[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.151 # Dvadasharanayacakra 1.151 Nyāyāgamānusāriṇī 1.151 - **Language:** Sanskrit ### [1.151](https://indike.org/pramana/in.jaina.post.dvadasaranayacakra!simhasuri.1.151) atanmātratve saṃvṛtisattvādityādi yāvadubhayathāpi rūpāgrāhitvād ghaṭādivat . atha mā bhūdeṣa doṣa iti na rūpamātraṃ sañcayaḥ, sa eva ca gṛhyata itīṣyate, tataḥ sañcayasya saṃvṛtisattvādarūpatvaṃ kharaviṣāṇavat . saṃvṛtisattvaṃ prāgupapāditam . arūpatvācca na cakṣurgrāhyaḥ syāt sañcayaḥ, rūpādanyatvāt, śabdavat khapuṣpavadvā . tataḥ ko doṣa iti cet, ucyate --cakṣurnaiva cakṣuḥ syāt, rūpasyāgrāhakatvāt, ghaṭavat jihvāvat tvagvadityādi . kathaṃ rūpasyāgrāhakaṃ cakṣuḥ iti dṛṣṭa-prasiddhiviruddhamucyata iti cet, tavaiva dṛṣṭaprasiddhivirodhāvāpādyete mayā . kiṃ kāraṇam ? ubhayathā rūpāgrāhitvāttasya . yadi sañcayastathāpyasannarūpa evetyuktatvādacakṣurviṣayo rūpam, tato rūpasyāgrāhakatvāccakṣuracakṣuḥ śrotravat . athāsañcitameva paramāṇunīlarūpamiṣṭaṃ tathāpyatīndriyatvādacakṣurviṣayo rūpam, ato rūpasyāgrāhakatvācca cakṣurna ca cakṣuḥ syāduktavaditi sūktam--ubhayathāpi rūpasyāgrāhakaṃ cakṣuriti . evaṃ tāvat cakṣurvijñānasamaṅgī ityatra cakṣuṣo'cakṣuṣṭvāccakṣurgrahaṇamanarthakam . - [Previous: 1.150](https://indike.org/pramana/in.jaina.post.dvadasaranayacakra!simhasuri.1.150) - [Next: 1.152](https://indike.org/pramana/in.jaina.post.dvadasaranayacakra!simhasuri.1.152) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.79) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.151](https://indike.org/pramana/in.jaina.post.dvadasaranayacakra!simhasuri.1.151) · Pramāṇa