[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 1.102 # Dvadasharanayacakra 1.102 Nyāyāgamānusāriṇī 1.102 - **Language:** Sanskrit ### [1.102](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.102) kāryāniyamo'pi ca . kāryameva sadasadbhūtakālādiviśeṣakāraṇamevetyaniyamaḥ pradhānādiśāstrakāraparikalpitakāraṇapūrvakameveti vā . kiṃ kāraṇam ? tathānugamyamānadṛṣṭāntābhāvāt . kiṃ tarhi ? etāvānniyamaḥ --kāraṇādhyāsāvimuktyanirmūlatvaṃ kāryasyeti, tathānugamyadṛṣṭārthatvāt, mṛtpiṇḍaśivaketyādipāṃśumṛtpiṇḍāderityantasya daṇḍakasyopari aniyatādisadasadbhūtakāraṇādhyāsāvimuktyanirmūlatvamiti vakṣyamāṇasambandhatvāt . kāryameva, sadeva asadeva vā kāraṇaṃ kālādi, sādikāraṇamityasya vā'niyamapradarśanārthamudāharaṇamāha --mṛtpiṇḍaśivaketyādi yāvat pāṃśumṛtpiṇḍāderiti, eṣāṃ mṛtpiṇḍādyavasthāviśeṣāṇāṃ vātāyanareṇuparyantānāmeva loke dṛṣṭatvāt punarupacayāt prāptamānantyaṃ yeṣāṃ skandhānāṃ te punarupacayaprāptānantyaskandhāḥ vātāyanareṇubhyaḥ prabhṛti punarupacayakrameṇa pāṃśu-mṛtpiṇḍa-śivaka-sthāsa-kosaka-kuśūlaghaṭa-kapāla-śakala-śarkarikā-pāṃśu-vātāyanareṇava iti cakrakakrameṇa kāraṇakāryāniyamo dṛṣṭaḥ . utkrameṇāpi ca saṅghātabhedābhyāṃ kāryakāraṇasadasattvāniyamo dṛṣṭaḥ, piṇḍamupamṛdya śivakakaraṇāt śivakaṃ copamṛdya piṇḍakaraṇāt sthāsakādīnāmanyatamamavasthāviśeṣamupamṛdyāpi piṇḍādikaraṇāt kriyākriyāphalakrameṇa ca kadācit kāraṇakāryāniyamadarśanādityaniyatādi, itthamaniyata ādirasyetyaniyatādi, jagaditi sambadhyate, tadeva aniyatasadasadbhūtakāraṇakāryam, aniyatādisadasadbhūtaṃ kāraṇam, tasya adhyāsastena vā kāraṇena adhyāso'dhiṣṭhānam . tena kāraṇādhyāsena avimuktiratyāgaḥ kāraṇasāmānyāvinābhāvaḥ, na tu atyantanirmūlotpattivināśalakṣaṇakāryatvaṃ khapuṣpavat, tathaiva loke dṛṣṭatvāt . tayā avimuktyā anirmūlatvaṃ kāryabhūtasya jagataḥ . - [Previous: 1.101](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.101) - [Next: 1.103](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.103) - [Up: 1](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.1.23) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.102](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.102) · Pramāṇa