[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.125 # Dvadasharanayacakra 1.125 Nyāyāgamānusāriṇī 1.125 - **Language:** Sanskrit ### [1.125](https://indike.org/pramana/in.jaina.post.dvadasaranayacakra!simhasuri.1.125) evaṃ tāvad vākyaviṣayo doṣaḥ . idānīmekapadaviṣaya ucyate --bhedavadabhedapadārthopādānācca na tathā iti punarnavo'bhyupagamavirodhaḥ . bhedo'syāstīti bhedavān, nāsya bheda ityabhedaḥ, bhedavāṃśca abhedaśca sa eveti bhedavadabhedaḥ, ko'sau ? padārthaḥ vṛkṣa ityādiḥ svārtha-dravya-liṅga-saṅkhyā-karmādikārakarūpaḥ . yaduktaṃ krama-yaugapadyacintāyām— svārthamabhidhāya śabdo nirapekṣo dravyamāha samavetam . samavetasya tu vacane liṅgaṃ saṅkhyāṃ vibhaktiṃ ca .. abhidhāya tān viśeṣānapekṣamāṇastu kṛtsnamātmānam . priyakutsanādiṣu tathā pravartate'sau vibhaktyantaḥ .. pā॰ ma॰ bhā॰ 5 . 3 . 74 iti vyākaraṇe sarvatantrasiddhānte . tatra svārtha iti jātirākāro vocyeta sva evārthaḥ svārtha iti so'nyāpekṣatvādanyena vinā na svaḥ iti syāt, ato dravyādisiddherbhedavān padārthaḥ . teṣāmeva ca svārthādīnāmatyantabhede'nyonyānātmakatvāt khapuṣpavadabhāvaḥ syāt, deśakālādyabhedopalabdheśca abhedasiddherabhinnaḥ padārthaḥ . tasmād bhedavadabhedapadārtha upāttaḥ padaṃ prayuñjānena śāstravidā svārthamātravādināpi . tathā dravye atha pratijñaivābhyupagamaḥ, tasyā lokāprāmāṇyāt . nanvaviśeṣādiṣvasataḥ pakṣāderupādānāllokābhyupagamāt lokavadeva cārthaḥ iti vyavasthāpya śabda- liṅge saṅkhyāyāṃ kārake kutsādau padārthe ca yojyaṃ krameṇa yugapadvā vācye . tamabhyupagamyāviśeṣavādino viśeṣavādina ubhayānekatvavādino vā na tathā iti tameva punarbruvato navo'bhyupagamavirodhaḥ . nava iti na svaśāstrābhyupagamena, kiṃ tarhi ? tatkālābhyupagamenetyarthaḥ . sa ca sarvatrābhyupagamavirodha iti . - [Previous: 1.124](https://indike.org/pramana/in.jaina.post.dvadasaranayacakra!simhasuri.1.124) - [Next: 1.126](https://indike.org/pramana/in.jaina.post.dvadasaranayacakra!simhasuri.1.126) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.64) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.125](https://indike.org/pramana/in.jaina.post.dvadasaranayacakra!simhasuri.1.125) · Pramāṇa