṛtaṃ anyatarasya daurbalyaṃ, tata eva tadaprāmāṇyasiddheḥ kimanumānabādhayā ? ### [1.4.32](https://indike.org/pramana/in.darsana.nyaya.nyayamanjari.1.4.32) tadviḍambanārthaṃ tadabhidhānamiti cet; tadapyayuktam . ekatra dharmiṇi yugapaditaretaravirodhidharmadvayaprayojakahetudvayopanipātāyogāt . na hi dvyātmakāni vastūni bhavitumarhanti ityavaśyamanyataraḥ tatrāprayojakahetuḥ . aprayojakatvādeva tasyāgamakatve kiṃ viḍambanārthena hetvantareṇa prayuktena . viruddhāvyabhicāryapi nāma na kaściddhetvābhāsa iti vakṣyāmaḥ 11 āhnike .. ### [1.4.33](https://indike.org/pramana/in.darsana.nyaya.nyayamanjari.1.4.33) prakaraṇasamo'pi na yaḥ kaścit satpratipakṣo heturiṣyate, api tu saṃśayabījabhūtaḥ anyataraviśeṣānupalambhaḥ bhrāntyā hetutvena prayujyamānaḥ tathocyata iti darśayiṣyāmaḥ 11 āhnike . tasmāt parodīritaṃ hetuṃ nirācikīrṣatā vādinā tadgatapakṣavṛttitādidharmaparīkṣaṇe manaḥ khedanīyam . na hi pratihetvanveṣiṇā vṛthā'ṭāṭyā kartavyā .. ### [1.4.34](https://indike.org/pramana/in.darsana.nyaya.nyayamanjari.1.4.34) nanu ! kataradanayoḥ sādhanayoraprayojakaṃ—racanātvāt, asmaryamāṇakartṛkatvāditi ca—ucyate—racanātvameva prayojakam . na hi puruṣamantareṇa kvacidakṣaravinyāsa iṣṭavya .. ### [1.4.35](https://indike.org/pramana/in.darsana.nyaya.nyayamanjari.1.4.35) bho bhagavantaḥ sabhyāḥ ! kvedaṃ dṛṣṭaṃ kva vā śrutaṃ loke . yadvākyeṣu padānāṃ racanā naisargikī bhavati .. 12 .. ### [1.4.36](https://indike.org/pramana/in.darsana.nyaya.nyayamanjari.1.4.36) yadi svābhāvikī vede padānāṃ racanā bhavet . paṭe hi hanta tantūnāṃ kathaṃ naisargikī na sā ? .. 13 .. ### [1.4.37](https://indike.org/pramana/in.darsana.nyaya.nyayamanjari.1.4.37) śanno devīrabhiṣṭayeatha. saṃ. 1-6-1, nārāyaṇaṃ namaskṛtya ma. bhā. ā. 1-1, astyuttarasyāṃ diśi devatātmākumārasaṃ. 1-1 iti tulye racanātve kvacit kartṛpūrvakatvaṃ, aparatra tadviparyaya iti mahān vyāmohaḥ . evaṃ hi dhūmo'pi kaścit anannika ityapi syāt .. ### [1.4.38](https://indike.org/pramana/in.darsana.nyaya.nyayamanjari.1.4.38) kimidānīṃ kumārasaṃbhavatulyo'sau vedaḥ saṃpannaḥ ? aho ! sarvāstikadhuryeṇa vedaprāmāṇyaṃ sādhitaṃ naiyāyikena ! ### [1.4.39](https://indike.org/pramana/in.darsana.nyaya.nyayamanjari.1.4.39) alamupahāsena ! racanāmātrameva tulyaṃ vedasya kumārasaṃbhavena, nānyat . na ceyatopahasituṃ yuktam . kimasya śabdatvasāmānyaṃ śaṅkhaśabdasādhāraṇaṃ nāsti ? sattāsāmānyaṃ vā sarvasādhāraṇamiti .. ### [1.4.40](https://indike.org/pramana/in.darsana.nyaya.nyayamanjari.1.4.40) nanu ! yāḥ kālidāsādiracanāḥ kartṛpūrvikāḥ . tābhyo vilakṣaṇaiveyaṃ racanā bhāti vaidikī .. 14 .. ### [1.4.41](https://indike.org/pramana/in.darsana.nyaya.nyayamanjari.1.4.41) ihādhyayanavelāyāṃ rūpādeva pratīyate . akṛtrimatvaṃ vedasya bhedaistaistairananyagaiḥ .. 15 .. ### [1.4.42](https://indike.org/pramana/in.darsana.nyaya.nyayamanjari.1.4.42) nāmākhyātopasargādiprayogagatayo navāḥ . stutinindāpurākalpaparakṛtyādigītayaḥ .. 16 .. ### [1.4.43](https://indike.org/pramana/in.darsana.nyaya.nyayamanjari.1.4.43) śākhāntaroktasāpekṣavikṣiptārthopavarṇanā . ityādayo na dṛśyante laukike sannibandhane .. 17 .. ### [1.4.44](https://indike.org/pramana/in.darsana.nyaya.nyayamanjari.1.4.44) tenādhyetṛgaṇāḥ sarve rūpāt vedamakṛtrimam . manyanta eva loke tu pītaṃ mīmāṃsakairyaśaḥ .. 18 .. ### [1.4.45](https://indike.org/pramana/in.darsana.nyaya.nyayamanjari.1.4.45) vedā na paṭhitā yaistu tvādṛśaiḥ kuṇṭhabuddhibhiḥ . kāryatvaṃ bruvate te'sya racanāsāmyamohitāḥ .. 19 .. ### [1.4.46](https://indike.org/pramana/in.darsana.nyaya.nyayamanjari.1.4.46) ucyate—mīmāṃsakāḥ yaśaḥ pibantu ! payo vā pibantu ! buddhijāḍyāpanayanāya brāhmīghṛtaṃ vā pibantu ! vedastu puruṣapraṇīta eva, nātra bhrāntiḥ .. ### [1.4.47](https://indike.org/pramana/in.darsana.nyaya.nyayamanjari.1.4.47) yathā ghaṭādisaṃsthānāt bhinnamapyacalādiṣu . saṃsthānaṃ kartṛmat siddhaṃ vede'pi racanā tathā .. 20 .. ### [1.4.48](https://indike.org/pramana/in.darsana.nyaya.nyayamanjari.1.4.48) yaccātra kiñcidvaktavyaṃ, tat pūrvameva pu. 491 savistaramuktam .. ### [1.4.49](https://indike.org/pramana/in.darsana.nyaya.nyayamanjari.1.4.49) api ca yadvilakṣaṇeyaṃ racanā, tadvilakṣaṇa eva kartā'numīyatām ! na punastadapalāpo yuktaḥ ityapyuktam pu. 503 .. ### [1.4.50](https://indike.org/pramana/in.darsana.nyaya.nyayamanjari.1.4.50) yāścaitāḥ nirvivādasidvakartṛkāḥ kālidāsādiracanāḥ camatkāriṇyaḥ, tāsāmanyonyavisadṛśaṃ rūpamupalabhyata eva .. ### [1.4.51](https://indike.org/pramana/in.darsana.nyaya.nyayamanjari.1.4.51) amṛteneva saṃsiktāḥ candaneneva carcitāḥ . candrāṃśubhirivonmṛṣṭāḥ kālidāsasya sūktayaḥ .. 21 .. ### [1.4.52](https://indike.org/pramana/in.darsana.nyaya.nyayamanjari.1.4.52) prakaṭarasānuguṇavikaṭākṣararacanācamatkāritasakalakavikulāḥ bāṇasya vācaḥ . pratikāvyaṃ ca tāni tāni vaicitryāṇi dṛśyanta eva . nāmākhyātādivaicitryamātreṇa kartrabhāvo vede rūpādeva pratīyata iti nūtaneyaṃ vācoyuktiḥ .. ### [1.4.53](https://indike.org/pramana/in.darsana.nyaya.nyayamanjari.1.4.53) api ca yadi rūpe samāśvasiti bhavato manaḥ—tadā ādimadarthābhidhānamapi vedasya rūpaṃ kathaṃ na parīkṣase ? babaraḥ prāvāhaṇirakāmayata tai. saṃ. 7-1-10, kusurabinda auddālakirakāmayata tai. saṃ. 7-2-2, 'purūravo mā prapataḥ ṛ. 10-95-15 iti .. ### [1.4.54](https://indike.org/pramana/in.darsana.nyaya.nyayamanjari.1.4.54) pratisargaṃ punasteṣāṃ bhāvāt anāditvamiti cet pratisargaṃ tarhi vedānyatvamapi bhaviṣyati . yathoktam— ### [1.4.55](https://indike.org/pramana/in.darsana.nyaya.nyayamanjari.1.4.55) pratimanvantaraṃ caiṣā śrutiranyā'bhidhīyate iti . rūpādakṛtrimattve ca kalpanā kalpitaiva sā . ādimadvastubuddhistu vācakairakṣaraiḥ sphuṭaiḥ .. 22 .. ### [1.4.56](https://indike.org/pramana/in.darsana.nyaya.nyayamanjari.1.4.56) teṣāmanyathāvyākhyānaṃ tu vyākhyānameva . paṭhanta eva tvadhyetāraḥ tata ādimato'rthān bahūn avagacchantīti nānādirvedaḥ . tasmānna racanātvamaprayojakam .. ### [1.4.57](https://indike.org/pramana/in.darsana.nyaya.nyayamanjari.1.4.57) kartrasmaraṇameva tvaprayojakam, asiddhatvāt . siddhamapi vā vede kartrasmaraṇamanyathāsiddham . vedakaraṇakālasya atidavīyastvāt, tatpraṇetuśca puṃsaḥ sakalapuruṣavilakṣaṇatvāt, niyataśarīraparigrahābhāvāt idantayā'sya pāṇinipiṅgalādivat smaraṇaṃ nāsti; na tu sa nāstyeva . anumānāgamābhyāṃ tadavagamāt kathaṃ pakṣadharmatayā grahītuṃ śakyate kartrasmaraṇam ? ### [1.4.58](https://indike.org/pramana/in.darsana.nyaya.nyayamanjari.1.4.58) taddhyekapuruṣasambandhi vyabhicarati . sarvapuruṣasambandhi tu duravagamam . sarve pumāṃsaḥ kartāraṃ vedasya na smarantīti kathaṃ jānāti bhavān ? na hi tava sakalalokahṛdayāni pratyakṣāṇi; sarvajñatvaprasaṅgāt . na ca yat tvaṃ na jānāsi, tat anyo'pi na jānātīti yuktam; atiprasaṅgāt . tasmādasmaryamāṇakartṛkatvaṃ durbodhameva .. ### [1.4.59](https://indike.org/pramana/in.darsana.nyaya.nyayamanjari.1.4.59) api ca karturasmaraṇe sati sutarāṃ vedārthānuṣṭhānaṃ prekṣāvatāṃ śithilībhavet . na hyakartṛka evopadeśaḥ saṃbhavati . saṃbhavannapi vā prāmāṇyaniścayanimittābhāvāt kathaṃ visraṃbhabhūmirasau bhavet . bādhakābhāvamātrācca na prāmāṇyaniścayo vacasāmityuktaṃ prākpu. 483 . tasmāt āptapratyayādeva nirvicikitsaṃ vedārthānuṣṭhānaṃ sapratiṣṭhānaṃ saṃbhavati, nānyatheti . tasmānna kartrasmaraṇasya racanātvapratipakṣatayopanyāsaḥ upapannaḥ .. ### [1.4.60](https://indike.org/pramana/in.darsana.nyaya.nyayamanjari.1.4.60) nāpi svatantramevedaṃ kartrabhāvasādhanaṃ bhavitumarhati . anupalabdhiriyamanena prakāreṇa kilocyate . sā'nupapannā, anumānena karturupalambhāt . anumānenāpi yadupalabdhaṃ tadupalabdhameva bhavati .. ### [1.4.61](https://indike.org/pramana/in.darsana.nyaya.nyayamanjari.1.4.61) nanu kartrabhāvasmaraṇabādhitatvāt anumānamidaṃ ayuktam— itaretarāśrayaprasaṅgāt— anupalabdhau siddhāyāṃ anumānanirāsaḥ, anumānanirāse ca sati anupalabdhisiddhiḥ .. ### [1.4.62](https://indike.org/pramana/in.darsana.nyaya.nyayamanjari.1.4.62) anumānaprāmāṇye'pi samāno doṣa iti cet—na—tasya pratibandhamahimnā prāmāṇyasiddheḥ . na hi tasyānupalabdhinirāsāpekṣaṃ prāmāṇyam .. ### [1.4.63](https://indike.org/pramana/in.darsana.nyaya.nyayamanjari.1.4.63) tatraitat syāt—na vayaṃ kartrabhāve prāmāṇyaṃ brūmaḥ . sakalalokapadārthavyavahāriṇo hi mīmāṃsakāḥ . paraṃ tu vedasya pauruṣeyatāṃ bruvāṇaṃ pramāṇaṃ pṛcchāmaḥ . taccāsya nāstīti balādanupalabdhyā tadabhāvaniścayo vyavatiṣṭhata iti—syādetadevam—yadyanumānaṃ na syāt . uktaṃ ca racanātvāt ityanumānam .. ### [1.4.64](https://indike.org/pramana/in.darsana.nyaya.nyayamanjari.1.4.64) yatpunaravādi—vedeṣu puruṣasya kartṛtvamaśakyaṃ grahītumiti pu. 513—tadapyasādhu—parokṣasya kuvindāderabhinavaprāvarakapaṭādau kārye kathaṃ kartṛtā'vagamyate ? ### [1.4.65](https://indike.org/pramana/in.darsana.nyaya.nyayamanjari.1.4.65) paṭādiracanāṃ dṛṣṭvā tasya cet sā'numīyate . vede'pi racanāṃ dṛṣṭvā kartṛtvaṃ tasya gamyatām .. 23 .. ### [1.4.66](https://indike.org/pramana/in.darsana.nyaya.nyayamanjari.1.4.66) śarīraparigrahamantareṇa prāṇināmupadeśasya kartumaśakyatvāt kadācidīśvaraḥ śarīramapi gṛhṇīyāditi kalpyate . niyataśarīraparigrahābhāvācca vyāsādivadasau na smaryate . tataśca— ### [1.4.67](https://indike.org/pramana/in.darsana.nyaya.nyayamanjari.1.4.67) adya sadyaḥ kaviḥ kāvye yathā karteti mīyate . tathā tatkālajaiḥ puṃbhiḥ so'pi karteti māsyate .. 24 .. ### [1.4.68](https://indike.org/pramana/in.darsana.nyaya.nyayamanjari.1.4.68) yathā parakṛtā śaṅkā tasmin kāvye vyapaiti te . vede'pyanyakṛtā śaṅkā tathā teṣāṃ vyapaiṣyati .. 25 .. ### [1.4.69](https://indike.org/pramana/in.darsana.nyaya.nyayamanjari.1.4.69) parokṣamanumānena yacca budhyāmahe vayam . pratyakṣaṃ yogināṃ taccetyuktaṃ pratyakṣalakṣaṇe .. 26 .. ### [1.4.70](https://indike.org/pramana/in.darsana.nyaya.nyayamanjari.1.4.70) pratyakṣamanumānaṃ ca tadevaṃ kartṛtāmitau . mūlapramāṇamastīti smṛtau nāndhaparaṃparā .. 27 .. ### [1.4.71](https://indike.org/pramana/in.darsana.nyaya.nyayamanjari.1.4.71) mantrārthavādamūlatvaṃ tata eva na tatsmṛteḥ . yathoditānumānādipramāṇāntarasaṃbhavāt .. 28 .. ### [1.4.72](https://indike.org/pramana/in.darsana.nyaya.nyayamanjari.1.4.72) yadapi itaretarāśrayamabhāṣi pu. 491—puruṣokte vedeprāmāṇyaṃ, vedaprāmāṇyāt puruṣasiddhiriti—tadapi na samyak; pūrvaṃ pu. 503 parihṛtatvāt . anumānāt prasiddhe kartari vedavākyaiḥ tatpratīterupodbalanamiṣyate, na tvāgamaikaśaraṇa eva kartravagamaḥ . uktaṃ ca pūrvamapi pu. 491 pṛthivyādinā kāryeṇa karturanumānam .. ### [1.4.73](https://indike.org/pramana/in.darsana.nyaya.nyayamanjari.1.4.73) kiṃ yenaiva kartrā pṛthivyādikāryaṃ nirmitaṃ, tenaiva vaidikyo racanā nirmitāḥ ? iti cet—omityucyate . kimatra pramāṇam ? iti cet— ### [1.4.74](https://indike.org/pramana/in.darsana.nyaya.nyayamanjari.1.4.74) ucyate, tarhi sarvajñaḥ sraṣṭuṃ prabhavatīdṛśam . vicitraṃ prāṇibhṛtkarmaphalabhogāśrayaṃ jagat .. 29 .. ### [1.4.75](https://indike.org/pramana/in.darsana.nyaya.nyayamanjari.1.4.75) tatkarmaphalasambandhavidā tadupadeśinaḥ . tenaiva vedā racitāḥ iti nānyasya kalpanā .. 30 .. ### [1.4.76](https://indike.org/pramana/in.darsana.nyaya.nyayamanjari.1.4.76) ekenaiva ca siddhe'rthe dvitīyaṃ kalpayema kim ? anekakalpanābījaṃ na hi kiñcana vidyate .. 31 .. ### [1.4.77](https://indike.org/pramana/in.darsana.nyaya.nyayamanjari.1.4.77) jagatsarge tāvat, eka eveśvara iṣyate na dvau, bahavo vā . bhinnābhinnāśayakalpane, ekatra vaiyarthyāt . itaratra vyabahāravaiśasaprasaṅgena, tata ekasyeśvaratvavighātāt . tathā hi— ### [1.4.78](https://indike.org/pramana/in.darsana.nyaya.nyayamanjari.1.4.78) anekeśvaravādo hi nātīva hṛdayaṅgamaḥ . te cet sadṛśasaṅkalpāḥ, ko'rtho bahubhirīśvaraiḥ ? .. 32 .. ### [1.4.79](https://indike.org/pramana/in.darsana.nyaya.nyayamanjari.1.4.79) saṃkalpayati yadekaḥ śubhamaśubhaṃ vā'pi satyasaṅkalpaḥ . tatsidhyati tadvibhavāt ityaparastatra kiṃ kuryāt .. 33 .. ### [1.4.80](https://indike.org/pramana/in.darsana.nyaya.nyayamanjari.1.4.80) bhinnābhiprāyatāyāṃ tu kāryavipratiṣedhataḥ . nūnamekaḥ svasaṅkalpavihatyā'nīśvaro bhavet .. 34 .. ### [1.4.81](https://indike.org/pramana/in.darsana.nyaya.nyayamanjari.1.4.81) ekasya kila saṅkalpaḥ rājā'yaṃ kriyatāmiti . hanyatāmiti cānyasya tau samāviśataḥ katham .. 35 .. ### [1.4.82](https://indike.org/pramana/in.darsana.nyaya.nyayamanjari.1.4.82) rājyasaṅkalpasāphalye vihatā badhakāmanā . tasyāḥ saphalatāyāṃ vā rājyasaṅkalpaviplavaḥ .. 36 .. ### [1.4.83](https://indike.org/pramana/in.darsana.nyaya.nyayamanjari.1.4.83) tena citrajagatkāryasaṃvāhānuguṇāśayaḥ . eka eveśvaraḥ sraṣṭā jagatāmiti sādhitam .. 37 .. ### [1.4.84](https://indike.org/pramana/in.darsana.nyaya.nyayamanjari.1.4.84) evaṃ jagatsargavat sa eva vedānāmapyekaḥ praṇetā bhavitumarhati . nānātvakalpanāyāṃ pramāṇābhāvāt, kalpanāgauravaprasaṅgācca .. ### [1.4.85](https://indike.org/pramana/in.darsana.nyaya.nyayamanjari.1.4.85) tena yaducyate— ### [1.4.86](https://indike.org/pramana/in.darsana.nyaya.nyayamanjari.1.4.86) nanvekaḥ sarvaśākhānāṃ kartetyavagataṃ kutaḥ ? bahavo bahubhirgranthāḥ kathaṃ na racitā ime ? .. 38 .. ### [1.4.87](https://indike.org/pramana/in.darsana.nyaya.nyayamanjari.1.4.87) iti—tatparihṛtaṃ bhavati .. ### [1.4.88](https://indike.org/pramana/in.darsana.nyaya.nyayamanjari.1.4.88) ataśca ekakartṛkā vedāḥ, yataḥ parasparavyatiṣaktārthopadeśino dṛśyante . ekameva hi karma vedacatuṣṭayopadiṣṭaiḥ pṛthagbhūtairapyekārtha samavāyibhiraṅgaiḥ anvitaṃ prayujyate . tatra hi hautraṃ ṛgvedena, yajurvedenādhvaryavaṃ, audgātraṃ sāmavedena, brahmatvamatharvavedena ca kriyate . paippalādiśākhābhedopadiṣṭaṃ ca tattadaṅgajātaṃ tatra tatrāpekṣyate . tatra sarvaśākhāpratyayaṃ ekaṃ karmetyāhuḥ . etacca adūra eva agre pu. 590 nirṇeṣyate .. ### [1.4.89](https://indike.org/pramana/in.darsana.nyaya.nyayamanjari.1.4.89) ekābhiprāyabaddhatvaṃ tena sarvatra gamyate . bhavedbhinnāśayānāṃ hi kathamekārthamīlanam ? .. 39 .. ### [1.4.90](https://indike.org/pramana/in.darsana.nyaya.nyayamanjari.1.4.90) kāvyasamasyāpūraṇe kā vārtā ? iti cet— ### [1.4.91](https://indike.org/pramana/in.darsana.nyaya.nyayamanjari.1.4.91) tatrāpi prathamasyaiva kavestadvastudarśanāt . tadabhiprāyavedī tu so'nyastamanuvartate .. 40 .. ### [1.4.92](https://indike.org/pramana/in.darsana.nyaya.nyayamanjari.1.4.92) anyathā'nanvitaṃ kāvyaṃ syādviśvavasukāvyavat . anvitatve tu sā nūnaṃ ādyasyaiva kavermatiḥ .. 41 .. ### [1.4.93](https://indike.org/pramana/in.darsana.nyaya.nyayamanjari.1.4.93) ihāpyekāśayābhijñadvitīyeśvarakalpane . ekābhiprāyataiva syāt, kiṃ ca tatkalpane phalam ? .. 42 .. ### [1.4.94](https://indike.org/pramana/in.darsana.nyaya.nyayamanjari.1.4.94) tasmādeka eva kartā sarvaśākhānām . kāṭhakādivyapadeśastu prakṛṣṭādhyayananibandhano bhaviṣyatīti bhavadbhirapyuktam .. ### [1.4.95](https://indike.org/pramana/in.darsana.nyaya.nyayamanjari.1.4.95) api ca yathā tarorvikṣiptāḥ śākhā bhavanti, na ca kṛtsnaṃ puṣpaphalapatramekasyāṃ śākhāyāṃ sannihitaṃ bhavati, kintu kasyāñcitkasyāñcit; evaṃ vedasyāpi śākhāḥ pṛthagaṅgakarmopadeśinyo vikṣiptāśca .. ### [1.4.96](https://indike.org/pramana/in.darsana.nyaya.nyayamanjari.1.4.96) tāsāṃ ca vṛkṣaśākhānāṃ ekasmājjanmabījataḥ . tathaiva sarvaśākhānāṃ ekasmāt puruṣottamāt .. 43 .. ### [1.4.97](https://indike.org/pramana/in.darsana.nyaya.nyayamanjari.1.4.97) kartā ya eva jagatāmakhilātmavṛtti- karmaprapañcaparipākavicitratājñaḥ . viśvātmanā tadupadeśaparāḥ praṇītāḥ tenaiva vedaracanā iti yuktametat .. 44 .. ### [1.4.98](https://indike.org/pramana/in.darsana.nyaya.nyayamanjari.1.4.98) āptaṃ tameva bhagavantamanādimīśaṃ āśritya viśvasiti vedavacassu lokaḥ . teṣāmakartṛkatayā na hi kaścidevaṃ visrambhameti matimāniti varṇitaṃ prāk .. 45 .. ### [1.4.99](https://indike.org/pramana/in.darsana.nyaya.nyayamanjari.1.4.99) evañca padavākyaracanādau tāvat vedeṣu puruṣāpekṣitvamupapāditam .. ### [1.4.100](https://indike.org/pramana/in.darsana.nyaya.nyayamanjari.1.4.100) yadapi sambandhakaraṇe puruṣānapekṣatvamucyate—citrabhānoriva dahanaśaktiḥ śabdasya naisargikī vācakaśaktiḥ . vyutpattistu vṛddhebhya eva vyavaharamāṇebhya upalabhyata iti kimatra puruṣaḥ kariṣyati ? iti—tadapyaghaṭamānam—puruṣaparighaṭitasamayasambandhavyatirekeṇa śabdādarthapratyayānupapatteḥ .. ### [1.4.101](https://indike.org/pramana/in.darsana.nyaya.nyayamanjari.1.4.101) nanu ! naiva śabdasyārthena sambandhaḥ kaścidasti . kasyedaṃ puruṣasāpekṣatvaṃ vā, nirapekṣatvaṃ vā cintyate ? ### [1.4.102](https://indike.org/pramana/in.darsana.nyaya.nyayamanjari.1.4.102) na hi śabdārthayoḥ kuḍyabadarayoriva saṃyogasvabhāvaḥ, tantupaṭayoriva samavāyātmā vā sambandhaḥ pratyakṣa upalabhyate . tanmūlatvācca sambandhāntarāṇyapi na santi . taduktaṃ mukhe śabdamupalabhāmahe, bhūmāvartham iti .. ### [1.4.103](https://indike.org/pramana/in.darsana.nyaya.nyayamanjari.1.4.103) nāpyanumīyate śabdasyārthena sambandhaḥ; kṣuramodakaśabdoccāraṇe mukhasya pāṭanapūraṇānupalambhāt . na ca śabdadeśe arthaḥ saṃbhavati, na cārthadeśe śabdaḥ; sthānakaraṇaprayatnānāṃ taddhetūnāṃ ghaṭādyarthapradeśe'nupalambhāt . vyāpakatvaṃ tu śabdasya pratiṣiddhameva .. ### [1.4.104](https://indike.org/pramana/in.darsana.nyaya.nyayamanjari.1.4.104) ucyate—na saṃśleṣalakṣaṇaḥ śabdārthasambandhaḥ asmābhirabhyupagamyate . tat kiṃ kāryakāraṇanimittanaimittikāśrayāśrayibhāvādayaḥ śabdasyārthena sambandhāḥ ? ete'pi na tarām .. ### [1.4.105](https://indike.org/pramana/in.darsana.nyaya.nyayamanjari.1.4.105) na tarhi tasya kaścidarthena sambandhaḥ ? na nāsti śabdasyārthena sambandhaḥ, pratyayanimittahetutvāt; dhūmādivat .. ### [1.4.106](https://indike.org/pramana/in.darsana.nyaya.nyayamanjari.1.4.106) tat kiṃ śabdārthayoravinābhāvaḥ sambandhaḥ ? so'pi nāsti; evaṃ hi śabdo'numānameva syāt .. ### [1.4.107](https://indike.org/pramana/in.darsana.nyaya.nyayamanjari.1.4.107) kastarhi ? samaya iti brūmaḥ .. ### [1.4.108](https://indike.org/pramana/in.darsana.nyaya.nyayamanjari.1.4.108) ko'yaṃ samayo nāma ? abhidhānābhidheyaniyamaniyogaḥ samaya ucyate .. ### [1.4.109](https://indike.org/pramana/in.darsana.nyaya.nyayamanjari.1.4.109) yadyevaṃ kimanāśaṅkanīyasaṃśleṣaparicodanena ? taddūṣaṇena ca ?— ucyate—śabdārthābhedavādināṃ hi vaiyākaraṇānāṃ eṣa saṃśleṣarūpaḥ sambandho balādāpatatīti ta eva pratikṣepyante .. ### [1.4.110](https://indike.org/pramana/in.darsana.nyaya.nyayamanjari.1.4.110) āha—yadi vaiyākaraṇavarṇito na saṃśleṣa upapattimān, samayo'yamanupapanna eva . sa hi puruṣakṛtaḥ saṅketaḥ . na ca puruṣecchayā vastuniyamo'vakalpate, tadicchāyā avyāhataprasaratvāt .. ### [1.4.111](https://indike.org/pramana/in.darsana.nyaya.nyayamanjari.1.4.111) artho'pi kimiti vācako na bhavati, śabdaśca vācyaḥ . na caivamasti—dahanamanicchannapi puruṣaḥ dhūmāt na taṃ pratyeti; jalaṃ vā tata icchannapi pratipadyate . tatra yathā dhūmāgnyoḥ naisargika evāvinābhāvo nāma sambandhaḥ, jñaptaye tu bhūyodarśanādi nimittamāśrīyate evaṃ śabdārthayoḥ sāṃsiddhika eva śaktyātmā sambandhaḥ, tadvyutpattaye tu vṛddhavyavahāraprasiddhisamāśrayaṇam .. ### [1.4.112](https://indike.org/pramana/in.darsana.nyaya.nyayamanjari.1.4.112) svābhāvike sambandhe sati dīpādivat kiṃ tadvyutpattyapekṣaṇeneti cet—na—śabdasya jñāpakatvāt . jñāpakasya dhūmādeḥ etat rūpaṃ, yat sambandhagrahaṇāpekṣaṃ svajñāpyajñāpakatvam . udyotādayastu pratyakṣasāmagryantargatatvāt na vyutpattyapekṣyā bhavanti . śaktistu naisargikī yathā rūpaprakāśinī dīpādeḥ, tathā śabdasyārthapratipādane . tasmāt na samayamātrāt arthapratipattiḥ .. ### [1.4.113](https://indike.org/pramana/in.darsana.nyaya.nyayamanjari.1.4.113) api ca abhidhānābhidheyaniyamaniyogarūpaḥ samayaḥ jñānameva, na tato'rthāntaram . jñānaṃ cātmani vartate, na ca śabdārthayoriti na tayoḥ sambandhaḥ syāt .. ### [1.4.114](https://indike.org/pramana/in.darsana.nyaya.nyayamanjari.1.4.114) kiñca samayaḥ kriyamāṇaḥ, pratyuccāraṇaṃ vā kriyate ? pratipuruṣaṃ vā ? sargādau vā sakṛdīśvareṇa ? iti .. ### [1.4.115](https://indike.org/pramana/in.darsana.nyaya.nyayamanjari.1.4.115) pratyuccāraṇaṃ prāktana eva kriyate ? nūtano vā ? ### [1.4.116](https://indike.org/pramana/in.darsana.nyaya.nyayamanjari.1.4.116) navasyatāvat kriyamāṇasya kathamarthapratyāyanasāmarthyamavagamyate ? tadavagatau vā kiṃ tatkaraṇena ? pūrvakṛtasya tu kṛtatvādeva punaḥ karaṇamanupapannam . ekasya vastunaḥ jñaptirasakṛdāvartate, notpattiḥ .. ### [1.4.117](https://indike.org/pramana/in.darsana.nyaya.nyayamanjari.1.4.117) pratipuruṣamapi sambandhaḥ bhinnaḥ ? abhinno vā kriyate ? ### [1.4.118](https://indike.org/pramana/in.darsana.nyaya.nyayamanjari.1.4.118) bhedapakṣe kathamekārthasaṃjñānam—gośabdasya sāsrādimānarthaḥ, kesarādimānaśvaśabdasya ? iti .. ### [1.4.119](https://indike.org/pramana/in.darsana.nyaya.nyayamanjari.1.4.119) abhede'pi tathaiva kṛtasya karaṇāyogāt jñānameva sambandhasya karaṇam .. ### [1.4.120](https://indike.org/pramana/in.darsana.nyaya.nyayamanjari.1.4.120) sargādāvapi sakṛtsambandhakaraṇamayuktam; tathāvidhakālāsambhavādeva . na hi śabdārthavyavahārarahitaḥ kaścitkāla upapadyate . tasmānnityasyaiva sambandhasya lokato vyutpattiḥ, na punaḥ karaṇam .. ### [1.4.121](https://indike.org/pramana/in.darsana.nyaya.nyayamanjari.1.4.121) vyutpattipakṣaṃ ca na karaṇapakṣābhihitā doṣāḥ spṛśanti, pratyakṣasiddhatvāt . pratyakṣaṃ hīdamupalabhyate . vṛddhānāṃ hi svārthe vyavaharamāṇānāṃ upaśṛṇvanto bālāḥ tatastataḥ śabdāt taṃ tamarthaṃ pratiyanti . te'pi vṛddhā yadā bālā āsan, tadā anyebhyaḥ vṛddhebhyaḥ tathaiva pratipannabantaḥ . te'pyanyebhya iti nāstyādissaṃsārasyati .. ### [1.4.122](https://indike.org/pramana/in.darsana.nyaya.nyayamanjari.1.4.122) api ca samayamātraśaraṇaḥ śaktiśūnyaḥ śabdaḥ kathamakṣinikocahastasaṃjñādibhyaḥ midyeta ? sa hi tadānīṃ kaśāṅkuśapratodābhighātasthānīya eva bhavet . tathā ca śabdādarthaṃ pratipadyāmaha iti laukiko vyapadeśo bādhyeta, samayādarthaṃ pratipadyāmaha iti syāt . samayapakṣe ca yadṛcchāśabdatulyatvaṃ sarvaśabdānāṃ prāpnoti . tena gavāśvādiśabdānāṃ niyataviṣayatvaṃ na syāt .. ### [1.4.123](https://indike.org/pramana/in.darsana.nyaya.nyayamanjari.1.4.123) yatpunarucyate—jātiviśeṣe cāniyamāt nyā. sū. 2-1-57 samayarūpaḥ sambandha iti—jātiśabdenātra deśo vivakṣitaḥ . kila kvaciddeśe kaścicchabdaḥ deśāntara prasiddhamarthamutsṛjya tato'rthāntare vartate . yathā coraśabdastaskaravacanaḥ, odane dākṣiṇātyaiḥ prayujyate . etacca samayapakṣe yujyate, nitye tu sambandhe kathaṃ tadarthavyabhicāra iti—tadapyayuktam—sarvaśabdānāṃ sarvārthapratyāyanaśaktiyuktatvāt kvaciddeśe kenacidarthena vyabahāraḥ .. ### [1.4.124](https://indike.org/pramana/in.darsana.nyaya.nyayamanjari.1.4.124) ata eva cānavagatasambandhe śrute sati sandeho bhavati—kamarthaṃ pratyāyayitumanenāyaṃ śabdaḥ prayuktaḥ syāt iti . asatyāṃ hi śaktau akṛtasamaye nirālambanā pratyāyakatvā''śaṅketi .. ### [1.4.125](https://indike.org/pramana/in.darsana.nyaya.nyayamanjari.1.4.125) athavā āryadeśaprasiddha eva śabdānāmarthaḥ, itarastu mlecchajanasammato'nādaraṇīya eva . tasmāt samayapakṣasyātidaurbalyāt akṛtrima eva śabdārthayoḥ sambandha iti na tatra puruṣasya prabhaviṣṇutā . ### [1.4.126](https://indike.org/pramana/in.darsana.nyaya.nyayamanjari.1.4.126) atrocyate—na nityaḥ sambandha upapadyate; śabdavat arthavacca tṛtīyasya tasya pratyakṣādinā pramāṇena apratīyamānatvāt .. ### [1.4.127](https://indike.org/pramana/in.darsana.nyaya.nyayamanjari.1.4.127) nanu ! śaktirūpaḥ sambandha ityuktam . śaktiśca tadāśriteti kathaṃ dharmyantaravat pṛthaktayā pratīyeta ?—naitatsāṃpratam—svarūpasaha kārivyatiriktāyāḥ śakteḥ sūkṣmāyāḥ prāgeva pu. 107-114 vistarataḥ pratikṣiptatvāt . na ca śaktiḥ pratyakṣagamyā; dravyasvarūpavadanupalambhāt . nānumeyā; kāryāṇāmanyathā'pi ghaṭamānatvāt . kalpayitvā ca śaktiṃ aparihāryaḥ samayaḥ; samayamantareṇārthapratipatterasiddheḥ . siddhe ca samaye tata evārthasiddheḥ kiṃ nityasambandhāśrayaṇena ? ### [1.4.128](https://indike.org/pramana/in.darsana.nyaya.nyayamanjari.1.4.128) yattūktam—samayasya puruṣecchādhīnatvāt, tasyāśca avyāhataprasaratvāt vācyavācakavyatyayaḥ syāt iti pu. 592—tadayuktam— śaktyabhāve śabdasyaiva vācakatve yogyatvāt . kā punaḥ śaktyabhāve yogyatā'syeti cet; yo'yaṃ gatvādijātiyogaḥ kramaviśeṣopakṛtaḥ . gatvautvādisāmānyasambandho hi yasya bhavati sa vācakatve yogya iti, itarastu vācyatve . yathā dravyatvādyaviśeṣe'pi vīraṇatvādisāmānyavatāṃ kaṭaniṣpattau, tantutvādisāmānyavatāṃ ca paṭaniṣpattau . na ca tatra śaktirastītyuktam . na ca kāraṇe kāryaṃ saditi sāṅkhyairiva bhavadbhiriṣyate . tasyāmasatyāmapi śaktau sāmānyaviśeṣasambandhasya niyāmakatvāt na vācyavācakayorvyatyaya iti na śaktirūpaḥ śabdārthayoḥ sambandhaḥ .. ### [1.4.129](https://indike.org/pramana/in.darsana.nyaya.nyayamanjari.1.4.129) na ca tayoravinābhāvo dhūmāgnyoriva sambandhaḥ . tatra hi sambandhaḥ pratīyamānaḥ evaṃ pratīyate dhūmo'gniṃ vinā na bhavati iti . iha punaḥ ayamasmāt pratīyate iti . etāvatyeva vyutpattiparyavasānam . ata eva avagatipūrvikaivāvagatirihetyanumānāt śabdasya bheda uktaḥ .. ### [1.4.130](https://indike.org/pramana/in.darsana.nyaya.nyayamanjari.1.4.130) prakāśakatvamapi śabdasya samayaprasādopanatameva, na svābhāvikam . sāṃsiddhike hi tathātve bhramitvādiprayuktāt, anyato vā yataḥ kutaścit abhinavādapi dīpādiva śabdādarthapratītiḥ syāt .. ### [1.4.131](https://indike.org/pramana/in.darsana.nyaya.nyayamanjari.1.4.131) yattu naisargike'pi prakāśakatve śabdasya dhūmāderiva jñāpakatvāt sambandhagrahaṇasāpekṣatvamuktam pu. 593—sa eṣa viṣama upanyāsaḥ . na hi dhūmādeḥ pratyāyakatvaṃ svābhāvikam, analāvinābhāvitvaṃ tu tasya nijaṃ balam . tatra cāgṛhyate tasmin pratītireva na jāyate iti yuktaṃ tadgrahaṇaṃ pratītyartham . iha tu pratītiśaktireva svābhāvikī bhavatā'bhyupagamyate . sā cet svābhāvikī, kiṃ vyutpattyapekṣaṇena ? iti .. ### [1.4.132](https://indike.org/pramana/in.darsana.nyaya.nyayamanjari.1.4.132) yadi cocyate—pratyāyaka iti pratyayaṃ dṛṣṭvā'vagacchāmaḥ, na prathamaśravaṇa iti . yāvatkṛtvaḥ śrutena iyaṃ saṃjñā, ayaṃ saṃjñī ityavagamyate, tāvatkṛtvaḥ śrutādarthāvagama iti—so'yaṃ samayopayoga eva kathito bhavati . saṃjñāsaṃjñisambandho hi samaya evocyate . tadupayogamantareṇa pratyāyakatvānavagamāt na svābhāvikī śaktiḥ .. ### [1.4.133](https://indike.org/pramana/in.darsana.nyaya.nyayamanjari.1.4.133) yattvabhyadhāyi—samayasya jñānātmakatvāt ātmani vṛttiḥ, na śabdārthayoriti pu. 593—etadapyacaturaśram—tadāśrayatvābhāve'pi jñānasya tadviṣayatvopapatteḥ .. ### [1.4.134](https://indike.org/pramana/in.darsana.nyaya.nyayamanjari.1.4.134) yadapyabhāṣaṇe—samayamātraśaraṇe sṛṇipratodanodananirviśeṣe śabde śabdādarthaṃ pratipadyāmaha iti vyapadeśaḥ na syāditi pu. 594—tadapi yatkiñcit . naisargikaśaktipakṣe'pi śakterarthaṃ pratipadyāmahe, na śabdāt iti vyapadeśaḥ syāt . avinābhāvādagniṃ pratipadyāmahe, na dhūmāt iti syāt . tadaṅgatvādavinābhāvādeḥ na tathā vyapadeśa iti cet; taditaratrāpi samānam .. ### [1.4.135](https://indike.org/pramana/in.darsana.nyaya.nyayamanjari.1.4.135) dhūme hi vyāptipūrvatvaṃ śabde samayapūrvatā . nānayostadapekṣāyāṃ karaṇatvaṃ vihanyate .. 46 .. ### [1.4.136](https://indike.org/pramana/in.darsana.nyaya.nyayamanjari.1.4.136) api ca laukiko vyapadeśaḥ samayapakṣasākṣitāmeva bhajate . devadattevoktaṃ amutaḥ śabdādamumarthaṃ pratipadyasveti ityevaṃ hi vyapadiśati lokaḥ . tasmāt samaya eva .. ### [1.4.137](https://indike.org/pramana/in.darsana.nyaya.nyayamanjari.1.4.137) ataścaivaṃ deśāntare saṅketavaśena tata eva śabdādarthāntarapratipattiḥ .. ### [1.4.138](https://indike.org/pramana/in.darsana.nyaya.nyayamanjari.1.4.138) nanu ! atroktaṃ sarve śabdāḥ sarvārthapratyāyanaśaktiyuktā iti kenacidarthena kvacidvyavahāra iti pu. 595—tadetadayuktam—śaktīnāṃ bhedābhedavikalpānupapatteḥ . na śabdasvarūpāt bhinnāḥ śaktayaḥ; tathā'navabhāsāt . avyatireke ca ekasmācchabdādananyatvāt parasparamavyatirekastāsāṃ syāt . na ca bhinnakāryānumeyā bhinnāḥ śaktayaḥ; kāryabhedasyānyathā'pyupapatteḥ . sarvaśaktiyoge ca sarvārthapratyayaprasaṅgaḥ . samayopayogo niyāmaka iti cet; sa evāstu kiṃ śaktibhiḥ ? ### [1.4.139](https://indike.org/pramana/in.darsana.nyaya.nyayamanjari.1.4.139) yadapyagādi—śabdaśravaṇe sati sarvārthaviṣayasandehadarśanāt sarvatra tasya śaktiḥ kalpyata iti pu. 595—tadapyasāram—na hi śaktikṛtaḥ sandehaḥ, kintu gatvādivarṇasāmānyanibandhanaḥ . tathā ca gatvādijātimatāṃ varṇānāṃ arthe vācakatvamavagatam . amī tajjātiyogino varṇāḥ kasyārthasya vācakāḥ syuḥ ? iti bhavati sandehaḥ .. ### [1.4.140](https://indike.org/pramana/in.darsana.nyaya.nyayamanjari.1.4.140) yatpunaravādi—sa eva śabdasyārthaḥ, yatrainamāryāḥ prayuñjata, na mlecchajanaprasiddha iti pu. 595—tadetat kathamiva śapathamantareṇa pratipadyemahi . na hi mlecchadeśe'pi tadarthapratyayo na jāyate, bādhyate vā, sandigdho veti kathaṃ na śabdārthaḥ ? ### [1.4.141](https://indike.org/pramana/in.darsana.nyaya.nyayamanjari.1.4.141) āryaprasiddhirbādhiketi cet; āryaprasiddherapi mlecchaprasiddhiḥ kathaṃ na bādhikā ? akṣādivacca vikalpyamānārthopapatteḥ vyavasthitaviṣaya eva vikalpo bhaviṣyati .. ### [1.4.142](https://indike.org/pramana/in.darsana.nyaya.nyayamanjari.1.4.142) pikanematāmarasādiśabdānāṃ ca bhavadbhiḥ mlecchaprayogāt arthaniścaya āśrita eva . aveṣṭyadhikaraṇe jai. sū. 2-3-3 rājaśabdaṃ āndhraprasiddhe'rthe varṇitavanto bhavanta iti alamavāntaracintanena . tasmāt samaya eva sambandha iti yuktam . taduktaṃ jātiviśeṣe cāniyamāt nyā. sū. 2-1-57 iti .. ### [1.4.143](https://indike.org/pramana/in.darsana.nyaya.nyayamanjari.1.4.143) atha yaduktaṃ—samayaḥ pratyuccāraṇaṃ, pratipuruṣaṃ, sargādau sakṛt kriyate ? iti pu. 593—pratyuccāraṇaṃ, pratipuruṣaṃ ca tatkaraṇaṃ anabhyupagatameva dūṣitam . sargādau sakṛdeva samayakaraṇamiti naḥ pakṣaḥ .. ### [1.4.144](https://indike.org/pramana/in.darsana.nyaya.nyayamanjari.1.4.144) ata eva na sarvaśabdānāṃ yadṛcchātulyatvam . keṣāñcideva śabdānāṃ asmadādibhiradyatve saṅketakaraṇāt tata eva yadṛcchāśabdā ucyante . sargādiśca samarthita eva pu. 510 . īśvarasiddhāvapyavikalamanumānamupanyastam pu. 491-512 .. ### [1.4.145](https://indike.org/pramana/in.darsana.nyaya.nyayamanjari.1.4.145) eṣa eva cāvayorviśeṣaḥ—yadeṣa śabdārthasambandhavyabahāraḥ tavānādiḥ, mama tu jagatsargāt prabhṛti pravṛtta iti . adyatve tu śabdārthasambandhavyutpattau tulya evāvayoḥ panthāḥ . tatrāpi tvayaṃ viśeṣaḥ— yat tava śaktiparyantā vyutpattiḥ, mama tu tadvarjamiti .. ### [1.4.146](https://indike.org/pramana/in.darsana.nyaya.nyayamanjari.1.4.146) tathā ceyamiyatī vyutpattiḥ loke dṛśyate—yat ayamasya vācyaḥ, ayamasya vācaka iti, na punaḥ śaktiparyantā vyutpattiṃrasti . tathā hi—yatra śṛṅgagrāhikayā śabdamarthaṃ ca nirdiśya sambandhaḥ kriyate, tatreyantamevainaṃ kriyamāṇaṃ paśyāmaḥ—ayamasya vācyaḥ, ayamasya vācaka iti .. ### [1.4.147](https://indike.org/pramana/in.darsana.nyaya.nyayamanjari.1.4.147) yatrāpi ca vṛddhebhyaḥ vyavaharamāṇebhyaḥ vyutpadyate, tatrāpīyadevāsau jānāti—ayamarthaḥ amutaḥ śabdāt anena pratipanna iti, na tvanyā'sya kācicchaktirastīti . iyatyaiva ca vyutpattyā śabdādarthapratyayopapatteḥ, asyāścāparihāryatvāt, adhikakalpanābījābhāvācca na nityaḥ śabdārthasambandhaḥ .. ### [1.4.148](https://indike.org/pramana/in.darsana.nyaya.nyayamanjari.1.4.148) ata eva ca sambandhaḥ tripramāṇakaḥ ślo. vā. 1-1-5 samba. pari. 141 iti yat tvayocyate tadasmābhirna mṛṣyate . śabdavṛddhābhidheyāṃśca pratyakṣeṇātra paśyati iti satyam . śrotuśca pratipannatvaṃ anumānena ceṣṭayā ityetadapi satyam . anyathā'nupapattyā tu vetti śaktiṃ dvayātmikām ityetattu na satyam; anyathā'pyupapatterityuktatvāt . tasmāt dvipramāṇakaḥ sambandhaniścayaḥ, na tripramāṇakaḥ .. ### [1.4.149](https://indike.org/pramana/in.darsana.nyaya.nyayamanjari.1.4.149) tadevaṃ śabdasya naisargikaśaktyātmakasambandhābhāvāt īśvaraviracitasamayanibandhanaḥ śabdārthavyavahāraḥ nānādiḥ .. ### [1.4.150](https://indike.org/pramana/in.darsana.nyaya.nyayamanjari.1.4.150) nanu ! īśvaro'pi sambandhaṃ kurvan avaśyaṃ kenacit śabdena karoti; tasya kena kṛtaḥ sambandhaḥ ? śabdāntareṇa cet, tasyāpi kena kṛtaḥ ? tasyāpi kena ? iti na kaścidavadhiḥ . tasmādavaśyamanena sambandhaṃ kurvatā vṛddhavyavahārasiddhāḥ kecit akṛtasambandhā eva śabdā abhyupagantavyāḥ . asti cet, vyavahārasiddhiḥ; kimīśvareṇa ? kiṃ vā tatkṛtena samayena ? ityanādipakṣa eva śreyān— ### [1.4.151](https://indike.org/pramana/in.darsana.nyaya.nyayamanjari.1.4.151) ucyate— ### [1.4.152](https://indike.org/pramana/in.darsana.nyaya.nyayamanjari.1.4.152) astramāyuṣmatā jñātaṃ viṣayastu na lakṣitaḥ . asmadādiṣu doṣo'yaṃ īśvare tu na yujyate .. 47 .. ### [1.4.153](https://indike.org/pramana/in.darsana.nyaya.nyayamanjari.1.4.153) nānākarmaphalasthānaṃ icchayaivedṛśaṃ jagat . sraṣṭuṃ prabhavatastasya kauśalaṃ ko vikalpayet .. 48 .. ### [1.4.154](https://indike.org/pramana/in.darsana.nyaya.nyayamanjari.1.4.154) icchāmātreṇa pṛthivyāderiyataḥ kāryasya karaṇamasmadādīnāṃ yanmanorathapadavīmapi nādhirohati, tadapi yataḥ saṃpadyate, tasya kiyānayaṃ prayāsaḥ . tadatreśvarasadbhāve paraṃ vipratipattayaḥ . tasmiṃstu siddhe ka evaṃ vikalpānāmavasaraḥ ? uktaṃ ca tatsiddhau nirapavādamanumānam . vayaṃ tu na kartāra eva sambandhasya, yata evamanuyujyemahi .. ### [1.4.155](https://indike.org/pramana/in.darsana.nyaya.nyayamanjari.1.4.155) aṅgusyagreṇa nirdiśya kañcidarthaṃ puraḥsthitam . vyutpādayanto dṛśyante bālānasmadvidhā api .. 49 .. ### [1.4.156](https://indike.org/pramana/in.darsana.nyaya.nyayamanjari.1.4.156) tasmāt īśvaraviracitasambandhādhigamopāyabhūtavṛddhavyavahāralabdhatadvyutpattisāpekṣaḥ śabdaḥ arthamavagamayatīti siddham .. ### [1.4.157](https://indike.org/pramana/in.darsana.nyaya.nyayamanjari.1.4.157) na ca nityasambandhābhāve'pi śabdasyārthāsaṃsparśitvaṃ, samayabalenārthapratyayasyābādhitasya siddherityuktatvādityalaṃ vistareṇa .. tasmāt pade ca vākye ca sambandhe ca svatantratā . puruṣasyopapanneti vedānāṃ tatpraṇītatā .. 50 .. tasmādāptoktatvādeva vedāḥ pramāṇam, na nityatvāt .. ### [1.4.158](https://indike.org/pramana/in.darsana.nyaya.nyayamanjari.1.4.158) nanu ! āptoktatvasya hetoḥ pakṣadharmatvaṃ kathamavagamyate ? na pratyakṣeṇa kṣoṇīdharadharmatvamiva dhūmasya vedānāmāptapraṇītatvamavagamyate; śravaṇayugalabalalabdhajanmani pratyaye vedākhyaśabdarāśereva pratibhāsāt . na codāttādivat varṇadharmatvena āptoktatvaṃ gṛhyate .. ### [1.4.159](https://indike.org/pramana/in.darsana.nyaya.nyayamanjari.1.4.159) nāpyanumānamasminnarthe; liṅgābhāvāt . prāmāṇye hi vedasya āptoktatvaṃ liṅgam . āptoktatvānumitau tu na liṅgāntaramupalabhāmaha iti kutastyaḥ pakṣadharmatvaniścayaḥ— ### [1.4.160](https://indike.org/pramana/in.darsana.nyaya.nyayamanjari.1.4.160) ucyate—alaṃ sarasvatīkṣodena ! ukta eva pakṣadharmatvaniścayopāyaḥ . tathā hi— ### [1.4.161](https://indike.org/pramana/in.darsana.nyaya.nyayamanjari.1.4.161) śabdasya sādhitaṃ tāvadanityatvaṃ savistaram . racanāḥ kartṛmatyaśca racanātvāditi sthitam .. 51 .. ### [1.4.162](https://indike.org/pramana/in.darsana.nyaya.nyayamanjari.1.4.162) kartā sarvasya sarvajñaḥ puruṣo'stīti sādhitam . kāryeṇānuguṇaṃ kalpyaṃ nimittamiti ca sthitam .. 52 .. ### [1.4.163](https://indike.org/pramana/in.darsana.nyaya.nyayamanjari.1.4.163) pratyakṣādivisaṃvādaḥ vede parihariṣyate . vyāghātapaunaruktyādidoṣāśca vacanāntare .. 53 .. ### [1.4.164](https://indike.org/pramana/in.darsana.nyaya.nyayamanjari.1.4.164) vidhyarthavādamantrāṇāṃ upayogaśca vakṣyate . na mātrāmātramapyasti vede khiñcidapārthakam .. 54 .. ### [1.4.165](https://indike.org/pramana/in.darsana.nyaya.nyayamanjari.1.4.165) śabdabrahmavivartādikalpanāśca puroditāḥ . sarvāḥ parihariṣyante kāryatvasya virodhikāḥ .. 55 .. ### [1.4.166](https://indike.org/pramana/in.darsana.nyaya.nyayamanjari.1.4.166) itthaṃ ca sthite kimanyadavaśiṣṭaṃ vedeṣvāptoktatāniścayasya ? so'yaṃ sakalaśāstrārthasthitau satyāṃ pakṣadharmatvaniścayaḥ hetoḥ āptoktatvasya gīyate .. ### [1.4.167](https://indike.org/pramana/in.darsana.nyaya.nyayamanjari.1.4.167) yattu pratyakṣamanumānaṃ vā tanniścayānimittamiti vikalpitam pu. 575—tatra pratyakṣamāstām ! anumānādīni ca yāni racanātvādīnyuktāni, yāni ca paradarśanadviṃṣi vakṣyante, tāni sarvāṇyāptoktatāyāḥ pakṣadharmatāsiddhyaupayikānītyalaṃ vistareṇa .. ### [1.4.168](https://indike.org/pramana/in.darsana.nyaya.nyayamanjari.1.4.168) vyāptiḥ punarasya hetoḥ āyurvedādivākyeṣu niścīyate . pippalīpaṭolamūlāderapyauṣadhasya itthamupayogāt idamabhimatamāsādyate . asya ca kṣīracukrādivirodhyaśanasya parihārādidamaniṣṭamupaśāmyatītyādiṣvāyurvedaśāstreṣu pratyakṣeṇa tasyārthasya tathā niścayāt arthāvisaṃvāditvaṃ nāma prāmāṇyaṃ pratipannaṃ; taccedamāptavādaprayuktam . ataḥ yatrāptavādatvaṃ tatra prāmāṇyamiti vyāptirgṛhyate .. ### [1.4.169](https://indike.org/pramana/in.darsana.nyaya.nyayamanjari.1.4.169) tathā mantrāṇāṃ prayoge vṛścikabhujagadaṣṭasya bhakṣitaviṣasya vā nirviṣatvaṃ, apasmārapiśācarūpikāgṛhītasya tadunmocanaṃ, atirabhasojjihāneṣu duṣṭamegheṣu sasyarakṣaṇamityevamupalabdham . atasteṣāṃ viṣabhūtāśaniśamanakuśalānāṃ āptā upadeṣṭāra iti tatrāpi tathaiva vyāptiniścayaḥ .. ### [1.4.170](https://indike.org/pramana/in.darsana.nyaya.nyayamanjari.1.4.170) nanu ! āyurvedādau prāmāṇyaṃ pratyakṣādisaṃvādāt pratipannam, nāptaprāmāṇyāt . ataḥ kathamāptoktatvasya tatra vyāptigrahaṇam ? naitadevam—pratyakṣādisaṃvādāt tanniścīyatāṃ nāma prāmāṇyam ! utthitaṃ tu tat āptoktatvāt . pratyakṣādāvapyarthakriyājñānasaṃvādāt prāmāṇyasya jñaptiḥ . utpattistu guṇavatkārakakṛtyetyuktam pu. 442 .. ### [1.4.171](https://indike.org/pramana/in.darsana.nyaya.nyayamanjari.1.4.171) nadyādivākyāni ca vipralambhakapuruṣabhāṣitāni visaṃvadanti loke dṛśyante . tenāptapraṇītatvameva teṣāṃ prāmāṇyakāraṇam, kāraṇaśuddhimantareṇa samyakpratyayānutpādāt . niścayopāvastu pratyakṣaṃ bhavatu, na tu tatkṛtameva prāmāṇyam . ataḥ yuktamāptoktatāyāḥ āyurvedādau vyāptigrahaṇam .. ### [1.4.172](https://indike.org/pramana/in.darsana.nyaya.nyayamanjari.1.4.172) nanu ! evamapi na yuktam, āptoktatvasya tatra paricchettumaśakyatvāt . anvayavyatirekamūlameva āyurvedavākyānāṃ prāmāṇyam, nāptakṛtam . anvayavyatirekau ca yāvatyeva dṛśyete, tāvatyevārthe prāmāṇyam—yathā harītakyādivākyārthe . yatra tu tayoradarśanaṃ tatrāprāmāṇyam—yathā somarājyupayoge samāḥ sahasraṃ jīvyate iti . āpte tu kalpyamāne'rghajaratīyaṃ syāt . ardhe tasyāptatvam, ardhe ca kathamanāptatvamiti .. ### [1.4.173](https://indike.org/pramana/in.darsana.nyaya.nyayamanjari.1.4.173) tadidamanupapannam—anvayavyatirekayoḥ grahītumaśakyatvāt . tau hi svātmani vā grahītuṃ śakyete ? vyaktayantare vā ? vyaktyantare'pi, sarvatra ? kvacideva vā vyaktiviśeṣe ? sarvathā saṃkaṭo'yaṃ panthāḥ . vyādhīnāṃ, tannidānānāṃ, tadupacayāpacayānāṃ tadupaśamopāyānāṃ, auṣadhānāṃ, tatsaṃyogaviyogaviśeṣāṇāṃ, tatparimāṇānāṃ, tadrasavīryavipākānāṃ, deśakālapuruṣadaśābhedena śaktibhedasya ekena janmanā grahītumaśakyatvāt . janmāntarānubhūtānāṃ ca bhāvānāṃ asmaraṇāt .. jano'nantastāvannirabadhiriha vyādhinivahaḥ na saṃkhyātuṃ śakyā bahuguṇarasadravyagatayaḥ . vicitrāḥ saṃyogāḥ pariṇatirapūrveti ca kutaḥ cikitsāyāḥ pāraṃ tarati yugalakṣairapi naraḥ .. 56 .. yadeva dravyamekasya dhātorbhavati śāntaye . yogāntarāttadevāsya punaḥ kopāya kalpate .. 57 .. yā dravyaśaktirekatra puṃsi nāsau narāntare . harītakyāpi nodbhūtavātakuṣṭhe virecyate .. 58 .. śaradyudriktapittasya jvarāya dadhi kalpate . tadeva bhuktaṃ varṣāsu jvaraṃ hanti daśāntare .. 59 .. na copalakṣaṇaṃ kiñcit asti tacchaktivedane . yenaikatra gṛhītā'sau sarvatrāvagatā bhavet .. 60 .. yo vā jñātuṃ prabhavati puruṣaḥ tatsāmarthyaṃ niravadhiviṣayam . syāt sarvajñaḥ sa iti na vimatiḥ tasmin kāryā svavacanakathite .. ### [1.4.174](https://indike.org/pramana/in.darsana.nyaya.nyayamanjari.1.4.174) athocyeta—anādirevaiṣā cikitsakasmṛtiḥ, vyākaraṇādismṛtivat . saṃkṣepavistaravivakṣayaiva carakādayaḥ kartāraḥ, na tu te sarvadarśinaḥ . na ca smṛtāvandhaparaṃparādoṣaḥ, samūlatvāt . yathā vyākaraṇasmṛteḥ śiṣṭaprayogo mūlaṃ, evamihānvayavyatirekau . śiṣṭavirodhe sati yathā mūlavirodhinī pāṇinyādismṛtirapramāṇam, tathā cāhuḥ iha na bhavatyanabhidhānāt vārtikam iti . evaṃ vaidyasmṛtirapi anvayavyatirekaviruddhā na pramāṇamiti—tadetadayuktam— anvayavyatirekayoryathoktanayena paricchedāsambhavena tanmūlatvānupapatteḥ .. ### [1.4.175](https://indike.org/pramana/in.darsana.nyaya.nyayamanjari.1.4.175) yadi hyanvayavyatirekābhyāṃ aśeṣadravyaśaktīrniścitya carakādibhirviracitaṃ śāstramitīdṛśamanvayavyatirekitvamucyate—tadapyayākṛtam—adyatve yāvantāvanvayavyatirekau vayamupalabdhuṃ śaknumaḥ, tāvadbhyāṃ tābhyāṃ ekadeśasaṃvādāt prāmāṇyakalpanāt tatra pravartatām; na tu tau tāvantau śāstrasya mūlaṃ bhavitumarhataḥ; sarvairasmadādibhistādṛśaśāstrapraṇayanaprasaṅgāt .. ### [1.4.176](https://indike.org/pramana/in.darsana.nyaya.nyayamanjari.1.4.176) anāditvamapi śāstrāṇāṃ vedavadanupapannam; carakādikartṛsmṛteḥ kālidāsādismṛtivadavigītatvāt . na ca cikitsāsmaraṇaprabandhaevāyamanādiḥ; tathātve andhaparaṃparā, kāraṇānavadhāraṇāt . na ca taduktaṃ unmūlaṃ bhavitumarhati, vyudastatvāt . tasmāt sarvajñapraṇīta evāyurvedaḥ .. ### [1.4.177](https://indike.org/pramana/in.darsana.nyaya.nyayamanjari.1.4.177) nanu aviduṣāmupadeśo nāvakalpata iti vidvāṃsaḥ carakādayaḥ kalpyantām . te tu pratyakṣeṇaiva sarvaṃ viditabanta ityatra kiṃ mānam ? ucyate—anvayavyatirekayornirāsāt nānumānasyaiṣa viṣayaḥ . vedamūlatvamapi manvādismṛtivat ayuktaṃ kalpayitum, kartṛsāmānyāsaṃbhavāditi varṇaviṣyāmaḥ pu. 632 . puruṣāntaropadeśapūrvakatve carakeṇava kimaparāddham ? upamānamanāśaṅkanīyamevāsminnarthe . arthāpattistuṃ na pramāṇāntaram . aprāmāṇyaṃ tu nāsti, bahukṛtvaḥ saṃvādadarśanāt . ataḥ pariśeṣāt pratyakṣīkṛtadeśakālapuruṣadaśābhedānusārisamastavyastapadārthasārthaśaktiniścayāḥ carakādayaḥ iti yuktaṃ kalpayitum .. ### [1.4.178](https://indike.org/pramana/in.darsana.nyaya.nyayamanjari.1.4.178) yadyevaṃ kathaṃ tarhi somarājyādivākyeṣu vyabhicāraḥ ? vyabhicāre cārdhajaratīyamityuktam—naiṣa doṣaḥ—karmakartṛsādhanavaiguṇyāt eṣu vyabhicāro bhaviṣyati . vaidikeṣu ca karmasu mīmāṃsakasya samāno guṇaḥ .. ### [1.4.179](https://indike.org/pramana/in.darsana.nyaya.nyayamanjari.1.4.179) kārīryādau kā te vārtā ? yasyāṃ na syādiṣṭau vṛṣṭiḥ . vaiguṇyaṃ cet kartrādīnāṃ, atrāpyevaṃ śakyaṃ vaktum .. 62 .. ### [1.4.180](https://indike.org/pramana/in.darsana.nyaya.nyayamanjari.1.4.180) yadi vidhuramabhuktaṃ karma śāstrīyamanyat phalavighaṭanahetuḥ kalpyate so'pi tulyaḥ . kvacidatha phalasaṃpat dṛśyate tatprayoge tadiha dṛḍhaśarīrāḥ santi dīrghāyuṣaśca .. 63 .. ### [1.4.181](https://indike.org/pramana/in.darsana.nyaya.nyayamanjari.1.4.181) āyurvedastasmāt āptakṛto nānyamūla iti siddham . evaṃphalavedādau prakāśamāptapraṇītatvam .. 64 .. ### [1.4.182](https://indike.org/pramana/in.darsana.nyaya.nyayamanjari.1.4.182) tasmāt āptoktatvasya siddhamāyurvedādau vyāptigrahaṇam . vyāptipradarśanāyaiva sūtrakṛtā— ### [1.4.183](https://indike.org/pramana/in.darsana.nyaya.nyayamanjari.1.4.183) sa dvividho dṛṣṭādṛṣṭārthatvāt nyā. sū. 1-1-8 ### [1.4.184](https://indike.org/pramana/in.darsana.nyaya.nyayamanjari.1.4.184) ityuktam . dṛṣṭārthaśabde gṛhītāvinābhāvaṃ āptoktatvaṃ adṛṣṭārthe'pi prāmāṇyaṃ sādhayatīti . ata evoktaṃ— ### [1.4.185](https://indike.org/pramana/in.darsana.nyaya.nyayamanjari.1.4.185) mantrāyurvedaprāmāṇyavacca tatprāmāṇyamāptaprāmāṇyātnyā. sū. 2-1-69 iti .. ### [1.4.186](https://indike.org/pramana/in.darsana.nyaya.nyayamanjari.1.4.186) nanvatrāpi na vaidyakaṃ viracayan dṛṣṭo muniḥ sarvavit tadvyāptigrahaṇaṃ jane yadi, vṛthā''yurvedasaṃkīrtanam . satyaṃ, kintu dṛḍhā tathāpi carakādyāptasmṛtirvaidyake nāsau cānyanibandhaneti kathitā tasyeha dṛṣṭāntatā .. 65 .. ### [1.4.187](https://indike.org/pramana/in.darsana.nyaya.nyayamanjari.1.4.187) ityāyurvedavākyaprabhṛtiṣu bhavati vyāptirāptoktatāyāḥ pūrvoktena krameṇa sphuṭamakathi tathā pakṣadharmatvamasyāḥ . na pratyakṣāgamābhyāmapahṛtaviṣayā nānumānāntareṇa vyādhūtā veti saiṣā bhajati gamakatāṃ pañcarūpopapatteḥ .. 66 .. ### [1.4.188](https://indike.org/pramana/in.darsana.nyaya.nyayamanjari.1.4.188) anapekṣatayā na vedavācāṃ ghaṭate niṣpratimaḥ pramāṇabhāvaḥ . kva girāmayathārthatānivṛttiḥ puruṣapratyayamantareṇa dṛṣṭā .. 67 .. ### [1.4.189](https://indike.org/pramana/in.darsana.nyaya.nyayamanjari.1.4.189) tatpratyayāt bahutaradraviṇavyayādi- sādhyeṣu karmasu tapassu ca vaidikeṣu . yuktaṃ pravartanamabādhanakena naiva tatsiddhirityalamasammata eṣa mārgaḥ .. 68 .. ### [1.4.190](https://indike.org/pramana/in.darsana.nyaya.nyayamanjari.1.4.190) tasmādāptoktatvādeva vedāḥ pramāṇamiti siddham .. ### [1.4.191](https://indike.org/pramana/in.darsana.nyaya.nyayamanjari.1.4.191) anye tu anyathā vedaprāmāṇyaṃ varṇayanti . tasya hi prāmāṇye abhyupagataparalokaḥ, anabhyupagataparaloko vā paro vipratipadyate ? ### [1.4.192](https://indike.org/pramana/in.darsana.nyaya.nyayamanjari.1.4.192) tatrānabhyupagataparalokaṃ prati tāvat ātmanityatādinyāyapūrvakaṃ paralokasamarthanameva vidheyam .. ### [1.4.193](https://indike.org/pramana/in.darsana.nyaya.nyayamanjari.1.4.193) paralokavādināṃ tu mate yadetat sukhiduḥkhyādibhedena jagato vaicitryaṃ dṛśyate, tadavaśyaṃ karmavaicitryanibandhanameva . karmāṇi cānanuṣṭhitāni nātmānaṃ labhante . alabdhātmanāṃ ca nabhaḥkusumanibhānāṃ kuto vicitrasukhaduḥkhādiphalasādhanatvam ? tasmāt anuṣṭhānameṣāmeṣitavyam . anuṣṭhānaṃ ca nāviditasvarūpāṇāṃ karmaṇāmupapannam . ajānan puruṣaḥ tapasvī kimanutiṣṭhet ? tadavaśyaṃ jñātvā'nuṣṭheyāni karmāṇi .. ### [1.4.194](https://indike.org/pramana/in.darsana.nyaya.nyayamanjari.1.4.194) tadidānīṃ teṣāṃ parijñāne ko'bhyupāyaḥ ? ### [1.4.195](https://indike.org/pramana/in.darsana.nyaya.nyayamanjari.1.4.195) na pratyakṣaṃ asmadādīnāṃ svargādyadṛṣṭapuruṣārthasādhanāni karmāṇi darśayituṃ prabhavati .. ### [1.4.196](https://indike.org/pramana/in.darsana.nyaya.nyayamanjari.1.4.196) nāpyanumānam; anvayavyatirekābhyāṃ tṛptibhojanayoriva svargayāgayoḥ sādhyasādhanasambandhānabadhāraṇāt .. ### [1.4.197](https://indike.org/pramana/in.darsana.nyaya.nyayamanjari.1.4.197) nāpyarthāpattiḥ; jagadvaicitryānyathā'nupapattyā tu vicitraṃ kāraṇamātramanumīyate . na ca tāvatā'nuṣṭhānasiddhiḥ . uktaṃ ca ślo. vā. 1-4-105— ### [1.4.198](https://indike.org/pramana/in.darsana.nyaya.nyayamanjari.1.4.198) adharme dharmarūpe vā'pyavibhakte phalaṃ prati . kimapyastīti vijñānaṃ narāṇāṃ kvopayujyate ? iti .. ### [1.4.199](https://indike.org/pramana/in.darsana.nyaya.nyayamanjari.1.4.199) upamānaṃ tvatra śaṅkyamānamapi na śobhate .. ### [1.4.200](https://indike.org/pramana/in.darsana.nyaya.nyayamanjari.1.4.200) nāpi parasparamupadiśanto laukikāḥ karmāṇi paralokaphalāni jānīyuriti vaktuṃ yuktam; ajñātvā upapādayatāṃ āptatvāyogāt . jñānaṃ tu laukikānāṃ durghaṭam; pramāṇābhāvādityuktatvāt . evameva hi puruṣopadeśaparaṃparākalpanāyāṃ andhaparaṃparānyāyaḥ syāt . tasmādavaśyaṃ abhyupagataparalokaiḥ paralokaphalāni karmāṇi kurvadbhiḥ śāstrāt karmāvabodho'bhyupagantavyaḥ . śāstraṃ ca vedā eveti siddhaṃ tatprāmāṇyam .. _First 200 of 609 passages. [Read on](https://indike.org/pramana/in.darsana.nyaya.nyayamanjari.1.4)_ ## Commentaries (1) - [Nyāyamañjarīgranthibhaṅga](https://indike.org/pramana/in.darsana.nyaya.nyayamanjari!granthibhanga.5.p1) — Cakradhara, Sanskrit ## Linked texts (8) - [Skandamahāpurāṇa (vulgate)](https://indike.org/pramana/in.purana.skanda*vulgate.6.3.139.7) — Sanskrit - [Mīmāṃsāsūtra](https://indike.org/pramana/in.darsana.mimamsa.mimamsasutra.1.3.2) — Jaimini, Sanskrit - [Kāśikā after the Trivandrum edition (provided by H. Krasser)](https://indike.org/pramana/in.darsana.mimamsa.mimamsasutra!sabara!slokavarttika!kasika*trivandrum.327.47.1) — Sanskrit - [Nayamayūkhamālikā](https://indike.org/pramana/in.darsana.visistadvaita.nayamayukhamalika.1.6.28.p4.4) — Sanskrit - [Nyāyacandrikā](https://indike.org/pramana/in.darsana.advaita.vada.nyaya-khandana.nyayacandrika.1.p1022) — Ānandapūrṇa Vidyāsāgara, Sanskrit - [Nyāyacandrikā](https://indike.org/pramana/in.darsana.advaita.nyayacandrika.1.p1022) — Gaṅgādhara, Sanskrit - [Skandapurāṇa (early; "Ambikākhaṇḍa") (ed. Bakker)](https://indike.org/pramana/in.purana.skanda*early*bakker.13.15.p1) — Sanskrit - [Adhikaraṇaratnamālā](https://indike.org/pramana/in.darsana.mimamsa.adhikaranaratnamala.9.2) — Sāyaṇa, Sanskrit --- Source: [https://indike.org/pramana/in.darsana.nyaya.nyayamanjari.1.4](https://indike.org/pramana/in.darsana.nyaya.nyayamanjari.1.4) · Pramāṇa