[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.128 # Dvadasharanayacakra 1.128 Nyāyāgamānusāriṇī 1.128 - **Language:** Sanskrit ### [1.128](https://indike.org/pramana/in.jaina.post.dvadasaranayacakra!simhasuri.1.128) tathā tadviṣayaḥ svavacanavirodho'pi pratipattavyaḥ . kasmāt ? lokavadeva cārtha iti vyavasthāpya śabdaprayogāt . lokena tulyaṃ vartate lokasyeva loka iva vā lokavat, evetyavadhāraṇe, kimavadhārayati ? loke'rthamavadhārayati nārthe lokam, śāstravidāmapi lokatvāt . pṛthaktve'pyarthalokayorubhayatra vāyamevakāro draṣṭavyaḥ--lokavadevārthaḥ arthavadeva loka iti, dvayorapi parasparāvyabhicārāt śāstravidāṃ lokapṛthaktve prayogāt tathāsatyatvasiddhe śabdārthe punaḥ na yathālokagrāhaṃ vastu iti virudhyeta svavacanena . lokavirodhastu prastuta eva, tadavirodhe'pravṛtteḥ . lokāprāmāṇye ca sarvatra pratyakṣānumānavirodhāvupasthitāveva, tatsthatvāttayoḥ . laukikārthapṛthaktve ca tatkalpitārthānām . itiśabdaḥ prakāre, anena prakāreṇa itthaṃ vyavasthāpya buddhyā abhyupagamya svaniścitārthapratipādanārthaṃ pareṣāṃ śabdaprayogāt, padāvadhiko vākyāvadhiko vā śabdaprayogavyavahāro lokānupātītthamiṣṭaṃ tairapi śāstrakāraiḥ . tatra ca tathāsatyatvasiddhe śabdārthe, tena prakāreṇa tathā, yena prakāreṇa mṛdrūpādipṛthukukṣyādike'rthe ghaṭaśabdo lokena prayuktastenaiva prakāreṇa satyatvena siddhe satyatvasiddhe loke śabdaṃ prayuñjānaiḥ śāstravidbhiḥ loko'bhyupagato'smābhiḥ ityuktameva bhavatyarthāt . tataḥ punaḥ na yathālokagrāhaṃ vastu iti virudhyeta . lokasya grāho lokagrāhaḥ, grāha iva grāhaḥ, yo yo lokagrāho yathālokagrāham . kiṃ tat ? vastu . yathaivāgopālaprasiddhaṃ vastu bruvāṇo vādī yo yaḥ prayujyate mayā śabdaḥ sa sa na tathārthaḥ syāt ityanena svavacanenaiva viruddhamāha, svena vacanena tattadvacanaṃ virudhyeta . virudhyeta iti āśaṃsāvacane liṅ pā॰ 3 . 3 . 134, kathaṃ mukhaniṣṭhuraṃ virudhyata eva ityavadhāryocyate ? kathañcid virudhyeta iti dākṣiṇyamācāryaḥ svakaṃ darśayati . evaṃ tāvat svavacanavirodhaḥ . - [Previous: 1.127](https://indike.org/pramana/in.jaina.post.dvadasaranayacakra!simhasuri.1.127) - [Next: 1.129](https://indike.org/pramana/in.jaina.post.dvadasaranayacakra!simhasuri.1.129) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.66) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.128](https://indike.org/pramana/in.jaina.post.dvadasaranayacakra!simhasuri.1.128) · Pramāṇa