[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.141 # Dvadasharanayacakra 1.141 Nyāyāgamānusāriṇī 1.141 - **Language:** Sanskrit ### [1.141](https://indike.org/pramana/in.jaina.post.dvadasaranayacakra!simhasuri.1.141) atrācāryo doṣadvayaṃ pariharannāha --nanvidamasyaivārthasya pradarśanārthaṃ prastutamasmābhiḥ . naitadaniṣṭamasmākaṃ na vā sādhyadharmavaikalyaṃ yat sañcayasya jñāpakatvaprasaṅgāt pratyakṣapratipattestaddoṣadvayamasmān pratyāpādyeta . na punarevametat, asyaiva pratipipādayiṣitatvāt . taducyate --yadi bhavanmatamidaṃ pratyakṣaṃ syāt, kārakādeva niṣpādakādeva cakṣurādivijñānasya nīlapītādeḥ svārthābhimatādālambanabhūtāddhetorjāyeta sañcayākhyāt saṃvṛtisataḥ, na paramārthasato'ṇvāderapi syāt, bhavati tu . tasmānna pratyakṣam, jñāpakadhūmādyapekṣāgnijñānavat, vaidharmyeṇa dāhānubhavanavat . svārthamātrālambanaṃ vā syāt pratyakṣatvād dāhānubhavanavat . yathoktam— anyathā dāhasambandhāddāhaṃ dagdho'bhimanyate . anyathā dāhaśabdena dāhārthaḥ sampratīyate .. vākyapa॰ 2 . 421 avyavahitapratipattyātmakatvāt pratyakṣasyeti tasyaivopacayahetuḥ, arthāntareṇāvyapetasyārthasya grāhakaṃ pratyakṣaṃ dṛṣṭam, yathā dāhānubhavaḥ, tathā tasya svalakṣaṇaviṣayatvāt pratyakṣasyārthāntaranirapekṣatā syāt, na punarastīti svalakṣaṇaviṣayatvādanadhyāropātmakatvāditi yāvat, sarvatrārthāntarādhyāropavṛttyarthāntaraheyatayotpannaṃ na jñānamiti yāvaduktaṃ bhavati tāvaduktaṃ bhavati svalakṣaṇaviṣayatvādavyavahitapratipattyātmakatvāt pratyakṣatvādityādi . arthāntaranimittagrāhyaṃ cāpratyakṣaṃ dṛṣṭam, yathā dāhaśabdajanitajñānamiti . evaṃ tāvat kārakatāṃ sañcayasyābhyupagamya doṣa āpāditaḥ . - [Previous: 1.140](https://indike.org/pramana/in.jaina.post.dvadasaranayacakra!simhasuri.1.140) - [Next: 1.142](https://indike.org/pramana/in.jaina.post.dvadasaranayacakra!simhasuri.1.142) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.1.32) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.141](https://indike.org/pramana/in.jaina.post.dvadasaranayacakra!simhasuri.1.141) · Pramāṇa