[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 2.225 # Dvadasharanayacakra 2.225 Nyāyāgamānusāriṇī 2.225 - **Language:** Sanskrit ### [2.225](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.225) anvāha ceti tasmin jinapravacanaprasiddhābhedabhāvanirvikalpavidhividhinayadarśane bhedābhāsapratyakṣānumānasaṃśayaviparyayānadhyavasāyāsambhavamanuvartamāno'nyo'pyāha . yathā viśuddhamākāśamiti dṛṣṭāntasamarthanam, timiropaplutadṛṣṭerviśuddhe nabhasi keśondukamaśakamakṣikāmayūracandrikādimātrābhiravayavairvitatamiti niravayave'pyasaṅkīrṇe saṅkīrṇadarśanaṃ bhavati . tathedamiti dārṣṭāntiko bhāvaikaparamārthaḥ, amaraṇādamṛtamavināśād bṛhattvād eṣu vidhividhiṣu avikalpaḥ śabdārthaḥ, na tvajñātaḥ sarvasyaikatvād yasya kasyacijjñāne sarvasya jñātatvāt . anvāha-- śāstreṣu prakriyābhedairavidyaivopavarṇyate .. anāgamavikalpā tu svayaṃ vidyopavartate .. vākyapa॰ 2 . 235 brahma nirvikāraṃ stimitaṃnistimiraṃ vyomavadeva sthitam, napuṃsakanirdeśaḥ sarvabhedābhimatāsadvikārasādhāraṇatvādavyakte guṇasandehe napuṃsakaliṅgaprayogavacanāt, bhavanāpekṣayā vā napuṃsakam . akaluṣamapi sadavidyayā jñānābhāsena kaluṣatvamivāpannamanāpannamapi abhedarūpaṃ sad bhedarūpamābhāti . evaṃ tāvadamalaṃ malarūpeṇābhātītyuktam . idānīmekaṃ sadanekadhā pravibhajyata iti brūmaḥ --tasyaikamapītyādi . yathā udanvatāṃ toyamutpāte'ṅgārarāśivat prajvaladupalakṣyate tathāsyānekarūpatā mithyaiva . prakṛtitvamiti, prakarṣeṇa kṛtiḥ prakṛtirghaṭapaṭādiprakāro bhedaḥ, tadbhāvamanāpannāneva vikārāṃstāneva ghaṭapaṭādīnātmabhāvādapracyutāneva nartakahastabhrūkṣepādikalpānākaroti sa svataḥ svātmānaṃ bhāva evākārarūpeṇa sṛjati upasaṃharati ca, ko dṛṣṭāntaḥ ? ṛtudhāmeva, ṛtūnāṃ dhāma indraḥ, indra iva . nirmalamākāśaṃ dṛṣṭvā vaktāro bhavanti--mahāvarṣasya garbha iti, kuto nirmale nabhasi varṣasambhavaḥ ? tathāpi tannairmalyāvināśanenaiva śakraḥ śakrakārmuka-śatahradā-mahāghana-stanita-varṣita-karakā-dhārāvarṣādīn sṛjatyupasaṃharati cetyucyate kṣaṇenaiva punastādṛgvaimalyadarśanānnabhasaḥ . yatheyaṃ ṛtudhāmnaḥ sṛṣṭiḥ śuddhagaganāpṛthagbhūtajalaprakṛtitvābhimatameghādirūpā tathā sarvaghaṭādigavādirūpā sṛṣṭirbhāvādevopasaṃhāraśceti bhāvavidhividhinayaḥ samāptaḥ .. - [Previous: 2.224](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.224) - [Next: 2.226](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.226) - [Up: 2](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.279) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.225](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.225) · Pramāṇa