[Pramāṇa](https://indike.org/pramana/) › [Indian literature](https://indike.org/pramana/in) › [Philosophy](https://indike.org/pramana/in.darsana) › [Logic and epistemology](https://indike.org/pramana/in.darsana.nyaya) › [A Cluster of Nyāya Flowers](https://indike.org/pramana/in.darsana.nyaya.nyayamanjari) › 2.3 # A Cluster of Nyāya Flowers 2.3: saptamamāhnikam—prameyaparīkṣā · prameyanirdeśaḥ Nyāyamañjarī 2.3 - **Language:** Sanskrit ### saptamamāhnikam—prameyaparīkṣā · prameyanirdeśaḥ ### [2.3.1](https://indike.org/pramana/in.darsana.nyaya.nyayamanjari.2.3.1) evaṃ pramāṇapadārthe parīkṣite sati yadarthaṃ tatparīkṣaṇaṃ tat prameyamidānīṃ darśayitumāha— ### [2.3.2](https://indike.org/pramana/in.darsana.nyaya.nyayamanjari.2.3.2) ātmaśarīrendriyārthabuddhimanaḥpravṛttidoṣapretyabhāvaphaladuḥkhāpavargāstu prameyam .. 1-1-9 .. ### [2.3.3](https://indike.org/pramana/in.darsana.nyaya.nyayamanjari.2.3.3) pramāṇavadihāpyetatsūtraṃ vyākhyāyi sūribhiḥ . evaṃ vibhāgasāmānyalakṣaṇapratipādakam .. ### [2.3.4](https://indike.org/pramana/in.darsana.nyaya.nyayamanjari.2.3.4) prameyaśrutirātmādipadaparyantavartinī . teṣāmeva prameyatvaṃ nānyasyeti niyacchati .. ### [2.3.5](https://indike.org/pramana/in.darsana.nyaya.nyayamanjari.2.3.5) yathā devadattayajñadattaviṇthumitrā bhojyantām iti evakārādiśrutimantareṇāpi śabdasāmarthyāt ta eva bhojanakriyāyogino'vagamyante, nānye; tathehāpyātmādayaḥ prameyamityukte tathaiva taditaraprameyaniṣedho'vadhāryate .. ### [2.3.6](https://indike.org/pramana/in.darsana.nyaya.nyayamanjari.2.3.6) nanu kathaṃ dvādaśavidhameva prameyamavadhāryate, yāvatā samānatantre pṛthivyānīninava dravyāṇi' rūpādayaścaturviśatiguṇāḥ, utkṣepaṇādi paṃcakarmāṇi, parāparabhedena dvividhaṃ sāmānyaṃ, nityadravyavṛttayo'ntyā viśeṣāḥ, ekaḥ samavāya iti ṣaṭpadārthānanukramya tadavāntaraviśeṣairānantyaṃ prameyasyopavarṇitamasti .. ### [2.3.7](https://indike.org/pramana/in.darsana.nyaya.nyayamanjari.2.3.7) ucyate—kiṃ punariha prameyaṃ vivakṣitamiti tatsāmānyalakṣaṇaṃ tāva parīkṣyatām .. ### [2.3.8](https://indike.org/pramana/in.darsana.nyaya.nyayamanjari.2.3.8) āha—sūktamidaṃ—kasyāpi karṇe pṛṣṭaḥ kaṭiṃ cālayatīti . dvādaśavidhatvamākṣiptaṃ na pratisamādhatte bhavān . prayeyasya sāmānyalakṣaṇaṃ tu parīkṣate iti .. ### [2.3.9](https://indike.org/pramana/in.darsana.nyaya.nyayamanjari.2.3.9) ucyate—alaṃ kelinā ! etadevātra pratisamādhānaṃ bhavati . na hi pramāṇaviṣayamātramiha prameyamabhimatam, evaṃvidhasya prasiddhatvena lakṣaṇānarhatvāt . pramāṇa evaṃ jñāte sati tadviṣayo'rthaḥ prameyamiti prajñāyata eva . kiṃ tena lakṣitena ? tasmāt viśiṣṭamiha prameyaṃ lakṣyate .. ### [2.3.10](https://indike.org/pramana/in.darsana.nyaya.nyayamanjari.2.3.10) jñātaṃ samyagatamyagvā yanmokṣāya bhavāya vā . tatprameyamihābhoṣṭaṃ na pramāṇārthamātrakam .. ### [2.3.11](https://indike.org/pramana/in.darsana.nyaya.nyayamanjari.2.3.11) tacca dvādaśavidhameva bhavati, na nyūnamadhikaṃ veti samāhitamitthaṃ bhavati vibhāgākṣepaḥ .. ### [2.3.12](https://indike.org/pramana/in.darsana.nyaya.nyayamanjari.2.3.12) kutaḥ punareṣaḥ prameyaviśeṣo labhyate ? niḥśreyasārthatvācchāstrasya . prameyajñānasya pramāṇajñānavadanyajñānopayogitāmantareṇa svata eva mithyājñānanivṛttyādikrameṇa apavargāhetutvapratijñānāt . tathāvidhasya cāpavargopāyatvasyātmādiṣveva bhāvāt .. ### [2.3.13](https://indike.org/pramana/in.darsana.nyaya.nyayamanjari.2.3.13) bhavatvevam ! sūtrasya tu kathamīdṛśaprameyaviśeṣasamarthane sāmarthyam ? viśeṣanirdeśāttu, śabdaprayogasāmarthyācca .. ### [2.3.14](https://indike.org/pramana/in.darsana.nyaya.nyayamanjari.2.3.14) satyam, ākāśakāladigādi pramāṇaviṣayatvāt prameyaṃ bhavati . tattu na saprayojanaṃ ātmaśarīrendriyārthamanaḥpravṛttidoṣapretyabhāvaphaladuḥkhāpavargāstu prameyam, asyaiva niḥśreyasahetutvādityāśayaḥ .. ### [2.3.15](https://indike.org/pramana/in.darsana.nyaya.nyayamanjari.2.3.15) taditthameṣa tuśabdaḥ niḥśreyasānaṅgabhūtaprameyāntaraparihāradvāreṇaviśiṣṭamātmādi prameyamiha sūcayati .. ### [2.3.16](https://indike.org/pramana/in.darsana.nyaya.nyayamanjari.2.3.16) taddvādaśavidhatve'pi heyopādeyabhedataḥ . dvidhocyate mumukṣūṇāṃ tathaiva dhyānasiddhaye .. ### [2.3.17](https://indike.org/pramana/in.darsana.nyaya.nyayamanjari.2.3.17) tatra dehādi duḥkhāntaṃ heyameva vyavasthitam . upādeyo'pavargastu, dvidhā'varithatirātmanaḥ .. ### [2.3.18](https://indike.org/pramana/in.darsana.nyaya.nyayamanjari.2.3.18) sukhaduḥkhādibhoktṛtvasvabhāvo heya eva saḥ . upādeyastu bhogādivyavahāraparāṅmukhaḥ .. ### [2.3.19](https://indike.org/pramana/in.darsana.nyaya.nyayamanjari.2.3.19) ātmano hi bhogādhiṣṭhānaṃ śarīram . bhogasādhanānīndriyāṇi . bhoktavyā indriyārthāḥ . bhogakāraṇaṃ manaḥ . pravṛttiḥ puṇyapāpātmikā . rāgādayaśca doṣāḥ śarīrādijanmahetavaḥ . etatkṛtaśca śarīrādiyogaviyogābhyāsaḥ pretyabhāvaḥ . etatkṛtameva ca saṃsāre sukhaduḥkharūpaṃ phalaṃ . tacya vividhameva . vivekavataḥ sarvaṃ duḥkhameveti . evaṃ śarīrādi duḥkhāntaṃ heyatayaiva bhāvanīyam . edadanupayuktaścātmā'pi tathaiva . etadviyuktastvātmaivāpavarga ucyate . sa copādeyatayā bhāvanoyaityata evātmapadasaṃgṛhītasyāpyasya punarnirdeśaḥ, sa rdi paramaḥ puruṣārtha iti .. ### [2.3.20](https://indike.org/pramana/in.darsana.nyaya.nyayamanjari.2.3.20) evamidaṃ dvādaśavidhaṃ prameyaṃ heyopādeyatayā tattvajñānena bhāvayana abhyāsāt tadviṣayaviparītagrahātmakaṃ mithyājñānaṃ kṣiṇoti .. ### [2.3.21](https://indike.org/pramana/in.darsana.nyaya.nyayamanjari.2.3.21) tattvajñānodayenāsya mithyājñāne'pabādhite . rāgadveṣādayo doṣāḥ tanmūlātkṣayamāpnuyuḥ .. ### [2.3.22](https://indike.org/pramana/in.darsana.nyaya.nyayamanjari.2.3.22) kṣīṇadoṣasya nodeti pravṛttiḥ puṇyapāpikā . tadabhāvānnatatkāryaṃ śarirādyupajāyate .. ### [2.3.23](https://indike.org/pramana/in.darsana.nyaya.nyayamanjari.2.3.23) aśarīraśca naivātmā spṛśyate duḥkhaḍambaraiḥ . aśeṣaduḥkhoparamaḥ so'pavargo'bhidhīyate .. ### [2.3.24](https://indike.org/pramana/in.darsana.nyaya.nyayamanjari.2.3.24) taditthameva dvādaśavidhaṃ prameyaṃ atigahanasaṃsāramāravasthalaprabhavabhīmasantāpanirvāpaṇamahāhradatāmupayātīti tadevopa deśārhamiti siddham .. ### [2.3.25](https://indike.org/pramana/in.darsana.nyaya.nyayamanjari.2.3.25) viraktasaṃkathāstāvadasatāṃ tāpasoditāḥ . ātmaiva tvasti nāstīti kathaṃ na paricintyate .. ### [2.3.26](https://indike.org/pramana/in.darsana.nyaya.nyayamanjari.2.3.26) tathā ca lokāyatikāḥ paralokāpavādinaḥ . caitanyakhacitāt kāyāt nātmā'nyo'stīti manvate .. ### [2.3.27](https://indike.org/pramana/in.darsana.nyaya.nyayamanjari.2.3.27) na ca tāvadātmā pratyakṣato gṛhyate, ghaṭādivat bāhyendriyeṇa, sukhādiyanmanasā vā paricchettumaśakyatvāt . anumānaṃ tu na pramāṇameva cārvākāṇām . na cātmasiddhau kiṃcana liṅgamasti . jñānādiyogastu bhūtānāmeva pariṇāmaviśeṣopapāditaśaktyatiśayajuṣāṃ bhaviṣyati . yathā guḍapiṣṭādayaḥ prāgasatīmapi madaśaktiṃ āsāditasurākārapariṇāmāḥ prapadyante, tathā mṛdādyavasthāyāṃ acetanānyapi bhūtāni śarīrākārapariṇatāni caitanyaṃ sprakṣyanti . kālāntare ca vyādhyādinā pariṇāmaviśeṣamavajahanti tānyeva caitanyaśūnyatāmupayāsyanti . caitanyavattvānapāyācca tāvantaṃ kālaṃ tānyeva smṛtyanusandhānādivyavahāranirvahaṇanipuṇatāmanubhaviṣyanti iti kimanumānaka ātmā syāt ? ### [2.3.28](https://indike.org/pramana/in.darsana.nyaya.nyayamanjari.2.3.28) āgamāstu manorathādhirūḍhaprāmāṇyāḥ kathamātmānamavabodhayituṃ śakṣyanti . ayamapi cāgamo'styeva vijñānaghana evaitebhyo bhūtebhyaḥ samutthāya tānyevānu vinaśyati na pretya saṃjñā'sti iti . tat ātmano nityasya paralokino'bhāvāt kṛtametābhiḥ apārthakapariśramakariṇībhiḥ paralokakathābhiḥ .. ### [2.3.29](https://indike.org/pramana/in.darsana.nyaya.nyayamanjari.2.3.29) tatra pratyakṣamātmānamaupavarṣāḥ prapedire . ahaṃpratyayagamyatvāt sayūthyā api kecana .. ### [2.3.30](https://indike.org/pramana/in.darsana.nyaya.nyayamanjari.2.3.30) astyayamahaṃpratyayaḥ kaścit śarīrasamānādhikaraṇaḥ sthūlo'ham kṣāmo'haṃ iti . kaścit jñātṛsamānādhikaraṇaḥ—jānāmyaham smarāmyaham iti . tatra sthūlādisamānādhikaraṇastāvadāstāmahaṃ pratyayaḥ .. ### [2.3.31](https://indike.org/pramana/in.darsana.nyaya.nyayamanjari.2.3.31) jñānecchāsukhaduḥkhādisāmānādhikaraṇyabhāk . yastvahaṃpratyayastatra nātmano'nyaḥ prakāśate .. ### [2.3.32](https://indike.org/pramana/in.darsana.nyaya.nyayamanjari.2.3.32) na hi jñānasukhecchādiyogaḥ kāyendriyādiṣu . na ca jñānādiśūnye'rthe jānāmītyādisaṃvidaḥ .. ### [2.3.33](https://indike.org/pramana/in.darsana.nyaya.nyayamanjari.2.3.33) jñānamātrāvabhāso'pi vāritaḥ pratyabhijñayā . jñātavānahamevādau ahamevādya vedmi ca .. ### [2.3.34](https://indike.org/pramana/in.darsana.nyaya.nyayamanjari.2.3.34) nottarasya ca pūrvasya na jñānakṣaṇayordvayoḥ . na santānasya caitasmin pratyaye'styavabhāsanam .. ### [2.3.35](https://indike.org/pramana/in.darsana.nyaya.nyayamanjari.2.3.35) nottarojñānavān pūrvaṃ pūrvo jānāti nādhunā . na dvayordvayamapyasti santānastu na vāstavaḥ .. ### [2.3.36](https://indike.org/pramana/in.darsana.nyaya.nyayamanjari.2.3.36) avastutvācca nāsau pūrvaṃ kiṃcijjñātavān, na cādya kiṃcijjānātīti . tasmādahameva hyo jñātavān, ahamevādya jānāmītyasmin pratyaye hyaścādya cānuvartamāno jñātā pratibhātīti gamyate .. ### [2.3.37](https://indike.org/pramana/in.darsana.nyaya.nyayamanjari.2.3.37) na cāsau kāyaḥ, bālādyavasthābhedena nānātvāt, acetanatvācca . evaṃca pratyabhijñā'haṃpratyayagrāhye jñātari siddhe, so'yaṃ sthūlādisamānādhikaraṇaḥ ahaṃpratyayaḥ tadabhedopacāreṇa śarīre vartamāno mithyeti kalpayiṣyate . na punaretadanurodhena jñānādisamānādhikaraṇāhaṃpratyayamithyātvakalpanaṃ yuktaṃ, abādhitatvāt . na khalbahaṃ jānāmīti pratyayaḥ kena cidalpīyasā doṣakāraṇena kaluṣīkartuṃ pāryate . tat asyātmaiva mukhyo viṣayaḥ, tadatiriktaṃ vastu bhākta iti . tasmādahaṃpratyayagamyatvādātmā pratyakṣa iti .. ### [2.3.38](https://indike.org/pramana/in.darsana.nyaya.nyayamanjari.2.3.38) atra vadanti—śabdamātroccāraṇametat ahaṃ jānāmi ahamicchāmi ahaṃsukhī ahaṃ duḥkhī iti . na tu jñānādisvarūpātiriktaḥ tadāśrayaḥ kaścidetāsu buddhiṣu parisphuratīti . kathamekasyāmeva saṃvidi kartā ca karma cātmā bhavet .. ### [2.3.39](https://indike.org/pramana/in.darsana.nyaya.nyayamanjari.2.3.39) grāhyagrāhakataikasya jñānasyāpākariṣyate . tvayā'pi neṣyate ceti tathā nāstyātmano'pi sā .. ### [2.3.40](https://indike.org/pramana/in.darsana.nyaya.nyayamanjari.2.3.40) yacca avasthākṛtaṃ bhedamabalambya grāhmagrāhakabhāvasamarthanamekasyaivātmanaḥ kṛtaṃ kila dravyādirūpamātmano grāhyaṃ, jñātṛrūpaṃ ca grāhakamiti tadanupapannam—dravyādirūpe grāhye na jñātari grāhyatā sādhitā syāt . ātmavartino'pi dravyādirūpasya ghaṭāditulyatvāt .. ### [2.3.41](https://indike.org/pramana/in.darsana.nyaya.nyayamanjari.2.3.41) yadapi nipuṇaṃmanyairucyate—bhavatu jñātṛteva grāhikā . tathāpi viṣayopādhikṛ to'styeva bhedaḥ . ghaṭāvacchinnā hi hi jñātṛtā grāhmā, śuddhaiva tu jñātṛtā grāhiketi . ghaṭamahaṃ jānāmi iti ko'rthaḥ ? katham jānantamātmānaṃ jānāmi ityasmatprayogasaṃbhedāccaivamavakalpate . anyatra tu śuddhaviṣayagrahaṇameva bhavati ghaṭo'yaṃ iti—tadetadapi saralamatipratāraṇamātram—yathā hi ghaṭo'yaṃ ittra ghaṭamātrapravaṇaiva saṃvit, evaṃ asmatprayogasaṃbhede'pi ghaṭamahaṃ jānāmi ityatra ghaṭapravaṇaiva buddhiḥ .. ### [2.3.42](https://indike.org/pramana/in.darsana.nyaya.nyayamanjari.2.3.42) iyāṃstu viśeṣaḥ—pūrvaṃ kevalaṃ ghaṭagrahaṇaṃ, adhunā tu jñānaviśiṣṭaghaṭāvamarśa iti .. ### [2.3.43](https://indike.org/pramana/in.darsana.nyaya.nyayamanjari.2.3.43) nanu ! vibhajyamānāyāṃ pratītau ghaṭo'yaṃ iti tāvat viṣayagrahaṇam . jānāmi iti tu jñānagrahaṇamapi bhavatu nāma . ahamiti tu kasya grahaṇam ? na caikasyāmeva pratītau aṃśavibhāgeva prāmāṇyamaprāmāṇyaṃ ca vaktuṃ yuktam—ghaṭamiti jānāmīti ca pramāṇaṃ, ahamiti tu na pramāṇamiti . tasmādatra jñāturavabhāso'bhyupeyaḥ .. ### [2.3.44](https://indike.org/pramana/in.darsana.nyaya.nyayamanjari.2.3.44) uktamatra naikasyāṃ pratītāvātmanaḥ kartṛtā karmatā ca syātāmiti .. ### [2.3.45](https://indike.org/pramana/in.darsana.nyaya.nyayamanjari.2.3.45) yastūpādhistvayonnetumupakrāntaḥ, so'yaṃ na ghaṭate, ghaṭapravaṇatvāt . ghaṭaṃ ahaṃ jānāmi iti pratītervibhajyamānatve'pi ghaṭamiti jānāmīti ca aṃśadvayaṃ viṣayaniṣṭhameva jātam . ahamiti tu ayamaṃśaḥ yadyātmaviṣaya iṣyate, tarhi sa eva tu śuddho'vaśiṣyate grāhyo grāhakaśceti . nāvasthākṛtastadbhedaḥ samarthitaḥ syāt . bhedābhāvena caikasyaiva—grāhyagrāhakabhāva manupādhikamabhidadhatā vijñānavādavartma saṃśritaṃ syāt . tasmādahaṃpratyayasya grāhakādbhinnaṃ grāhyaṃ abhidhitsatā śarīrameva grāhyamabhyupagantavyam . jñānasāmānādhikaraṇyānupapatteśca varamasya mithyātvam, astu nāmātmāvalambanatā .. ### [2.3.46](https://indike.org/pramana/in.darsana.nyaya.nyayamanjari.2.3.46) ata eva kṛśaśyāmasāmānādhikaraṇyadhīḥ . śarīrālambanatvasya sākṣiṇī na virotsyate .. ### [2.3.47](https://indike.org/pramana/in.darsana.nyaya.nyayamanjari.2.3.47) nanu ! mamedaṃ śarīraṃ iti bhedapratibhāsāt kathamahaṃpratyayaḥ śarīrālambanaḥ syāt ? bhoḥ sādho ! naivaṃvidheṣu viśvasitumarhati . mamātmā ityapi bhedapratyayadarśanāt .. ### [2.3.48](https://indike.org/pramana/in.darsana.nyaya.nyayamanjari.2.3.48) athāvasthābhedādinā yathātathā tatsamarthanamāsthīyate; tadiha śarīrālambanatve'pi saiva saraṇiranusariṣyate . tasmāt ahaṃpratyayaḥ śarīrālambana eveti, sa ca jñānādisamānādhikaraṇo mithyā, sthūlādisamānādhikaraṇastu samyagiti .. ### [2.3.49](https://indike.org/pramana/in.darsana.nyaya.nyayamanjari.2.3.49) ye tu mama śaroraṃ mamātmā iti buddhī,—te dve api mithyā, mamapratyayasyāhaṃpratyayavat ātmānālambanatvāt, śarīre ca bhedānupapatteḥ .. ### [2.3.50](https://indike.org/pramana/in.darsana.nyaya.nyayamanjari.2.3.50) mama pāṇirbhujo veti bhinnatvādupapadyate . śarīraṃ tu mametyeṣā kalpanā rāhumūrdhavat .. ### [2.3.51](https://indike.org/pramana/in.darsana.nyaya.nyayamanjari.2.3.51) tasmādahaṃkāramamakārayoḥ dvayorapyaviṣayatvāt ātmā parokṣa iti siddham .. ### [2.3.52](https://indike.org/pramana/in.darsana.nyaya.nyayamanjari.2.3.52) apare punarāhuḥ— grāhyagrāhakarūpobhayasaṃpatterekasya karmatvaṃ kartṛtvaṃ ca yugapadātmano manyāmahe; kintu citiśaktisvabhāvamaparasādhanamaparokṣamātmatattvaṃ pracakṣmahe . na hyātmā'nyajanyena jñānena ghaṭādirriva prakāśyate, api tu svata eva prakāśyate . cetanatvamapi tasya naisargikameva, na karaṇopanītacitiyoganibandhanam . cidyogāddhi cetanatve ghaṭādāvapi tatprasaṅgaḥ . na cāsti niyamahetuḥ, anekakārakanikaraparighaṭitatanurapi citirātmānameva jñātāraṃ karoti, na kārakāntaramiti . tasmāt svata eva citsvabhāvatā tasya bhadrikā . tadidamātmaprakāśanaṃ saṃvidvadavagantavyam . yadāhuḥ—saṃvita saṃvittayaiva saṃvedyate, na saṃvedyatayeti . nāsyāḥ karmabhāvo vidyata ityarthaḥ . evamātmā grāhakatayaiva prakāśyate, na grāhyatayeti tadvairupyasya codanamanupapannamiti .. ### [2.3.53](https://indike.org/pramana/in.darsana.nyaya.nyayamanjari.2.3.53) etadapi na caturaśram—aparasādhanamiti ko'rthaḥ ? upāyāntaranirapekṣameva prakāśamānamātmatattvamāsta iti; tadayuktam—akaraṇikāyāḥ pratīteradṛṣṭatvāt . apūrvaṃ ca tat kimapi yathābhyupagatapramāṇātiriktameva pramāṇaṃ syāt . na ca niyamakāraṇamatra paśyāmaḥ, tathā prakāśamānaḥ sva evātmā prakāśate, na parātmeti . prakāśamānatvena cātmano nūnamanubhūyamānatā vācyā . anubhūyamānatā ca anubhavakarmatvam, itarathā'syāḥ pratyakṣataiva na syāt .. ### [2.3.54](https://indike.org/pramana/in.darsana.nyaya.nyayamanjari.2.3.54) athocyate—na pratyakṣa ātmā, kiṃntvaparokṣa iti; nedamarthāntaravacanam . śiśava evaṃ pratāryante, na prāmāṇikāḥ . pratyakṣaśca na bhavati, aparokṣaśca bhavatīti citram .. ### [2.3.55](https://indike.org/pramana/in.darsana.nyaya.nyayamanjari.2.3.55) pratyakṣajñānakarmatvamasya nāstīti cet, tarhyaparokṣatvamapi mā bhūt . prakāśatvādaparokṣatvamiti cet—na—dīpādeḥ prakāśasyāpyandhādibhiragṛhyamāṇasya prakāśamānatvāyogāt . tasmāt prakāśate cedātmā nūnamanubhūyetāpīti balāt karmatvamaparihāryam . ataśca tadavasthaiva dvairūpyacodanā .. ### [2.3.56](https://indike.org/pramana/in.darsana.nyaya.nyayamanjari.2.3.56) prakāśajñānapakṣaṃ ca pratikṣepsyāmaḥ . sa cātmanyapi tulyo nyāyaḥ . kalpanādvairūpyaṃ ca bhavatāṃ, ātmā ca svaprakāśaḥ, saṃvicca svaprakāśeti . na ca nipuṇamatirapi vivekamīdṛśamupadarśayituṃ śaknoti bhavān—iyaṃ svaprakāśā phalarūpā saṃvit, ayaṃ svaprakāśo jñātṛrūpa ātmeti . citraṃ cedaṃ yattayoḥ dvayoḥ prakāśayorantarāle tadvyāpāraḥ parokṣaḥ jñānākhyaḥ saṃpannaḥ iti .. ### [2.3.57](https://indike.org/pramana/in.darsana.nyaya.nyayamanjari.2.3.57) nanu ghaṭamahaṃ jānāmi ityatra trayapratibhāsaḥ—ghaṭaṃ iti viṣayaḥ prakāśate, ahaṃ ityātmā, jānāmi iti saṃviditi .. ### [2.3.58](https://indike.org/pramana/in.darsana.nyaya.nyayamanjari.2.3.58) uktamatra—ghaṭaṃ jānāmi iti jñānaviśeṣaṇaviṣayapratibhāsaḥ . ahaṃ iti tu śarīre jñātṛtvabhramaḥ, ekasyātmanaḥ grāhyagrāhakabhāvānupapatteriti .. ### [2.3.59](https://indike.org/pramana/in.darsana.nyaya.nyayamanjari.2.3.59) yadapi svataścetanasvabhāvatvamātmanaḥ kalpyate—tadapi na sopapattikam .. ### [2.3.60](https://indike.org/pramana/in.darsana.nyaya.nyayamanjari.2.3.60) sacetanaścitā yogāt tadyogena vinā jaḍaḥ . nārthāvabhāsādanyaddhi caitanyaṃ nāma manmahe .. ### [2.3.61](https://indike.org/pramana/in.darsana.nyaya.nyayamanjari.2.3.61) yadi ca svata evārthāvabhāsasāmarthyamātmanaḥ—tat kimindriyaiḥ prayojanam ? manaṣṣaṣṭhairindriyanirapekṣapadārthaparicchedasāmarthyapakṣe ca sarvasarvajñatāpattiḥ . ato'vaśyaṃ jñānasamavāyinibandhanamevātmanaścetayitṛtvam .. ### [2.3.62](https://indike.org/pramana/in.darsana.nyaya.nyayamanjari.2.3.62) na ca ghaṭādibhiratiprasaṅgaḥ āśaṅkanīyaḥ . padārthasvabhāvopanatasyaiva kriyāvaicitryasya sarvalokaprasiddhatvāt . cetanādikriyāḥ karmasamavāyinyo na bhavanti . gamanādikriyāstu kartṛsamavāyinyaḥ . tadiyaṃ jñānakriyā'pi kartṛsamavāyinyeva . na ca vastuśaktiranuyojyā bhavati .. ### [2.3.63](https://indike.org/pramana/in.darsana.nyaya.nyayamanjari.2.3.63) na jaḍatvāviśeṣe'pi karmādau samavaiti cit . na dravyatvāviśeṣe'pi gandhaḥ spṛśati pāvakam .. ### [2.3.64](https://indike.org/pramana/in.darsana.nyaya.nyayamanjari.2.3.64) tasmānna pratyakṣa ātmā, nāpi svataścetayiteti sthitam .. ### [2.3.65](https://indike.org/pramana/in.darsana.nyaya.nyayamanjari.2.3.65) svayūthyāstu kecidācakṣate—yadyekasya kartṛtvaṃ karmatvaṃ cānupapannamityapratyatyakṣa ātmā iṣyate ? tadayamanumānenāpi kathaṃ grahīṣyate ? ### [2.3.66](https://indike.org/pramana/in.darsana.nyaya.nyayamanjari.2.3.66) ātmānamātmanā''tmaiva liṅgādanuminoti hi . tatra nūnamupetavyā kartṛtā karmatā'sya ca .. ### [2.3.67](https://indike.org/pramana/in.darsana.nyaya.nyayamanjari.2.3.67) tatrānumānajñānasya yathā''tmā yāti karmatām . tathā'haṃpratyayasyaiṣaḥ pratyakṣasyāpi gacchatu .. ### [2.3.68](https://indike.org/pramana/in.darsana.nyaya.nyayamanjari.2.3.68) dehādivyatiriktaśca yathā liṅgena gamyate . tathā'haṃpratyayenāpi gamyatāṃ tadvilakṣaṇaḥ .. ### [2.3.69](https://indike.org/pramana/in.darsana.nyaya.nyayamanjari.2.3.69) nanu ! ātmanaḥ kiṃ rūpaṃ, yat pratyakṣeṇa sākṣātkriyate ?—yadyevaṃ sukhāderapi kiṃ rūpaṃ, yanmānasapratyakṣasamadhigamyamiṣyate .. ### [2.3.70](https://indike.org/pramana/in.darsana.nyaya.nyayamanjari.2.3.70) nanu ! ānandādisvabhāvaṃ prasiddhameva sukhādeḥ; tarhi tadādhāratvamātmano'pi rūpamavagacchatu bhavān .. ### [2.3.71](https://indike.org/pramana/in.darsana.nyaya.nyayamanjari.2.3.71) sukhādi cetyamānaṃ hi svatantraṃ nānubhūyate . matubarthānuvedhāttu siddhaṃ grahaṇamātmanaḥ .. ### [2.3.72](https://indike.org/pramana/in.darsana.nyaya.nyayamanjari.2.3.72) idaṃ sukhamiti jñānaṃ dṛśyate na ghaṭādivat . ahaṃ sukhīti tu jñaptiḥ ātmano'pi prakāśikā .. ### [2.3.73](https://indike.org/pramana/in.darsana.nyaya.nyayamanjari.2.3.73) api ca— ### [2.3.74](https://indike.org/pramana/in.darsana.nyaya.nyayamanjari.2.3.74) jñātṛjñānaviśiṣṭārthagrahaṇaṃ kila bhāṣyakṛt . svayaṃ prādīdṛśattacca kiṃ vā yuktamupekṣitum .. ### [2.3.75](https://indike.org/pramana/in.darsana.nyaya.nyayamanjari.2.3.75) viśeṣyabuddhimicchanti nāgṛhītaviśeṣaṇām . pūrvaṃ cānanubhūtasya smaraṇaṃ nāvakalpate .. ### [2.3.76](https://indike.org/pramana/in.darsana.nyaya.nyayamanjari.2.3.76) na cānumānataḥ pūrvaṃ jñātvā''tmānaṃ viśeṣaṇam . tadviśiṣṭārthabuddhiḥ syāt kramasyānavadhāraṇāt .. ### [2.3.77](https://indike.org/pramana/in.darsana.nyaya.nyayamanjari.2.3.77) tasmāt pratyakṣa ātmā .. ### [2.3.78](https://indike.org/pramana/in.darsana.nyaya.nyayamanjari.2.3.78) sāmānādhikaraṇyaṃ ca smaraṇānubhavādiṣu . anusandhīyamānaṃ yaddṛśyate tatkathaṃ bhavet .. ### [2.3.79](https://indike.org/pramana/in.darsana.nyaya.nyayamanjari.2.3.79) pūrvaṃ ahamamumarthamanubhūtavān, ahamevādya punaranubhavāmi iti tulyaviṣayaṃ tāvat . tulyakartṛkatā'pi tatra prakāśate, itarathā tvanumātumapyātmā na śakyeta .. ### [2.3.80](https://indike.org/pramana/in.darsana.nyaya.nyayamanjari.2.3.80) jñānecchāsukhaduḥkhādi kiledaṃ liṅgamātmanaḥ . ekāśrayatayā jñātaṃ anusandhātṛbodhakam .. ### [2.3.81](https://indike.org/pramana/in.darsana.nyaya.nyayamanjari.2.3.81) tathātvena ca tadjñānaṃ āśrayajñānapūrvakam . jñāte tatrāphalaṃ liṅgaṃ ajñāte tu na liṅgatā .. ### [2.3.82](https://indike.org/pramana/in.darsana.nyaya.nyayamanjari.2.3.82) tasmāt pratyakṣa evātmā varamabhyupagamyatām . vṛddhāgamānusāreṇa saṃvidālokanena ca .. ### [2.3.83](https://indike.org/pramana/in.darsana.nyaya.nyayamanjari.2.3.83) athavā'bhiniveśena kimanena prayojanam . anumeyatvamevāstu liṅgenecchādinā''tmanaḥ .. ### [2.3.84](https://indike.org/pramana/in.darsana.nyaya.nyayamanjari.2.3.84) tadāha sūtrakāraḥ— ### [2.3.85](https://indike.org/pramana/in.darsana.nyaya.nyayamanjari.2.3.85) icchādveṣaprayatnasukhaduḥkhajñānānyātmano liṅgam .. 1-1-10 .. ### [2.3.86](https://indike.org/pramana/in.darsana.nyaya.nyayamanjari.2.3.86) icchā nāma tāvaditthamupajāyate—yajjātīyamarthamu payuṃjānaḥ puruṣaḥ purā sukhamanubhūtavān, punaḥ kālāntare tajjātīyamarthamupalabhya sukhasādhana tāmanusmṛtya tadādātumicchati . seyamanena krameṇa samupajāyamānecchā pūrvāparānusandhānasamarthamāśrayamanumāpayati, kāryasya nirādhārasyānupapatteḥ . āśrayamātrapratītau cāyamanvayavyatirekavāneva heturbhavati . icchā dharmiṇī —āśriteti sādhyo dharmaḥ—kāryatvāt, ghaṭādivat; guṇatvāt, rūpādivat iti vā heturvaktavyaḥ .. ### [2.3.87](https://indike.org/pramana/in.darsana.nyaya.nyayamanjari.2.3.87) guṇatvaṃ cecchādīnāṃ acākṣuṣapratyakṣatvādinā rasādivaddarśitamācāryaiḥ .. ### [2.3.88](https://indike.org/pramana/in.darsana.nyaya.nyayamanjari.2.3.88) evamanvayavyatirekavatā'munā hetunā adhiṣṭhānamātre'numite, tadadhiṣṭhānatve ca dehendriyādau prasakte pūrvānubhūtasukhasādhanatvānusandhānasavya pekṣatadutpādanaparyālocanayā tatkāryasamānakartṛkatvāvagamāt śarīrādipratiṣedhe sati, sa eva kevalavyatirekibhavane tu viśiṣṭamāśrayamanumāpayati . icchā—śarīrādivilakṣaṇāśrayā—śarīrādiṣu bādhakopapattau satyāṃ kāryatvāt . atra ca sādharmyadṛṣṭānto na saṃbhavatīti vedharmyadṛṣṭāntaḥ pradarśyate . sa ca ghaṭa eva . yo'bhūt sādharmyadṛṣṭāntaḥ kāryatve nirviśeṣaṇe'pi ghaṭaḥ, sa eva vaidharmyadṛṣṭāntaḥ saviśeṣaṇe . yatra vilakṣaṇāśritatvaṃ nāsti, tatra saviśeṣaṇaṃ kāryatvamapi nāsti, yathā ghaṭādāviti na na śakyate vaktum . tatra kāryatvamātrayoge'pi saviśeṣaṇānāṃ kāryatvābhāvāt vilakṣaṇāśritatvamapi tatra nāsti, bhūtāśritatvena pratyakṣamupalabhyamānatvāt .. ### [2.3.89](https://indike.org/pramana/in.darsana.nyaya.nyayamanjari.2.3.89) nanu cānvayadarśanamantareṇa kevalo vyatirekaḥ pratīyamānaḥ saṃdigdho bhavati—kiṃ tatsādhyābhāvakṛtaiva tasya tasmādvyāvṛttiḥ, uta nimittāntarakṛtā ? iti . sandigdhavyatirekasya hetoragamakatvaṃ niścitavyabhicārahetuvaditi tārkikāḥ—ucyate—syādetadevam, yadi prathamamanavagatānvaya eva kevalavyatirekaśaraṇo hetuḥ prayujyeta . yatra tvanvayavyatirekavāneva hetuḥ kaṃcana viśeṣamāśritya kevalavyatirekitāmabalambate, tatra na ? sandigdhavyatirekatā'vakāśaṃ labhate . ghaṭo hi bhūtalāśritatvena pratyakṣamupalabhyate . tadasya vilakṣaṇāśrayavirahādeva saviśeṣaṇahetuśūnyatā jātā, nirviśeṣaṇāvasthāyāṃ tadyogadarśanāditi na sandigdho vyatirekaḥ .. ### [2.3.90](https://indike.org/pramana/in.darsana.nyaya.nyayamanjari.2.3.90) athavā śarīratvaṃ sāmānyamiha vaidharmyadṛṣṭāntīkartavyam . tatra hi sarvātmanā kāryatvasya śaṅkā'pi nāsti . na ca tadvilakṣaṇāśritam, śarīrāśritatvasya pratyakṣamupalambhāditi .. ### [2.3.91](https://indike.org/pramana/in.darsana.nyaya.nyayamanjari.2.3.91) tadiyamicchā prathamapadārthadarśanādikāryasamānakartṛkatayā'vagamyamānā śarīrādivilakṣaṇamāśrayamavagamayati, saviśeṣaṇātkāryatvāditi sthitam . yaśca sa vilakṣaṇa āśrayaḥ tatrā''tmasaṃjñā'gamikī .. ### [2.3.92](https://indike.org/pramana/in.darsana.nyaya.nyayamanjari.2.3.92) evameva dveṣāderātmaliṅgatā vaktavyā . yajjātīyasyārthasya sannidhānādduḥkhamanubhūtavān puruṣaḥ, tajjātīyamarthaṃ punarupalabhamāno duḥkhasādhanatāmanusandhāya tat dveṣṭīti . so'pi pratisandhātāramekamantareṇa nopapadyate .. ### [2.3.93](https://indike.org/pramana/in.darsana.nyaya.nyayamanjari.2.3.93) ābhyāmicchādveṣābhyāmanantaraṃ prayatnaḥ samutpadyate . so'pi yathoktena krameṇānusandhānapūrvaka eva . prayatamānasya sukhaduḥkhe bhavataḥ . te api tathaiva draṣṭavye .. ### [2.3.94](https://indike.org/pramana/in.darsana.nyaya.nyayamanjari.2.3.94) jñānaṃ tu yadyapi prathamamanusandhānanirapekṣamapi bhavati . tadapi ca śakyata evātmaliṅgamabhidhātum; tathāpyanusandhānapūrvecchādikāryaprakara ṇāt nirṇayātmakameva jñānamudāhartavyam . tatra hi bubhutsāvimarśādipūrvakatvamupalabdhamiti tadekakartṛkatvamupakalpyate . tadevamicchādīnyātmaliṅgānīti sthitam .. ### [2.3.95](https://indike.org/pramana/in.darsana.nyaya.nyayamanjari.2.3.95) śāstre cānekahetūktiḥ na doṣāya kathāsviva . śiṣyaḥ kaścitkvacitkiṃcit anusmṛtyābhidhāsyati .. ### [2.3.96](https://indike.org/pramana/in.darsana.nyaya.nyayamanjari.2.3.96) iti kāruṇiko hi muniranekamiha hetumārgamupadiṣṭavān .. ### [2.3.97](https://indike.org/pramana/in.darsana.nyaya.nyayamanjari.2.3.97) nanu ! atra coditaṃ—anusandhātāramantareṇa tadetadicchādi kāryaṃ nāvakalpata iti kathaṃ jñāyate . ekatra pramātari taddarśanāditi yaducyate— tadidamekapramātṛgrahaṇādātmapratyakṣatvamaṅgīkṛtaṃ syāt iti vyarthamanumānam . agrahaṇe tu pramāturekasya tatpūrvakatvenecchādeḥ pratibandhāgrahaṇādaśakyamanumānamiti—parihṛtametat—kāryatvenaiva liṅgatvamicchāderupavarṇitamasmābhiḥ, na smaraṇādisamānādhāratayeti .. ### [2.3.98](https://indike.org/pramana/in.darsana.nyaya.nyayamanjari.2.3.98) kimarthastarhi pratisandhānopanyāsaḥ ? śarīrādiṣu tadāśrayatvapratiṣedhārthaḥ . na tvevaṃ vyākhyātavanto vayam, ekasya pramātuḥ icchādikāryāśrayatvadarśanāt ekāśrayatvānumānamiti . tasmānna doṣaḥ .. ### [2.3.99](https://indike.org/pramana/in.darsana.nyaya.nyayamanjari.2.3.99) nanu kathaṃ na doṣaḥ ? śarīrādyāśrayatvapratiṣedhasādhane'pi hetorvyāpti grahaṇāsaṃbhavāt . yāvaddhi darśanasmaśṇecchādi kāryajātamekapramātṛniyatatayā'navadhāritaṃ, tāvat kathamasmadavasthābhiḥ na śarīrādyāśrayatvaniṣedhasya tatpūrvakasya caikātmāśritatvasya siddhiḥ .. ### [2.3.100](https://indike.org/pramana/in.darsana.nyaya.nyayamanjari.2.3.100) ka evamāha—na gṛhītamekakartṛkatayā kāryamicchādīti—yadi gṛhītaṃ tarhi vaktavyam, kva gṛhītam ? kena vā pramāṇena gṛhītamiti . svātmanyeveti cet, so'yaṃ pratyakṣa ātmā bhavet . evamanabhyupagame vā na vyāpti grahaṇamiti .. ### [2.3.101](https://indike.org/pramana/in.darsana.nyaya.nyayamanjari.2.3.101) ucyate—na ca pratyakṣa ātmā, na ca vyāpteragrahaṇam . na caiva dharmyantare vyāptirgṛhyate . kintu svasantāna eva . tathāpi na sidhyati pramātṛniyatatānumānam ? kathamiva sidhyati ? santānāntareṣu ekapramātṛpūrvakatvena pratisandhānasya dṛṣṭatvāt .. ### [2.3.102](https://indike.org/pramana/in.darsana.nyaya.nyayamanjari.2.3.102) nanu ! ko'tra vyāptigrahaṇakālaḥ ? pramāṇānumānabaddhi tadbhedena bhavitavyam . tataḥ kim ? idaṃ tato bhavati . kathaṃ svasantāna eva vyāptirgṛhyatām ? kathaṃ vā tatraiva pramātṛniyamo'numīyatāmiti . seyasubhayataḥ pāśā rajjuḥ . ātmā vā pratyakṣaḥ . vyāptirvā duravagameti .. ### [2.3.103](https://indike.org/pramana/in.darsana.nyaya.nyayamanjari.2.3.103) naitadevam—yathā śākyapakṣe—sattvāt kṣaṇikatvānumāne vyāptigrahaṇam, tathehāpi bhaviṣyati . tatra hi yaiva kramayaugapadyavyāvṛttyā sattvasya nityebhyo vyāvṛttiḥ, sa eva kṣaṇikaiḥ anvaya iti dharmyantaranirapekṣatayaiva sādhye'pi dharmiṇi pratibandhagrahaṇaṃ ca anumānaṃ ca darśitam . tadvadihāpyekapramātṛpūrvakatvena pratisandhānasya dharmyantare yadyapi grahaṇaṃ nāsti . tathāpi santānāntarabhede yadasyādarśanaṃ, tadevaikakartṛkatvadarśanamiti ko'nayorhetutve viśeṣaḥ ? ### [2.3.104](https://indike.org/pramana/in.darsana.nyaya.nyayamanjari.2.3.104) nanu ! tatra nityebhyaḥ kramayaugapadyavyāvṛttyā vyāvṛttatvaṃ śakyagrahaṇam . iha tu pramātṛbhedena pratisandhānavyāvṛttirduravagamā . svasantāne'pi jñānakṣaṇābhinnā eva pramātāraḥ . na ca tebhyo vyāvṛttaṃ pratisandhānamiti .. ### [2.3.105](https://indike.org/pramana/in.darsana.nyaya.nyayamanjari.2.3.105) tiṣṭhatvanvayaḥ, vyatirekamukhenāpi kaṣṭamidamanumānaṃ vartate . svasantāne santānāntaravat pramātṛbhedāgrahaṇāt . tadbhedagrahe hi svaparasantāna viveko na syāt . yadyevam, pramātṛbhedagrahaṇābhāvāt punarapyātmā pratyakṣa āyātaḥ .. ### [2.3.106](https://indike.org/pramana/in.darsana.nyaya.nyayamanjari.2.3.106) maivam—nātmā pratyakṣaḥ . pramātṛbhedo hi svasantāne na gṛhyata ityuktam . na punastadaikyaṃ gṛhyate . anyacca bhedāgrahaṇam—anyacca tadaikyagrahaṇam . bhedāgrahaṇādeva ca vyāptisiddheḥ na kaṣṭamanumānam .. ### [2.3.107](https://indike.org/pramana/in.darsana.nyaya.nyayamanjari.2.3.107) nanu ca svasantāne'pi pramātṛbhedāgrahaṇaṃ kiṃ pramāturekatvāt, uta jñānānāṃ kāryakāraṇabhāvāt ? iti na niścīyate . tataśca saṃdigdho vyatirekaḥ—yathā jñānānāṃ kāryakāraṇabhāvo nāsti, yathā ca na tatkṛto'yaṃ vyavahāraḥ, tathā'nantarameva savistaraṃ vakṣyāmaḥ . tasmādicchādikāryeṇa yuktamekapramātranumānam .. ### [2.3.108](https://indike.org/pramana/in.darsana.nyaya.nyayamanjari.2.3.108) nanu cāśritamicchādi deha eva bhaviṣyati . bhūtānāmeva caitanyamiti prāha bṛhaspatiḥ .. ### [2.3.109](https://indike.org/pramana/in.darsana.nyaya.nyayamanjari.2.3.109) uktaṃ ca madaśaktivadvijñānamiti—ucyate—śarīraṃ tāvannecchāderā śrayaḥ; śaiśavayauvanavārdhakādidaśābhedena bhinnatvāt .. ### [2.3.110](https://indike.org/pramana/in.darsana.nyaya.nyayamanjari.2.3.110) tathāhi nānyadṛṣṭo'rthaḥ smartumanyena śakyate . na cānyena smṛte tasmin anyasyecchopajāyate .. ### [2.3.111](https://indike.org/pramana/in.darsana.nyaya.nyayamanjari.2.3.111) tenādyādarthavijñānāt prakṛtyecchāsamudbhavāt . ekasya kāryacakrasya vaktavyaḥ kaścidāśrayaḥ .. ### [2.3.112](https://indike.org/pramana/in.darsana.nyaya.nyayamanjari.2.3.112) śarīraṃ ca bālyādyavasthābhedena bhinnam . atastasya nāśrayo bhavitumarhati, santānāntaravat . yathā hi devadattadṛṣṭe'rthe na yajñādattasya smaraṇaṃ, evaṃ bālaśarīrānubhūte yuvaśarīrasya tanna syāt .. ### [2.3.113](https://indike.org/pramana/in.darsana.nyaya.nyayamanjari.2.3.113) nanu avasthāmātrameva bhinnam; avasthātṛśarīrasvarūpamabhinnameva pratyabhijñāpratyayaprāmāṇyādavagamyate . na ceyaṃ pratyabhijñā lūnapunarjāta keśanakhādipratyabhijñāvadanyathāsiddhā, vināśasyānupalambhāt . stambhādau hi kṣaṇabhaṅgitvapratiṣedhaḥ pratyabhijñayaiva kariṣyate . sā cehāpi tādṛśyeva —tadayuktam—stambhādau nānātvakāraṇāgrahaṇāt . iha tu rūpapariṇāma sanniveśādyanyatvadarśanāt sādṛśyanibandhaneyaṃ bhrāntireva pratyabhijñā . na khalu śiśuśarīre, taruṇaśarīre, jaraccharīre ca tulyameva parimāṇādyupalabhyate .. ### [2.3.114](https://indike.org/pramana/in.darsana.nyaya.nyayamanjari.2.3.114) āhārapariṇāmācca dehabhedo'vagamyate . pākajotpattimārgeṇa na jīryetānnamanyathā .. ### [2.3.115](https://indike.org/pramana/in.darsana.nyaya.nyayamanjari.2.3.115) na bhavetparipoṣo hi dadhikṣīrādibhakṣaṇe . kāṃcikādyupayoge ca na dṛśyetāsya raktatā .. ### [2.3.116](https://indike.org/pramana/in.darsana.nyaya.nyayamanjari.2.3.116) kṣīṇairavayavaḥ kaiścit kaiściccābhinavodgataiḥ . abhinna evāvayavī kathaṃ bhavitumarhati .. ### [2.3.117](https://indike.org/pramana/in.darsana.nyaya.nyayamanjari.2.3.117) tathā ca kecit pacyamānasya ghaṭāderapi prāgavasthāvisadṛśarūpādiyoginaḥ pākakāraṇabhūtavegavadagnidravyasaṃyogaparyālocanayaiva pralayodayau kalpitavantaḥ .. ### [2.3.118](https://indike.org/pramana/in.darsana.nyaya.nyayamanjari.2.3.118) yadyapi kandukanikṣiptā ghaṭādayaḥ tṛṇaparṇādipihitavapuṣo'pi tadvivaraprasṛtena nayanaraśminā na vinaṣṭā ityupalabhyante . yadyapi tatsaṃkhyā, tatparimāṇaḥ, tatsanniveśaḥ, taddeśāśca pakvā api dṛśyante, yadyapi patanto na vibhāvyante, yadyapi ca tadā teṣāṃ kartrādikārakakalāpāsaṃbhavāt punarghaṭanamaghaṭamānamiva lakṣyate—tathāpi teṣāmanumānena vināśaḥ parikalpyate . sarvāvayaveṣvantarbahiśca pākāt pūrvarūpādivilakṣaṇaguṇopalabdheḥ antaḥpraveśaḥ kṛśānoranumīyate . tena vegavatā vahnidravyeṇa nodanāt abhighātādvā nūnaṃ ghaṭādyārambhakeṣvavayaveṣu kriyā jāyate, kriyātaḥ vibhāgaḥ, vibhāgāt dravyārambhakasaṃyogavināśaḥ, tadvināśāt dravyavināśa iti .. ### [2.3.119](https://indike.org/pramana/in.darsana.nyaya.nyayamanjari.2.3.119) anupraveśapakṣe'pi sūkṣmavivaraparikalpanāt avaśyamavayavasaṃyogavighaṭanaṃ ghaṭāderiti vināśa eva .. ### [2.3.120](https://indike.org/pramana/in.darsana.nyaya.nyayamanjari.2.3.120) api ca pākānantaraṃ kandukādapakṛṣyamāṇāḥ piṭhārādayaḥ kecit sphuṭitāḥ, kecidvakratāṃ gatāḥ, kecit sanniveśāntarameva pratipannā dṛśyante . tasmādapi paśyāmo naśyantīti .. ### [2.3.121](https://indike.org/pramana/in.darsana.nyaya.nyayamanjari.2.3.121) tatsaṃkhyatvāditi sarvamanaikāntikaṃ sūcyagraviddhakaṇṭhakoṇaiḥ kumbhādibhiḥ . ataḥ pūrvoktanītyā naṣṭeṣu ghaṭādikāryadravyeṣu paramāṇava eva pacyante . pakvāśca śyāmādiguṇānavajahataḥ raktādiguṇāntarayogamanu bhavantaḥ prāṇigatasukhaduḥkhopabhogasādhanabhūtādṛṣṭapreryamāṇāḥ parasparaṃ saṃyujya dyaṇukādiprakrameṇa tādṛśameva ghaṭādikāryamārabhante . tatrāmuṣmin kṣaṇe'muṣya kāryasya prasavaḥ, amuṣya pralaya iti prakriyā na likhyate, granthavistarabhayāt, aprayojanatvācceti .. ### [2.3.122](https://indike.org/pramana/in.darsana.nyaya.nyayamanjari.2.3.122) evaṃ tapanātapapacyamāneṣvāmrādiphaleṣveṣa eva nyāyaḥ . śarīre'pyaudaryeṇa tejasā pacyamāneṣvannapānādiṣu rasamaladhātubhāvena pariṇāmamupagacchatsu prāyeṇa pratikṣaṇamutpādavināśau saṃbhavata iti sthairyābhāvāt kathamanusandhānādikāryayogastasyeti .. ### [2.3.123](https://indike.org/pramana/in.darsana.nyaya.nyayamanjari.2.3.123) apare punaḥ pratyakṣabalavattayā ghaṭāderavināśameva pacyamānasya manyante . suṣiradravyārambhācca antarbahiśca pāko'pyupapatsyate . dṛśyate ca pakve'pi kalaśe niṣiktānāmapāṃ bahiḥ śītasparśagrahaṇam . ataśca pākakāle jvaladanalaśikhākalāpānupraveśakṛtavināśavat tadāpi śiśirataranīrakaṇanikarānupraveśakṛtavināśaprasaṅgaḥ . na cedṛśī pramāṇadṛṣṭiḥ . ataḥ prakṛtisuṣiratayaiva kāryadravyasya ghaṭāderārambhāt antarāntarā tejaḥkaṇānupraveśakṛtapākopapatteralaṃ vināśakalpanayā . piṭharapākapakṣa eva peśalaḥ .. ### [2.3.124](https://indike.org/pramana/in.darsana.nyaya.nyayamanjari.2.3.124) yādṛgeva hi nikṣiptaḥ ghaṭaḥ pākāya kanduke . pāke'pi tādṛgevāsau uddhṛto dṛśyate tataḥ .. ### [2.3.125](https://indike.org/pramana/in.darsana.nyaya.nyayamanjari.2.3.125) kvacittu sanniveśāntaradarśanaṃ kāṣṭhādyabhighātakṛtamupapatsyate . pāvakasaṃparkakāritve tu sarvatra tathābhāvaḥ syāt . tasmādavinaṣṭā eva ghaṭādayaḥ pacyante . so'yaṃ tu ghaṭādinyāyaḥ śarīre neṣyate .. ### [2.3.126](https://indike.org/pramana/in.darsana.nyaya.nyayamanjari.2.3.126) na hyannapākaḥ sthairye'pi tatra kumbhādipākavat . cayāpacayayuktaṃ hi śarīramupalabhyate .. ### [2.3.127](https://indike.org/pramana/in.darsana.nyaya.nyayamanjari.2.3.127) tasmāt parimāṇādibhedadarśanānnaikaṃ śarīraṃ iti jvālādipratyabhijñāvattatpratyabhijñeti sthitam .. ### [2.3.128](https://indike.org/pramana/in.darsana.nyaya.nyayamanjari.2.3.128) yadapyucyate avasthānāmeva nānātvam, avasthātā punareka eva dehākhya iti—tadapyayuktam bhedābhedavikalpānupapatteḥ . yadi śarīrādavyatiritā eva tadavasthāḥ, tarhi tannānātvāt śarīranānātvaprasaṅgaḥ . ekasmāccharīrādapyananyatvāt avasthānāmapyanyonyaṃ bhedo na syāt .. ### [2.3.129](https://indike.org/pramana/in.darsana.nyaya.nyayamanjari.2.3.129) atha vyatiriktāḥ śarīrādavasthāḥ, tarhi bhedena tadupagraho darśayitavyaḥ . na cāsāvasti . gotvādāvanuvṛttā buddhiranyathā'siddhā satī jātitadvatorbhedamāpādayantī na kenacitpratihanyate . iha punaravasthāturekatvagrāhiṇī buddhiḥ pūrvanītyā pramāṇabādhitatvāt bhrānteti . tasmāt śarīrasya bhinnatvāt santānāntaravat smṛtyanusandhānādikāryayogo durghaṭa iti na tasyecchādikāryāśrayatvam .. ### [2.3.130](https://indike.org/pramana/in.darsana.nyaya.nyayamanjari.2.3.130) itaśca na śarīrasya jñānādiyogaḥ, pariṇāmitvāt, kṣīravat; rūpādimattvāt, tadvadeva; anekasamūhasvabhāvatvāt, tridaṇḍādivat; sānniveśaviśiṣṭācca bhūtatvāt, vāhyabhūtavat .. ### [2.3.131](https://indike.org/pramana/in.darsana.nyaya.nyayamanjari.2.3.131) caitanyaśūnyaṃ śarīraṃ, śarīratvāt, bhūtaśarīravat . na śarīradharmaścaitanyam, ayāvaddravyabhāvitvāt . na ca saṃyogādibhiḥ vyabhicāraḥ; tadupajananāpāyayornimittāntarajanyatvadarśanāt, iha ca tadabhāvāt . viśeṣaguṇatve satīti vā viśeṣaṇopādānānna vyabhicāraḥ . tadviśeṣaguṇatve hi caitanyasya rūpādivattadavasthānādavināśaprasaṅgaḥ .. ### [2.3.132](https://indike.org/pramana/in.darsana.nyaya.nyayamanjari.2.3.132) yattu madaśaktivadityuktam—tatramadaśakterdṛṣṭatvāt abhyupagamaḥ, na tu jñānasya tatra darśanam .. ### [2.3.133](https://indike.org/pramana/in.darsana.nyaya.nyayamanjari.2.3.133) nanu jñānamapi tadanvayavyatirekānuvidhāyi prāyeṇa dṛśyate . bhūteṣvannapānādyupayogapuṣṭeṣu paṭvī cetanā bhavati, tadviparyaye viparyayaḥ . brāhmīghṛtādyupayogasaṃskṛte ca kumāraśarīre paṭuprajñatā jāyate .. ### [2.3.134](https://indike.org/pramana/in.darsana.nyaya.nyayamanjari.2.3.134) varṣāsu ca svedādinā'natidavīyasaiva kālena dadhyādyavayavā eva calantaḥ pūtanādikrimirūpā upalabhyante . caitanye ca gurulāghavavyavahāro'pi bhūtātiśayasadasattvakṛto bhaviṣyatīti bhūtacaitanyapakṣa eva yuktiyukto lakṣyate .. ### [2.3.135](https://indike.org/pramana/in.darsana.nyaya.nyayamanjari.2.3.135) naitaccāru—ceṣṭendriyārthāśrayaḥ śarīraṃ lakṣyate . tatra tadanugrahāt indriyānugrahe sati paṭukaraṇatvāt viṣayagrahaṇamapi paṭutaramivabhavati . na ca viṣayagrahaṇādanyaccaitanyaṃ nāma .. ### [2.3.136](https://indike.org/pramana/in.darsana.nyaya.nyayamanjari.2.3.136) etena brāhmīghṛtopayogo'pi vyākhyātaḥ . vyāpakatvādātmanaḥ sarvatra bhāve sati bhogāyatanatvena kadācit bhūtāvayavānāṃ upādānam . ataḥ śukraśoṇitādivat dadhyavayavān vikṛtānupādāsyate . tathā ca svedajādibhedena bahubhedo bhūtasargaḥ pravartate vicitrakarmaparipākāpekṣayeti yatkiṃcidetat . tasmānna sarvathā bhūtānāṃ caitanyamiti siddham .. ### [2.3.137](https://indike.org/pramana/in.darsana.nyaya.nyayamanjari.2.3.137) nāpīndriyāṇi yathoktasya jñānādeḥ kāryasyāśrayatāṃ pratipadyante— ### [2.3.138](https://indike.org/pramana/in.darsana.nyaya.nyayamanjari.2.3.138) darśanasparśanābhyāmekārthagrahaṇāt .. nyā-sū-3-1-1 ### [2.3.139](https://indike.org/pramana/in.darsana.nyaya.nyayamanjari.2.3.139) yamarthamahamadrākṣaṃ cakṣuṣā, tamevaitarhi sparśanena spṛśāmi, yamasprākṣa sparśanena, tamadhunā cakṣuṣā paśyāmi iti kataradindriyamevamanusandadhīta ? na cakṣuḥ, sparśāviṣayatvāt . na tvagindriyaṃ, rūpāviṣayatvāt . tasmādubhayaviṣayagrahaṇasamarthaḥ kaścidanusandhātā'stīti sa indriyavyatirikto gamyate .. ### [2.3.140](https://indike.org/pramana/in.darsana.nyaya.nyayamanjari.2.3.140) amunaiva prasaṅgena rūpādivyatirekiṇaḥ . vaktavyā guṇinaḥ siddhiretadbuddhinibandhanā .. ### [2.3.141](https://indike.org/pramana/in.darsana.nyaya.nyayamanjari.2.3.141) rūpādiṣu svatantreṣu na hyeṣapratyayo bhavet . na rūpamasya viṣayaḥ na sparśo na ca taddvayam .. ### [2.3.142](https://indike.org/pramana/in.darsana.nyaya.nyayamanjari.2.3.142) ataśca—na guṇavyatirikto guṇī, bhedenāgrahaṇāt—ityasiddhaḥ parokto hetuḥ, bhedagrahaṇasya darśitatvāt . vṛttivikalpādīnāṃ tu pratisamādhānaṃ sāmānyasamarthanāvasare kathitam, avayavisiddhau vakṣyate cetyalamavāntaracintayā .. ### [2.3.143](https://indike.org/pramana/in.darsana.nyaya.nyayamanjari.2.3.143) itaśca nendriyāṇāṃ caitanyam, karaṇatvāt; vāsyādivat . bhautikāni cendriyāṇi varṇayiṣyāmaḥ . tena ya eṣa bhūtacaitanyanirākaraṇe nyāyo varṇitaḥ, sa teṣvapi yojanīyaḥ .. ### [2.3.144](https://indike.org/pramana/in.darsana.nyaya.nyayamanjari.2.3.144) ataścaivaṃ— ### [2.3.145](https://indike.org/pramana/in.darsana.nyaya.nyayamanjari.2.3.145) indriyāntaravikārāt .. nyā. sū. 3-1-12 .. ### [2.3.146](https://indike.org/pramana/in.darsana.nyaya.nyayamanjari.2.3.146) āmre hi cakṣuṣā dṛṣṭe rasaniṣyandasundare . rasanasya vikāraḥ syāt na dantodakasaṃplavaḥ .. ### [2.3.147](https://indike.org/pramana/in.darsana.nyaya.nyayamanjari.2.3.147) bahūnāmindriyāṇāṃ ca bhinnābhiprāyatā bhavet . tenaikatraiva santāne nānācetanatā bhavet .. ### [2.3.148](https://indike.org/pramana/in.darsana.nyaya.nyayamanjari.2.3.148) ati tucchaścāyamindriyacaitanyapakṣa iti kimatra bahu likhyate .. ### [2.3.149](https://indike.org/pramana/in.darsana.nyaya.nyayamanjari.2.3.149) nanu ! manastarhi icchāderadhiṣṭhānaṃ bhaviṣyati . taddhi nityamekaṃ sarvaviṣayaṃ, abhautikamiti na prāktanadauṣaiḥ spṛśyate—ucyate—manaso'pi tadāśrayatvamanupannam . kutaḥ ? ### [2.3.150](https://indike.org/pramana/in.darsana.nyaya.nyayamanjari.2.3.150) jñāturjñānasādhanopapatteḥ saṃjñābhedamātram .. nyā. sū. 3-1-17 .. ### [2.3.151](https://indike.org/pramana/in.darsana.nyaya.nyayamanjari.2.3.151) manaso hīcchādyāśrayatve jñānādau kartṛtvāt tasyāpi bāhyagandhādiviṣayajñānayaugapadyānupapatteḥ tadgrahaṇakaraṇaghrāṇādyadhiṣṭhānapaṭunā kena cidāntarasukhaduḥkhādiviṣayagrāhiṇā smṛtyādikriyākāriṇā ca karaṇena bhavitavyamiti tatrātmasaṃjñā bhavet, ātmani ca kartari manassaṃjñeti .. ### [2.3.152](https://indike.org/pramana/in.darsana.nyaya.nyayamanjari.2.3.152) na cāsya bāhyakaraṇaiḥ sidhyanti sakalāḥ kriyāḥ . na ca smṛtisukhecchādau cakṣurādīni sādhanam .. ### [2.3.153](https://indike.org/pramana/in.darsana.nyaya.nyayamanjari.2.3.153) tenecchākṛtisukhaduḥkhavedanānāṃ ādhāro na khalu mano na cendriyāṇi . deho'pi vrajati na tatsamāśrayatvaṃ tenānyaṃ puruṣamataḥ prakalpayāmaḥ .. ### [2.3.154](https://indike.org/pramana/in.darsana.nyaya.nyayamanjari.2.3.154) dikpradarśanamidaṃ kṛtamicchā- dveṣayatnasukhaduḥkhamatīnām . liṅgatākathanamātmani tatra tvasti hetunivaho bahuranyaḥ .. ### [2.3.155](https://indike.org/pramana/in.darsana.nyaya.nyayamanjari.2.3.155) kartṛprayojyatā khalu dṛṣṭā dātrādikaraṇajātasya . tvakśrotrādyapi karaṇaṃ tathaiva kartrā prayujyeta .. ### [2.3.156](https://indike.org/pramana/in.darsana.nyaya.nyayamanjari.2.3.156) hitāhitaprāptivisargayogyā ceṣṭā ca dṛṣṭā niyatā śarīre . taccetanādhiṣṭhitatāmamuṣya gantrīrathāderiva kalpayāmaḥ .. ### [2.3.157](https://indike.org/pramana/in.darsana.nyaya.nyayamanjari.2.3.157) prāṇādimārutānāmantaścalatāṃ calācalagatīnām . sahajanijakarmavikṛtau kāraṇamanumīyate kiṃcit .. ### [2.3.158](https://indike.org/pramana/in.darsana.nyaya.nyayamanjari.2.3.158) idaṃ ca dehāditaratra durlabhaṃ nirīkṣya vṛddhikṣatabhagnarohaṇam . dhruvaṃ grahasyeva gatiḥ prakalpate nijāśrayakṣemaparāyaṇo naraḥ .. ### [2.3.159](https://indike.org/pramana/in.darsana.nyaya.nyayamanjari.2.3.159) yuktaṃ ca naiva manasā hyanadhiṣṭhitānāṃ svārthapramākaraṇakauśalamindriyāṇām . syāt kaścidiṣṭaviṣayānuguṇaḥ prayatnaḥ yat preritaṃ samadhitiṣṭhati tāni, cetaḥ .. ### [2.3.160](https://indike.org/pramana/in.darsana.nyaya.nyayamanjari.2.3.160) jñānaprayatnādimato'tha kasya dṛṣṭāntatā syāt karaṇādiliṅge . kārye na naḥ paryanuyoga eṣaḥ sāmānyamātrasya tavāpi siddheḥ .. ### [2.3.161](https://indike.org/pramana/in.darsana.nyaya.nyayamanjari.2.3.161) pratyakṣādipramāṇairyaḥ vyavahāraḥ sa cātmanā . vinā nityena netyevaṃ tato'pyetasya kalpanā .. ### [2.3.162](https://indike.org/pramana/in.darsana.nyaya.nyayamanjari.2.3.162) yat pratyakṣaṃ pratyabhijñāsvabhāvaṃ jñātranyatve tasya na hyātmalābhaḥ . grāhyasyaikyaṃ yadvadarthasya tasmāt sidhyatyevaṃ grāhakasyāpi puṃsaḥ .. ### [2.3.163](https://indike.org/pramana/in.darsana.nyaya.nyayamanjari.2.3.163) avinābhāvagrahaṇaṃ liṅgajñānaṃ tadanvayasmaraṇam . liṅgipramitiritīdaṃ na boddhṛbhede pramāṇaṃ syāt .. ### [2.3.164](https://indike.org/pramana/in.darsana.nyaya.nyayamanjari.2.3.164) jñāte vanecaramukhādatideśavākye dṛṣṭe mṛge vipinavartini gosadṛkṣe . tatsaṃjñitāmitiphalaṃ labhate pramātṛ- bhede na cedamupamānamiti pratiṣṭham .. ### [2.3.165](https://indike.org/pramana/in.darsana.nyaya.nyayamanjari.2.3.165) varṇānāṃ śravaṇaṃ krameṇa samayasmṛtyā padārthagrahaḥ tatsaṃskārajamantyavarṇakalanākāle tadālocanam . ākāṃkṣādinibandhanānvayakṛtaṃ vākyārthasaṃpiṇḍanaṃ jñātraikena vinā'tidurghaṭamato nityātmasiddhirdhruvā .. ### [2.3.166](https://indike.org/pramana/in.darsana.nyaya.nyayamanjari.2.3.166) mayedaṃ pūrvedyurvihitamidamanyedyuraparaṃ vidhātavyaṃ ceti śrutikṛṣivaṇijyādiṣu janāḥ . yadevaṃ ceṣṭante nipuṇamanusandhāya tadamī dhruvaṃ sarvāvasthānugatamavagacchanti puruṣam .. ### [2.3.167](https://indike.org/pramana/in.darsana.nyaya.nyayamanjari.2.3.167) ityātmalakṣaṇamavādi yadetadicchā- dveṣaprayatnasukhaduḥkhasamāśrayatvam . tatsaṅginaṃ tadiha heyatayā vyavasyet tadviprayuktamadhigamyatayā mumukṣuḥ .. ### [2.3.168](https://indike.org/pramana/in.darsana.nyaya.nyayamanjari.2.3.168) atho tathāgatāḥ prāhuḥ kiṃ puṃsā kalpitena vaḥ . jñānamātreṇa pūrvoktaḥ vyavahāraḥ prasiddhyati .. ### [2.3.169](https://indike.org/pramana/in.darsana.nyaya.nyayamanjari.2.3.169) jñānaṃ kimātmavannityaṃ saugatairupagamyate . prāgdarśitānusandhānakāmanādikriyākṣamam .. ### [2.3.170](https://indike.org/pramana/in.darsana.nyaya.nyayamanjari.2.3.170) jñānaṃ bauddhagṛhe tāvat kuto nityaṃ bhaviṣyati . anye'pi sarve saṃskārāḥ kṣaṇikā iti gṛhyatām .. ### [2.3.171](https://indike.org/pramana/in.darsana.nyaya.nyayamanjari.2.3.171) kṣaṇikaṃ ceṣyate kāryaṃ na kvacit kiṃcidāśritam . svatantraṃ jñānamevātaḥ nānyastenānumīyate .. ### [2.3.172](https://indike.org/pramana/in.darsana.nyaya.nyayamanjari.2.3.172) jñānasya ca prabhedo'yaṃ icchādveṣasukhādikaḥ . na vastvantaramityevaṃ na tato'pyanyakalpanam .. ### [2.3.173](https://indike.org/pramana/in.darsana.nyaya.nyayamanjari.2.3.173) guṇatvamapi nāstyasya yato'dhiṣṭhānakalpanā . na guṇavyatiriktaśca guṇī nāmāsti kaścana .. ### [2.3.174](https://indike.org/pramana/in.darsana.nyaya.nyayamanjari.2.3.174) nirāśrayeṣu vijñānaskandheṣu kṣaṇabhaṅgiṣu . kathaṃ smṛtyādikāryaṃ vā paraloko'pi vā katham .. ### [2.3.175](https://indike.org/pramana/in.darsana.nyaya.nyayamanjari.2.3.175) satyapi paraloke kathamakṛtābhyāgamakṛtavipraṇāśau parākriyete ? yena hi jñānena caityavandanādi karma kṛtaṃ, tasya vināśāt na tatphalopabhogaḥ . yasya ca phalopabhogaḥ tena na tatkarma kṛtamiti—naiṣadoṣaḥ—kāryakāraṇabhāvasya niyāmakatvāt . anādiprabandhapravṛtto hi jñānānāṃ hetuphalabhāva pravāhaḥ . eṣa eva ca santāna ityucyate . tatkṛtaścāyaṃ anusandhānādikāryaniyamaḥ . santānānāditvāt, tadavicchedācca paraloko'pi na kliṣṭakalpanaḥ .. ### [2.3.176](https://indike.org/pramana/in.darsana.nyaya.nyayamanjari.2.3.176) yadyapi santatyantarapatitajñānajanyamapi santatyantare jñānaṃ dṛśyate, tathāpi na tādṛśakāryakāraṇabhāvena santānavyavahāraḥ pratisandhānādikāryanirvāho vā; kintu upādānarūpatadviśeṣanibandhana evaiṣa nirvahati niyamaḥ . tasminneva sati svarūpasantānavibhāgo'vakalpate .. ### [2.3.177](https://indike.org/pramana/in.darsana.nyaya.nyayamanjari.2.3.177) smṛtivatparihartavyau kṛtanāśākṛtāgamau . tatsantānopasaṃkrāntyā kusume bījarāgavat .. ### [2.3.178](https://indike.org/pramana/in.darsana.nyaya.nyayamanjari.2.3.178) āha ca— ### [2.3.179](https://indike.org/pramana/in.darsana.nyaya.nyayamanjari.2.3.179) yasminneva hi santāne āhitā karmavāsanā . phalaṃ tatraiva badhnāti kārpāse raktatā yathā .. ### [2.3.180](https://indike.org/pramana/in.darsana.nyaya.nyayamanjari.2.3.180) yathā yasminneva hi kārpasabīje varṇaḥ raktatākhyaḥ kṛtaḥ, tasyaiva kusumamapi raktam, nānyasyeti; tathā yasminneva jñānasantāne yādṛśī karmavāsanā, tādṛśaṃ phalaṃ tasminneva santāne bhavati, nānyasmin jñāna ityarthaḥ . tathā ca kṛtahānākṛtābhyāgamadoṣanirāsaḥ .. ### [2.3.181](https://indike.org/pramana/in.darsana.nyaya.nyayamanjari.2.3.181) nityastvātmā'bhyupagamyamānaḥ yadi sukhādijanmanā vikṛtimanubhavati tadayaṃ anitya eva carmādivaduktaḥ syāt . nirvikāratve tu satā' satā vā sukhaduḥkhādinā karmaphalena kastasya viśeṣa iti karmavaiphalyameva . taduktam— ### [2.3.182](https://indike.org/pramana/in.darsana.nyaya.nyayamanjari.2.3.182) varṣātapābhyāṃ kiṃ vyomnaḥ carmaṇyasti tayoḥ phalam . carmopamaścet so'nityaḥ khatulyaścedasatphalaḥ iti .. ### [2.3.183](https://indike.org/pramana/in.darsana.nyaya.nyayamanjari.2.3.183) tasmādutsṛjyatāmeṣaḥ mūrdhābhiṣiktaḥ prathamo mohaḥ ātmagraho nāma . tannivṛttyā cātmīyagraho'pi viraṃsyati ahameva na, kiṃ mama iti . tadidamahaṃkāramamakāragranthiprahāṇena nairātmyadarśanameva nirvāṇadvāra mabalambyatām .. ### [2.3.184](https://indike.org/pramana/in.darsana.nyaya.nyayamanjari.2.3.184) tasya ca mārgaḥ kṣaṇikapadārthaniścayaḥ . kṣaṇikeṣu hi sarvabhāveṣu nirāśrayeṣu jñānasyāpyāśrayavirahāt kutastyamātmakalpanamiti .. ### [2.3.185](https://indike.org/pramana/in.darsana.nyaya.nyayamanjari.2.3.185) kathaṃ punareṣaḥ sakalapramāṇātītaḥ kṣaṇikapadārthavādaḥ śakyate śākyairabhyupagantum .. ### [2.3.186](https://indike.org/pramana/in.darsana.nyaya.nyayamanjari.2.3.186) na khalu kṣaṇabhāṅgitve bhāvānāmakṣajā matiḥ . pramāṇaṃ, kṣaṇikākārakalpanotpatyasambhavāt .. ### [2.3.187](https://indike.org/pramana/in.darsana.nyaya.nyayamanjari.2.3.187) athavāpyavinābhūtahetujñānopapattitaḥ . na bhūmiranumānasya vikalpaniyatasthiteḥ .. ### [2.3.188](https://indike.org/pramana/in.darsana.nyaya.nyayamanjari.2.3.188) smaraṇapratyabhijñāne pratyuta sthairyasādhake . evaṃ ca vaṃcanāmātraṃ āśunāśitvadeśanāḥ .. ### [2.3.189](https://indike.org/pramana/in.darsana.nyaya.nyayamanjari.2.3.189) ucyate—pratyakṣagamyaṃ kṣaṇikatvaṃ bhavati, na bhavatītyeṣaṃ kariṣyate vicāraḥ . anumānaṃ tu saṃpratyevābhidhīyate—sattvāt kṣaṇikāḥ padārthā iti . sattvaṃ tāvadarthakriyākāritvamucyate . yathoktam pra. vā. 1-3-2— ### [2.3.190](https://indike.org/pramana/in.darsana.nyaya.nyayamanjari.2.3.190) arthakriyāsamarthaṃ yat tadeva paramārthasat iti .. ### [2.3.191](https://indike.org/pramana/in.darsana.nyaya.nyayamanjari.2.3.191) satpratyayagamyatve hi sattve, keśoṇḍrakāderapi sattvaprasaṅgaḥ . sattā sambandhitve tu sattve, sāmānyādīnāṃ tadasambandhādasattvaṃ syāt . arthakriyāsāmarthyasattvānuvartī ca laukiko vyavahāraḥ . satyapi putre tatkāryādarśanāt—aputrā vayam iti vyapadiśanti laukikā . putrādanyasminnapi tatkāryakāriṇi sati saputrā vayam iti ca bruvate . tasmādarthakriyākāritvameva sattvam .. ### [2.3.192](https://indike.org/pramana/in.darsana.nyaya.nyayamanjari.2.3.192) bhavatvevaṃ, tasya tu kutra kathaṃ vā kṣaṇikatvena vyāptigrahaṇam ? kutreti yat pṛcchasi, yatra rocate mahābhāgāya ghaṭe, paṭe vā gṛhyatāṃ vyāptiḥ .. ### [2.3.193](https://indike.org/pramana/in.darsana.nyaya.nyayamanjari.2.3.193) kiṃ sādhyadharmiṇyeva vyāptigrahaṇamupapadyate ? ### [2.3.194](https://indike.org/pramana/in.darsana.nyaya.nyayamanjari.2.3.194) dhīman ! ko'tra pramādaḥ ? na hi daivanirmitaḥ kaścit sādhyadharmī nāma . grahītuṃ śakyate cedvyāptiḥ, yatra tatra sā gṛhyatāmiti .. ### [2.3.195](https://indike.org/pramana/in.darsana.nyaya.nyayamanjari.2.3.195) yattu kathamasyā grahaṇamiti—taducyate—bhāvānāṃ hi sattvaṃ kramayaugapadyābhyāṃ vyāptam .. ### [2.3.196](https://indike.org/pramana/in.darsana.nyaya.nyayamanjari.2.3.196) nityeṣu ca padārtheṣu vyāpakānupalambhanāt . tadvyāptamapi sattvaṃ hi balāttebhyo nivartate .. ### [2.3.197](https://indike.org/pramana/in.darsana.nyaya.nyayamanjari.2.3.197) na ca rāśistṛtīyo'sti tena gatyantarakṣayāt . kṣaṇikāneva tān bhāvān sattvaṃ samabalambate .. ### [2.3.198](https://indike.org/pramana/in.darsana.nyaya.nyayamanjari.2.3.198) tacca svagrāhakādbodhāt asandigdhaṃ pratīyate . jñānotpattyaiva taddhetoḥ asāmarthye parākṛte .. ### [2.3.199](https://indike.org/pramana/in.darsana.nyaya.nyayamanjari.2.3.199) asamarthātsamutpādo dṛśyate na hi kasyacit . śaktāśaktaprasūtatve na tadbodho'sti saṃśayaḥ .. ### [2.3.200](https://indike.org/pramana/in.darsana.nyaya.nyayamanjari.2.3.200) ata eva ca tajjñānaṃ pramāṇaṃ jagadussadā . svarūpe śaktijatve tu saṃśayāderasaṃbhavāt .. _First 200 of 542 passages. [Read on](https://indike.org/pramana/in.darsana.nyaya.nyayamanjari.2.3)_ ## Commentaries (1) - [Nyāyamañjarīgranthibhaṅga](https://indike.org/pramana/in.darsana.nyaya.nyayamanjari!granthibhanga.57.p1) — Cakradhara, Sanskrit ## Linked texts (5) - [Bārhaspatyasūtra (fragments)](https://indike.org/pramana/in.darsana.nastika.carvaka.brhaspatisutra*fragments.1.8) — Sanskrit - [Yogavāsiṣṭha (vulgate)](https://indike.org/pramana/in.lit.ramayana.upajivya.yogavasistha*vulgate.6.28.14) — Sanskrit - [With Śaṅkara's bhāṣya (Sansknet input)](https://indike.org/pramana/in.darsana.vedanta.brahmasutra!sankara!ratnaprabha*withbhasya.1.747.5) — Sanskrit - [Bhāmatī with the sūtras (Sansknet input)](https://indike.org/pramana/in.darsana.vedanta.brahmasutra!sankara!bhamati*withsutra.1.591.4) — Sanskrit - [Śrībhāṣya (complete text)](https://indike.org/pramana/in.darsana.vedanta.brahmasutra!ramanuja*complete.5.1-60) — Sanskrit --- Source: [https://indike.org/pramana/in.darsana.nyaya.nyayamanjari.2.3](https://indike.org/pramana/in.darsana.nyaya.nyayamanjari.2.3) · Pramāṇa