[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 1.208 # Dvadasharanayacakra 1.208 Nyāyāgamānusāriṇī 1.208 - **Language:** Sanskrit ### [1.208](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.208) na ca grāhyasya nīlāderviṣayasyetyādi . cakṣurādibhirgrāhyasya nīlādeḥ samūhātmakasya, viṣayo gocaraḥ, sambandhi cakṣurādivijñānam, tasya nīlādiparamāṇavo na ālambanam, anyathā paramārthato vidyamānatvāt . anyatheti svābhāsādanyathābhāsante na tathā paramārthato vidyante paramārthatastu svalakṣaṇā apyagrāhyā vidyante, tasmādanyathā paramārthato vidyamānatvāt cakṣurādivannīlādigrāhyaviṣayajñānālambanā na bhavanti paramāṇavaḥ . yathā cakṣurādīndriyāṇyanyathā paramārthato'nīlādiparamāṇvātmakāni santi anyathā nīlādijñānotpattau hetubhāvaṃ bibhrati nālambanāni tathā paramāṇava iti . itaśca paramāṇvālambanaṃ na bhavati mbanam, anyathā paramārthato vidyamānatvāt tadasādhāraṇaviṣayatvādvā, rasajñānavat . nanu ca pratyekameva te samuditāḥ kāraṇam, tathāsanta eva samuditāḥ paramāṇavaścakṣurādijñānotpattihetutvādālambanam, tadavasthānāṃ jñānotpādanaśaktyabhivyakteḥ, cakṣurādiparamāṇūnāmiva . na hyeka indriyaparamāṇurviṣayaparamāṇurvā vijñānamutpādayitumalam, na tatsamudāyaḥ prajñaptisattvāt . pratyekakāraṇatāyāmaṇūnāṃ samudāye darśanaśaktivyaktiḥ, śibikāvāhakasamudāyavahanaśaktivat, andhapaṅktivat pratyekādarśanavailakṣaṇyena . cakṣurvijñānam, tadasādhāraṇaviṣayatvādvā, tasyāsādhāraṇaviṣayatvāccakṣurvijñānasya . asādhāraṇa ekaiko nīlaparamāṇurviṣayo'syeti tadasādhāraṇaviṣayatvam, tacca siddham, pratyekaṃ ca te samuditāḥ kāraṇam pra॰ samu॰ vṛ॰ 1 . 15 iti vacanāt . tasmādasādhāraṇaviṣayatvādvā rasajñānavat, yathā rasajñānamasādhāraṇaviṣayatvānnīlaparamāṇvālambanaṃ na bhavatyevaṃ cakṣurvijñānamapi . vāśabdāt tannīlaparamāṇavaścakṣurviṣayā na bhavanti, asādhāraṇaviṣayatvāt, asādhāraṇāśca te viṣayāśca, rasajñānavat, rasajñāne iva rasajñānavat, yathā rasajñāne rasalakṣaṇo'rtho'sādhāraṇaviṣayatvāt tvanmatenaiva cakṣurvijñānaviṣayo na bhavati evaṃ nīlaparamāṇava iti . - [Previous: 1.207](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.207) - [Next: 1.209](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.209) - [Up: 1](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.113) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.208](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.208) · Pramāṇa