[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.138 # Dvadasharanayacakra 1.138 Nyāyāgamānusāriṇī 1.138 - **Language:** Sanskrit ### [1.138](https://indike.org/pramana/in.jaina.post.dvadasaranayacakra!simhasuri.1.138) mā maṃsthāḥ proktakalpanātmakatvādihetvasiddhiḥ iti . yasmāduktaṃ vo'bhidharma eva abhidharmapiṭaka eva buddhavacane'bhihitam --sañcitālambanāḥ pañca vijñānakāyā iti . nityaṃ samprayuktakadharmairyuktatvād rāgādibhiḥ kāyā ityucyante pañca cakṣurādivijñānāni . rūpādiparamāṇorekasya asañcitasya anyaiḥ samānajātīyairasaṅgatasya ālambanasya viṣayasyendriyabuddhigrāhyatvasya ghaṭādiṣu ghaṭapaṭarathādiṣu nīlādiṣu rūparasagandhasparśabdeṣu tadguṇeṣu pratyakṣābhimateṣu saṃvṛtisatsu abhāvāt sañcitāṇughaṭanīlādyākāra eva gṛhyate cakṣurādibhiḥ . tasyāṃ cāvasthāyāṃ paramāṇutvena avasthānam ārhatān pratyasiddham, pariṇāmāntarāpattyabhyupagamāt . vaiśeṣikāṇāṃ paramāṇvārabdhāvayavidravyam . sāṅkhyānāṃ samavasthānaviśeṣāpannāḥ sattvādayo guṇāḥ . laukikānāṃ tu sthūlakāryānumitatajjātīyasūkṣmakāraṇamātrasambhāvanam--santi kecit sūkṣmā bahavaḥ sthūlasya kāraṇabhūtāḥ paṭasyeva tantava iti . sambhāvitānāṃ tathāsambhāvane'pi teṣāṃ saṅghāta-pariṇāmābhyāmṛte cākṣuratvādyabhāvo lokavyāptāṇuvat, ato'tīndriyatvādālambanatvānupapattiḥ . ataścālambanatvānupapatterdravyasatāṃ paramāṇūnāmetat pratipattavyam --cakṣurādivijñānānāṃ rūpādiparamāṇusaṅghāta eva ālambanamiti . ādigrahaṇād rasādiparimaṇḍalādiparamāṇusaṅghāta eva ālambanam . tataḥ kimiti cet, tataḥ pratyekamālambanaparamāṇūnām, ālambanārthāḥ paramāṇava ālambanaparamāṇavaḥ, teṣāṃ paramārthasatāmeṣām, ta eva hi paramārthasanto na samūho nīlādirghaṭādiśca saṃvṛtisattvāt, bhavatsiddhāntenaiva aviṣayatā paramāṇūnām . - [Previous: 1.137](https://indike.org/pramana/in.jaina.post.dvadasaranayacakra!simhasuri.1.137) - [Next: 1.139](https://indike.org/pramana/in.jaina.post.dvadasaranayacakra!simhasuri.1.139) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.72) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.138](https://indike.org/pramana/in.jaina.post.dvadasaranayacakra!simhasuri.1.138) · Pramāṇa