[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 1.155 # Dvadasharanayacakra 1.155 Nyāyāgamānusāriṇī 1.155 - **Language:** Sanskrit ### [1.155](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.155) yadyapi syāt tayorekajñānatvādekajñeyatvam, ekaṃ jñānamanayorityekajñāne, tayorekajñānatvāt ekameva jñeyaṃ tadbhāva ekajñeyatvaṃ dāhānubhavavat, tasminnekajñeyatve itaretaratve anyonyātmāpannatve sati sarvasarvātmavāditā . katham ? samudāyānarthāntaratvād rūpaṃ samudāya eva samudāyasvarūpavat, samudāyo vā rūpameva rūpānarthāntaratvād rūpasvarūpavat . evaṃ rasādi-ghaṭādi-rūpādisamudāyāntarābhimatārthānāmanarthāntaratvāt sarvasarvātmakatvavāditā . tasmāt sarvaparamāṇunīlānāṃ sañcayānarthāntaratvādaikye sati samavāya- grahaṇe yuvatikeśapāśasamudāye gṛhyamāṇe, hiśabdo yasmādarthe, yasmāt sarvanīlaikyaṃ tasmādekameva nīlaṃ rūpamekakeśagataṃ gṛhyeta, ekamekaṃ prati pratyekaikanīlagrahaṇaṃ syāt, ekanīlavālagrahaṇe'pi ca sarvanīlakeśapāśagrahaṇamekanīlātmakatvāt samudāyasya . tataśca yathātra sandrāvāt sarvanīlaikatā, guṇasandrāvo dravyam, nārthāntaram, sandrutya sarvanīlaguṇā ekatāmāpannāḥ, tathā rūpādipañcakasyāpi rūparasagandhasparśaśabdapañcakasyāpi sandrāvādekatā syāt iti vartate . kasmāddhetoḥ ? guṇatvāt, dharmatvādityarthaḥ, na hi vaiśeṣikavad dravyaguṇabhedo'stīti kṛtvā . dṛṣṭānto nīlaikatvavat, yathā sarvanīlānāṃ guṇatvāddharmatvā tathā rūpādipañcakasyāpi, guṇatvāt, nīlaikatvavat . tataśca guṇasandrāvadravyatvāt sarvathā pṛthivyādīnām, teṣāmapi rūpādiparamārthatvāt sarvasarvātmakatvam . ayaṃ tu sandrāvātiśayo māyeyīyaḥ, sañcitālambanābhyupagamād rūpādiparamāṇūnāṃ sañcitānāmasañcitānāṃ prāganabhyupagamāt . āgama evoktaṃ hi vaḥ--saṅghātā eva saṅghātān spṛśanti, sāvayavatvāt . tatra parasparasparśanirūpaṇe sarvātma- dekatvaṃ tathā rūparasādyekatvam . tataśca sandrāvasiddhau guṇānāṃ rūpādyaikye sati ko doṣaḥ ? ucyate — guṇasandrāvadravyatvāt guṇānāṃ sandrutimātrameva yasmāddravyaṃ tasmāt sarvathā pṛthivyādīnāṃ pṛthivyaptejovāyvādīnām ekatvam iti vartate . kiṃ kāraṇam ? tadeva rūpādyekatvaṃ kāraṇam, tata āha --teṣāmapi rūpādiparamārthatvāditi, rūpādaya eva paramārtho guṇasandrāvadravyatvāt, teṣāṃ caikyam, ataḥ pṛthivyaptejovāyughaṭapaṭasaritsamudrajyotirādeḥ sarvasya lokasya tadātmakatvādaikyaṃ prāptamiti . tadupasaṃhṛtyaivāha --sarvasarvātmakatvamiti . ataḥ sādhūcyate--sarvasarvātmavāditaiva viśeṣaikāntavādino'pyaviśeṣaikāntavādina iveti . - [Previous: 1.154](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.154) - [Next: 1.156](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.156) - [Up: 1](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.83) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.155](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.155) · Pramāṇa