[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [Post-canonical works (philosophy, yoga, karma theory, narrative, poetry, history)](https://indike.org/pramana/in.jaina.post) › [Dvādaśāranayacakra](https://indike.org/pramana/in.jaina.post.dvadasaranayacakra) › [Nyayagamanusarini](https://indike.org/pramana/in.jaina.post.dvadasaranayacakra!simhasuri) › 1.73 # Dvadasharanayacakra 1.73 Nyāyāgamānusāriṇī 1.73 - **Language:** Sanskrit ### [1.73](https://indike.org/pramana/in.jaina.post.dvadasaranayacakra!simhasuri.1.73) itara āha--yathā dravyayoḥ pratyāsattirdravyatvābhisambandhāt tathā sattvābhisambandhād dravyaguṇakarmaṇāṃ bhaviṣyati . yathoktam --saditi yato dravyaguṇakarmasu dravyaguṇakarmabhyo'rthāntaraṃ sā sattā vai॰ sū॰ 1 . 2 . 7-8 iti . atra brūmaḥ--dravyayorapi tvadanukampādravīkṛtacetasā mayā tvayi cittānuvṛttyā uktam, tatrāpyāśāṃ mā kṛthāḥ, tadapi nopapadyate buddhyāsattikṛtasāmānyaviśeṣavādino bhavataḥ sāmānyābhāve viśeṣābhāvāt . tathāsattiḥ sikatānāṃ vajrasya ca, pārthivatvasāmānyānuviddhatvādaśmasikatāloṣṭavajrādīnām . teṣāṃ sāmānyaviśeṣau syātām, na bhūmyambhasoḥ, anyatarasya pārthivatvābhāvāt . tenaiva hetukrameṇa tathāsattiḥ piṇḍaghaṭayoḥ, na mṛt-sikatānām; evaṃ parataḥ parato yāvat tulyajāti- guṇakriyayoraṇvoreva, na tu tayorapi antyaviśeṣasamavāyena apakṣiptapratyāsattyoḥ . tasmāt sāmānyābhāvād viśeṣābhāvaḥ, sarvatraivobhayābhāvaḥ . arthāśleṣalakṣaṇāyāṃ tvāsattau pṛthivīghaṭarūpādīnāmeva syāt sāmānyaviśeṣatā, netarasāmānyaviśeṣayoḥ . guṇakriyayoraṇvoreva syātāṃ sāmānyaviśeṣau iti vartate . tathāsattiḥ ghaṭakapālayoḥ, na piṇḍaghaṭayoḥ; evaṃ kapālaśakalayoḥ, na ghaṭaśakalayoḥ; śakalaśarkarayoḥ, na ghaṭaśarkarayoḥ; pāṃśuśarkarayoḥ, na śakalaśarkarayoḥ; pāṃśudhūlyoḥ, na dhūlīśarkarayoḥ; dhūlītruṭyoḥ, na pāṃśutruṭyoḥ; truṭiparamāṇvoḥ, na dhūlīparamāṇvoḥ . athavā ghaṭasya ca ghaṭasya ca, na ghaṭasya kapālasya cetyādi . tayorapi aṇvoḥ pārthivaśuklagatisamavāyinorevāṇvoḥ, na āpyapārthivādinīlaśuklagatisthitijātiguṇakriyayoḥ . na tu tayorapītyādi yāvadapakṣiptapratyāsattyoriti . tulyajātiguṇakriyāsamavāyinoranyatvapratyayaprabhāvolliṅgitāntyaviśeṣayoḥ tatsamavāyenāpakṣiptā apahṛtā pratyāsattistayorapi iti kṛtvā kutastadbuddhyāsannaprakaraṇam ? tasmāt sāmānyābhāvād viśeṣābhāvaḥ, sarvatraivobhayābhāva iti dravyaguṇakarmaṇāṃ na sāmānyaṃ nāpi viśeṣaḥ ityataḥ prabhṛti yāvat aṇvoḥ ityetadavadhimadhyābhihitopattibalād yathopapāditasāmānyaviśeṣābhāvaṃ smārayati . - [Previous: 1.72](https://indike.org/pramana/in.jaina.post.dvadasaranayacakra!simhasuri.1.72) - [Next: 1.74](https://indike.org/pramana/in.jaina.post.dvadasaranayacakra!simhasuri.1.74) - [Up: 1](https://indike.org/pramana/in.jaina.post.dvadasaranayacakra!simhasuri.1) ## Linked texts (1) - [Dvādaśāranayacakra](https://indike.org/pramana/in.jaina.post.dvadasaranayacakra.36) — Mallavādin, Sanskrit --- Source: [https://indike.org/pramana/in.jaina.post.dvadasaranayacakra!simhasuri.1.73](https://indike.org/pramana/in.jaina.post.dvadasaranayacakra!simhasuri.1.73) · Pramāṇa