[Pramāṇa](https://indike.org/pramana/) › [Indian literature](https://indike.org/pramana/in) › [Philosophy](https://indike.org/pramana/in.darsana) › [Logic and epistemology](https://indike.org/pramana/in.darsana.nyaya) › [Nyāyasūtra](https://indike.org/pramana/in.darsana.nyaya.nyayasutra) › [Prakasha of Keshava Mishra Tarkacarya](https://indike.org/pramana/in.darsana.nyaya.nyayasutra!kesava-misra-tarkacarya) › 6.1 # Nyayasutra 6.1 Prakāśa of Keśava Miśra Tarkācārya 6.1 - **Language:** Sanskrit ### [6.1](https://indike.org/pramana/in.darsana.nyaya.nyayasutra!kesava-misra-tarkacarya.6.1) evaṃ prathamāhnike, pañcāvayavātmake sāṅgopāṅge nyāye lakṣite, samprati nyāyatadābhāsa vivekahetubhūtopālambhaparāṇāṃ kathāhetvābhāsacchalakathakāśaktiliṅgānāṃ lakṣaṇamityāhnikayorhetuhetumadbhāvarūpā saṅgatiḥ | tatrādau kathāprakaraṇam prādhānyāt | hetvābhāsādīnāṃ sādhanadūṣaṇavacanasandarbhātmakakathaikadeśatvāt | tatrāpyetacchāstroddeśyatattatvajñānasākṣādupāyatvāt vādasya prādhānyāt ādau tallakṣaṇāya sūtram—‘‘pramāṇa……vādaḥ’’ | sūtrākṣiptaṃ kathāsāmānyalakṣaṇaṃ vibhāgaśca | tacca pakṣapratipakṣaparigraha iti sūtraikadeśena kṛtamiti kaścit | kathakāśaktiliṅgavadvākyatvamityanye | jātiviśeṣa evetyapare | sāmānyalakṣaṇaṃ ca prakaraṇaikyāya nirvāncyameveti dik | vibhāgaśca sā tredhā vādo jalpo vitaṇḍā ceti | sūtrārthastu vāda iti lakṣyanirdeśaḥ | śeṣaṃ lakṣaṇāya parikaraśodhanāya ca | pakṣaḥ siṣādhayiṣito'rthaḥ pratipakṣastadvirodhī siṣādhayiṣita eva | tayoḥ parigraho'ṅgīkāro yatreti kathāprayojako viruddhārthāṅgīkāra uktaḥ | etāvanmātraṃ kathāntarasādhāraṇaṃ vitaṇḍāyāmapi | sādhanīyaṃ mayā, dūṣaṇīyaṃ tvayeti pakṣapratipakṣaparigrahādityata uktam—pramāṇatarkasādhanopālambha iti | pramāṇena tarkeṇa ca sādhanaṃ sthāpanamupālambhaḥ parapakṣapratiṣedhaśca yasmin sa tathā | yadvā pramāṇatarketi sādhanopālambhābhyāmanvīyate | vāde pramāṇatarkābhyāmeva sādhanopālambhaḥ vītarāgatvādvadinoḥ | jalpādau chalādisādhanopālambhatā vijigīṣukathātvāt | siddhāntāviruddha ityanenāpasiddhāntopagrahaḥ | sarvahetvābhāsānāṃ ca teṣāṃ siddhānte niṣedhena tadvirodhāt | avayavopapattyā vā teṣāmupagrahaḥ pañca\[kṣa\]grahaṇāt | nyūnādhikayorityaṣṭanigrahādhikaraṇo vādaḥ | tattvanirṇāyukathā vāda iti lakṣaṇākarṣaḥ | - [Previous: 5.40](https://indike.org/pramana/in.darsana.nyaya.nyayasutra!kesava-misra-tarkacarya.5.40) - [Next: 6.2](https://indike.org/pramana/in.darsana.nyaya.nyayasutra!kesava-misra-tarkacarya.6.2) - [Up: 6](https://indike.org/pramana/in.darsana.nyaya.nyayasutra!kesava-misra-tarkacarya.6) ## Linked texts (1) - [Nyāyasūtra](https://indike.org/pramana/in.darsana.nyaya.nyayasutra.1.2.1) — Akṣapāda Gautama, Sanskrit --- Source: [https://indike.org/pramana/in.darsana.nyaya.nyayasutra!kesava-misra-tarkacarya.6.1](https://indike.org/pramana/in.darsana.nyaya.nyayasutra!kesava-misra-tarkacarya.6.1) · Pramāṇa