[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 2.212 # Dvadasharanayacakra 2.212 Nyāyāgamānusāriṇī 2.212 - **Language:** Sanskrit ### [2.212](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.212) atha so'rtho'svastathābhūta eva tataḥ sa bhāva eva, bhāvādeva tasya svaśabdavācyārthasya bhāvaśabdavācyārthavat kiṃ vyāvṛttyānarthikayā ? iti svaśabdasya vyāvartyābhāvād vyāvṛttiranarthikā, vyāvartyārthābhāvaśca tasya bhāvatvād bhāvavadityuktaḥ . syānmatam--tasya vyāvartyasyābhāvād vyāvartyatā viśeṣaṇārthavattā ceti, etaccāyuktam, tadbhāvatvaprasaṅgāt, na hyasataḥ prasaṅgo'sti, aprasaktasya ca vyāvartyatā nāsti abrāhmaṇavacane brāhmaṇatvavat, na hyabrāhmaṇavacane brāhmaṇo'prasakto vyāvartyate, yathoktaṃ nañivayuktamanyasadṛśādhikaraṇe tathā hyarthagatiḥ pā॰ vā॰ 3 . 1 . 12 iti . bhāvaśabdārthavyutpattyarthaṃ kartrarthopādānād yadayaṃ bhavati iti bhāvaśabdasya ayaṃśabdaviśiṣṭasya svarūpoktaḥ svaśabdo'pyanarthakaḥ . tasmād yadapi kiñcittvād vastutvādarthatvādibhyaḥ svavat . ayaṃ ca svabhāvaḥ kiṃ vyāpī prativastu parisamāpto vā ? vyāpitve tyaktasvaparaviśeṣaṇaḥ syāt . prativastutve kiṃ tena kalpitenābhinnaphalena lokavādāt . pratyekamātravṛtti ca vastu ghaṭādyeva ghaṭādītītaretarābhāvāt parasparamasvabhavanaparigrahāt kutaḥ kva cāsau svabhāvaḥ syāt ? bhāvaviṣayaikārthe svatve na kiñcidanyat svaṃ nāmeti kimatra bhedena kriyate ghaṭādinā paṭādibhāvaviśiṣṭena ? so'pi yadi bhāva eva ko'yaṃ vyāvartyate tadapi ca bhavedeva vyāvartyatvādabrāhmaṇavat, vaidharmyeṇa nāsat tat, kutaḥ ? asato'prasakta- tvādaprasaktasya cāvyāvartyatvāt khapuṣpavat . vyāvartyasya sattve'numānāntaramapyāha --kiñcittvād vastutvādarthatvāt, ādigrahaṇāt prameya-jñeya-sattvādibhyo'pi . dṛṣṭāntaḥ svavaditi, yathā svaṃ vyāvartyād vibhaktatvāt kiñcid vastu arthaḥ prameyaṃ jñeyaṃ sacca tathā vyāvartyamapi sajjñeyaṃ prameyamartho vastu kiñcidvā prasaktatvādeva, tasmād bhavedeva . - [Previous: 2.211](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.211) - [Next: 2.213](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.213) - [Up: 2](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.269) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.212](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.212) · Pramāṇa