[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.124 # Dvadasharanayacakra 1.124 Nyāyāgamānusāriṇī 1.124 - **Language:** Sanskrit ### [1.124](https://indike.org/pramana/in.jaina.post.dvadasaranayacakra!simhasuri.1.124) atrocyate --evaṃ tarhi sākṣāllokapakṣāpattyābhyupagamavirodhaḥ . sākṣāditi pratyakṣata eva lokapakṣāpattiḥ . katham ? kiñcidgrahaṇāt tathāgrahaṇādanyathāgrahaṇācca . kiñcittvādeva na sarvaṃ sarvātmakam, sarvāsarvatvasiddhiśca vibhāganirdeśāt kiñcit iti . evaṃ tena prakāreṇa tathā iti sa cānya bhedapadārthopādānācca na tathā iti punarnavo'bhyupagamavirodhaḥ . stayośca kaściddharmaḥ prakāravyapadeśabhāgeṣitavyaḥ, teṣu triṣvapi siddheṣu yasmāt tathā iti ghaṭate . evam anyathā ityapi, ayamanyasmādanyaḥ, anyaśca asmādanyaḥ iti sarvāsarvatvasiddherlokapakṣāpattiḥ . evaṃ viśeṣaikānte deśakālakṛtātyantabhedanirupākhyaśūnyatveṣu kiṃ tat syāt kiñcit iti vibhajya anyasmādavasthitādanavasthitamasadvānyaditi vocyeta vilakṣaṇamiti ? evaṃ tathā anyathā iti ca na ghaṭete . evamubhayānekatvaikānte pūrvavad dravyādīnāmitaretarānātmakatvāt sāmānyaviśeṣayoḥ kāryakāraṇayorvā nirmūlatvādibhyo vā hetubhyo'sattvād vastunaḥ kiñcittathānyathā ityanupapatterlokapakṣāpattiḥ . tayā ca saha sarvasarvātmakatvādiśāstrābhyupagamo virudhyate . evaṃ tāvat pratijñā duṣṭā . pratijñāvaddhetudṛṣṭāntāvapi duṣṭāveva, tadasādhakatvāt . unmatta iti ca dṛṣṭānto lokapakṣapātādṛte na sidhyati, utkṛṣṭo mada unmāda iti madāntarāpekṣo vimadatvāpekṣo vā nirdeśaḥ, sa ca laukika eva, tamabhyupagamya tannirācikīrṣava evonmattatarā iti . - [Previous: 1.123](https://indike.org/pramana/in.jaina.post.dvadasaranayacakra!simhasuri.1.123) - [Next: 1.125](https://indike.org/pramana/in.jaina.post.dvadasaranayacakra!simhasuri.1.125) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.64) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.124](https://indike.org/pramana/in.jaina.post.dvadasaranayacakra!simhasuri.1.124) · Pramāṇa