[Pramāṇa](https://indike.org/pramana/) › [Indian literature](https://indike.org/pramana/in) › [Philosophy](https://indike.org/pramana/in.darsana) › [Logic and epistemology](https://indike.org/pramana/in.darsana.nyaya) › [Manuals and primers](https://indike.org/pramana/in.darsana.nyaya.prakarana) › [Tarkikaraksha](https://indike.org/pramana/in.darsana.nyaya.prakarana.tarkikaraksa) › 2.27 # Tarkikaraksha 2.27 Tārkikarakṣā 2.27 - **Language:** Sanskrit ### [2.27](https://indike.org/pramana/in.darsana.nyaya.prakarana.tarkikaraksa.2.27) vat | avṛtterupalabdhirūpeṇāvartamānaghaṭādivadupalabdhirna syāditi tadviṣayo liṅgādirnopalabhyaḥ syāditi vyarthaḥ prayogaḥ | evamanupalabdhatvācchabdo nāstītyukte anupalabdheḥ svātmani tadrūpeṇa vṛttau viṣayavat svasyāpyanupalabdhatvāt tadvadevābhāvaprāptāvanupalabdhyabhāvaścopalabdhireveti viparītāpattiḥ svātmani svarūpeṇāvṛttau tu saiva na syāditi tadviṣayaḥ śabdonupalabdho na syādityubhayathāpyasiddho hetuḥ taduktam tadanupalabdheranupalambhādabhāvasiddhau tadviparītopapatteranupalabdhisamaḥ | yadi tādrūpyeṇa vṛttāvapyanupalabdhā na bhavati śabdopyanupalabdho na syāt anupalabdhopi vā naiva nāstītyucyeta | tarhyanupalabdhatvāditi hetustatrānaikāntikaḥ śabde nāstitāṃ na sādhayediti | evamanyatrāpi viṣayidharmeṣu darśayitavyam | anumānaviṣayāvalambanenāpi pravartate | yathā sandigdhe nyāyaḥ pravartate sandehasya svātmani tādrūpeṇa vṛttau viṣayavat svayameva sandigdhaḥ kathaṃ viṣayaṃ sandigdhaṃ kuryāt | avṛttau tu ghaṭādivat sandeho na syāditi nyāyaviṣayābhāvaḥ | tathā śabdapratyabhijñānaṃ bhrāntamityukte bhramayogādbhrāntiḥ bhramaḥ svasmiṃstādrūpyeṇa vṛttau svayameva bhrāntaḥ kathaṃ viṣayaṃ bhrāntaṃ kuryāt | anyathā svavyāghātaḥ | iyaṃ saṃśayaparīkṣāyāṃ sūtrakārairudāhṛtā vipratipattau ca saṃpratipatteḥ, avyavasthātmani vyavasthitatvāccāvyavasthāyā iti tathā śabdaparīkṣāyāṃ anyadanyasmādananyadityanyatābhāvaḥ aniyame niyamānnāniyama iti | asyāṃ ca viṣayidharmopalambhaḥ kāraṇam | āpātataḥ pratikūlatarka āropyaḥ atipīḍāyāmasiddhirnaikāntikaṃ vā pratyuttaraṃ viṣayidharmaḥ svātmani tādrūpyeṇa vartata iti pakṣaṃ kakṣīkurmaḥ | na ca svātmano viṣayīkaraṇaṃ kiṃ tu tadātmakatvamiti na svarūpavyāghātaprasaktiḥ tadidamanaṅgādhikyaṃ svātmano viṣayatvasyānaṅgasyaivāṅgīkārāt | taduktam anupalambhātmakatvādanupalabdheraheturiti | asyāpyupalakṣaṇatvādupalambhātmakatvādupasādharmyādervipakṣāṇāṃ sapakṣatvaprasañjanam sādhanapratibandhyā yat sa hyanityasamodayaḥ - [Previous: 2.26](https://indike.org/pramana/in.darsana.nyaya.prakarana.tarkikaraksa.2.26) - [Next: 2.28](https://indike.org/pramana/in.darsana.nyaya.prakarana.tarkikaraksa.2.28) - [Up: 2](https://indike.org/pramana/in.darsana.nyaya.prakarana.tarkikaraksa.2) ## Linked texts (3) - [Text of the Tokyo Indology Student Team](https://indike.org/pramana/in.darsana.nyaya.nyayasutra!vatsyayana*tokyo.490.3) — Sanskrit - [Nyāyasūtra](https://indike.org/pramana/in.darsana.nyaya.nyayasutra.5.1.29) — Akṣapāda Gautama, Sanskrit - [Nyāyasāra](https://indike.org/pramana/in.darsana.nyaya.prakarana.nyayasara.2.p76) — Bhāsarvajña, Sanskrit --- Source: [https://indike.org/pramana/in.darsana.nyaya.prakarana.tarkikaraksa.2.27](https://indike.org/pramana/in.darsana.nyaya.prakarana.tarkikaraksa.2.27) · Pramāṇa