[Pramāṇa](https://indike.org/pramana/) › [Indian literature](https://indike.org/pramana/in) › [Philosophy](https://indike.org/pramana/in.darsana) › [Vedānta (Uttaramīmāṃsā)](https://indike.org/pramana/in.darsana.vedanta) › [Brahmasūtra](https://indike.org/pramana/in.darsana.vedanta.brahmasutra) › [Brahmasūtrabhāṣya (Śārīrakamīmāṃsābhāṣya)](https://indike.org/pramana/in.darsana.vedanta.brahmasutra!sankara) › [Bhāmatī](https://indike.org/pramana/in.darsana.vedanta.brahmasutra!sankara!bhamati) › [Bhamati with the sutras (Sansknet input)](https://indike.org/pramana/in.darsana.vedanta.brahmasutra!sankara!bhamati*withsutra) › 1.591 # Bhamati 1.591 Bhāmatī with the sūtras (Sansknet input) 1.591 - **Language:** Sanskrit ### [1.591.1](https://indike.org/pramana/in.darsana.vedanta.brahmasutra!sankara!bhamati*withsutra.1.591.1) START ### [1.591.2](https://indike.org/pramana/in.darsana.vedanta.brahmasutra!sankara!bhamati*withsutra.1.591.2) nāsato 'dṛṣṭatvāt || ### [1.591.3](https://indike.org/pramana/in.darsana.vedanta.brahmasutra!sankara!bhamati*withsutra.1.591.3) itaścānupapanno vaināśikasamaya iti / asthirāt kārayotpattimicchanto vaināśikā arthādabhāvādeva bhāvotpattimāhuḥ / uktametadadhastāt / nirapekṣāt kāryotpattau puruṣakarmavaiyarthyam / sāpekṣatāyāṃ ca kṣaṇasyābhedyatvenopakṛtatvānupapatteḥ, anupakāriṇi cāpekṣābhāvādakṣaṇikatvaprasaṅgaḥ / sāpekṣatvānapekṣatvayoścānyataraniṣedhasyānyataravidhānanāntarīyakatvena prakārāntarābhāvānnāsthirādbhāvādbhāvotpattiriti kṣaṇikapakṣer'thādabhāvādbhāvotpattiriti pariśiṣyata ityarthaḥ / na kevalamarthādāpadyate, darśayanti ca--nānupamṛdya prādurbhāvāditi / etadvibhajate--vinaṣṭāddhikileti / kilakāro 'nicchāyām / kūṭasthāccetkāraṇāt kāryamutpadyetāpi sarvaṃ sarvata utpadyeta / ayamabhisaṃdhiḥ--kūṭastho hi kāryajananasvabhāvo vā syādatatsvabhāvo vā / sa cetkāryajananasvabhāvastato yāvadanena kāryaṃ kartavyaṃ tāvatsahasaiva kuryāt / samarthasya kṣepāyogāt / atatsvabhāve tu na kadācidapi kuryāt / yadyucyeta samartho 'pi kramavatsahakārisacivaḥ krameṇa kāryāṇi karotīti / tadayuktam / vikalpāsahatvāt / kimasya sahakāriṇaḥ kañcidupakāramādadhati na vā / anādhāne 'nupakāritayā sahakāriṇo nāpekṣeran / ādhāne 'pi bhinnamabhinnaṃ vopakāramādadhyuḥ / abhede tadevābhihitamiti kauṭasthyaṃ vyāhanyeta / bhede tūpakārasya tasmin sati kāryasya bhāvādasati cābhāvātsatyapi kūṭasthe kāryānutpādādanvayavyatirekābhyāmupakāra ### [1.591.4](https://indike.org/pramana/in.darsana.vedanta.brahmasutra!sankara!bhamati*withsutra.1.591.4) eva kāryakārī na bhāva iti nārthakriyākārī bhāvaḥ / taduktam-'varṣātapābhyāṃ kiṃ vyomnaścarmaṇyasti tayoḥ phalam / carmopamaścetso 'nityaḥ svatulyaścedasatphalaḥ // ### [1.591.5](https://indike.org/pramana/in.darsana.vedanta.brahmasutra!sankara!bhamati*withsutra.1.591.5) 'iti / tathā cākiñcitkarādapi cet kūṭasthātkāryaṃ jāyeta, sarvaṃ sarvasmājjāyeteti sūktam / upasaṃharati-tasmādabhāvagrastebhya iti / ### [1.591.6](https://indike.org/pramana/in.darsana.vedanta.brahmasutra!sankara!bhamati*withsutra.1.591.6) tatredamucyate / nāsato 'dṛṣṭatvāditi / nābhāvāt kāryotpattiḥ / kasmāt / adṛṣṭatvāt / nahi śaśaviṣāṇādaṅgurādīnāṃ kāryāṇāmutpattirdṛśyate / yadi tvabhāvādbhāvotpattiḥ syāttato 'bhāvatvāviśeṣāt śaśaviṣāṇādibhyo 'pyaṅgurotpattiḥ / nahyabhāvo viśiṣyate / viśeṣaṇayoge vā so 'pi bhāvaḥ syānna nirūpākhya ityarthaḥ / viśeṣaṇayogamabhāvasyābhyupetyāha-nāpyabhāvaḥ kasyacidutpattiheturiti / api ca yadyenānanvitaṃ na tattasya vikāraḥ, yathā ghaṭaśarāvodañcānādayo hemnānanvitā na hemavikāraḥ / ananvitāścaite vikārā abhāvena / tasmānnābhāvavikāraḥ / bhāvavikārastu te, bhāvasya tenānvitatvādityāha-abhāvācca bhāvotpattāviti / abhāvakāraṇavādino vacanamanubhāṣya dūṣayati-yattūktamiti / sthiro 'pi bhāvaḥ kramavatsahakārisamavadhānāt krameṇa kāryāṇi karoti / na cānupakārakāḥ sahakāriṇaḥ / sa cāsya sahakāribhirādhīyamānā upakāro na bhinno nāpyabhinnaḥ / kintvanirvācya eva / anirvācyācca kāryamapyanirvācyameva jāyate / na caitāvatā sthirasyākāraṇatvaṃ, tadupādānatvātkāryasya, rajjūpādānatvamiva bhujaṅgasyetyuktam / tathā ca śrutiḥ-'mṛttiketyeva satyam'iti / apica ye 'pi sarvato vilakṣaṇāni svalakṣaṇāni vastusantyāsthiṣata, teṣāmapi kimiti bījajātīyebhyo 'ṅkurajātīyānyeva jāyante kāryāṇi, natu kramelakajātīyāni / nahi bījādbījāntarasya vā kramelakasya vātyantavailakṣaṇye kaścidviśeṣaḥ / naca bījāṅguratve sāmānye paramārthasatī, yenaitayorbhāvikaḥ kāryakāraṇabhāvo bhavet / tasmātkālpanikādeva svalakṣaṇopādānādbījajātīyāttathāvidhasyaivāṅgurajātīyasyotpattiniyama āstheyaḥ / anyathā ### [1.591.7](https://indike.org/pramana/in.darsana.vedanta.brahmasutra!sankara!bhamati*withsutra.1.591.7) kāryahetukānumānocchedaprasaṅgaḥ / diṅmātrasya sūcitam / prapañcastu brahmatatvasamīkṣānyāyakaṇikayoḥ kṛta iti neha pratanyate vistarabhayāt //26// ## Linked texts (2) - [Nyāyamañjarī](https://indike.org/pramana/in.darsana.nyaya.nyayamanjari.2.3.182) — Jayanta Bhaṭṭa, Sanskrit - [Sarvadarśanasaṅgraha](https://indike.org/pramana/in.darsana.all.sarvadarsanasangraha.2.29) — Mādhava, Sanskrit --- Source: [https://indike.org/pramana/in.darsana.vedanta.brahmasutra!sankara!bhamati*withsutra.1.591](https://indike.org/pramana/in.darsana.vedanta.brahmasutra!sankara!bhamati*withsutra.1.591) · Pramāṇa