[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.120 # Dvadasharanayacakra 1.120 Nyāyāgamānusāriṇī 1.120 - **Language:** Sanskrit ### [1.120](https://indike.org/pramana/in.jaina.post.dvadasaranayacakra!simhasuri.1.120) kiñcānyat --tathā ca tatra pratijñādīnāmapyanupapattiḥ . na kevalaṃ śāstravijñānāprāmāṇyameva, kiṃ tarhi ? tena prakāreṇa tathā ca evaṃ ca kṛtvā tatra sati tasminnalaukike mṛgatṛṣṇikāvat pratijñādīnāmapyavayavānāmanupapattiḥ . katham ? yadi yathā lokena gṛhyate na tathā vastu . yadīti parābhyupagamaṃ darśayati, yadi pratipādanakauśalena pratipādanabuddhisaṃvādamātratvena dṛṣṭāntamupādāya yathāhaṃ yuktyopapādayāmi śāstreṇa ca tathā tad vastu na tu yathā lokena gṛhyate tatheti bhavato'bhiprāyaḥ . tatra pratijñā tāvad yathoktā gṛhyamāṇā aviśeṣāderna tathā syāt . aviśeṣaikāntavāde tāvat sarvasya sarvātmakatvāt nityaḥ śabdaḥ iti pratijñā yathā śrotreṇa gṛhyate na tathā bhavitumarhati . kiṃ kāraṇam ? netrādigrāhyarūpādyātmikāpi seti kṛtvā . evaṃ viśeṣaikāntavāde'pi anityaḥ śabdaḥ iti pratijñā akāranikārādivarṇavijñānānāṃ deśakālakṛtātyantanānātvakṣaṇikatvaśūnyatvanirupākhyatvāt parasparāpekṣābhāve sarvabhāvābhāve ca yathā gṛhyate na tathā syāt . evamubhayānekatvaikānte pūrvavadanyataragrāhyasya itarapakṣanirapekṣasyābhāvāt . - [Previous: 1.119](https://indike.org/pramana/in.jaina.post.dvadasaranayacakra!simhasuri.1.119) - [Next: 1.121](https://indike.org/pramana/in.jaina.post.dvadasaranayacakra!simhasuri.1.121) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.1.28) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.120](https://indike.org/pramana/in.jaina.post.dvadasaranayacakra!simhasuri.1.120) · Pramāṇa