[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.153 # Dvadasharanayacakra 1.153 Nyāyāgamānusāriṇī 1.153 - **Language:** Sanskrit ### [1.153](https://indike.org/pramana/in.jaina.post.dvadasaranayacakra!simhasuri.1.153) idānīṃ nīlam, vijānāti iti ca dūṣyam . tatra nīlaṃ padārthato dūṣitameva, vijānātīti ca dūṣitameva padārthataḥ, rūpacakṣurvijñānānāṃ saṅgateśca dūṣitatvāt . mā bhūdakṣarasthānaṃ dūṣaṇaśūnyamiti kṛtvā vākyārthato'pi dūṣyate --nīlavijñānasambandhī na bhavati tatsantānaḥ, tadākārajñānotpattihetvabhāvāt . sa ākāro'syeti tadākāraṃ jñānaṃ nīlākāram, tasyotpattistadākārajñānotpattiḥ, tasyā hetuḥ sañcayo nīlarūpaṃ vā syāt, ubhayamapi tanna bhavatyuktavidhinaiva, atastadākārajñānotpattihetvabhāvāt . nīlaṃ ca sañcayaṃ ca pratyekasamuditakāraṇatvād vijñāsyatīti cet, na, yugapajjñānāsambhavāt, jñānasya kriyāvaidharmyāt . tayorekajñānatvādekajñeyatve itaretaratve sarvasarvātmavāditā . sarvanīlaikye hi samavāyagrahaṇe pratyekaikanīlagrahaṇaṃ syāt . tataśca yathātra sandrāvāt sarvanīlaikatā ko dṛṣṭāntaḥ ? adagdhasya dāhājñānavat, yathā adagdhasya dāhānubhavajñānaṃ tadākārajñānotpattihetvabhāvānnāsti tathā nīlavijñānasambandhī na bhavati tatsantāna iti . evaṃ nīlarūpatatsañcayayoranyataraviṣaya- tveṣṭau doṣā uktāḥ . - [Previous: 1.152](https://indike.org/pramana/in.jaina.post.dvadasaranayacakra!simhasuri.1.152) - [Next: 1.154](https://indike.org/pramana/in.jaina.post.dvadasaranayacakra!simhasuri.1.154) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.82) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.153](https://indike.org/pramana/in.jaina.post.dvadasaranayacakra!simhasuri.1.153) · Pramāṇa