Dvadasharanayacakra 2.69

2.69

[ sarvathaikāntena sadrūpasya na niyatārthavyavasthā saṃkarādidoṣatvāt tathāsadrūpasya sakalaśūnyatāprasaṃgāt | nityasyaikasvarūpatvāt ekarūpasyārthakriyākāritvābhāvaḥ, arthakriyākāritvābhāve dravyasyāpya-
bhāvaḥ | anityapakṣe'pi niranvayatvādarthakriyākāritvābhāve dravyasyāpyabhāvaḥ | ekarūpasyaikāntena viśeṣābhāvaḥ sarvathaikarūpatvāt | viśeṣābhāve sāmānyasyāpyabhāvaḥ | anekapakṣe'pi tathā dravyābhāvo nirādhāratvāt | bhedapakṣe'pi viśeṣasvabhāvānāṃ nirādhāratvādarthakriyākāritvābhāvaḥ | arthakriyākāritvābhāve dravyasyāpyabhāvaḥ | abhedapakṣe'pi sarvathaikarūpatvādarthakriyākāritvābhāvaḥ | arthakriyākāritvābhāve dravyasyāpyabhāvaḥ | bhavyasyaikāntena parapariṇatyā saṃkarādidoṣasaṃbhavaḥ | abhāvyasyāpi tathā śūnyatāprasaṃgaḥ svarūpeṇāpyabhavanāt | svabhāva rūpasyaikāntena saṃsārābhāvaḥ | vibhāvapakṣe'pi tathā mokṣasyāsaṃbhavaḥ | caitanyamevetyukte sarveṣāṃ śuddhajñānacaitanyāvāptirbhavet | tathā acaitanyapakṣe'pi sakalacaitanyocchedaḥ syāt | mūrtasyaikāntenātmano na mokṣāvāptiḥ syāt | amūrtasyāpi ātmanastathā saṃsāraviloyaḥ syāt | ekapradeśasyaikāntenātmano'nekakriyākāritvahāniḥ syāt | anekapradeśatve'pi tathā tasya nārthakriyākāritvaṃ svasvabhāvaśūnyatāprasaṃgāt | śuddhasyaikāntenātmano na karmakalaṅkāvalepaḥ sarvathā nirañjanatvāt | aśuddhasyāpi tathātmano na kadācidapi śuddhavodhaprasaṃgaḥ syāttanmayatvāt | upacāritai-
kāntapakṣe'pi nātmajñatā saṃbhavati niyamitapakṣatvāt | tathātmano'nupacaritapakṣe'pi parajñatādīnāṃ virodhaḥ | ubhayaikāntapakṣe'pi virodhaḥ ekāntatvāt | tahya̍nekānte'pi kasmānna bhavati | syādvādāt | sa ca kṣetrādibhede dṛṣṭo'hinakulādīnām | sa ca vyāghātakaḥ, sahānavasthālakṣaṇaḥ, pratibandhyapratibandhakaśceti, anavasthānādikaṃ vā | tatrānavasthānaṃ dvividhaṃ, guṇānāmekādhāratvalakṣaṇaṃ gaganatalāvambīti (?) | saṃkaraḥ vyatikaraḥ anavasthā abhāvaḥ adṛṣṭakalpanā dṛṣṭaparihāṇiḥ virodhaḥ vaiyadhikaraṇyaṃ ceti śreṣṭhadoṣāṇāṃ ekānte saṃbhavaḥ |