[Pramāṇa](https://indike.org/pramana/) › [Indian literature](https://indike.org/pramana/in) › [Philosophy](https://indike.org/pramana/in.darsana) › [Logic and epistemology](https://indike.org/pramana/in.darsana.nyaya) › [A Cluster of Nyāya Flowers](https://indike.org/pramana/in.darsana.nyaya.nyayamanjari) › 2.5 # A Cluster of Nyāya Flowers 2.5: navamamāhnikam—prameyaparīkṣā · apavargaparīkṣā Nyāyamañjarī 2.5 - **Language:** Sanskrit ### navamamāhnikam—prameyaparīkṣā · apavargaparīkṣā ### [2.5.1](https://indike.org/pramana/in.darsana.nyaya.nyayamanjari.2.5.1) evaṃ śarīrādau duḥkhaparyante heye prameye nirṇīte, yadartha etadupadeśaḥ yatparamupādeyaṃ prameyaṃ, yadarthaḥ śāstrārambhaḥ tamapavargaṃ lakṣayitumāha— ### [2.5.2](https://indike.org/pramana/in.darsana.nyaya.nyayamanjari.2.5.2) tadatyantavimokṣo'pavargaḥ .. 1-1-22 .. ### [2.5.3](https://indike.org/pramana/in.darsana.nyaya.nyayamanjari.2.5.3) taditi prakrāntasya duḥkhasyāvamarśaḥ . na ca mukhyameva duḥkhaṃ bādhanāsvabhāvamavamṛśyate, kintu tatsādhanaṃ tadanuṣaktaṃ ca sarvameva . tena duḥkhena viyogo'pavargaḥ .. ### [2.5.4](https://indike.org/pramana/in.darsana.nyaya.nyayamanjari.2.5.4) asti pralayavelāyāmapyātmano duḥkhaviyogaḥ . sa tvapavargo na bhavati, sargasamaye punarakṣīṇakarmāśayānurūpaśarīrādisaṃbandhe sati dukhasaṃbhavāt . ataḥ tadvyāvṛttyarthamatyantagrahaṇam .. ### [2.5.5](https://indike.org/pramana/in.darsana.nyaya.nyayamanjari.2.5.5) ātyantikī duḥkhanivṛttirapavargaḥ, na sāvadhikā . dvividhaduḥkhāvamarśinā sarvanāmnā sarveṣāmātmaguṇānāṃ duḥkhavadavamarśāt, atyantagrahaṇena ca sarvātmanā tadviyogābhidhānāt navānāmātmaguṇānāṃ buddhisukhaduḥkhecchādveṣaprayatnadharmādharmasaṃskārāṇāṃ nirmūlocchedaḥ apavarga ityuktaṃ bhavati .. ### [2.5.6](https://indike.org/pramana/in.darsana.nyaya.nyayamanjari.2.5.6) yāvadātmaguṇāssarve nocchinnā vāsanādayaḥ . tāvadātyantikī duḥkhavyāvṛttirnāvakalpate .. ### [2.5.7](https://indike.org/pramana/in.darsana.nyaya.nyayamanjari.2.5.7) dharmādharmanimitto hi saṃbhavaḥ sukhaduḥkhayoḥ . mūlabhūtau ca tāveva stambhau saṃsārasadmanaḥ .. ### [2.5.8](https://indike.org/pramana/in.darsana.nyaya.nyayamanjari.2.5.8) taducchede tu tatkāryaśarīrādyanupaplavāt . nātmanaḥ sukhaduḥkhe staḥ ityasau mukta ucyate .. ### [2.5.9](https://indike.org/pramana/in.darsana.nyaya.nyayamanjari.2.5.9) hacchādveṣaprayatnādi bhogāyatanabandhanam . ucchinnabhogāyatanaḥ nātmā tairapi yujyate .. ### [2.5.10](https://indike.org/pramana/in.darsana.nyaya.nyayamanjari.2.5.10) prāṇasya kṣuppipāse dve lobhamohau ca cetasaḥ . śītātapau śarīrasya ṣaḍūmirahitaḥ śivaḥ .. ### [2.5.11](https://indike.org/pramana/in.darsana.nyaya.nyayamanjari.2.5.11) tadevaṃ navānāmātmaviśeṣaguṇānāṃ nirmūlocchedo'pavarga iti yaducyate, tadevedamuktaṃ bhavati tadatyantavimokṣo'pavarga iti .. ### [2.5.12](https://indike.org/pramana/in.darsana.nyaya.nyayamanjari.2.5.12) nanu ! tasyāmavasthāyāṃ kīdṛgātmā'vaśiṣyate ? svarūpaikapratiṣṭhānaḥ parityakto'khilairguṇaiḥ .. ### [2.5.13](https://indike.org/pramana/in.darsana.nyaya.nyayamanjari.2.5.13) umiṣṭakātigaṃ rūpaṃ tadasyāhurmanīṣiṇaḥ . saṃsārabandhanādhīnaduḥkhakleśādyadūṣitam .. ### [2.5.14](https://indike.org/pramana/in.darsana.nyaya.nyayamanjari.2.5.14) atra tāvat vedāntina āhuḥ—nāyamidṛśo mokṣaḥ prekṣāvatāṃ prayatnabhūmirbhavitumarhati . ko hi nāma śilāśakalakalpaṃ apagatasakalasukha saṃvedanasaṃsparśaṃ ātmānamupapādayituṃ yateta ? sopādhisāvadhikaparimitānandaniṣyandāt svargādapyadhikaṃ anavadhikaniratiśayanaisargikānandasundaraṃ aparimlānatatsaṃvedanasāmarthyaṃ caturthaṃ puruṣārthamācakṣante vicakṣaṇāḥ .. ### [2.5.15](https://indike.org/pramana/in.darsana.nyaya.nyayamanjari.2.5.15) yadi tu jaḍaḥ pāṣāṇanirviśeṣa eva tasyāmavasthāyāmātmā bhavet, . tatkṛtaṃ apavargeṇa ! saṃsāra eva varamastu ! yatra tāvadantarā'ntarā'pi duḥkhakaluṣitamapi svalpamapi sukhamupabhujyate . cintyatāṃ tāvadidaṃ, kimalpasukhānubhavo bhadrakaḥ, uta sarvasukhoccheda eva . tasmānnityasukhamātmano mahattvavadastīti āgamaprāmāṇyādabhyupagamyatām . tacca saṃsāradaśāyāṃ avidyāvaraṇavaśena nānubhūyate . tattvajñānābhyāsabhāvanābhibhūtanirantarāvidyāvaraṇastvātmā tasyāmavasthāyāṃ tadanubhavatīti .. ### [2.5.16](https://indike.org/pramana/in.darsana.nyaya.nyayamanjari.2.5.16) tadidamanupapannam—ātmano nityasukhasattāyāṃ pramāṇābhāvāt . pratyakṣaṃ tāvannāsmadādīnāmanyeṣāṃ vā keṣāṃcidasminnarthe prabhaviṣyatīti keyaṃ kathā ? anumānamapi na saṃbhavati, liṅgaleśānavalokanāditi .. ### [2.5.17](https://indike.org/pramana/in.darsana.nyaya.nyayamanjari.2.5.17) nanu ! uktamevānumānamapavargāya, yatra prekṣāvatāṃ prayatnaḥ . sukhasiddhaye hi buddhimanto yatante, nāśmakalpamātmānaṃ kartumiti . tadayaṃ iṣṭādhigamārthaḥ mumukṣoḥ prayatnaḥ, prekṣāpūrvakāriprayatnatvāt, kṛṣyādiprayatna vaditi .. ### [2.5.18](https://indike.org/pramana/in.darsana.nyaya.nyayamanjari.2.5.18) nāniṣṭoparamārthatvāt; aniṣṭasyāpi śāntaye . santaḥ prayatamānā hi dṛśyante vyādhikheditāḥ .. ### [2.5.19](https://indike.org/pramana/in.darsana.nyaya.nyayamanjari.2.5.19) atidurvahaścāyaṃ saṃsāraduḥkhabhāra iti tadupaśamāya vyavasyantaḥ santaḥ na niṣprayojanaprayatnā bhavantīti anaikāntiko hetuḥ .. ### [2.5.20](https://indike.org/pramana/in.darsana.nyaya.nyayamanjari.2.5.20) atha āgamādavagamyate—bibhutveneva, nityena sukhenāvinākṛtaḥ svātmeti . tathā ca paṭhyate—vijñānamānandaṃ brahma iti— ### [2.5.21](https://indike.org/pramana/in.darsana.nyaya.nyayamanjari.2.5.21) syādetadevam—yadyetadeva kevalaṃ āgamavacanamaśroṣyata . vacanāntaramapi tu śrūyate—na ha vai saśarīrasya sataḥ priyāpriyayorupahatirasti . aśarīraṃ vā va santaṃ na priyāpriye spṛśataḥ iti .. ### [2.5.22](https://indike.org/pramana/in.darsana.nyaya.nyayamanjari.2.5.22) nanu ! bhavatpaṭhitamāgamavacanaṃ anyathāpi vyākhyātuṃ śakyate . saśarīrasya iti prakramāt sāṃsārike sukhaduḥkhe anukūletaraviṣayopalaṃbhasaṃbhave tadānīmaśarīramātmānaṃ na spṛśata ityarthaḥ .. ### [2.5.23](https://indike.org/pramana/in.darsana.nyaya.nyayamanjari.2.5.23) hanta ! tarhi tvadadhītamapi vedavacanaṃ ānandaṃ brahma iti saṃsāraduḥkhaparihāraprakaraṇādeva tadduḥkhāpāyaviṣayaṃ vyākhyāsyate . na khalu vyākhyānasya bhagavataḥ kācidabhūmirasti . dṛṣṭāśca duḥkhoparame sukhaśabdaprayogāḥ .. ### [2.5.24](https://indike.org/pramana/in.darsana.nyaya.nyayamanjari.2.5.24) cirajvaraśirortyādivyādhiduḥkhena kheditāḥ . sukhino vayamadyeti tadapāye prayuṃjate .. ### [2.5.25](https://indike.org/pramana/in.darsana.nyaya.nyayamanjari.2.5.25) yadi ca ānandam iti vacanāt nityaṃ sukhamātmana iṣyate, tarhi brahma iti vacanāt vyāpakatvamiva, vijñānam iti vacanāt jñānamapi nityamasyābhyupagantavyam . ataśca sukhavat jñānasyāpi nityatvāt saṃsāre'pi nityasukhopalabdhiḥ syāt . tataśca dharmādharmaphalābhyāṃ sukhaduḥkhābhyāmasya nityasya sukhasya sāhacaryamanubhūyeta . api ca— ### [2.5.26](https://indike.org/pramana/in.darsana.nyaya.nyayamanjari.2.5.26) sukhavat jñānavaccāsya kāmaṃ dehendriyādyapi . nityaṃ prakalpyatāmitthaṃ mokṣo ramyataro bhavet .. ### [2.5.27](https://indike.org/pramana/in.darsana.nyaya.nyayamanjari.2.5.27) atha kāryaṃ sukhajñānam, hetustasya vicintanīyaḥ—yata utpadyata iti . dharmāccet, so'pi kiṃprabhava iti vācyam . yogasamādhija iti cet, tasya svakāryatvāt svakāryasukhasaṃvedanāvasānatvānna śāśvatikatvaṃ syāt . aprakṣayaśca dharmasya niranumānakaḥ . na hi yogasamādhijo dharmaḥ na kṣīyata ityatra ca kiṃcidanumānamasti . viparyaye tu prasiddhamanumānam, sarvasya kṛtakasyānityatvadarśanāditi . kṣīṇe ca dharme tatkāryajñānābhāvāt sadapi sukhamanupalabhyamānaṃ asato na viśiṣyate .. ### [2.5.28](https://indike.org/pramana/in.darsana.nyaya.nyayamanjari.2.5.28) svaprakāśaṃ tat sukhamiti cet—na—saṃsāre'pi tadupalabdhiprasaṅgāt . śarīrādisaṃbandhaḥ pratibandhaheturiti cet—na—śarīrādīnāmupabhogārthatvāt . bhogārthāḥ śarīrādayaste bhogapratibandhaṃ vidadhatīti na sādhvī kalpanā .. ### [2.5.29](https://indike.org/pramana/in.darsana.nyaya.nyayamanjari.2.5.29) avidyāvaraṇāt saṃsāre svaprakāśasukhānupalambha iti cet—na—prakāśasya tucchenāvaritumaśakyatvāt . na ca prakāśarūpaṃ pāramārthikamātmanaḥ sukhaṃ tadviparītatucchasvabhāveyamavidyā na parītumarhati, meghādinā dinakarakiraṇā varaṇāvadhāraṇāt .. ### [2.5.30](https://indike.org/pramana/in.darsana.nyaya.nyayamanjari.2.5.30) aviralagavalamalīmasaṃ balāhakavyūhapihitaravibimbam . tadapi na rajanīsadṛśaṃ dinamiti sahasā mohamahimā .. ### [2.5.31](https://indike.org/pramana/in.darsana.nyaya.nyayamanjari.2.5.31) meghā api raveranye svarūpeṇa ca vāstavāḥ . tattvānyatvādacintyā tu nāvidyā'varaṇakṣamā .. ### [2.5.32](https://indike.org/pramana/in.darsana.nyaya.nyayamanjari.2.5.32) tasmānna nityānandatvamātmanaḥ suvacam .. ### [2.5.33](https://indike.org/pramana/in.darsana.nyaya.nyayamanjari.2.5.33) api ca mokṣe nityānandasvabhāve tadrāgeṇa prayatamāno mumukṣuḥ na mokṣamadhigacchet . na hirāgiṇāṃ mokṣo'stīti mokṣavidaḥ .. ### [2.5.34](https://indike.org/pramana/in.darsana.nyaya.nyayamanjari.2.5.34) duḥkhanivṛttyātmake'pi mokṣe duḥkhadveṣāt prayatamānasya samāno doṣa iti cet—na—mumukṣordveṣābhāvāt . rāgadveṣau hi saṃsārakāraṇamiti ca jānāti mumukṣuḥ, dveṣṭi ca duḥkhamiti kathaṃ saṃgacchate .. ### [2.5.35](https://indike.org/pramana/in.darsana.nyaya.nyayamanjari.2.5.35) sukhe'pyasya rāgo nāstyeveti cet—na—svarganirviśeṣe'pavarge svargava drāgasya saṃbhāvyamānatvāt . duḥkhena tu nirviṇṇasya mumukṣorvairāgyaṃ jāyate na duḥkhaviṣayo dveṣaḥ . viraktasya cāsya mokṣaṃ prati yatno bhavati, na duḥkhaṃ dviṣata iti na samāno nyāyaḥ .. ### [2.5.36](https://indike.org/pramana/in.darsana.nyaya.nyayamanjari.2.5.36) yaduktaṃ tādṛśo mokṣaḥ prekṣāvatāṃ prayatnaviṣayo na bhavatīti—tadapi na sāṃpratam—prayojanānusāreṇa pramāṇavyavasthānupapatteḥ . na hi prayojanānuvarti pramāṇaṃ bhavitumarhati .. ### [2.5.37](https://indike.org/pramana/in.darsana.nyaya.nyayamanjari.2.5.37) yadi nirānando mokṣaḥ prekṣāvatāṃ na ruciraḥ—kāmaṃ mā bhūt—na tvapramāṇakamānandaṃ tvatra kalpayituṃ śaknumaḥ .. ### [2.5.38](https://indike.org/pramana/in.darsana.nyaya.nyayamanjari.2.5.38) na ca sarvātmanā sādhūnāmanabhimata eva tathāvidho mokṣaḥ . na catadavāptaye na prayatante . te hyevaṃ vivecayanti . duḥkhasaṃsparśaśūnyaśāśvatika sukhasaṃbhogāsaṃbhavāt, duḥkhasya cāvaśyaṃ hātavyatvāt, vivekahānasya cāśakyatvāt, viṣamadhunī ivaikapātre patite ubhe api sukhaduḥkhe tyajyetāmiti . ataśca saṃsārānmokṣaḥ śreyān, yatrāyamiyānatidussaho duḥkhaprabandho'valupyate, varamiyatī kādācitkī sukhakaṇikā tyaktā, na tasyāḥ kṛte duḥkhabhāra iyānūḍha iti . tasmānna sukhopabhogātmako mokṣa iti .. ### [2.5.39](https://indike.org/pramana/in.darsana.nyaya.nyayamanjari.2.5.39) anyastvāha—tiṣṭhatu tāvanmokṣaḥ ! saṃsāre'pi na sukhaṃ nāma kiṃcidastīti sarva evāyaṃ dukhābhāvamātre suḥkhavyavahāraḥ . tathā hi— ### [2.5.40](https://indike.org/pramana/in.darsana.nyaya.nyayamanjari.2.5.40) tṛṣā śuṣyatyāsye pibati salilaṃ svādu surabhi kṣudhārtassan śālīn kabalayati māṃspākavalitān . pradīpte rāgāgnau ghananibiḍamāśliṣyati vadhūṃ pratīkāre vyādheḥ sukhamiti viparyasyati janaḥ .. ### [2.5.41](https://indike.org/pramana/in.darsana.nyaya.nyayamanjari.2.5.41) ucyate—tadidamatikṛtakavairāgyaprakaṭanakaurukucīkauśalam, ānandātmanaḥ pratiprāṇisaṃvedyasya sukhasya nihnotumaśakyatvāt . anivṛtte'pi duḥkhe kvacit sukhasaṃvedanāt na duḥkhābhāvaḥ sukham . nirabhilāṣasyāpyatarkitopanatasukhasādhanaviṣayasaṃparke sati sukhasaṃvedadarśanāt .. ### [2.5.42](https://indike.org/pramana/in.darsana.nyaya.nyayamanjari.2.5.42) abhilāṣātmakaduḥkhābhāvaḥ sukhamityapi na manojñam . yastu duḥkhābhāve kvacit sukhamityapi vyapadeśaḥ praśāntarogāṇāmiva pūrvaṃ darśitaḥ, sa bhākta iti na tāvatā svasaṃvedanasākṣikasukhāpahnavaḥ kartumucitaḥ . mokṣa tu nityasukhamasaṃbhavatpramāṇatvāt nābhyupagamyate .. ### [2.5.43](https://indike.org/pramana/in.darsana.nyaya.nyayamanjari.2.5.43) api ca mokṣe sukhamasti na veti vicāra eṣa na prāmāṇikajanocitaḥ . svarūpeṇa vyavasthānamātmano mokṣa iti mokṣavidaḥ . tatra ātmasvarūpameva kīdṛśamiti cintyam, na pṛthaṅmokṣasvarūpam . ātmanaśca sukhaduḥkhabudhyādayaḥ āgantukā guṇāḥ, na mahattvavat sāṃsiddhikā iti nirṇītametadātmalakṣaṇe, sukhādikāryeṇa cātmano'numānāditi .. ### [2.5.44](https://indike.org/pramana/in.darsana.nyaya.nyayamanjari.2.5.44) ata eva kāpilakathitacitiśaktisvabhāvatvamapi na yuktamātmanaḥ .. ### [2.5.45](https://indike.org/pramana/in.darsana.nyaya.nyayamanjari.2.5.45) sa cetanaścitā yogāt tadyogena vinā jaḍaḥ . citirnāmārthavijñānaṃ kādācitkaṃ tu tasya tat .. ### [2.5.46](https://indike.org/pramana/in.darsana.nyaya.nyayamanjari.2.5.46) nārthasaṃvenādanyat caitanyaṃ nāma vidyate . tacca sāmagryadhīnatvāt kathaṃ mokṣe bhaviṣyati .. ### [2.5.47](https://indike.org/pramana/in.darsana.nyaya.nyayamanjari.2.5.47) jāgrataḥ svapnavṛttervā suṣuptasyāpi vā''tmanaḥ . jñānamutpadyate'nyā tu caturthī nāsti tādṛśī .. ### [2.5.48](https://indike.org/pramana/in.darsana.nyaya.nyayamanjari.2.5.48) jāgraddaśāyāṃ svapne ca buddheḥ pratyātmavedyatā . sukhaṃ supto'hamadyeti paścātpratyavamarśanāt .. ### [2.5.49](https://indike.org/pramana/in.darsana.nyaya.nyayamanjari.2.5.49) tadā tvavedyamānā'pi suṣupte dhīḥ prakalpyate . turyāvasthā tu saṃvittiśūnyasya sthitirātmanaḥ .. ### [2.5.50](https://indike.org/pramana/in.darsana.nyaya.nyayamanjari.2.5.50) turyāvasthātigaṃ rūpaṃ yadāhuḥ kecidātmanaḥ . pramāṇāgocaratvena kalpanāmātrameva tat .. ### [2.5.51](https://indike.org/pramana/in.darsana.nyaya.nyayamanjari.2.5.51) saṃvitprasavasāmarthyaṃ sāmagrīsannidhānataḥ . yadi nāmātmano'styasya tāvatā na cidātmatā .. ### [2.5.52](https://indike.org/pramana/in.darsana.nyaya.nyayamanjari.2.5.52) yadi tu darśanaśaktiyogyatāmātrameva puṃsaścaitanyamucyate—tarhi tathāvidhasya tasya kaivalyasyāsmākīnamokṣasadṛśatvameva . satsaṃvitprasavayogya tāmātrasaṃbhave'pi dṛśyendriyasaṃprayogādisāmagrīvaikalyāt kaivalyāvasthāyā mātmano draṣṭṛtvāsaṃbhavāt . darśanaśūnyasya cānyasya caitanyasya nirastatvāditi .. ### [2.5.53](https://indike.org/pramana/in.darsana.nyaya.nyayamanjari.2.5.53) nirvāṇādipadākhyeyamapavargaṃ tu saugatāḥ . santatyucchedamicchanti, svacchāṃ vā jñānasantatim .. ### [2.5.54](https://indike.org/pramana/in.darsana.nyaya.nyayamanjari.2.5.54) matadvitayamapyetat pratyuktaṃ pūrvameva yat . dhvastaśca jñānasantānaḥ nityaścātmā samarthitaḥ .. ### [2.5.55](https://indike.org/pramana/in.darsana.nyaya.nyayamanjari.2.5.55) santatyucchedapakṣastu naiyāyikamatādapi . śocyo yatrāśmakalpo'pi na kaścidavaśiṣyate .. ### [2.5.56](https://indike.org/pramana/in.darsana.nyaya.nyayamanjari.2.5.56) arhatpakṣe'pi yadrūpaṃ anyasāpekṣamātmanaḥ . na kevalasya tādrapyam ityasmanmatatulyatā .. ### [2.5.57](https://indike.org/pramana/in.darsana.nyaya.nyayamanjari.2.5.57) vikāritvaṃ tu jīvānāṃ atyantamasamaṃjasam . śabdapudgalavaccaitatpratyākhyeyamasaṃbhavāt .. ### [2.5.58](https://indike.org/pramana/in.darsana.nyaya.nyayamanjari.2.5.58) tasmānna vedāntavido vadanti mokṣaṃ na sāṅkhyā na ca saugatādyāḥ . ityakṣapādābhihito'pavargaḥ śroyāṃstadatyantavimokṣa eva .. ### [2.5.59](https://indike.org/pramana/in.darsana.nyaya.nyayamanjari.2.5.59) āha—bhavatvayamīdṛgapavargaḥ . sa tu kathamadhigamyata ityucyatām . uktameva bhagavatā sūtrakāreṇa— ### [2.5.60](https://indike.org/pramana/in.darsana.nyaya.nyayamanjari.2.5.60) duḥkhajanmapravṛttidoṣamithyājñānānāmuttarottarāpāye tadanantarāpāyādapavargaḥ .. 1-1-2 .. ### [2.5.61](https://indike.org/pramana/in.darsana.nyaya.nyayamanjari.2.5.61) duḥkhocchedastāvadapavarga iti kathitam . kāryatvācca duḥkhasya kāraṇocchedāttaducchedaḥ . kāraṇaṃ cāsya janma . janmani sati hi duḥkhaṃ bhavati . jāyate iti hi janma dehendriyādisaṃbandhaḥ ātmanaḥ . tadapi janmakāraṇocchedādevocchedyam . atastatkāraṇaṃ pravṛttirucchedyā . tasyā api hetūcchedāt uccheda iti taddhetayo doṣāḥ ucchedyāḥ . teṣāṃ tu nimittaṃ mithyājñānam . tasminnucchinne doṣā ucchinnā bhavantīti mithyā jñānamucchedyam . taducchede ca tattvajñānamupāyaḥ . prasiddho hyayamarthaḥ samarthitaśca pūrvaṃ vistarataḥ tattvajñānaṃ mithyājñānasya bādhakamiti . tasmā tattvajñānānmithyājñānadoṣapravṛttijanmaduḥkhanivṛttikrameṇāpavarga iti .. ### [2.5.62](https://indike.org/pramana/in.darsana.nyaya.nyayamanjari.2.5.62) yadyapi mithyājñānamapi janmakāryam, aśarīrasyātmano mithyājñānānupapatteḥ . itaretarakāryakāraṇabhāvena bījāṅkuravadanādiprabandhapravṛttena pravartamānā mithyājñānādayo bhāvāḥ saṃsāra ityākhyāyate—tathāpi—tatkāraṇocchedacintāyāṃ kutaḥ prabhṛtyuccheda upakramyatāmiti vicāryamāṇe viśeṣaniyamābhāvāt yataḥ kutaściditi prāpte, mithyājñānasya pratikūlamuccheda kāraṇaṃ tattvajñānamupalabdhamiti viśeṣe pramāṇābhavāt taducchada evopakramyate .. ### [2.5.63](https://indike.org/pramana/in.darsana.nyaya.nyayamanjari.2.5.63) ata eva mithyājñānamūlaḥ saṃsāra ucyate . tasmin ucchinne taducchedasaṃbhavāt, na tataḥ prabhṛti saṃsāraḥ pravartata iti nipuṇamatibhirapi nirdhārayituṃ śakyam, anāditvāttasyeti .. ### [2.5.64](https://indike.org/pramana/in.darsana.nyaya.nyayamanjari.2.5.64) tadevaṃ tattvajñānānmithyājñānāpāye tatkāryadoṣāpāyaḥ, doṣāpāye pravṛttyapāyaḥ, pravṛttyapāye janmāpāyaḥ, janmāpāye duḥkhāpāyaḥ—sa evāpavarga iti . tadidamuktaṃ uttarottarāpāye tadanantarāpāyāt iti .. ### [2.5.65](https://indike.org/pramana/in.darsana.nyaya.nyayamanjari.2.5.65) āha—vidito'yaṃ sūtrārthaḥ; kintvaghaṭamānamanorathaviḍambanāmātramidam alīkaśraddadhānatāprakaṭanaṃ vā . duradhigamastu saṃkaṭo mokṣamārgaḥ .. ### [2.5.66](https://indike.org/pramana/in.darsana.nyaya.nyayamanjari.2.5.66) sādhyastrivarga evaiṣaḥ dharmakarmārthalakṣaṇaḥ . caturthaḥ puruṣārthastu kathāsveva virājate .. ### [2.5.67](https://indike.org/pramana/in.darsana.nyaya.nyayamanjari.2.5.67) yadā priyaviyogādi bhavatyudvegakāraṇam . tadā mokṣakathāḥ kāmaṃ kriyantāṃ śokaśāntaye .. ### [2.5.68](https://indike.org/pramana/in.darsana.nyaya.nyayamanjari.2.5.68) na tūdyamasamaye tadadhigamasamarthāmupalabhāmahe saraṇim, ṛṇakleśapravṛttyanubandhasya dustaratvāt .. ### [2.5.69](https://indike.org/pramana/in.darsana.nyaya.nyayamanjari.2.5.69) ṛṇānubandhastāvat—jāyamāno ha vai brāhmaṇaḥ tribhirṛṇairṛṇavā . brahmacaryeṇa ṛṣibhyaḥ yajñena devebhyaḥ prajayā pitṛbhyaḥ itīdaṃ hi vede paṭhyate . tatra prathamaṃ ṛṣīṇāmanṛṇaḥ syām iti brahmacaryamācarati . tataḥ pitṛṇāmanṛṇaḥ syām iti kṛtadārasaṅgrahaḥ prajotpādanāya vyavaharati . tadanu gṛhastha eva darśapūrṇamāsādiṣu sahasrasaṃvatsaraparyanteṣu karmasvadhikṛtaḥ kratūnanutiṣṭhatīti devānāmanṛṇaḥ syām iti . ko'sya mokṣavyavasāyāvasaraḥ ? ### [2.5.70](https://indike.org/pramana/in.darsana.nyaya.nyayamanjari.2.5.70) nanu ca ! ### [2.5.71](https://indike.org/pramana/in.darsana.nyaya.nyayamanjari.2.5.71) ṛṇāṇi trīṇyapākṛtya mano mokṣe niveśayet— ### [2.5.72](https://indike.org/pramana/in.darsana.nyaya.nyayamanjari.2.5.72) iti manvādismaraṇāt astyeva tadavasaraḥ—na—śrutivākyavirodhāt . evaṃ hi śrūyate jarāmaryaṃ vā etatsatraṃ yadagnihotraṃ darśapūrṇamāsau ca jarayā ha vā eṣa etasmānmucyate mṛtyunā vā iti . na ca karmaprayogāśaktyā karmabhyo virantuṃ śakyate; svayamaśaktasya bāhyaśaktyupadeśāt . antevāsī vā juhuyāta, brahmaṇā hi sa parikrītaḥ . krīto vā juhuyāt dhanena hi sa parikrītaḥ . aśaktasya ca mokṣopāyānuṣṭhāne'pyasya kathaṃ śaktiḥ ? ### [2.5.73](https://indike.org/pramana/in.darsana.nyaya.nyayamanjari.2.5.73) kleśānubandhādapyapavargābhāvaḥ— ### [2.5.74](https://indike.org/pramana/in.darsana.nyaya.nyayamanjari.2.5.74) ye hi rāgādayo doṣāḥ ātmanaścirasaṃbhṛtāḥ . kastān śamayituṃ śaktaḥ punarāvṛttidharmakān .. ### [2.5.75](https://indike.org/pramana/in.darsana.nyaya.nyayamanjari.2.5.75) kāmaṃ ciraṃ vijityāpi krodhaṃ vā lobhameva vā . punargacchan vaśe teṣāṃ lokaḥ prāyeṇa dṛśyate .. ### [2.5.76](https://indike.org/pramana/in.darsana.nyaya.nyayamanjari.2.5.76) tathāhi—ciramapi tapasi niyamitamatirapi avijitaviṣamaśaravikṛtiḥ tanupavanāpanītavasanakāminīstanajaghanadarśanādeva vaśaṃ viśvāmitraḥ kusumadhanvano gata iti śrūyate .. ### [2.5.77](https://indike.org/pramana/in.darsana.nyaya.nyayamanjari.2.5.77) alamākhyāyikayā . adyatve'pyevaṃ śataśo dṛśyata iti durucchedā doṣāḥ . vītarāgajanmādarśanāt iti ca vicāritamātmaparīkṣāyām . aviyukta eva doṣairjanturjāyata iti doṣavivṛddhihetavaśca rūpādayo viṣayāḥ . te kathamiva svakarmaṇyudāsate .. ### [2.5.78](https://indike.org/pramana/in.darsana.nyaya.nyayamanjari.2.5.78) tāmbūlaṃ kusumasugandhayassamīrāḥ saudheṣu pratiphalitāḥ śaśāṅkabhāsaḥ . vācaśca praṇayanavāmṛtadravārdrāḥ dūtīnāṃ dadhati na kasya rāgavṛddhim .. ### [2.5.79](https://indike.org/pramana/in.darsana.nyaya.nyayamanjari.2.5.79) api ca— ### [2.5.80](https://indike.org/pramana/in.darsana.nyaya.nyayamanjari.2.5.80) mugdhasmitasughādhautamadhurālāpaśālinā . mukhena pakṣmalākṣīnāṃ kasya nākṣipyate manaḥ .. ### [2.5.81](https://indike.org/pramana/in.darsana.nyaya.nyayamanjari.2.5.81) ityevaṃ nidānānupaśamādapi sthita eva kleśānubandhaḥ .. ### [2.5.82](https://indike.org/pramana/in.darsana.nyaya.nyayamanjari.2.5.82) pravṛttyanubandhaḥ khalvapi— ### [2.5.83](https://indike.org/pramana/in.darsana.nyaya.nyayamanjari.2.5.83) rāgādipreryamāṇo hi karmāṇyārabhate naraḥ . dīrghadīrghāḥ pratāyante yairdharmādharmavāsanāḥ .. ### [2.5.84](https://indike.org/pramana/in.darsana.nyaya.nyayamanjari.2.5.84) yaḥ pravṛttyanubandhaśca heturanyasya janmanaḥ . tena janmāntareṇānyā janyate karmavāsanā .. ### [2.5.85](https://indike.org/pramana/in.darsana.nyaya.nyayamanjari.2.5.85) ekamevedṛśaṃ karma kartumāpatati kvacit . janmāyutaśatenāpi yatphalaṃ bhujyate na vā .. ### [2.5.86](https://indike.org/pramana/in.darsana.nyaya.nyayamanjari.2.5.86) kleśakarmānubandhotthā janmaduḥkhādiśṛṅkhalā . punarāvartamānaiṣā kenopāyena bhajyatām ? ### [2.5.87](https://indike.org/pramana/in.darsana.nyaya.nyayamanjari.2.5.87) vinā phalopabhogena na vināśo'sti karmaṇām . teṣāṃ jñānāgninā dāha iti śraddhāvijṛmbhitam .. ### [2.5.88](https://indike.org/pramana/in.darsana.nyaya.nyayamanjari.2.5.88) kāryakāraṇabhāvo hi śāstrādevāvadhāritaḥ . karmaṇāṃ ca phalānāṃ ca sa kathaṃ vā nivartatām .. ### [2.5.89](https://indike.org/pramana/in.darsana.nyaya.nyayamanjari.2.5.89) na ca pyajñānasāpekṣaṃ karmeṣṭaṃ bandhakāraṇam . yenātmajñānayuktānāṃ tadudāsīta tān prati .. ### [2.5.90](https://indike.org/pramana/in.darsana.nyaya.nyayamanjari.2.5.90) ajñānanairapekṣyeṇa karmaṇāṃ svabhāva evaiṣaḥ, yat phalāvinābhāvitvamiti .. ### [2.5.91](https://indike.org/pramana/in.darsana.nyaya.nyayamanjari.2.5.91) tasmāditthamṛṇakleśapravṛttyādyanubandhataḥ . na mokṣasiddhirastīti tadartho viphalaḥ śramaḥ .. ### [2.5.92](https://indike.org/pramana/in.darsana.nyaya.nyayamanjari.2.5.92) aśakye'rthe vṛthā yatna iti matvā manīṣibhiḥ . mokṣacarcāḥ parityajya sve gṛhe sukhamāsyatām .. ### [2.5.93](https://indike.org/pramana/in.darsana.nyaya.nyayamanjari.2.5.93) atrābhidhīyate—yattāvaduktaṃ ṛṇānubandhāt iti—tadayuktam— vidhipadāśravaṇāt aupacārikam ṛṇaśabdaṃ jāyamānaśabdaṃ ca prayujya karmastutiriyaṃ kriyate jāyamāno ha vai brāhmaṇaḥ iti . na tadvyatirikta puruṣārthaviṣayaprayatnapratiṣedho vidhīyate .. ### [2.5.94](https://indike.org/pramana/in.darsana.nyaya.nyayamanjari.2.5.94) tathā hi—ṛṇaśabdo'yaṃ viṣayāntare mukhyārthaḥ prasiddhaḥ, yatrottamarṇaḥ salābhamamutaḥ pratigrahīṣyāmi iti dhanamadhamarṇāya prayacchati . adhamarṇo'pi salābhamasmai pradāsyāmi iti mattvā gṛhṇāti . so'yaṃ ṛṇaśabdasya mukhyo viṣayaḥ iha nāstyeva .. ### [2.5.95](https://indike.org/pramana/in.darsana.nyaya.nyayamanjari.2.5.95) jāyamāno'pi mukhyaḥ utpadyamāno hi mātuḥ kukṣikuhārānnissarannabhi dhīyate . na cāsau tapasvī bālaḥ karmabhirabhisaṃbadhyate . tasmāt brahmacaryam, apatyotpādanam, adhvaraprayoga iti tritayamidam, ṛṇavadavaśyakartavyamiti karmastutiriyamaupacārikapadaprayogādgamyate . na caitāvatā mokṣavyavasāyāvasaraviraha iti pariśaṅkanīyam, āśramāntarasya tadaupayi kasya darśanāt .. ### [2.5.96](https://indike.org/pramana/in.darsana.nyaya.nyayamanjari.2.5.96) nanu ! maraṇāvadhi darśapūrṇamāsādidharmopadeśāt kathamāśramāntaragrahaṇam—na—jarāmaryavādasthāpyaparityāgapratipādanāya karmapraśaṃsārthatvāt . ye catvāraḥ pathayo devayānāḥ ityādayo hi caturthāśramaśaṃsinaḥ bhūyāṃsaḥ santi mantrārthavādāḥ . manvādismṛtivacanāni caturthāśramopadeśīni caturthāśramocitaśaucācārādītikartavyatāvitānavidhānaparāṇi ca prabandhenaiva dṛśyante— ### [2.5.97](https://indike.org/pramana/in.darsana.nyaya.nyayamanjari.2.5.97) evaṃ gṛhāśrame sthitvā vidhivat snātako dvijaḥ . vane vasetsuniyataḥ bhaikṣabhugvijitendriyaḥ .. ### [2.5.98](https://indike.org/pramana/in.darsana.nyaya.nyayamanjari.2.5.98) ityupakramya caturthāśramocitamokṣopāyānuṣṭhānopadeśāya ṣaṣṭho'dhyāyaḥ samasta eva manunā'nukrāntaḥ .. ### [2.5.99](https://indike.org/pramana/in.darsana.nyaya.nyayamanjari.2.5.99) jābālaśrutau ca vidhāyakenaiva brāhmaṇavākyena pratipadamāśramacatuṣṭaya mupadiṣṭam brahmacārī bhūtvā gṛhī bhavet, gṛhī bhūtvā vanī bhavet, vanī bhūtvā pravrajet iti .. ### [2.5.100](https://indike.org/pramana/in.darsana.nyaya.nyayamanjari.2.5.100) agnisamāropaṇavidhānopadeśaśca pratyakṣaśrutaḥ kathamapahnūyate . ### [2.5.101](https://indike.org/pramana/in.darsana.nyaya.nyayamanjari.2.5.101) ātmanyagnīn samāropya brāhmaṇaḥ pravrajedgṛhāt iti .. ### [2.5.102](https://indike.org/pramana/in.darsana.nyaya.nyayamanjari.2.5.102) api ca upaniṣadāmadhyayanaṃ asati mokṣopāyaprayogasamarthe caturthāśrame nirarthakameva prāpnoti . kriyākāṇḍānuṣṭhānaniṣṭhatve hi vedasya jñānakāṇḍopadeśaḥ kiṃprayojanaḥ syāt .. ### [2.5.103](https://indike.org/pramana/in.darsana.nyaya.nyayamanjari.2.5.103) tadevaṃ varṇavat āśramāṇāmapi caturṇāṃ pratyakṣopadeśasiddhatvāccaturthāśramiṇāṃ ca mokṣādhigamopāyatattvajñānabhāvanābhyāsāvasarasaṃbhavāt so'yaṃ jarāmaryavādaḥ praśaṃsāmātrapara evāvatiṣṭhate . jarayā ha vā eṣa etasmānmucyate mṛtyunā vā iti ca vacanāt jarasā karmatyāgānujñānāt sa eva caturthāśramāvasara iti gamyate . taduktam— ### [2.5.104](https://indike.org/pramana/in.darsana.nyaya.nyayamanjari.2.5.104) gṛhasthastu yadā paśyet valīpalitamātmanaḥ . apatyasyaiva cāpatyaṃ tadā'raṇyaṃ samāśrayet .. ### [2.5.105](https://indike.org/pramana/in.darsana.nyaya.nyayamanjari.2.5.105) ma. smṛ. 6. 2 iti .. ### [2.5.106](https://indike.org/pramana/in.darsana.nyaya.nyayamanjari.2.5.106) itarathā hi mṛtyunaiva ca tasmānmṛcyate ityavakṣyata, ca tvevamabravīt . tasmāt vārdhakadaśocitaṃ caturthamāśramamanumanyante .. ### [2.5.107](https://indike.org/pramana/in.darsana.nyaya.nyayamanjari.2.5.107) tiṣṭhatu vā vārdhakadaśā . yūno'pi paripakvakāṣa yasyāśramacatuṣṭaya kramamanapekṣyaiva mokṣādhikāra ākhyātaḥ . yathokyaṃ brahmacaryādeva pravrajet iti . ata eva dvividho brahmacāri bhavati—upakurvāṇaḥ naiṣṭhikaśca . tatra upakurvāṇakaḥ yo brahmacaryamanubhūya gṛhasthāśramamanubhavati . sa cāpari pakvakaṣāyaḥ, anuṣaśāntarāgaḥ . tameva pratīdamucyate— ### [2.5.108](https://indike.org/pramana/in.darsana.nyaya.nyayamanjari.2.5.108) anadhītya dvijo vedān anutpādya ca santatim . aniṣṭavā caiva yajñaiśca mokṣamicchan vrajatyadhaḥ ### [2.5.109](https://indike.org/pramana/in.darsana.nyaya.nyayamanjari.2.5.109) ma. smṛ. 6. 37 iti .. ### [2.5.110](https://indike.org/pramana/in.darsana.nyaya.nyayamanjari.2.5.110) yastu paripakvakaṣāyaḥ sa naiṣṭhika eva brahmacārī bhavati, na gṛhasthāśramaṃ pratipadyate . gṛhastho'pi paripakvakaṣāyaḥ vānaprasthāśramamullaṅghya yatitve'dhikriyate . yathoktam—gṛhādvā vanādvā pravrajet iti .. ### [2.5.111](https://indike.org/pramana/in.darsana.nyaya.nyayamanjari.2.5.111) kecittu—karmaphalābhisandhirahitasya, kartavyamiti karma kurvataḥ kṣīṇarāgasyātmavidaḥ gṛhasthasyāpi mokṣamācakṣate . yathā''ha yājñavalkyaḥ— ### [2.5.112](https://indike.org/pramana/in.darsana.nyaya.nyayamanjari.2.5.112) nyāyārjitadhanastattvajñānaniṣṭho'tithipriyaḥ . śrāddhakṛdvedavidyāvit gṛhastho'pi vimucyate ### [2.5.113](https://indike.org/pramana/in.darsana.nyaya.nyayamanjari.2.5.113) iti . tasmādṛṇānubandhādapavargābhāva ityayuktam .. ### [2.5.114](https://indike.org/pramana/in.darsana.nyaya.nyayamanjari.2.5.114) yattu kleśānubandhāditi—tadapyanadhyavasāyamātram . pratipakṣabhāvanādinā kleśopaśamasya suśakatvāt . yadi hi doṣā nityā bhaveyuḥ, anityatve'pyākasmikā vā, sahetutve'pi yadyeṣāṃ nityo heturbhavet . kāryo 'pi vā yadyasau na jñāyeta, jñātasya vā'sya śamanopāyo na jñāyeta, jñāto'pi vā'nuṣṭhātumasau na śakyeta, tadā ka evainamucchindyāt . kintu— ### [2.5.115](https://indike.org/pramana/in.darsana.nyaya.nyayamanjari.2.5.115) nākasmikā na nityāste na nityājñātahetukāḥ . nājñātaśamanopāyāḥ na cāśakyapratikriyāḥ .. ### [2.5.116](https://indike.org/pramana/in.darsana.nyaya.nyayamanjari.2.5.116) na hi doṣāṇāṃ ātmasvarūpavannityatvaṃ, upajananāpāyadharmakatvena grahaṇāt mithyājñānaṃ ca prasavakāraṇameṣāmavadhṛtamiti nākasmikatvam, avināśihetukatvam, ajñātahetukatvaṃ vā .. ### [2.5.117](https://indike.org/pramana/in.darsana.nyaya.nyayamanjari.2.5.117) mithyājñānasya ca sanyagjñānam pratipakṣabhāvanābhyāsena ca samūlamunmīlayituṃ śakyante doṣāḥ iti nājñātapratīkāratvaṃ teṣām . uktaṃ ca kena cit pra-vā-3-220— ### [2.5.118](https://indike.org/pramana/in.darsana.nyaya.nyayamanjari.2.5.118) sarveṣāṃ savipakṣatvāt nirhrāsātiśayāśritāt . sātmībhāvāttadabhyāsāt hīyerannāsravāḥ kvacit .. ### [2.5.119](https://indike.org/pramana/in.darsana.nyaya.nyayamanjari.2.5.119) iti . viṣayadoṣadarśanena hi teṣu saktilakṣaṇo rāgaḥ śāmyati . yadā hyeṣa cintayati vivekī— ### [2.5.120](https://indike.org/pramana/in.darsana.nyaya.nyayamanjari.2.5.120) asau taralatārākṣī pīnonnataghanastanī . vilupyamānā kāntāre vihagairadya dṛśyate .. ### [2.5.121](https://indike.org/pramana/in.darsana.nyaya.nyayamanjari.2.5.121) vibhāti bahirevāsyāḥ padmagandhanibhaṃ vapuḥ . antarmajjāsthiviṇmūtrabhedaḥkrimikulākulam .. ### [2.5.122](https://indike.org/pramana/in.darsana.nyaya.nyayamanjari.2.5.122) asthīni pittamuccārāḥ klinnānyāntrāṇi śoṇitam . iti carmapinaddhaṃ tat kāminītyabhidhīyate .. ### [2.5.123](https://indike.org/pramana/in.darsana.nyaya.nyayamanjari.2.5.123) medogranthī stanau nāma tau svarṇakalaśau katham . viṣṭhādṛtau nitambe ca ko'yaṃ hemaśilābhramaḥ .. ### [2.5.124](https://indike.org/pramana/in.darsana.nyaya.nyayamanjari.2.5.124) mūtrāsṛgdvāramaśuci cchidraṃ kledi jugupsitam . tadeva hi ratisthānaṃ aho puṃsāṃ viḍambanā .. ### [2.5.125](https://indike.org/pramana/in.darsana.nyaya.nyayamanjari.2.5.125) prītiryathā nijāsyotthaṃ lihataḥ śoṇitaṃ śunaḥ . śuṣke'sthini tathā puṃsaḥ svadhātusyandinaḥ striyām .. ### [2.5.126](https://indike.org/pramana/in.darsana.nyaya.nyayamanjari.2.5.126) vyāttānanā vivṛttākṣī vivarṇā śvāsaghurgharā . kathamadya na rāgāya mriyamāṇā tapasvinī .. ### [2.5.127](https://indike.org/pramana/in.darsana.nyaya.nyayamanjari.2.5.127) aho bata varāko'yaṃ akāle tṛṣitaḥ phaṇī . prasāritamukho'smākaṃ śoṇitaṃ pātumāgataḥ .. ### [2.5.128](https://indike.org/pramana/in.darsana.nyaya.nyayamanjari.2.5.128) kimanenāparāddhaṃ naḥ svabhāvo vastunaḥ svayam . spṛśyamāno dahatyagniḥ iti kasmai prakupyati .. ### [2.5.129](https://indike.org/pramana/in.darsana.nyaya.nyayamanjari.2.5.129) nānukūlaḥ priye hetuḥ pratikūlo na vipriye . svakarmaphalamaśnāmi kaḥ suhṛtkaśca me ripuḥ .. ### [2.5.130](https://indike.org/pramana/in.darsana.nyaya.nyayamanjari.2.5.130) evamahaniśaṃ cintayato nitāntaṃ śāntasya manasaḥ samacittatā sarvatra samudbhavatīti vilīyante doṣagranthayaḥ .. ### [2.5.131](https://indike.org/pramana/in.darsana.nyaya.nyayamanjari.2.5.131) ata evopadiśyante mokṣaśāstreṣvanekaśaḥ . tasya tasyopaghātāya tāstāḥ pratyūhabhāvanāḥ .. ### [2.5.132](https://indike.org/pramana/in.darsana.nyaya.nyayamanjari.2.5.132) nanu ca pratipakṣabhāvane'pi na sarvātmanā doṣapakṣaḥ kṣayamupayāti . nimbābhyupayoga iva kriyamāṇe kaphadhāturiti—naitadevam—tatra nimbopayo gavat tadanukūlasyānnapānāderupayogadarśanāt . api ca— ### [2.5.133](https://indike.org/pramana/in.darsana.nyaya.nyayamanjari.2.5.133) dharmilopabhayāttatra neṣṭaḥ sarvātmanā kṣayaḥ . kaphādhikyaṃ tu hantavyaṃ dhātusāmyasya siddhaye .. ### [2.5.134](https://indike.org/pramana/in.darsana.nyaya.nyayamanjari.2.5.134) iha sarvātmanocchedyāḥ kleśāḥ saṃsārakāriṇaḥ . chedaścaikāntatasteṣāṃ pratipakṣopasevayā .. ### [2.5.135](https://indike.org/pramana/in.darsana.nyaya.nyayamanjari.2.5.135) na ca pratipakṣabhāvanābhyāsamekaṃ astramapāsya tadupaśame nimittāntaraṃ kimapi kramate .. ### [2.5.136](https://indike.org/pramana/in.darsana.nyaya.nyayamanjari.2.5.136) na hi viṣayābhilāṣastadupabhogena viraṃsyati . yathā''ha— ### [2.5.137](https://indike.org/pramana/in.darsana.nyaya.nyayamanjari.2.5.137) na jātu kāmaḥ kāmānāmupabhogena śāmyati . haviṣā kṛṣṇavartmeva bhūya evābhivardhate .. ma-bhā-ā-85-12 ### [2.5.138](https://indike.org/pramana/in.darsana.nyaya.nyayamanjari.2.5.138) anyatrāpyuktam—bhogābhyāsamanu vivardhante rāgāḥ, kauśalāni cendriyāṇām iti .. ### [2.5.139](https://indike.org/pramana/in.darsana.nyaya.nyayamanjari.2.5.139) pārāśaryo'pyāha— ### [2.5.140](https://indike.org/pramana/in.darsana.nyaya.nyayamanjari.2.5.140) tṛṣṇākhaniragādheyaṃ duṣpūrā kena pūryate . yā mahadbhirapi kṣiptaiḥ pūraṇenaiva khanyate iti .. ### [2.5.141](https://indike.org/pramana/in.darsana.nyaya.nyayamanjari.2.5.141) tasmāt pratipakṣabhāvanaiva bhagavatī bhīmakāntiḥ antaḥkaraṇakāntāre nirantaramabhijvalantī dāvadahanadīdhitiriva dahati doṣaviṭapakāniti . tadevaṃ doṣānubandhavidhvaṃsopāyasaṃbhavānna tatkṛto mokṣamārganirodho'bhidhātavyaḥ .. ### [2.5.142](https://indike.org/pramana/in.darsana.nyaya.nyayamanjari.2.5.142) ata eva kecana cetanasya prakṛtyā nirmalatvāt malānāmāgantukatvāt, malanibarhaṇahetośca yathoktasya saṃbhavāt, tadācaraṇāttadapāye sati svatassakalapadārthadarśanasāmarthyasvabhāvacittattvāvasthānāt sarvajñasiddhimadūravartinīmeva manyante .. ### [2.5.143](https://indike.org/pramana/in.darsana.nyaya.nyayamanjari.2.5.143) yadapyuktaṃ kleśaśūnyatvamātmano na kadācidapi dṛṣṭam, anubandhavṛttitvāt kveśānāmiti—tadapyasatyam—suṣuptāvasthāyāmaspṛṣṭasya doṣairātmanaḥ pratyahamupalambhāt . jāgrato'pi kā cana tādṛśī dṛśā dṛśyata eva, yasyāmasāvātmasvarūpa evātmā nirmalo'vatiṣṭhate . yathoktaṃ aharaharbrahmalokaṃ yānti iti . tadalamanena doṣānubandhakathānubandhena .. ### [2.5.144](https://indike.org/pramana/in.darsana.nyaya.nyayamanjari.2.5.144) yadapi pravṛttyanubandhāditi pratyapādi—tadapi sūtrakṛtā samāhitam —na pravṛttiḥ pratisandhānāya hīnakleśasya nyā-sū-4-1-64 iti . doṣeṣu bandhahetuṣu vigaliteṣu pravṛttirapi na dehendriyādijanmane prabhavatīti .. ### [2.5.145](https://indike.org/pramana/in.darsana.nyaya.nyayamanjari.2.5.145) nanu doṣakṣayānmā bhūt uttaraḥ karmasaṅgrahaḥ . kathaṃ phalamadattvā tu prāktanaṃ karma śāmyati .. ### [2.5.146](https://indike.org/pramana/in.darsana.nyaya.nyayamanjari.2.5.146) atra kecidāhuḥ—dadatyeva karmāṇi, nādattvā śāmyanti; tathāpi bandhahetavo na bhavanti . yataḥ śamasantoṣādijanitaṃ yoginaḥ sukhamutpādya dharmo vinaṅkṣyati, adharmaśca śītātapakleśādidvārakaṃ duḥkhaṃ dattveti .. ### [2.5.147](https://indike.org/pramana/in.darsana.nyaya.nyayamanjari.2.5.147) nanu ! amuṣmātkarmaṇaḥ idaṃ phalaṃ bhavatīti karmaphalānāṃ kāryakāraṇa bhāvaniyamāt, kathamiyatā karmaphalopabhogo bhavedityanyathā tadupabhogamapare varṇayanti . yogī hi yogardhisiddhyā vihitanikhilanijadharmādharmakarmā nirmāya tadupabhogayogyāni teṣu teṣūpapattisthāneṣu tāni tāni sendriyāṇi śarīrāṇi, raṇḍāntaḥkaraṇāni ca muktairātmabhirupekṣitāni gṛhītvā sakṛdeva sakalakarmaphalamanubhavati prāptaiśvarya itītthamupabhogena karmaṇāṃ kṣayaḥ .. ### [2.5.148](https://indike.org/pramana/in.darsana.nyaya.nyayamanjari.2.5.148) anye tvācakṣate—kimanena bhogāyāsena, adattaphalānyeva karmāṇi yogino naṅkṣyanti . tattvajñānasyaiva bhagavata iyān prabhāvaḥ, yadasminnutpanne cirasaṃcitānyapi karmāṇi sahasaiva pralayamupayānti . bhogādapi teṣāṃ prakṣayaḥ śāstraprāmāṇyādevāvagataḥ . tathā tatprāmāṇyādeva tattvajñānā dapi tatprakṣayaṃ pratipatsyāmahe . tathā cāha— ### [2.5.149](https://indike.org/pramana/in.darsana.nyaya.nyayamanjari.2.5.149) yathaidhāṃsi samiddho'gniḥ bhasmasātkurute'rjuna . jñānāgniḥ sarvakarmāṇi bhasmasātkurute tathā ### [2.5.150](https://indike.org/pramana/in.darsana.nyaya.nyayamanjari.2.5.150) gī. 4-37 iti .. ### [2.5.151](https://indike.org/pramana/in.darsana.nyaya.nyayamanjari.2.5.151) na cedaṃ śraddhāmātram, vedavidāmagraṇyā vyāsamuninaiva samabhidhānāt, avedārthaṃ hi nāsāvabhidadhīteti .. ### [2.5.152](https://indike.org/pramana/in.darsana.nyaya.nyayamanjari.2.5.152) tamanye na manyante . na sarvāmanā karmaṇāṃ dāhaḥ . kintu svarūpeṇa satāmapi sahakārivaikalyāt svakāryakaraṇodāsīnatā teṣāṃ bhavati, bhraṣṭānāmiva bījānāmaṅkurakaraṇakauśalahāniḥ . yataḥ sāmagrī kāryasya janikā, na kevalaṃ kārakam . ato na karmāṇyevakevalāni phalopabhogayogyaśarīrendriyādijanmanimittatāmupayānti . kintu mithyājñānena doṣaiśca sahitāni . taduktaṃ avidyātṛṣṇe dharmādharmau ca janmakāraṇam iti .. ### [2.5.153](https://indike.org/pramana/in.darsana.nyaya.nyayamanjari.2.5.153) tattvavidaśca tattvavittvādeva nāvidyā mithyājñānātmikā bhavati . doṣāṇāṃ tu prathame darśita eva kramaḥ . tadabhāve bhavantāvapi dharmādharmau na bandhāya kalpete . na hi svakāryamaṅkurādi kusūlavartīni bījāni janayitumutsahante .. ### [2.5.154](https://indike.org/pramana/in.darsana.nyaya.nyayamanjari.2.5.154) bhraṣṭabījānāmapi svarūpaśaktirapi tānavaṃ gatā . tadvat karmaṇāṃ svarūpaśaktiśaithilyaṃ mā nāma bhūt . tathāpi kusūlavarti bījavat sahakāri vaidhuryāt kāryānārambha iti . tadidasuktaṃ na pravṛttiḥ pratisandhānāya hīnakleśasya nyā-sū-4-1-64 iti .. ### [2.5.155](https://indike.org/pramana/in.darsana.nyaya.nyayamanjari.2.5.155) nanu svarūpasattāyāṃ dharmādharmayoḥ kathamidamuktaṃ navānāmātmaguṇānāṃ nirmūlocchedo'pavarga iti—naiṣa doṣaḥ—manassaṃyogavadakiṃcitkarayoravasthānamapi ucchedānna viśiṣyate . muktasyātmanaḥ vibhutvādaparihāryo mana ssaṃyogaḥ . na ca tadānīmasau sannapi sukhaduḥkhajñānādijanmani vyāpriyate . evaṃ dharmādharmau santāvapi phalamanākṣipantau kiṃ kariṣyata iti phalata ucchinnāveva bhavataḥ . tasmānnavānāmātmaguṇānāmucchedo'pavarga ityaviruddham .. ### [2.5.156](https://indike.org/pramana/in.darsana.nyaya.nyayamanjari.2.5.156) evaṃ pravṛttyanubandhasyāpi bandhahetorabhāvānna durgamo'pavargaḥ .. ### [2.5.157](https://indike.org/pramana/in.darsana.nyaya.nyayamanjari.2.5.157) apare punarāhuḥ—karmaphalānāṃ śāstrataḥ kāryakāraṇabhāvaniyamāvagateḥ śamasantoṣaśītātapādidvārakasukhaduḥkhamātropapādanena karmaparikṣayānupapatteḥ, yogarddhyā ca dīrghakālāvadhisukhaduḥkhopabhogasya sakṛdeva saṃpādayitumaśakya tvāt jñānāgninā ca dāhe tatkarmopadeśivaidikavacanasārthānarthakyaprasaṅgāt, adattaphalasya karmaṇo'nuparamāt, avasthānapakṣe ciramapyuṣitvā kusūlāvasthitabījavat kālāntareṇāpi tatphalākṣepaprasaṅgāt avaśyaṃ svaphalopabhogadvāraka eva karmakṣayo vācyaḥ .. ### [2.5.158](https://indike.org/pramana/in.darsana.nyaya.nyayamanjari.2.5.158) na cānirmokṣa āśaṅkanīyaḥ, tataścirādapi tatsiddhisaṃbhavāt . tathā ca mumukṣurnityanaimittikaṃ karmāvaśyamanutiṣṭhet, ananutiṣṭhan pratyaveyāditi tatkuto'sya bandhaḥ syāt . kāmyaṃ niṣiddhaṃ ca karma svarganarakakāri vispaṣṭameva bandhasādhanamiti tatpariharedevetyevaṃ tāvaduttaro'yaṃ na karmasaṃcayaḥ pravartate . tadāha— ### [2.5.159](https://indike.org/pramana/in.darsana.nyaya.nyayamanjari.2.5.159) nityanaimittike kuryāt pratyavāyajihāsayā . mokṣārthī na pravarteta tatra kāmyaniṣiddhayoḥ iti .. ### [2.5.160](https://indike.org/pramana/in.darsana.nyaya.nyayamanjari.2.5.160) prāktanasya tu karmasaṃcayasya bhogādeva kṣayaḥ . ātmavidaśca mumukṣorayamanuṣṭhānakramo bhavati, netarasyeti sa evetthamapavṛjyata iti . āha ca— ### [2.5.161](https://indike.org/pramana/in.darsana.nyaya.nyayamanjari.2.5.161) ātmajñe caitadastīti tadjñānamupayujyate . tatra jñātātmatattvānāṃ bhogātpūrvakriyākṣaye .. uttarapracayāsattvāt deho notpadyate punaḥ .. ### [2.5.162](https://indike.org/pramana/in.darsana.nyaya.nyayamanjari.2.5.162) nanu ! nityakarmanuṣṭhānapakṣe nāstyeva mokṣaḥ . yānyeva hi nityāni darśapaurṇamāsādikarmāṇi yāvajjīvaṃ darśapūrṇamāsābhyāṃ yajeta ityādicodanopadiṣṭāni, tānyeva phalavanti śrūyanta iti kāmyānyapi bhavituma rhanti darśapaurṇamāsābhyāṃ svargakāmo yajet agniṃhotraṃ juhuyātsvargakāmaḥ iti—na—phalābhisandhānapūrvakatvenāprayogāt . tathā''ha— ### [2.5.163](https://indike.org/pramana/in.darsana.nyaya.nyayamanjari.2.5.163) prārthyamānaṃ phalaṃ jñātaṃ nānicchostadbhaviṣyati ### [2.5.164](https://indike.org/pramana/in.darsana.nyaya.nyayamanjari.2.5.164) iti . so'yaṃ pravṛttau viśeṣaḥ . prayoge'pi viśeṣaḥ . kāmyaṃ karma sarvāṅgopasaṃhāreṇa prayujyamānaṃ phalasādhanamiti na yathāśakti tathā tathā prayoktavyamiti . nityakarmaṇaḥ akaraṇāt pratyavāya iti yathāśaktyapi tat prayoktavyam . ananuṣṭhitāt yādṛk, tādṛk anuṣṭhitaśreyaḥpratyavāyaparihāropapatteḥ .. ### [2.5.165](https://indike.org/pramana/in.darsana.nyaya.nyayamanjari.2.5.165) kāmye tu sarvāṇyaṅgāni yadyasāvupasaṃhartuṃ na śaknuyāt, mā pravartiṣṭa . na hyapravartamānaḥ pratyaveyāditi .. ### [2.5.166](https://indike.org/pramana/in.darsana.nyaya.nyayamanjari.2.5.166) evaṃca tadeva darśapaurṇamāsādikarma yāvajjīvaṃ iti codanayopadiṣṭaṃ nityaṃ sat tatphalānabhisandhānāt prayuktaṃ na bandhāya kalpate . kva sā svargasādhanatvaśaktiḥ asya gateti cet—na—na vayaṃ karmaṇāṃ śaktimaśakti vā pratyakṣataḥ prapaśyāmaḥ . śāstraikaśaraṇāstu śrotriyā vayam . codanaiva dharme pramāṇamiti naḥ kulavratametat . sā ca codanā ekatra kāminamadhikāriṇamāśritya pravṛttā . tadadhikāraśca phalanirvṛttervinā na syāditi phalaparyantatāṃ pratipadyate .. ### [2.5.167](https://indike.org/pramana/in.darsana.nyaya.nyayamanjari.2.5.167) anyatra tu yāvatpadoṣabaddhajīvanapadārthāvacchinnādhikārilābhena pravartamānā na phalāya prabhavati . akriyamāṇe tu śāstrārthe pratyavāyāya bhavati adhikṛtena satā śāstrārthastyakta iti . kāmye tvanutpannakāmo'dhikṛta eva na bhavatīti nādhikṛtena satā vidhistyakta iti na pratyavaitīti . upakramya tvantarāle tyaktuṃ na labhata eva . vītāyāṃ phalecchāyāṃ, āvāpte vā phale tatkarmasamāpanavadavaśyakartavyameva tadityalaṃ śāstrāntaragarbheṇa bhūyasā kathāvistareṇa .. ### [2.5.168](https://indike.org/pramana/in.darsana.nyaya.nyayamanjari.2.5.168) sarvathā suṣṭūktaṃ nityanaimittike kuryāt iti .. ### [2.5.169](https://indike.org/pramana/in.darsana.nyaya.nyayamanjari.2.5.169) nanu ! bhogāt prāktanakarmakṣayapakṣe dīrghakālāpekṣaṇāt apratyāsanna iva mokṣo lakṣyate—kiṃ tvayā jñātamadhunaiva . huṃkṛtvā nirvilambameva mokṣamāpnuyāditi . na khalu sulabho'yaṃ puruṣārthaḥ . kiṃ na śrutamidamāyuṣmatā kyāsavacanam— ### [2.5.170](https://indike.org/pramana/in.darsana.nyaya.nyayamanjari.2.5.170) anekajanmasaṃsiddhastato yāti parāṃ gatim gī. 6. 45 iti .. ### [2.5.171](https://indike.org/pramana/in.darsana.nyaya.nyayamanjari.2.5.171) jñānāgnidāhavacanaṃ tu jñānapraśaṃsārthameva . so'yaṃ jñānakarmasamuccayānmokṣa ucyata iti .. ### [2.5.172](https://indike.org/pramana/in.darsana.nyaya.nyayamanjari.2.5.172) atrābhidhīyate—na khalu phalopabhogadvārakaḥ karmaṇāṃ parikṣayaḥ janmakoṭiśatairapi śakyakriyaḥ . uktaṃ hi— ### [2.5.173](https://indike.org/pramana/in.darsana.nyaya.nyayamanjari.2.5.173) ekamevedṛśaṃ karma kartumāpatati kvacit . janmāyutaśatenāpi yatphalaṃ bhujyate na vā .. ### [2.5.174](https://indike.org/pramana/in.darsana.nyaya.nyayamanjari.2.5.174) dehaistatkarmabhogārthaiḥ karmānyanna kariṣyate . dehabandhanamityeṣā durāśaiva tapasvinām .. ### [2.5.175](https://indike.org/pramana/in.darsana.nyaya.nyayamanjari.2.5.175) tadīdṛśamenaṃ mokṣapathamupadiśadbhiryājñikaiḥ mokṣopekṣaṇamanakṣaramupadiṣṭaṃ bhavatīti . tasmāt pūrvoktanītyaiva karmaṇāṃ bandhahetutvamapākaraṇīyam .. ### [2.5.176](https://indike.org/pramana/in.darsana.nyaya.nyayamanjari.2.5.176) nanu ! pakṣacatuṣṭaye'pi doṣa uktaḥ—na—caturthapakṣasya niravadyatvāt . sahakārivaikalyāt kusūlāvasthitabījavat karmaṇāmanārambhakatve sati na kaściddoṣaḥ . eṣa eva ca teṣāṃ dāhaḥ, yat kāryānārambhakatvam .. ### [2.5.177](https://indike.org/pramana/in.darsana.nyaya.nyayamanjari.2.5.177) nanu ! avinaṣṭasvarūpāṇi kusūlabījavadeva kadā cirādārapsyante kāryam . tasmādvaramucchidyantāmeva . kimidānīṃ nityamātmānamapyucchettuṃ yatāmahe . sa hi purā bhoktā'bhūditi mukto'pi punarbhoktṛtāṃ pratipadyeteti varamucchidyantāmeva .. ### [2.5.178](https://indike.org/pramana/in.darsana.nyaya.nyayamanjari.2.5.178) sāmagryabhāvāt kathamasau punaḥ bhoktṛtāṃ gacchet ? iti cet— karmāṇyapi sahakāryabhāvāt kathaṃ kāryamārabheran ? na ca karmaṇāṃ bandhakaraṇe rāgādayo na sahakāriṇa iti vaktuṃ śakyate; vītarāgasya jatmādarśanāt ityasakṛduktatvāt . tasmādayameva sūtrakāropadiṣṭaḥ panthāḥ peśalaḥ na pravṛttiḥ pratisandhānāya hīnakleśasya iti .. ### [2.5.179](https://indike.org/pramana/in.darsana.nyaya.nyayamanjari.2.5.179) yaccedamucyate jñānakarmasamuccayānmokṣa iti—tatredaṃ vaktavyam . karmaṇāṃ kīdṛśo mokṣaṃ pratyaṅgabhāvaḥ ? na hi tatsādhyo mokṣaḥ; svargā divadanityatvaprasaṅgāt .. ### [2.5.180](https://indike.org/pramana/in.darsana.nyaya.nyayamanjari.2.5.180) api ca—ātmaiva svarūpāvasthito mokṣa ityucyate; na cātmasvarūpaṃ karmasādhyam, anādinidhanatvena siddhatvāt .. ### [2.5.181](https://indike.org/pramana/in.darsana.nyaya.nyayamanjari.2.5.181) nanu ! nityakarmānanuṣṭhāne pratyaveyāditi taddvārakabandhaparihāropāyatvāt karmāpi mokṣāṅgaṃ syāt—na—sanyāsavidhānasya pratyakṣopadeśādi tyuktatvāt . aparipakvakaṣāyāṇāṃ śanaiśśanaistatparipākaupayikatvena karmānuṣṭhānaṃ pāramparyeṇāpavargopāya iti tu bāḍhamabhyupagamyate . yathā''ha manuḥ— ### [2.5.182](https://indike.org/pramana/in.darsana.nyaya.nyayamanjari.2.5.182) mahāyajñaiśca yajñaiśca brāhmīyaṃ kriyate tanuḥ iti .. ### [2.5.183](https://indike.org/pramana/in.darsana.nyaya.nyayamanjari.2.5.183) adhyātmavidaśca jñānakāṇḍaupayikameva kriyākāṇḍaṃ manyante . sākṣāttu karmasādhye'pavarge svargavadapāyitvaprasaṅgāt kṛtakasya sarvasyānityatvāt tattvajñānameva mokṣopāya ityuktam .. ### [2.5.184](https://indike.org/pramana/in.darsana.nyaya.nyayamanjari.2.5.184) yadapi yamaniyamādisādhyamaṅgabhūtaṃ karmajātam, tadapi tadaṅgatāṃ gacchanna vāryate . tatkāryatve'pi—yāvadguṇapraghvaṃsābhāvasvabhāvatvāt mokṣasya na kṣayitvaṃ svargavat . anyastu na mokṣa ityuktam .. ### [2.5.185](https://indike.org/pramana/in.darsana.nyaya.nyayamanjari.2.5.185) tatpūrvoktaprakrameṇāpavarga— prāptestattvajñānamevābhyupāyaḥ . karma tvaṅgaṃ tatra śaucādi kiṃcit kiṃcittatsyādātmasaṃskārapūrvam .. ### [2.5.186](https://indike.org/pramana/in.darsana.nyaya.nyayamanjari.2.5.186) āha—tattvajñānamidānīṃ vicintyatām—kiṃviṣayaṃ tadapavargāya kalpate ? kuto vā tasya niḥśreyasasādhanatvamavagatamiti .. ### [2.5.187](https://indike.org/pramana/in.darsana.nyaya.nyayamanjari.2.5.187) nanu ! ātmajñānamapavargaheturiti bahuśaḥ kathitamevaitaditi ko'yaṃ praśnaḥ ?—na—vipratipatteḥ . vipravadante hyatra vādinaḥ .. ### [2.5.188](https://indike.org/pramana/in.darsana.nyaya.nyayamanjari.2.5.188) eka evāyam . avidyāparikalpitaḥ jīvātmaparamātmavibhāgaḥ . paramātmatattvajñānādavidyāpāye mokṣa iti brahmavādinaḥ .. ### [2.5.189](https://indike.org/pramana/in.darsana.nyaya.nyayamanjari.2.5.189) śabdādvaitaniścayāditi vaiyākaraṇāḥ .. ### [2.5.190](https://indike.org/pramana/in.darsana.nyaya.nyayamanjari.2.5.190) vijñānādvaitadarśanāditi śākyabhikṣavaḥ .. ### [2.5.191](https://indike.org/pramana/in.darsana.nyaya.nyayamanjari.2.5.191) prakṛtipuruṣavivekavijñānāditi pāramarṣāḥ .. ### [2.5.192](https://indike.org/pramana/in.darsana.nyaya.nyayamanjari.2.5.192) īśvarapraṇidhānāditi cānye .. ### [2.5.193](https://indike.org/pramana/in.darsana.nyaya.nyayamanjari.2.5.193) tadevaṃ kasmai tattvajñānāya spṛhayantu mumukṣavaḥ iti vācyam .. ### [2.5.194](https://indike.org/pramana/in.darsana.nyaya.nyayamanjari.2.5.194) ucyate—bhinnāstāvadātmāna iti gṛhyatāmātmajñānameva niḥśreyasāṅgamiti .. ### [2.5.195](https://indike.org/pramana/in.darsana.nyaya.nyayamanjari.2.5.195) yattu—kutastasya niḥśreyasasādhanatvamavagatamiti; akṣapādavacanāditi brūmaḥ . akṣapādastāvadevamupadiṣṭavān ātmajñānānniḥśreyasādhigamaḥ iti . na ca niṣpramāṇakamarthameṣa ṛṣirupādiśaditi bhavitavyamatra pramāṇena . tattu vaidikaṃ vidhivākyaṃ ātmā jñātavyaḥ iti .. ### [2.5.196](https://indike.org/pramana/in.darsana.nyaya.nyayamanjari.2.5.196) sa eṣa tāvanna niradhikāraḥ vidhiḥ; adhikārarahitasya ca vidheḥ prayogayogyatvābhāvāt . adhikārānveṣaṇamupakramaṇīyam . paraprakaraṇaparipaṭhanavirahācca nāsya samidādhividhivat pradhānādhikāraniveśitvam . ataḥ viśvajidadhikaraṇanyāyena svargakāmamadhikāriṇamiha yāvadupādātumadhyavasyāmaḥ, tadaiva na sa punarāvartate ityarthavādasamarpiteyamapunarāvṛttireva hṛdayapathamavatarati, rātrisatra iva pratiṣṭheti tāmevāsya phalatvena pratipadyāmahe .. ### [2.5.197](https://indike.org/pramana/in.darsana.nyaya.nyayamanjari.2.5.197) sā ceyaṃ sādhyamānā'pi rūpādeva hi śāśvatī . cakāstyapunarāvṛttiḥ na svargavadapāyinī .. ### [2.5.198](https://indike.org/pramana/in.darsana.nyaya.nyayamanjari.2.5.198) nanu ! dṛṣṭaprayojanālābhe sati adṛṣṭaprayojanaparikalpanāvasaraḥ . iha ca dṛṣṭameva prayojanamātmajñānasya karmapravṛttihetutvamupalabhyate . nityenātmanā vinā bhūteṣvevācetaneṣu śmaśānāvadhiṣu bahuvittavyayāyāsasādhyāni ko nāma jyotiṣṭomādikarmāṇyanutiṣṭhediti nitya evātmā paralokī jñātavyaḥ . evaṃ hi nirviśaṅkaḥ karmasu pravarteteti .. ### [2.5.199](https://indike.org/pramana/in.darsana.nyaya.nyayamanjari.2.5.199) tadidamanupapannam—anyata eva siddhatvāt . pratyabhijñāpratyakṣapratyayena jaiminīyaiḥ, anumānamahimnā ca naiyāyikādibhiḥ ātmā nitya iti niścita eva . kimatra vidhiḥ kariṣyati . itikartavyatākalāpopadeśaśca tadānīmatyantaniṣprayojanaḥ syāt .. ### [2.5.200](https://indike.org/pramana/in.darsana.nyaya.nyayamanjari.2.5.200) amī ca tathā nāmātimahānto vedagranthā iyatyeva paryavasannā iti ?—tadidamupanatam—seyaṃ mahato vaṃśastambāt laṭvā''kṛṣyata iti . tasmādarthavādasamarpitamapunarāvṛttirūpameva phalamātmajñānavidhirabalambata ityevaṃ kecit .. _First 200 of 504 passages. [Read on](https://indike.org/pramana/in.darsana.nyaya.nyayamanjari.2.5)_ ## Commentaries (1) - [Nyāyamañjarīgranthibhaṅga](https://indike.org/pramana/in.darsana.nyaya.nyayamanjari!granthibhanga.66.45.1) — Cakradhara, Sanskrit ## Linked texts (9) - [Parātrīśikāvivaraṇa (complete text)](https://indike.org/pramana/in.sampradaya.saiva.agama.trika.rudrayamala.paratrisika!abhinavagupta*complete.2.411) — Sanskrit - [Bhāmatī, text without the sūtras (Sansknet input)](https://indike.org/pramana/in.darsana.vedanta.brahmasutra!sankara!bhamati*textonly.135) — Sanskrit - [Yogavāsiṣṭha (vulgate)](https://indike.org/pramana/in.lit.ramayana.upajivya.yogavasistha*vulgate.7.208.27) — Sanskrit - [Vākyapadīya (ed. Raghunātha Śarmā, with the Vṛtti and his Ambākartrī)](https://indike.org/pramana/in.vedanga.vyakarana.darsana.vakyapadiya*raghunatha.5.2.50.p6) — Sanskrit - [Tantravārttika (ed. Subbāśāstrī)](https://indike.org/pramana/in.darsana.mimamsa.mimamsasutra!sabara!tantravarttika*subbasastri.2.1.4.4.10) — Sanskrit - [Kāśikā after the Trivandrum edition (provided by H. Krasser)](https://indike.org/pramana/in.darsana.mimamsa.mimamsasutra!sabara!slokavarttika!kasika*trivandrum.346.16) — Sanskrit - [Nyāyacandrikā](https://indike.org/pramana/in.darsana.advaita.vada.nyaya-khandana.nyayacandrika.1.p1415) — Ānandapūrṇa Vidyāsāgara, Sanskrit - [Nyāyacandrikā](https://indike.org/pramana/in.darsana.advaita.nyayacandrika.1.p1415) — Gaṅgādhara, Sanskrit - [Nyāyaviniścaya](https://indike.org/pramana/in.jaina.anuyoga.phil.nyayaviniscaya.10.668) — Akalaṅka, Sanskrit --- Source: [https://indike.org/pramana/in.darsana.nyaya.nyayamanjari.2.5](https://indike.org/pramana/in.darsana.nyaya.nyayamanjari.2.5) · Pramāṇa