[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 1.213 # Dvadasharanayacakra 1.213 Nyāyāgamānusāriṇī 1.213 - **Language:** Sanskrit ### [1.213](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.213) kiñcānyat, itarathāpi caiṣāṃ samudāya eva na syāt, nyāyato'pītyarthaḥ, etat pratijñānam . samudāya eva na syāt, pratyekamabhūtatvāt, vandhyāputravadityeṣa nyāyaḥ, yathā pratyekamabhūtānāṃ vandhyāputrāṇāṃ samudāyo nāsti tathā paramāṇūnāmiti . nanvayamanyāyaḥ pratyekamabhūtatvāsiddheḥ paramāṇūnāmiti cet, netyucyate, bauddhairevoktā trayātiriktasaṃskṛtakṣaṇikānityatvābhyupagamena sahāsaṅgatirasya . tvaprāptyanantarameva vinaṣṭatvāt . pratyekatvaprāptirapi caivaṃ naiva, asattvāt, vandhyāputravat . sahotpādādadoṣa iti cet, na, tulyatvāt . kiṃ bhūtasya sahatā ? abhūtasya ? yadi bhūtasya bhavanānantaravinaṣṭatvāt kutaḥ sahatā, uktavadasattvāpattereva ? yaduktaṃ vaḥ siddhānte— buddhibodhyaṃ trayādanyat saṃskṛtaṃ kṣaṇikaṃ ca tat . iti . ākāśa-pratisaṅkhyā-'pratisaṅkhyānirodhākhyāt trayādanyat pratyayajanitatvāt saṃskṛtam, saṃskṛtatvācca kṣaṇikānityam, kṣaṇo'syāstīti kṣaṇikam, kṣaṇamātramevāsya kālo na parata iti kṣaṇikānityameva na kālāntarāvasthāyyanityatvaṃ laukikābhimataghaṭādivadityetenābhyupagamena saha pratyekaṃ te samuditāḥ kāraṇamityasyābhyupagamasya saṅgatirnāsti . kiṃ kāraṇam ? pratyekatvaprāptyanantarameva vinaṣṭatvāt, ekaikasya paramāṇoḥ svarūpalābhasamanantarameva vinaṣṭatvāt kaḥ pratyekasamudāyaḥ ? ko vā deśato'tyantaṃ rūpādibhedena yāvadanabhilāpyatathāvasthānāṃtayāvaśyaṃ bhidyamānānāṃ pratyekaṃ bhāvaḥ ? iti siddhaṃ pratyekamabhūtatvaṃ deśataḥ kālataścāvasthāntarāprāpteriti . pratyekatvaprāptirapi caivaṃ naiva, nirmūlata eva paramāṇūnāṃ yāpi pratyekatvaprāptiḥ sāpi caivamuktavidhinā naivāsti, svarūpaprāptimātradeśakālāpratīkṣitvavināśitvādasattvāt, vandhyāputravat, yathā vandhyāputrāṇāṃ pratyekatvaprāptirnāsti tathā paramāṇvabhimatānāṃ tathānavasthānāmabhāvānna pratyekatvaprāptiriti . - [Previous: 1.212](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.212) - [Next: 1.214](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.214) - [Up: 1](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.117) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.213](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.1.213) · Pramāṇa