[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The Prakīrṇakas ("miscellaneous" texts)](https://indike.org/pramana/in.jaina.painna) › [The ten canonical Prakīrṇakas](https://indike.org/pramana/in.jaina.painna.dasapainna) › Devimdatthaa # Devimdatthaa (Deviṃdatthaa) देविंदत्थअ · Praise of the Lords of the Gods About 300 gāthās describing the 32 Indras, their abodes and vimānas, and the four classes of gods. - **Language:** Māhārāṣṭrī Prakrit - **Date:** 100–500 CE - **Extent:** 308 passages, 3,275 words - **Text:** complete digital text - **Source:** jainelibrary-agam · Agam 32 Devindatthao Navamam Painnayam Mulam PDF File, by Dipratnasagar, Deepratnasagar, Deepratnasagar 2012… · Shown with the permission of Muni Dīparatnasāgara and the Jain eLibrary (granted 2026-10-18), text unaltered;… ## Contents - [1 Maṅgalaṃ, devendrapṛcchā](https://indike.org/pramana/in.jaina.painna.dasapainna.devindatthaa.1) — 11 parts - [2 Bhavanapati adhikāra](https://indike.org/pramana/in.jaina.painna.dasapainna.devindatthaa.2) — 55 parts - [3 Vāṇavyantara adhikāra](https://indike.org/pramana/in.jaina.painna.dasapainna.devindatthaa.3) — 14 parts - [4 Jyotiṣka adhikāra](https://indike.org/pramana/in.jaina.painna.dasapainna.devindatthaa.4) — 81 parts - [5 Vaimānika adhikāra](https://indike.org/pramana/in.jaina.painna.dasapainna.devindatthaa.5) — 112 parts - [6 Isiprabhāpṛthvi evaṃ siddhādhikāra](https://indike.org/pramana/in.jaina.painna.dasapainna.devindatthaa.6) — 35 parts ## Text ### Maṅgalaṃ, devendrapṛcchā ### [1.1](https://indike.org/pramana/in.jaina.painna.dasapainna.devindatthaa.1.1) amara-naravaṃdie vaṃdiūṇa usabhāie jinavariṃde | vīravarapacchimaṃte telokkagurū guṇāinne || ### [1.2](https://indike.org/pramana/in.jaina.painna.dasapainna.devindatthaa.1.2) koi paḍhame paosammi sāvao samayanicchayavihiṇṇū | vannei thayamuyāraṃ jiyamāṇe vaddhamānammi || ### [1.3](https://indike.org/pramana/in.jaina.painna.dasapainna.devindatthaa.1.3) tassa thuṇaṃtassa jinaṃ sāmaiyakaḍā piyā suhanisannā | paṃjaliuḍā abhimuhī suṇai thayaṃ vaddhamānassa || ### [1.4](https://indike.org/pramana/in.jaina.painna.dasapainna.devindatthaa.1.4) iṃdavilayāhiṃ tilayarayaṇaṃkie lakkhaṇaṃkie sirasā | pāe avagayamāṇassa vaṃdimo vaddhamānassa || ### [1.5](https://indike.org/pramana/in.jaina.painna.dasapainna.devindatthaa.1.5) vinayapaṇaehi siḍhilamauḍehiṃ apaḍimajasassa devehiṃ | pāyā pasaṃtarosassa vaṃdiyā vaddhamānassa || ### [1.6](https://indike.org/pramana/in.jaina.painna.dasapainna.devindatthaa.1.6) battīsaṃ deviṃdā jassa guṇehiṃ uvahammiyā bāḍhaṃ | to tassa ciya ccheyaṃ pāyacchāyaṃ uvehāmo || ### [1.7](https://indike.org/pramana/in.jaina.painna.dasapainna.devindatthaa.1.7) ‘battīsaṃ deviṃda’tti bhaṇiyamittammi sā piyaṃ bhaṇai | aṃtarabhāsaṃ tāhe kāhāmī kouhalleṇaṃ || ### [1.8](https://indike.org/pramana/in.jaina.painna.dasapainna.devindatthaa.1.8) kayare te battīsaṃ deviṃdā? ko va kattha parivasai? | kevaiyā kassa ṭhiī? ko bhavanapariggaho kassa? || ### [1.9](https://indike.org/pramana/in.jaina.painna.dasapainna.devindatthaa.1.9) kevaiyā va vimānā? bhavanā? nagarā va huṃti kevaiyā? | puḍhavīṇa va bāhallaṃ? uccatta? vimānavanno vā? || ### [1.10](https://indike.org/pramana/in.jaina.painna.dasapainna.devindatthaa.1.10) ke kenā''hāraṃti va kāleṇukkosa majjhima jahannaṃ? | ussāso nissāso ohīvisao va ko kesiṃ? || ### [1.11](https://indike.org/pramana/in.jaina.painna.dasapainna.devindatthaa.1.11) vinaovayārauvahammiyāi hāsarasamuvvahaṃtīe | paḍipucchio piyāe bhaṇai, suyanu! taṃ nisāmeha || ### Bhavanapati adhikāra ### [2.12](https://indike.org/pramana/in.jaina.painna.dasapainna.devindatthaa.2.12) suyanāṇasāgarāo suṇiuṃ paḍipucchaṇāi jaṃ laddhaṃ | suṇa vāgaraṇāvaliyaṃ nāmāvaliyāi iṃdāṇaṃ || ### [2.13](https://indike.org/pramana/in.jaina.painna.dasapainna.devindatthaa.2.13) suṇa vāgaraṇāvaliyaṃ rayaṇaṃ va paṇāmiyaṃ ca vīrehiṃ | tārāvali vva dhavalaṃ hiyaeṇa pasannacitteṇaṃ || ### [2.14](https://indike.org/pramana/in.jaina.painna.dasapainna.devindatthaa.2.14) rayaṇappabhāpuḍhavīnikuḍavāsī sutaṇu! teulesāgā | vīsaṃ vikasiyanayaṇā bhavanavaī me nisāmeha || ### [2.15](https://indike.org/pramana/in.jaina.painna.dasapainna.devindatthaa.2.15) do bhavanavaīiṃdā camare 1 vairoyaṇe 2 ya asurāṇaṃ 1 | do nāgakumāriṃdā dharaṇe 3 taha bhūyānaṃde 4 ya 2 || ### [2.16](https://indike.org/pramana/in.jaina.painna.dasapainna.devindatthaa.2.16) do suyanu! suvaṇṇiṃdā veṇūdeve 5 ya veṇudālī 6 ya 3 | do dīvakumāriṃdā puṇṇe 7 ya tahā vasiṭṭhe 8 ya 4 || ### [2.17](https://indike.org/pramana/in.jaina.painna.dasapainna.devindatthaa.2.17) do udahikumāriṃdā jalakaṃte 9 jalapabhe 10 ya nāmeṇaṃ 5 | amiyagai 11 amiyavāhaṇa 12 disākumārāṇa do iṃdā 6 || ### [2.18](https://indike.org/pramana/in.jaina.painna.dasapainna.devindatthaa.2.18) do vāukumāriṃdā velaṃba 13 pabhaṃjaṇe 14 ya nāmeṇaṃ 7 | do thaṇiyakumāriṃdā ghose 15 ya tahā mahāghose 16 | 8 || ### [2.19](https://indike.org/pramana/in.jaina.painna.dasapainna.devindatthaa.2.19) do vijjukumāriṃdā harikaṃta 17 harissahe 18 ya nāmeṇaṃ 9 | aggisiha 19 aggimānava 20 huyāsaṇavaī vi do iṃdā 10 || ### [2.20](https://indike.org/pramana/in.jaina.painna.dasapainna.devindatthaa.2.20) ee viyasiyanayane! vīsaṃ viyasiyajasā mae kahiyā | bhavanavarasuhanisanne, suṇa bhavanapariggahamimesiṃ || ### [2.21](https://indike.org/pramana/in.jaina.painna.dasapainna.devindatthaa.2.21) camara-vairoyaṇāṇaṃ asuriṃdāṇaṃ mahānubhāgāṇaṃ | tesiṃ bhavanavarāṇaṃ causaṭṭhimahe sayasahassā || ### [2.22](https://indike.org/pramana/in.jaina.painna.dasapainna.devindatthaa.2.22) nāgakumāriṃdāṇaṃ bhūyānaṃda-dharanāṇa doṇhaṃ pi | tesiṃ bhavanavarāṇaṃ culasīimahe sayasahassā || ### [2.23](https://indike.org/pramana/in.jaina.painna.dasapainna.devindatthaa.2.23) do suyanu! suvaṇṇiṃdā veṇūdeve ya veṇudālī ya | tesiṃ bhavanavarāṇaṃ bāvattari mo sayasahassā || ### [2.24](https://indike.org/pramana/in.jaina.painna.dasapainna.devindatthaa.2.24) vāukumāriṃdāṇaṃ velaṃba-pabhaṃjanāṇa doṇhaṃ pi | tesiṃ bhavanavarāṇaṃ channavaimahe sayasahassā || ### [2.25](https://indike.org/pramana/in.jaina.painna.dasapainna.devindatthaa.2.25) covaṭṭhī asurāṇaṃ, culasīī ceva hoi nāgāṇaṃ | bāvattarī suvaṇṇāṇa, vāukumārāṇa channauī || ### [2.26](https://indike.org/pramana/in.jaina.painna.dasapainna.devindatthaa.2.26) dīva-disā-udahīṇaṃ vijjukumāriṃda-thaṇiya-maggīṇaṃ | chaṇhaṃ pi juvalayāṇaṃ chāvattari mo sayasahassā || ### [2.27](https://indike.org/pramana/in.jaina.painna.dasapainna.devindatthaa.2.27) ekkekkammi ya juyale niyamā chāvattariṃ sayasahassā | suṃdari! līlāe ṭhie! ṭhiīvisesaṃ nisāmehi || ### [2.28](https://indike.org/pramana/in.jaina.painna.dasapainna.devindatthaa.2.28) camarassa sāgarovama suṃdari! ukkosiyā ṭhiī bhaṇiyā | sāhīyā boddhavvā balissa vairoyaṇiṃdassa || ### [2.29](https://indike.org/pramana/in.jaina.painna.dasapainna.devindatthaa.2.29) je dāhiṇāṇa iṃdā camaraṃ mottūṇa sesayā bhaṇiyā | paliovamaṃ divaḍḍhaṃ ṭhiī u ukkosiyā tesiṃ || ### [2.30](https://indike.org/pramana/in.jaina.painna.dasapainna.devindatthaa.2.30) je uttareṇa iṃdā baliṃ pamottūṇa sesayā bhaṇiyā | paliovamāiṃ donni u desūṇāiṃ ṭhiī tesiṃ || ### [2.31](https://indike.org/pramana/in.jaina.painna.dasapainna.devindatthaa.2.31) eso vi ṭhiiviseso suṃdararūve! visiṭṭharūvāṇaṃ | bhomijjasuravarāṇaṃ suṇa anubhāge sunayarāṇaṃ || ### [2.32](https://indike.org/pramana/in.jaina.painna.dasapainna.devindatthaa.2.32) joyaṇasahassamegaṃ ogāhittūṇa bhavana-nagarāiṃ | rayaṇappabhāi savve ekkārasa joyaṇasahasse || ### [2.33](https://indike.org/pramana/in.jaina.painna.dasapainna.devindatthaa.2.33) aṃto cauraṃsā khalu, ahiyamanoharasahāvaramaṇijjā | bāhirao ciya vaṭṭā, nimmalavairāmayā savve || ### [2.34](https://indike.org/pramana/in.jaina.painna.dasapainna.devindatthaa.2.34) ukkinnaṃtaraphalihā abbhiṃtarao u bhavanavāsīṇaṃ | bhavana-nagarā virāyaṃti kanagasusiliṭṭhapāgārā || ### [2.35](https://indike.org/pramana/in.jaina.painna.dasapainna.devindatthaa.2.35) varapaumakaṇṇiyāsaṃṭhiehiṃ hiṭṭhā sahāvalaṭṭhehiṃ | sohiṃti paiṭṭhāṇehiṃ vivihamaṇibhatticittehiṃ || ### [2.36](https://indike.org/pramana/in.jaina.painna.dasapainna.devindatthaa.2.36) caṃdaṇapayaṭṭhiehi ya āsattosattamalla-dāmehiṃ | dārehiṃ puravarā te paḍāgamālāulā rammā || ### [2.37](https://indike.org/pramana/in.jaina.painna.dasapainna.devindatthaa.2.37) aṭṭheva joyaṇāiṃ uvviddhā hoṃti te duvāravarā | dhūmaghaḍiyāulāiṃ kaṃcanaghaṃṭāpiṇaddhāṇi || ### [2.38](https://indike.org/pramana/in.jaina.painna.dasapainna.devindatthaa.2.38) jahiṃ devā bhavanavaī varataruṇīgīya-vāiyaraveṇaṃ | niccasuhiyā pamuiyā gayaṃ pi kālaṃ na yāṇaṃti || ### [2.39](https://indike.org/pramana/in.jaina.painna.dasapainna.devindatthaa.2.39) camare dharaṇe taha veṇudeva puṇṇe ya hoi jalakaṃte | amiyagaī velaṃbe ghose ya harī ya aggisihe || ### [2.40](https://indike.org/pramana/in.jaina.painna.dasapainna.devindatthaa.2.40) kanaga-maṇi-rayaṇathūbhiyarammāiṃ saveiyāiṃ bhavanāiṃ | eesiṃ dāhiṇao, sesāṇaṃ uttare pāse || ### [2.41](https://indike.org/pramana/in.jaina.painna.dasapainna.devindatthaa.2.41) cautīsā coyālā aṭṭhattīsaṃ ca sayasahassāiṃ | cattā pannāsā khalu dāhiṇao huṃti bhavanāiṃ || ### [2.42](https://indike.org/pramana/in.jaina.painna.dasapainna.devindatthaa.2.42) tīsā cattālīsā cautīsaṃ ceva sayasahassāiṃ | chattīsā chāyālā uttarao huṃti bhavanāiṃ || ### [2.43](https://indike.org/pramana/in.jaina.painna.dasapainna.devindatthaa.2.43) bhavana-vimānavaīṇaṃ tāyattīsā ya logapālā ya | savvesi tinni parisā, sāmāṇa caugguṇā''yarakkhā u || ### [2.44](https://indike.org/pramana/in.jaina.painna.dasapainna.devindatthaa.2.44) causaṭṭhī saṭṭhī khalu chacca sahassā taheva cattāri | bhavanavai-vāṇamaṃtara-joisiyāṇaṃ ca sāmāṇā || ### [2.45](https://indike.org/pramana/in.jaina.painna.dasapainna.devindatthaa.2.45) paṃca'ggamahīsīo camara-balīṇaṃ havaṃti nāyavvā | sesayabhavaniṃdāṇaṃ chacceva ya aggamahisīo || ### [2.46](https://indike.org/pramana/in.jaina.painna.dasapainna.devindatthaa.2.46) do ceva jaṃbudīve, cattāri ya mānusuttare sele | cha ccā'ruṇe samudde, aṭṭha ya aruṇammi dīvammi || ### [2.47](https://indike.org/pramana/in.jaina.painna.dasapainna.devindatthaa.2.47) jannāmae samudde dīve vā jammi hoṃti āvāsā | tannāmae samudde dīve vā tesi uppāyā || ### [2.48](https://indike.org/pramana/in.jaina.painna.dasapainna.devindatthaa.2.48) asurāṇaṃ nāgāṇaṃ udahikumārāṇa huṃti āvāsā | aruṇavarammi samudde tattheva ya tesi uppāyā || ### [2.49](https://indike.org/pramana/in.jaina.painna.dasapainna.devindatthaa.2.49) dīva-disā-aggīṇaṃ thaṇiyakumārāṇa hoṃti āvāsā | aruṇavare dīvammi ya, tattheva ya tesi uppāyā || ### [2.50](https://indike.org/pramana/in.jaina.painna.dasapainna.devindatthaa.2.50) vāu-suvaṇṇiṃdāṇaṃ eesiṃ mānusuttare sele | hariṇo harissahassa ya vijjuppabha-mālavaṃtesu || ### [2.51](https://indike.org/pramana/in.jaina.painna.dasapainna.devindatthaa.2.51) eesiṃ devāṇaṃ bala-viriya-parakkamo u jo jassa | te suṃdari! vaṇṇe haṃ jahakkamaṃ ānupuvvīe || ### [2.52](https://indike.org/pramana/in.jaina.painna.dasapainna.devindatthaa.2.52) jāva ya jaṃbuddīvo jāva ya camarassa camaracaṃcā u | asurehiṃ asurakannāhiṃ atthi visao bharetuṃ je || ### [2.53](https://indike.org/pramana/in.jaina.painna.dasapainna.devindatthaa.2.53) taṃ ceva samairegaṃ balissa vairoyaṇassa boddhavvaṃ | asurehiṃ asurakannāhiṃ tassa visao bhareuṃ je || ### [2.54](https://indike.org/pramana/in.jaina.painna.dasapainna.devindatthaa.2.54) dharaṇo vi nāgarāyā jaṃbuddīvaṃ phaḍāi chāijjā | taṃ ceva samairegaṃ bhūyānaṃde vi boddhavvaṃ || ### [2.55](https://indike.org/pramana/in.jaina.painna.dasapainna.devindatthaa.2.55) garuliṃda veṇudevo jaṃbuddīvaṃ chaejja pakkheṇaṃ | taṃ ceva samairegaṃ veṇūdālimmi boddhavvaṃ || ### [2.56](https://indike.org/pramana/in.jaina.painna.dasapainna.devindatthaa.2.56) puṇṇo vi jaṃbudīvaṃ pāṇitaleṇaṃ chaejja ekkeṇaṃ | taṃ ceva samairegaṃ havai vasiṭṭhe vi boddhavvaṃ || ### [2.57](https://indike.org/pramana/in.jaina.painna.dasapainna.devindatthaa.2.57) ekkāe jalummīe jaṃbuddīvaṃ bharejja jalakaṃto | taṃ ceva samairegaṃ jalappabhe hoi boddhavvaṃ || ### [2.58](https://indike.org/pramana/in.jaina.painna.dasapainna.devindatthaa.2.58) amiyagaissa vi visao jaṃbuddīvaṃ tu pāyapaṇhīe | kaṃpejja niravasesaṃ, iyaro puṇa taṃ samairegaṃ || ### [2.59](https://indike.org/pramana/in.jaina.painna.dasapainna.devindatthaa.2.59) ekkāe vāyaguṃjāe jaṃbudīvaṃ bharejja velaṃbo | taṃ ceva samairegaṃ pabhaṃjane hoi boddhavvaṃ || ### [2.60](https://indike.org/pramana/in.jaina.painna.dasapainna.devindatthaa.2.60) ghoso vi jaṃbudīvaṃ suṃdari! ekkeṇa thaṇiyasaddeṇaṃ | bahirīkarijja savvaṃ, iyaro puṇa taṃ samairegaṃ || ### [2.61](https://indike.org/pramana/in.jaina.painna.dasapainna.devindatthaa.2.61) ekkāe vijjuyāe jaṃbuddīvaṃ harī payāsejjā | taṃ ceva samairegaṃ harissahe hoi boddhavvaṃ || ### [2.62](https://indike.org/pramana/in.jaina.painna.dasapainna.devindatthaa.2.62) ekkāe aggijālāe jaṃbudīvaṃ ḍahejja aggisiho | taṃ ceva samairegaṃ mānavae hoi boddhavvaṃ || ### [2.63](https://indike.org/pramana/in.jaina.painna.dasapainna.devindatthaa.2.63) tiriyaṃ tu asaṃkhejjā dīva-samuddā saehiṃ rūvehiṃ | avagāḍhā u karijjā suṃdari! eesi egayaro || ### [2.64](https://indike.org/pramana/in.jaina.painna.dasapainna.devindatthaa.2.64) pabhū annayaro iṃdo jaṃbuddīvaṃ tu vāmahattheṇaṃ | chattaṃ jahā dharejjā ayattao maṃdaraṃ ghittuṃ || ### [2.65](https://indike.org/pramana/in.jaina.painna.dasapainna.devindatthaa.2.65) jaṃbuddīvaṃ kāūṇa chattayaṃ, maṃdaraṃ ca se daṃḍaṃ | pabhū annayaro iṃdo, eso tesiṃ balaviseso || ### [2.66](https://indike.org/pramana/in.jaina.painna.dasapainna.devindatthaa.2.66) esā bhavanavaīṇaṃ bhavanaṭhiī vanniyā samāseṇaṃ | suṇa vāṇamaṃtarāṇaṃ bhavanaṭhiī ānupuvvīe || ### Vāṇavyantara adhikāra ### [3.67](https://indike.org/pramana/in.jaina.painna.dasapainna.devindatthaa.3.67) pisāya 1 bhūyā 2 jakkhā 3 ya rakkhasā 4 kinnarā 5 ya kiṃpurisā 6 | mahoragā 7 ya gaṃdhavvā 8 aṭṭhavihā vāṇamaṃtariyā || ### [3.68](https://indike.org/pramana/in.jaina.painna.dasapainna.devindatthaa.3.68) ete u samāseṇaṃ kahiyā bhe vāṇamaṃtarā devā | patteyaṃ pi ya vocchaṃ solasa iṃde mahiḍḍhīe || ### [3.69](https://indike.org/pramana/in.jaina.painna.dasapainna.devindatthaa.3.69) kāle 1 ya mahākāle 2|1 surūva 3 paḍirūva 4|2 punnabhadde 5 ya | amaravai māṇibhadde 6|3 bhīme 7 ya tahā mahābhīme 8|4 || ### [3.70](https://indike.org/pramana/in.jaina.painna.dasapainna.devindatthaa.3.70) kinnara 9 kiṃpurise 10 khalu 5 sappurise 11 ceva taha mahāpurise 12|6 | aikāya 13 mahākāe 14|7 gīyaraī 15 ceva gīyajase 16|8 || ### [3.71](https://indike.org/pramana/in.jaina.painna.dasapainna.devindatthaa.3.71) sannihie 1 sāmāṇe 2|1 dhāya 3 vidhāe 4|2 isī 5 ya isivāle 6|3 | issara 7 mahissare yā 8|4 havai suvacche 9 visāle ya 10|5 || ### [3.72](https://indike.org/pramana/in.jaina.painna.dasapainna.devindatthaa.3.72) hāse 11 hāsaraī vi ya 12|6 see ya 13 tahā bhave mahāsee 14|7 | payae 15 payayavaī vi ya 16|8 neyavvā ānupuvvīe || ### [3.73](https://indike.org/pramana/in.jaina.painna.dasapainna.devindatthaa.3.73) uḍḍhamahe tiriyammi ya vasahiṃ uvaveṃti vaṃtarā devā | bhavanā puṇa'ṇha rayaṇappabhāe uvarillae kaṃḍe || ### [3.74](https://indike.org/pramana/in.jaina.painna.dasapainna.devindatthaa.3.74) ekkekkammi ya juyale niyamā bhavanā varā asaṃkhejjā | saṃkhijjavitthaḍā puṇa, navaraṃ eta'ttha nāṇattaṃ || ### [3.75](https://indike.org/pramana/in.jaina.painna.dasapainna.devindatthaa.3.75) jaṃbuddīvasamā khalu ukkoseṇaṃ bhavaṃti bhavanavarā | khuḍḍā khettasamā vi ya videhasamayā ya majjhimayā || ### [3.76](https://indike.org/pramana/in.jaina.painna.dasapainna.devindatthaa.3.76) jahiṃ devā vaṃtariyā varataruṇīgīya-vāiyaraveṇaṃ | niccasuhiyā pamuiyā gayaṃ pi kālaṃ na yāṇaṃti || ### [3.77](https://indike.org/pramana/in.jaina.painna.dasapainna.devindatthaa.3.77) kāle surūva puṇṇe bhīme taha kinnare ya sappurise | aikāe gīyaraī aṭṭhete hoṃti dāhiṇao || ### [3.78](https://indike.org/pramana/in.jaina.painna.dasapainna.devindatthaa.3.78) maṇi-kanaga-rayaṇathūbhiya jaṃbūnayaveiyāiṃ bhavanāiṃ | eesiṃ dāhiṇao, sesāṇaṃ uttare pāse || ### [3.79](https://indike.org/pramana/in.jaina.painna.dasapainna.devindatthaa.3.79) dasavāsasahassāiṃ ṭhiī jahannā u vaṃtarasurāṇaṃ | paliovamaṃ tu ekkaṃ ṭhiī u ukkosiyā tesiṃ || ### [3.80](https://indike.org/pramana/in.jaina.painna.dasapainna.devindatthaa.3.80) esā vaṃtariyāṇaṃ bhavanaṭhiī vanniyā samāseṇaṃ | suṇa joisālayāṇaṃ āvāsavihiṃ suravarāṇaṃ || ### Jyotiṣka adhikāra ### [4.81](https://indike.org/pramana/in.jaina.painna.dasapainna.devindatthaa.4.81) caṃdā 1 sūrā 2 tārāgaṇā 3 ya nakkhatta 4 gahagaṇasamaggā 5 | paṃcavihā joisiyā, ṭhiī viyārī ya te bhaṇiyā || ### [4.82](https://indike.org/pramana/in.jaina.painna.dasapainna.devindatthaa.4.82) addhakaviṭṭhagasaṃṭhāṇasaṃṭhiyā phāliyāmayā rammā | joisiyāṇa vimānā tiriyaṃloe asaṃkhejjā || ### [4.83](https://indike.org/pramana/in.jaina.painna.dasapainna.devindatthaa.4.83) dharaṇiyalāo samāo sattahiṃ nauehiṃ joyaṇasaehiṃ | heṭṭhillo hoi talo, sūro puṇa aṭṭhahiṃ saehiṃ || ### [4.84](https://indike.org/pramana/in.jaina.painna.dasapainna.devindatthaa.4.84) aṭṭhasae āsīe caṃdo taha ceva hoi uvaritale | egaṃ dasuttarasayaṃ bāhallaṃ joisassa bhave || ### [4.85](https://indike.org/pramana/in.jaina.painna.dasapainna.devindatthaa.4.85) egaṭṭhibhāga kāūṇa joyaṇaṃ tassa bhāgachappannaṃ | caṃdaparimaṃḍalaṃ khalu, aḍayālīsā ya sūrassa || ### [4.86](https://indike.org/pramana/in.jaina.painna.dasapainna.devindatthaa.4.86) jahiṃ devā joisiyā varataruṇīgīya-vāiyaraveṇaṃ | niccasuhiyā pamuiyā gayaṃ pi kālaṃ na yāṇaṃti || ### [4.87](https://indike.org/pramana/in.jaina.painna.dasapainna.devindatthaa.4.87) chappannaṃ khalu bhāgā vicchinnaṃ caṃdamaṃḍalaṃ hoi | aḍavīsaṃ ca kalāo bāhallaṃ tassa boddhavvaṃ || ### [4.88](https://indike.org/pramana/in.jaina.painna.dasapainna.devindatthaa.4.88) aḍayālīsaṃ bhāgā vicchinnaṃ sūramaṃḍalaṃ hoi | cauvīsaṃ ca kalāo bāhallaṃ tassa boddhavvaṃ || ### [4.89](https://indike.org/pramana/in.jaina.painna.dasapainna.devindatthaa.4.89) addhajoyaṇiyā u gahā, tassa'ddhaṃ ceva hoi nakkhattā | nakkhattaddhe tārā, tassa'ddhaṃ ceva bāhallaṃ || ### [4.90](https://indike.org/pramana/in.jaina.painna.dasapainna.devindatthaa.4.90) joyaṇamaddhaṃ tatto ya gāuyaṃ paṃca dhaṇusayā hoṃti | gaha-nakkhattagaṇāṇaṃ tāravimānāṇa vikkhaṃbho || ### [4.91](https://indike.org/pramana/in.jaina.painna.dasapainna.devindatthaa.4.91) jo jassa u vikkhaṃbho, tassa'ddhaṃ ceva hoi bāhallaṃ | taṃ tiguṇaṃ savisesaṃ tu parirao hoi boddhavvo || ### [4.92](https://indike.org/pramana/in.jaina.painna.dasapainna.devindatthaa.4.92) solasa ceva sahassā aṭṭha ya cauro ya donni ya sahassā | joisiyāṇa vimānā vahaṃti devā'bhiogā u || ### [4.93](https://indike.org/pramana/in.jaina.painna.dasapainna.devindatthaa.4.93) purao vahaṃti sīhā, dāhiṇao kuṃjarā mahākāyā | paccatthimeṇa vasahā, turagā puna uttare pāse || ### [4.94](https://indike.org/pramana/in.jaina.painna.dasapainna.devindatthaa.4.94) caṃdehi u sigghayarā sūrā, sūrehiṃ taha gahā sigghā | nakkhattā u gahehi ya, nakkhattehiṃ tu tārāo || ### [4.95](https://indike.org/pramana/in.jaina.painna.dasapainna.devindatthaa.4.95) savva'ppagaī caṃdā, tārā puna hoṃti savvasigghagaī | eso gaīviseso joisiyāṇaṃ tu devāṇaṃ || ### [4.96](https://indike.org/pramana/in.jaina.painna.dasapainna.devindatthaa.4.96) appiḍḍhiyā u tārā, nakkhattā khalu tao mahiḍḍhie | nakkhattehiṃ tu gahā, gahehiṃ sūrā, tao caṃdā || ### [4.97](https://indike.org/pramana/in.jaina.painna.dasapainna.devindatthaa.4.97) savvabbhiṃtara'bhīī, mūlo puna savvabāhiro hoi | savvovariṃ ca sāī, bharaṇī puna savvahiṭṭhimayā || ### [4.98](https://indike.org/pramana/in.jaina.painna.dasapainna.devindatthaa.4.98) savve gaha-nakkhattā majjhe khalu hoṃti caṃda-sūrāṇaṃ | hiṭṭhā samaṃ ca uppiṃ tārāo caṃda-sūrāṇaṃ || ### [4.99](https://indike.org/pramana/in.jaina.painna.dasapainna.devindatthaa.4.99) paṃceva dhanusayāiṃ jahannayaṃ aṃtaraṃ tu tārāṇaṃ | do ceva gāuyāiṃ nivvāghāeṇa ukkosaṃ || ### [4.100](https://indike.org/pramana/in.jaina.painna.dasapainna.devindatthaa.4.100) donni sae chāvaṭṭhe jahannayaṃ aṃtaraṃ tu tārāṇaṃ | bārasa ceva sahassā do bāyālā ya ukkosā || ### [4.101](https://indike.org/pramana/in.jaina.painna.dasapainna.devindatthaa.4.101) eyassa caṃdajogo sattaṭṭhiṃ khaṃḍio ahoratto | te huṃti nava muhuttā sattāvīsaṃ kalāo ya || ### [4.102](https://indike.org/pramana/in.jaina.painna.dasapainna.devindatthaa.4.102) sayabhisayā bharaṇīo addā assesa sāi jeṭṭhā ya | ee cha nnakkhattā pannarasamuhuttasaṃjogā || ### [4.103](https://indike.org/pramana/in.jaina.painna.dasapainna.devindatthaa.4.103) tinneva uttarāiṃ puṇavvasū rohiṇī visāhā ya | ee cha nnakkhattā paṇayālamuhuttasaṃjogā || ### [4.104](https://indike.org/pramana/in.jaina.painna.dasapainna.devindatthaa.4.104) avasesā nakkhattā panarasa yā hoṃti tīsaimuhuttā | caṃdammi esa jogo nakkhattāṇaṃ muṇeyavvo || ### [4.105](https://indike.org/pramana/in.jaina.painna.dasapainna.devindatthaa.4.105) abhiī chacca muhutte cattāri ya kevale ahoratte | sūreṇa samaṃ vaccai etto sesāṇa vucchāmi || ### [4.106](https://indike.org/pramana/in.jaina.painna.dasapainna.devindatthaa.4.106) sayabhisayā bharaṇīo addā assesa sāi jeṭṭhā ya | vaccaṃti cha'horatte ekkāvīsaṃ muhutte ya || ### [4.107](https://indike.org/pramana/in.jaina.painna.dasapainna.devindatthaa.4.107) tinneva uttarāiṃ punavvasū rohiṇī visāhā ya | vaccaṃti muhutte tinni ceva vīsaṃ ahoratte || ### [4.108](https://indike.org/pramana/in.jaina.painna.dasapainna.devindatthaa.4.108) avasesā nakkhattā pannarasa vi sūrasahagayā jaṃti | bārasa ceva muhutte terasa ya same ahoratte || ### [4.109](https://indike.org/pramana/in.jaina.painna.dasapainna.devindatthaa.4.109) do caṃdā, do sūrā, nakkhattā khalu havaṃti chappannā | chāvattaraṃ gahasayaṃ jaṃbuddīve viyārī ṇaṃ || ### [4.110](https://indike.org/pramana/in.jaina.painna.dasapainna.devindatthaa.4.110) ekkaṃ ca sayasahassaṃ tittīsaṃ khalu bhave sahassāiṃ | nava ya sayā pannāsā tārāgaṇakoḍikoḍīṇaṃ || ### [4.111](https://indike.org/pramana/in.jaina.painna.dasapainna.devindatthaa.4.111) cattāri ceva caṃdā, cattāri ya sūriyā lavaṇatoe | bāraṃ nakkhattasayaṃ, gahāṇa tinneva bāvannā || ### [4.112](https://indike.org/pramana/in.jaina.painna.dasapainna.devindatthaa.4.112) do ceva sayasahassā sattaṭṭhiṃ khalu bhave sahassā u | nava ya sayā lavaṇajale tārāgaṇakoḍikoḍīṇaṃ || ### [4.113](https://indike.org/pramana/in.jaina.painna.dasapainna.devindatthaa.4.113) cauvīsaṃ sasi-raviṇo, nakkhattasayā ya tinni chattīsā | ekkaṃ ca gahasahassaṃ chappannaṃ dhāyaīsaṃḍe || ### [4.114](https://indike.org/pramana/in.jaina.painna.dasapainna.devindatthaa.4.114) aṭṭheva sayasahassā tiṇṇi sahassā ya satta ya sayāiṃ | dhāyaisaṃḍe dīve tārāgaṇakoḍikoḍīṇaṃ || ### [4.115](https://indike.org/pramana/in.jaina.painna.dasapainna.devindatthaa.4.115) bāyālīsaṃ caṃdā bāyālīsaṃ ca diṇayarā dittā | kālodahimmi ee caraṃti saṃbaddhalesāyā || ### [4.116](https://indike.org/pramana/in.jaina.painna.dasapainna.devindatthaa.4.116) nakkhattasahassaṃ egameva chāvattaraṃ ca sayamannaṃ | chacca sayā channauyā mahaggahā tinni ya sahassā || ### [4.117](https://indike.org/pramana/in.jaina.painna.dasapainna.devindatthaa.4.117) aṭṭhāvīsaṃ kālodahimmi bārasa ya sahassāiṃ | nava ya sayā pannāsā tārāgaṇakoḍikoḍīṇaṃ || ### [4.118](https://indike.org/pramana/in.jaina.painna.dasapainna.devindatthaa.4.118) coyālaṃ caṃdasayaṃ, coyālaṃ ceva sūriyāṇa sayaṃ | pokkharavarammi ee caraṃti saṃbaddhalesāyā || ### [4.119](https://indike.org/pramana/in.jaina.painna.dasapainna.devindatthaa.4.119) cattāriṃ ca sahassā battīsaṃ ceva hoṃti nakkhattā | chacca sayā bāvattara mahaggahā bārasa sahassā || ### [4.120](https://indike.org/pramana/in.jaina.painna.dasapainna.devindatthaa.4.120) channaui sayasahassā coyālīsaṃ bhave sahassāiṃ | cattāri taha sayāiṃ tārāgaṇakoḍikoḍīṇaṃ || ### [4.121](https://indike.org/pramana/in.jaina.painna.dasapainna.devindatthaa.4.121) bāvattariṃ ca caṃdā, bāvattarimeva dinayarā dittā | pukkharavaradīvaḍḍhe caraṃti ee pagāsiṃtā || ### [4.122](https://indike.org/pramana/in.jaina.painna.dasapainna.devindatthaa.4.122) tinni sayā chattīsā cha cca sahassā mahaggahāṇaṃ tu | nakkhattāṇaṃ tu bhave solāṇi duve sahassāṇi || ### [4.123](https://indike.org/pramana/in.jaina.painna.dasapainna.devindatthaa.4.123) aḍayālasayasahassā bāvīsaṃ khalu bhave sahassāiṃ | do ya saya pukkharaddhe tārāgaṇakoḍikoḍīṇaṃ || ### [4.124](https://indike.org/pramana/in.jaina.painna.dasapainna.devindatthaa.4.124) battīsaṃ caṃdasayaṃ 132, battīsaṃ ceva sūriyāṇa sayaṃ 132 | sayalaṃ manussaloyaṃ caraṃti ee payāsiṃtā || ### [4.125](https://indike.org/pramana/in.jaina.painna.dasapainna.devindatthaa.4.125) ekkārasa ya sahassā cha ppi ya solā mahaggahasayā u 11616 | cha cca sayā channauā nakkhattā tinni ya sahassā 3696 || ### [4.126](https://indike.org/pramana/in.jaina.painna.dasapainna.devindatthaa.4.126) aṭṭhāsīiṃ cattāiṃ sayasahassāiṃ manuyalogammi | satta ya sayā anūnā tārāgaṇakoḍikoḍīṇaṃ || ### [4.127](https://indike.org/pramana/in.jaina.painna.dasapainna.devindatthaa.4.127) eso tārāpiṃḍo savvasamāseṇa manuyalogammi | bahiyā puṇa tārāo jiṇehiṃ bhaṇiyā asaṃkhejjā || ### [4.128](https://indike.org/pramana/in.jaina.painna.dasapainna.devindatthaa.4.128) evaiyaṃ tāraggaṃ jaṃ bhaṇiyaṃ taha ya manuyalogammi | cāraṃ kalaṃbuyāpupphasaṃṭhiyaṃ joisaṃ carai || ### [4.129](https://indike.org/pramana/in.jaina.painna.dasapainna.devindatthaa.4.129) ravi-sasi-gaha-nakkhattā evaiyā āhiyā manuyaloe | jesiṃ nāmā-goyaṃ na pāgayā pannaveiṃti || ### [4.130](https://indike.org/pramana/in.jaina.painna.dasapainna.devindatthaa.4.130) chāvaṭṭhiṃ piḍayāiṃ caṃdā''iccāṇa manuyalogammi | do caṃdā do sūrā ya hoṃti ekkekkae piḍae || ### [4.131](https://indike.org/pramana/in.jaina.painna.dasapainna.devindatthaa.4.131) chāvaṭṭhiṃ piḍayāiṃ nakkhattāṇaṃ tu manuyalogammi | chappannaṃ nakkhattā ya hoṃti ekkekkae piḍae || ### [4.132](https://indike.org/pramana/in.jaina.painna.dasapainna.devindatthaa.4.132) chāvaṭṭhī piḍayāiṃ mahaggahāṇaṃ tu manuyalogammi | chāvattaraṃ gahasayaṃ ca hoi ekkekkae piḍae || ### [4.133](https://indike.org/pramana/in.jaina.painna.dasapainna.devindatthaa.4.133) cattāri ya paṃtīo caṃdā''iccāṇa manuyalogammi | chāvaṭṭhiṃ chāvaṭṭhiṃ ca hoi ikkikkiyā paṃtī || ### [4.134](https://indike.org/pramana/in.jaina.painna.dasapainna.devindatthaa.4.134) chappannaṃ paṃtīo nakkhattāṇaṃ tu manuyalogammi | chāvaṭṭhiṃ chāvaṭṭhiṃ ca hoi ikkikkiyā paṃtī || ### [4.135](https://indike.org/pramana/in.jaina.painna.dasapainna.devindatthaa.4.135) chāvattaraṃ gahāṇaṃ paṃtisayaṃ hoi manuyalogammi | chāvaṭṭhiṃ chāvaṭṭhiṃ ca hoi ikkikkiyā paṃtī || ### [4.136](https://indike.org/pramana/in.jaina.painna.dasapainna.devindatthaa.4.136) te merumanucaraṃtī payāhiṇāvattamaṃḍalā savve | aṇavaṭṭhiehiṃ joehiṃ caṃda-sūrā gahagaṇā ya || ### [4.137](https://indike.org/pramana/in.jaina.painna.dasapainna.devindatthaa.4.137) nakkhatta-tārayāṇaṃ avaṭṭhiyā maṃḍalā muṇeyavvā | te vi ya payāhiṇāvattameva meruṃ anucaraṃti || ### [4.138](https://indike.org/pramana/in.jaina.painna.dasapainna.devindatthaa.4.138) rayaṇiyara-diṇayarāṇaṃ uḍḍhamahe eva saṃkamo natthi | maṃḍalasaṃkamaṇaṃ puna abbhiṃtara bāhiraṃ tiriyaṃ || ### [4.139](https://indike.org/pramana/in.jaina.painna.dasapainna.devindatthaa.4.139) rayaṇiyara-dinayarāṇaṃ nakkhattāṇaṃ ca mahagahāṇaṃ ca | cāraviseseṇa bhave suha-dukkhavihī manussāṇaṃ || ### [4.140](https://indike.org/pramana/in.jaina.painna.dasapainna.devindatthaa.4.140) tesiṃ pavisaṃtāṇaṃ tāvakkhettaṃ tu vaḍḍhae niyamā | teṇeva kameṇa puṇo parihāyai nikkhamiṃtāṇaṃ || ### [4.141](https://indike.org/pramana/in.jaina.painna.dasapainna.devindatthaa.4.141) tesiṃ kalaṃbuyāpupphasaṃṭhiyā hoṃti tāvakhettamuhā | aṃto ya saṃkulā bāhiṃ vitthaḍā caṃda-sūrāṇaṃ || ### [4.142](https://indike.org/pramana/in.jaina.painna.dasapainna.devindatthaa.4.142) keṇaṃ vaḍḍhai caṃdo? parihānī vā vi keṇa caṃdassa? | kālo vā joṇhā vā keṇa'nubhāveṇa caṃdassa? || ### [4.143](https://indike.org/pramana/in.jaina.painna.dasapainna.devindatthaa.4.143) kiṇhaṃ rāhuvimāṇaṃ niccaṃ caṃdeṇa hoi avirahiyaṃ | cauraṃgulamappattaṃ hiṭṭhā caṃdassa taṃ carai || ### [4.144](https://indike.org/pramana/in.jaina.painna.dasapainna.devindatthaa.4.144) bāvaṭṭhiṃ bāvaṭṭhiṃ divase divase tu sukkapakkhassa | jaṃ parivaḍḍhai caṃdo, khavei taṃ ceva kāleṇaṃ || ### [4.145](https://indike.org/pramana/in.jaina.painna.dasapainna.devindatthaa.4.145) pannarasaibhāgeṇa ya caṃdaṃ pannarasameva saṃkamai | pannarasaibhāgeṇa ya puṇo vi taṃ ceva pakkamai || ### [4.146](https://indike.org/pramana/in.jaina.painna.dasapainna.devindatthaa.4.146) evaṃ vaḍḍhai caṃdo, parihānī eva hoi caṃdassa | kālo vā joṇhā vā teṇa'nubhāveṇa caṃdassa || ### [4.147](https://indike.org/pramana/in.jaina.painna.dasapainna.devindatthaa.4.147) aṃto manussakhette havaṃti cārovagā ya uvavannā | paṃcavihā joisiyā caṃdā sūrā gahagaṇā ya || ### [4.148](https://indike.org/pramana/in.jaina.painna.dasapainna.devindatthaa.4.148) teṇa paraṃ je sesā caṃdā''icca-gaha-tāra-nakkhattā | natthi gaī, na vi cāro, avaṭṭhiyā te muṇeyavvā || ### [4.149](https://indike.org/pramana/in.jaina.painna.dasapainna.devindatthaa.4.149) do caṃdā iha dīve, cattāri ya sāgare lavaṇatoe | dhāyaisaṃḍe dīve bārasa caṃdā ya sūrā ya || ### [4.150](https://indike.org/pramana/in.jaina.painna.dasapainna.devindatthaa.4.150) ee jaṃbuddīve duguṇā, lavaṇe caugguṇā hoṃti | kāloyaṇā tiguṇiyā sasi-sūrā dhāyaīsaṃḍe || ### [4.151](https://indike.org/pramana/in.jaina.painna.dasapainna.devindatthaa.4.151) dhāyaisaṃḍappabhiī uddiṭṭhā tiguṇiyā bhave caṃdā | āillacaṃdasahiyā anaṃtarānaṃtare khette || ### [4.152](https://indike.org/pramana/in.jaina.painna.dasapainna.devindatthaa.4.152) rikkha-ggaha-tāraggaṃ dīva-samudde jaicchase nāuṃ | tassa sasīhi u guṇiyaṃ rikkha-ggaha-tārayaggaṃ tu || ### [4.153](https://indike.org/pramana/in.jaina.painna.dasapainna.devindatthaa.4.153) bahiyā u mānusanagassa caṃda-sūrāṇa'vaṭṭhiyā jogā | caṃdā abhiījuttā, sūrā puṇa hoṃti pussehiṃ || ### [4.154](https://indike.org/pramana/in.jaina.painna.dasapainna.devindatthaa.4.154) caṃdāo sūrassa ya sūrā caṃdassa aṃtaraṃ hoi | paṇṇāsa sahassāiṃ \[tu\] joyaṇāṇaṃ anūnāiṃ || ### [4.155](https://indike.org/pramana/in.jaina.painna.dasapainna.devindatthaa.4.155) sūrassa ya sūrassa ya sasiṇo sasiṇo ya aṃtaraṃ hoi | bahiyā u mānusanagassa joyaṇāṇaṃ sayasahassaṃ || ### [4.156](https://indike.org/pramana/in.jaina.painna.dasapainna.devindatthaa.4.156) sūraṃtariyā caṃdā, caṃdaṃtariyā ya dinayarā dittā | cittaṃtaralesāgā suhalesā maṃdalesā ya || ### [4.157](https://indike.org/pramana/in.jaina.painna.dasapainna.devindatthaa.4.157) aṭṭhāsīiṃ ca gahā, aṭṭhāvīsaṃ ca hoṃti nakkhattā | egasasīparivāro, etto tārāṇa vocchāmi || ### [4.158](https://indike.org/pramana/in.jaina.painna.dasapainna.devindatthaa.4.158) chāvaṭṭhisahassāiṃ nava ceva sayāiṃ paṃcasayarāiṃ | egasasīparivāro tārāgaṇakoḍikoḍīṇaṃ || ### [4.159](https://indike.org/pramana/in.jaina.painna.dasapainna.devindatthaa.4.159) vāsasahassaṃ paliovamaṃ ca sūrāṇa sā ṭhiī bhaṇiyā 1 | paliovama caṃdāṇaṃ vāsasayasahassamabbhahiyaṃ 2 || ### [4.160](https://indike.org/pramana/in.jaina.painna.dasapainna.devindatthaa.4.160) paliovamaṃ gahāṇaṃ 3 nakkhattāṇaṃ ca jāṇa paliyaddhaṃ 4 | paliyacauttho bhāgo tārāṇa vi sā ṭhiī bhaṇiyā 5 || ### [4.161](https://indike.org/pramana/in.jaina.painna.dasapainna.devindatthaa.4.161) paliovama'ṭṭhabhāgo ṭhiī jahannā u joisagaṇassa | paliovamamukkosaṃ vāsasayasahassamabbhahiyaṃ || ### Vaimānika adhikāra ### [5.162](https://indike.org/pramana/in.jaina.painna.dasapainna.devindatthaa.5.162) bhavanavai-vāṇamaṃtara-joisavāsīṭhiī mae kahiyā | kappavaī vi ya vocchaṃ bārasa iṃde mahiḍḍhīe || ### [5.163](https://indike.org/pramana/in.jaina.painna.dasapainna.devindatthaa.5.163) paḍhamo sohammavaī 1 īsāṇavaī u bhannae bīo 2 | tatto saṇaṃkumāro havai 3 cauttho u māhiṃdo 4 || ### [5.164](https://indike.org/pramana/in.jaina.painna.dasapainna.devindatthaa.5.164) paṃcamao puṇa baṃbho 5 chaṭṭho puṇa laṃtao'ttha deviṃdo 6 | sattamao mahasukko 7 aṭṭhamao bhave sahassāro 8 || ### [5.165](https://indike.org/pramana/in.jaina.painna.dasapainna.devindatthaa.5.165) navamo ya āṇaiṃdo 9 dasamo puṇa pāṇao'ttha deviṃdo 10 | āraṇa ekkārasamo 11 bārasamo accuo iṃdo 12 || ### [5.166](https://indike.org/pramana/in.jaina.painna.dasapainna.devindatthaa.5.166) ee bārasa iṃdā kappavaī kappasāmiyā bhaṇiyā | āṇāīsariyaṃ vā teṇa paraṃ natthi devāṇaṃ || ### [5.167](https://indike.org/pramana/in.jaina.painna.dasapainna.devindatthaa.5.167) teṇa paraṃ devagaṇā sayaicchiyabhāvaṇāi uvavannā | gevijjehiṃ na sakkā uvavāo annaliṃgeṇaṃ || ### [5.168](https://indike.org/pramana/in.jaina.painna.dasapainna.devindatthaa.5.168) je daṃsaṇavāvannā liṃgaggahaṇaṃ kareṃti sāmaṇṇe | tesiṃ pi ya uvavāo ukkoso jāva gevejjā || ### [5.169](https://indike.org/pramana/in.jaina.painna.dasapainna.devindatthaa.5.169) ittha kira vimānāṇaṃ battīsaṃ vaṇṇiyā sayasahassā | sohammakappavaiṇo sakkassa mahānubhāgassa 1 || ### [5.170](https://indike.org/pramana/in.jaina.painna.dasapainna.devindatthaa.5.170) īsānakappavaiṇo aṭṭhāvīsaṃ bhave sayasahassā 2 | bārasa ya sayasahassā kappammi saṇaṃkumārammi 3 || ### [5.171](https://indike.org/pramana/in.jaina.painna.dasapainna.devindatthaa.5.171) aṭṭheva sayasahassā māhiṃdammi u bhavaṃti kappammi 4 | cattāri sayasahassā kappammi u baṃbhalogammi 5 || ### [5.172](https://indike.org/pramana/in.jaina.painna.dasapainna.devindatthaa.5.172) ittha kira vimānāṇaṃ pannāsaṃ laṃtae sahassāiṃ 6 | cattā ya mahāsukke 7 chacca sahassā sahassāre 8 || ### [5.173](https://indike.org/pramana/in.jaina.painna.dasapainna.devindatthaa.5.173) āṇaya-pāṇayakappe cattāri sayā''raṇa'ccue tinni 11-12 | satta vimānasayāiṃ causu vi eesu kappesu || ### [5.174](https://indike.org/pramana/in.jaina.painna.dasapainna.devindatthaa.5.174) eyāiṃ vimānāiṃ kahiyāiṃ jāiṃ jattha kappammi | kappavaīṇa vi suṃdari! ṭhiīvisese nisāmehi || ### [5.175](https://indike.org/pramana/in.jaina.painna.dasapainna.devindatthaa.5.175) do sāgarovamāiṃ sakkassa ṭhiī mahāṇubhāgassa 1 | sāhīyā īsāṇe 2 satteva saṇaṃkumārammi 3 || ### [5.176](https://indike.org/pramana/in.jaina.painna.dasapainna.devindatthaa.5.176) māhiṃde sāhiyāiṃ satta ya 4 dasa ceva baṃbhalogammi 5 | coddasa laṃtayakappe 6 sattarasa bhave mahāsukke 7 || ### [5.177](https://indike.org/pramana/in.jaina.painna.dasapainna.devindatthaa.5.177) kappammi sahassāre aṭṭhārasa sāgarovamāiṃ ṭhii 8 | āṇaya eguṇavīsā 9 vīsā puṇa pāṇae kappe 10 || ### [5.178](https://indike.org/pramana/in.jaina.painna.dasapainna.devindatthaa.5.178) puṇṇā ya ekkavīsā udahisanāmāṇa āraṇe kappe 11 | aha accuyammi kappe bāvīsaṃ sāgarāṇa ṭhiī 12 || ### [5.179](https://indike.org/pramana/in.jaina.painna.dasapainna.devindatthaa.5.179) esā kappavaīṇaṃ kappaṭhiī vaṇṇiyā samāseṇaṃ | gevejja'nuttarāṇaṃ suṇa anubhāgaṃ vimānāṇaṃ || ### [5.180](https://indike.org/pramana/in.jaina.painna.dasapainna.devindatthaa.5.180) tinneva ya gevejjā hiṭṭhillā 1 majjhimā 2 ya uvarillā 3 | ekkekkaṃ pi ya tivihaṃ, evaṃ nava hoṃti gevejjā || ### [5.181](https://indike.org/pramana/in.jaina.painna.dasapainna.devindatthaa.5.181) sudaṃsaṇā 1 amohā 2 ya suppabuddhā 3 jasodharā 4 | vacchā 5 suvacchā 6 sumaṇā 7 somanasā 8 piyadaṃsaṇā 9 || ### [5.182](https://indike.org/pramana/in.jaina.painna.dasapainna.devindatthaa.5.182) ekkārasuttaraṃ heṭṭhimae, sattuttaraṃ ca majjhimae | sayamegaṃ uvarimae, paṃceva anuttaravimānā || ### [5.183](https://indike.org/pramana/in.jaina.painna.dasapainna.devindatthaa.5.183) heṭṭhimagevejjāṇaṃ tevīsaṃ sāgarovamāiṃ ṭhiī | ekkekkamāruhijjā aṭṭhahiṃ sesehiṃ namiyaṃgi! || ### [5.184](https://indike.org/pramana/in.jaina.painna.dasapainna.devindatthaa.5.184) vijayaṃ 1 ca vejayaṃtaṃ 2 jayaṃta 3 maparājiyaṃ 4 ca boddhavvaṃ | savvaṭṭhasiddhanāmaṃ 5 hoi cauṇhaṃ tu majjhimayaṃ || ### [5.185](https://indike.org/pramana/in.jaina.painna.dasapainna.devindatthaa.5.185) puvveṇa hoi vijayaṃ, dāhiṇao hoi vejayaṃtaṃ tu | avareṇaṃ tu jayaṃtaṃ, avarāiyamuttare pāse || ### [5.186](https://indike.org/pramana/in.jaina.painna.dasapainna.devindatthaa.5.186) eesu vimānesu u tettīsaṃ sāgarovamāiṃ ṭhiī | savvaṭṭhasiddhanāme ajahannukkosa tettīsā || ### [5.187](https://indike.org/pramana/in.jaina.painna.dasapainna.devindatthaa.5.187) heṭṭhillā uvarillā do do juvala'ddhacaṃdasaṃṭhāṇā | paḍipuṇṇacaṃdasaṃṭhāṇasaṃṭhiyā majjhimā cauro || ### [5.188](https://indike.org/pramana/in.jaina.painna.dasapainna.devindatthaa.5.188) gevejjāvalisarisā gevejjā tinni tinni āsannā | hulluyasaṃṭhāṇāiṃ anuttarāiṃ vimānāiṃ || ### [5.189](https://indike.org/pramana/in.jaina.painna.dasapainna.devindatthaa.5.189) ghanaudahipaiṭṭhāṇā surabhavanā dosu hoṃti kappesuṃ | tisu vāupaiṭṭhāṇā, tadubhayasupaiṭṭhiyā tinni || ### [5.190](https://indike.org/pramana/in.jaina.painna.dasapainna.devindatthaa.5.190) teṇa paraṃ uvarimayā āgāsaṃtarapaiṭṭhiyā savve | esa paiṭṭhāṇavihī uḍḍhaṃ loe vimānāṇaṃ || ### [5.191](https://indike.org/pramana/in.jaina.painna.dasapainna.devindatthaa.5.191) kiṇhā-nīlā-kāū-teūlesā ya bhavana-vaṃtariyā | joisa-sohammīsāne teulesā muṇeyavvā || ### [5.192](https://indike.org/pramana/in.jaina.painna.dasapainna.devindatthaa.5.192) kappe saṇaṃkumāre māhiṃde ceva baṃbhaloge ya | eesu pamhalesā, teṇa paraṃ sukkalesā u || ### [5.193](https://indike.org/pramana/in.jaina.painna.dasapainna.devindatthaa.5.193) kanagattayarattābhā suravasabhā dosu hoṃti kappesu | tisu hoṃti pamhagorā, teṇa paraṃ sukkilā devā || ### [5.194](https://indike.org/pramana/in.jaina.painna.dasapainna.devindatthaa.5.194) bhavanavai-vāṇamaṃtara-joisiyā hoṃti sattarayaṇīyā | kappavaīṇa ya suṃdari! suṇa uccattaṃ suravarāṇaṃ || ### [5.195](https://indike.org/pramana/in.jaina.painna.dasapainna.devindatthaa.5.195) sohamme īsāne ya suravarā hoṃti sattarayaṇīyā | do do kappā tullā dosu vi parihāyae rayaṇī || ### [5.196](https://indike.org/pramana/in.jaina.painna.dasapainna.devindatthaa.5.196) gevejjesu ya devā rayaṇīo donni hoṃti uccā u | rayaṇī puṇa uccattaṃ anuttaravimānavāsīṇaṃ || ### [5.197](https://indike.org/pramana/in.jaina.painna.dasapainna.devindatthaa.5.197) kappāo kappammi u jassa ṭhiī sāgarovama'bbhahiyā | usseho tassa bhave ikkārasabhāgaparihīno || ### [5.198](https://indike.org/pramana/in.jaina.painna.dasapainna.devindatthaa.5.198) jo ya vimānusseho puḍhavīṇa ya jaṃ ca hoi bāhallaṃ | doṇhaṃ pi taṃ pamāṇaṃ battīsaṃ joyaṇasayāiṃ || ### [5.199](https://indike.org/pramana/in.jaina.painna.dasapainna.devindatthaa.5.199) bhavanavai-vāṇamaṃtara-joisiyā huṃti kāyapaviyārā | kappavaīṇa vi suṃdari! vocchaṃ paviyāraṇavihī u || ### [5.200](https://indike.org/pramana/in.jaina.painna.dasapainna.devindatthaa.5.200) sohammīsānesuṃ ca suravarā hoṃti kāyapaviyārā | saṇaṃkumāra-māhiṃdesu phāsapaviyārayā devā || _First 200 of 314 passages. [Read on](https://indike.org/pramana/in.jaina.painna.dasapainna.devindatthaa)_ ## Recensions and editions (7) - [Deviṃdatthaa (Āgamasuttāṇi, ed. Dīparatnasāgara 2012)](https://indike.org/pramana/in.jaina.painna.dasapainna.devindatthaa*deepratnasagar2012) — Ardhamāgadhī Prakrit - [Deviṃdatthaa (Dipratnasagar, Deepratnasagar, Agam Shrut Prakashan, 1996)](https://indike.org/pramana/in.jaina.painna.dasapainna.devindatthaa*deepratnasagar1996) — Māhārāṣṭrī Prakrit - [Deviṃdatthaa (D S Baya, Agam Ahimsa Samta Evam Prakrit Samsthan, 2006)](https://indike.org/pramana/in.jaina.painna.dasapainna.devindatthaa*baya2006) — Māhārāṣṭrī Prakrit - [Deviṃdatthaa (Subhash Kothari, Suresh Sisodiya, Agam Ahimsa Samta evam Prakrit Samsthan, 1988)](https://indike.org/pramana/in.jaina.painna.dasapainna.devindatthaa*subhash1988) — Māhārāṣṭrī Prakrit, not yet digitised - [Deviṃdatthaa (Purnachandrasagar, Jainanand Pustakalay, 2005)](https://indike.org/pramana/in.jaina.painna.dasapainna.devindatthaa*purnachandrasagar2005) — Māhārāṣṭrī Prakrit, not yet digitised - [Deviṃdatthaa (Dipratnasagar, Deepratnasagar, Deepratnasagar, 2014)](https://indike.org/pramana/in.jaina.painna.dasapainna.devindatthaa*deepratnasagar2014) — Māhārāṣṭrī Prakrit, not yet digitised - [Deviṃdatthaa (Purushottam Jain, Ravindra Jain, Purshottam Jain, Ravindra Jain)](https://indike.org/pramana/in.jaina.painna.dasapainna.devindatthaa*purushottam) — Māhārāṣṭrī Prakrit, not yet digitised ## Commentaries (4) - [Devendrastavavṛtti](https://indike.org/pramana/in.jaina.painna.dasapainna.devindatthaa!tika) — Sanskrit - [Deviṃdatthaa: ṭīkānusārī vivecana](https://indike.org/pramana/in.jaina.painna.dasapainna.devindatthaa!deepratnasagar) — Muni Dīparatnasāgara, Gujarati - [Devendranarakendraprakaraṇa C (Malayagiri)](https://indike.org/pramana/in.jaina.painna.dasapainna.devindatthaa!devendranarakendraprakaranac) — Malayagiri, Sanskrit, not yet digitised - [Devendranarakendraprakaraṇa C (Municandrasūri)](https://indike.org/pramana/in.jaina.painna.dasapainna.devindatthaa!devendranarakendraprakaranac-municandrasuri) — Municandrasūri, Sanskrit, not yet digitised ## Translations (5) - [Deviṃdatthaa: Gujarati translation (Dipratnasagar, Deepratnasagar, Agam Shrut Prakashan, 1997)](https://indike.org/pramana/in.jaina.painna.dasapainna.devindatthaa~gu-deepratnasagar1997) — Gujarati, not yet digitised - [Deviṃdatthaa: Hindi translation (Dipratnasagar, Deepratnasagar, Agam Shrut Prakashan, 2001)](https://indike.org/pramana/in.jaina.painna.dasapainna.devindatthaa~hi-deepratnasagar2001) — Hindi, not yet digitised - [Deviṃdatthaa: Gujarati translation (Dipratnasagar, Deepratnasagar, Deepratnasagar, 2009)](https://indike.org/pramana/in.jaina.painna.dasapainna.devindatthaa~gu-deepratnasagar2009) — Gujarati, not yet digitised - [Deviṃdatthaa: Hindi translation (Dīparatnasāgara, 2019)](https://indike.org/pramana/in.jaina.painna.dasapainna.devindatthaa~hi-deepratnasagar2019) — Hindi - [Deviṃdatthaa: Gujarati translation (Dīparatnasāgara, 2020)](https://indike.org/pramana/in.jaina.painna.dasapainna.devindatthaa~gu-deepratnasagar2020) — Gujarati ## See also: more in [The ten canonical Prakīrṇakas](https://indike.org/pramana/in.jaina.painna.dasapainna) - [Gacchayara (Gacchāyāra)](https://indike.org/pramana/in.jaina.painna.dasapainna.gacchayara) — Māhārāṣṭrī Prakrit; 900 CE - [Mahapaccakkhana (Mahāpaccakkhāṇa)](https://indike.org/pramana/in.jaina.painna.dasapainna.mahapaccakkhana) — Māhārāṣṭrī Prakrit; 300 CE - [Aurapaccakkhana (Āurapaccakkhāṇa)](https://indike.org/pramana/in.jaina.painna.dasapainna.aurapaccakkhana) — Māhārāṣṭrī Prakrit; 300 CE - [Tamdulaveyaliya (Taṃdulaveyāliya)](https://indike.org/pramana/in.jaina.painna.dasapainna.tandulaveyaliya) — Māhārāṣṭrī Prakrit; 300 CE - [Bhattaparinna (Bhattapariṇṇā)](https://indike.org/pramana/in.jaina.painna.dasapainna.bhattaparinna) — Māhārāṣṭrī Prakrit; 600 CE - [Samtharaga (Saṃthāraga)](https://indike.org/pramana/in.jaina.painna.dasapainna.santharaga) — Māhārāṣṭrī Prakrit; 600 CE _Discussed in 11 studies in Pramāṇa (listed on the page)._ --- Source: [https://indike.org/pramana/in.jaina.painna.dasapainna.devindatthaa](https://indike.org/pramana/in.jaina.painna.dasapainna.devindatthaa) · Pramāṇa