[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 1.162 # Dvadasharanayacakra 1.162 Nyāyāgamānusāriṇī 1.162 - **Language:** Sanskrit ### [1.162](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.162) yaccāpyabhihitamabhidharmakośe yadetadanekaprakārabhinnamityādi yāvadanekavarṇasaṃsthānaṃ paśyata dravyeṇa cakṣurvijñānamutpādyate yadā nīlāditatprakāravyavacchedo bhavati, kadācidanekena yadā na tatprakāravyavacchedaḥ, tadyathā dūrānmaṇisamūhamanekavarṇasaṃsthānaṃ paśyataḥ . atrāpi kathamanekaprakārabhinna- iti buddhavacanaṃ pratyakṣalakṣaṇānuṣaṅgāgataṃ cakṣurvijñānasamaṅginīlavijñānodāharaṇasabhāvanavākyavannopapadyate evetyupapādayiṣyannupanyasyati . idaṃ punarbuddhavacanaṃ pramāṇam iti abhidharmakośe nidarśitaṃ tadvicāryam . tatrānekaḥ prakāraḥ prakṛṣṭaḥ kāraḥ, ko'sau ? anyonyātulyatvam . kena prakāreṇa bhinnaṃ rūpāyatanam ? nīlapītādiprakārabhinnam . tatra tasmin rūpāyatane'nekaprakārabhinne kadācidekena dravyeṇa cakṣurvijñānamutpādyate . kadā punarekena dravyeṇotpādyate ? yadā nīlāditatprakāravyavacchedo bhavati, nīlamevedaṃ na pītādi, pītamevedaṃ na nīlādi ityekaprakāravyavacchedo yadā bhavati tadā cakṣurvijñānamekena dravyeṇotpādyate . kadācidanekena, kadā punaranekena ? yadā na tatprakāravyavacchedo bhavati, nīlādiprakāravyavacchedo yadā na bhavati tadā cakṣurvijñānamanekena dravyeṇotpādyate . asminnartha udāharaṇamapyāha --tadyathā dūrānmaṇisamūhamityādi . viprakṛṣṭadeśasthitaṃ maṇīnāṃ samūhamanekavarṇasaṃsthānamanekena varṇena saṃsthānaṃ vyavasthānamasya tamanekavarṇasaṃsthānaṃ paśyataḥ, anekavarṇamanekasaṃsthānaṃ ca paśyata iti vā . yo nīlapītādyanekavarṇo vṛttatryasrādyanekasaṃsthāno vajrendranīlamarakatasasyakapuṣparāgapadmarāgasphaṭikādimaṇisamūho'nekaprakārabhinnastaṃ paśyataḥ puruṣasya dūrānna vyavacchedo bhavati, ārāttu vyavacchedo bhavati--ayamindranīlo vajrādīnāmanyatamo veti . - [Previous: 1.161](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.161) - [Next: 1.163](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.163) - [Up: 1](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.89) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.162](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.162) · Pramāṇa