[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 1.103 # Dvadasharanayacakra 1.103 Nyāyāgamānusāriṇī 1.103 - **Language:** Sanskrit ### [1.103](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.103) ataḥ proktahetordṛṣṭakāryakāraṇasadasattvāniyamāt paraparikalpitapradhānādyadṛṣṭaikakāraṇānupapatteḥ kālādiviśeṣakāraṇaikyānumānābhāvācca kāraṇasāmānyamātrānumānāccāvagamyatām--na kiñcidanyat phalaṃ tacchāstreṇa kriyate, nirarthakāni śāstrāṇītyarthaḥ . kiṃ tat ? yallokavyavahāraphalādatiricya varteta, yadapekṣya śāstrāṇi sārthakāni syuḥ . tasmādavagamyatām--idaṃ jagallokaprasiddhameva aniyatānuparatādyantadṛṣṭakāraṇakāryaprabandhamiti . na tu yathānyaiḥ kalpitam--uparatavyāpāraṃ sat pradhānamatīndriyaṃ punarindriyagrāhyatvādibhāvena jagat sṛjati, punarātmānaṃ saṃhṛtya uparatavyāpāraṃ tiṣṭhati . na cātyantāsatkāryaṃ kṣaṇotpannavinaṣṭamasambaddhamūlaṃ vaitaditi . itiśabdo hetvarthaḥ . ko hetuḥ ? śāstranairarthakyam . kasmin sādhye ? phalādatiricya varteta iti vṛthaivamādau śāstrārambhaḥ . atra tu śāstramarthavat syāt— idaṅkāma idaṃ kuryāditi . arthyo hi kriyāyā evopadeśaḥ, citrādivat, na tu laukike eva gṛhyamāṇe'rthe idamevaṃ naivaṃ vetinaivaṃ ceti vicāraḥ . anupahatendriyamanaḥpratyakṣeṇa loke yathāsau śāstrārambhavṛthābhāve, ata āha --vṛthā evamādau śāstrārambhaḥ . kva tarhi śāstramarthavat syāditi cet, atīndriye puruṣārthasādhyasādhanasambandhe . ko'sau ? ityata āha --atra tu śāstramarthavat syāt— idaṅkāma idaṃ kuryāditi . idaṃ śabdena sarvanāmnā sāmānyavādinā sarvāḥ kriyāḥ phalecchāpreritāstatsādhanīḥ sūcayati agnihotraṃ juhuyāt svargakāmaḥ, putrakāmo yajeta, paśukāmo yajeta, annādyakāmo yajeta ityādyāḥ, kriyākriyāphalasambandhasyātīndriyatvāt . uktaṃ ca --aprāpye śāstramarthavat mīmāṃsāda॰ 6 . 2 . 18, pratyakṣādipramāṇairanadhigamye ityarthaḥ . - [Previous: 1.102](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.102) - [Next: 1.104](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.104) - [Up: 1](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.51) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.103](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.103) · Pramāṇa