[Pramāṇa](https://indike.org/pramana/) › [Indian literature](https://indike.org/pramana/in) › [Jain Literature](https://indike.org/pramana/in.jaina) › [The four Anuyogas ("expositions")](https://indike.org/pramana/in.jaina.anuyoga) › [Ontology, epistemology and logic](https://indike.org/pramana/in.jaina.anuyoga.phil) › [Logic and epistemology (pramāṇa, naya, syādvāda)](https://indike.org/pramana/in.jaina.anuyoga.phil.nyaya) › [Standpoints, nikṣepa, saptabhaṅgī](https://indike.org/pramana/in.jaina.anuyoga.phil.nyaya.naya) › [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra) › [Nyayagamanusarini](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri) › 2.226 # Dvadasharanayacakra 2.226 Nyāyāgamānusāriṇī 2.226 - **Language:** Sanskrit ### [2.226](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.226) evaṃ tāvad vastvarthato vidhividhinayavikalpāḥ puruṣa-niyati-kāla-svabhāva-bhāvā vyākhyātāḥ . anayā diśā śabdabrahmavidhividhinayagrahādyekakāraṇavādā unnayanīyāḥ . idānīṃ teṣu śabdārtho vaktavyaḥ, sa ca sāmānyenocyate sarveṣāṃ tulyatvāt . sa ca dvividhaḥ--padārtho vākyārthaśca . tatra padārthastāvat --eṣu vidhividhiṣvavikalpaḥ śabdārthaḥ, ukteṣu puruṣādivādeṣvavasthādyupacaritaprakriyābhedakalpitavikalpāsattvāt tadvastunirvikalpatvāt . na tvityādi, nājñātaḥ, sarvasyaikatvād yasya kasyacijjñāne sarvasya jñātatvāt . etena vaktṛtvādyasamanvayo vyākhyāto dṛṣṭāntābhāvāt sarvasya sarvajñatvād bhedābhāvāt . etamarthamanyo'pyanvāha— śāstreṣu prakriyā . sāṅkhyayogavaiśeṣikavedaśiraḥprabhṛtiṣu nṛprakṛtipuruṣadravyaguṇādinityānityādvaitadvaitatraitādipadārthaprakriyābhedairvikalpātmakapadārthapraṇayane yathāprakriyamavidyaivopavarṇyate vikalpasyāvastutvāt . vidyā tu tattvajñānaṃ sā āgamavikalparūpā na bhavitumarhati, vāggocarātikrāntatvāt tattvajñānaviṣayānantātmakaikapara ye tvete ghaṭādiśabdā meghastanitavadete śabdā eva kevalā nārthasvarūpasya vācakā mayūravirutavat saṅketād vyavahārānupātinastasyaiva caikasya brahmaṇo lakṣaṇārthāḥ tadekadeśatvāt prāgabhihitapratyakṣasiddhivat . evaṃ ca kṛtvāhuḥ--sarvadhātavo bhuvo'rthamabhidadhati iti . mārthasya . yathoktam --paṇṇavaṇijjā bhāvā āva॰ ni॰ 488 ityādi . āgamābhyāsāttu samyagdarśana-jñānacāritra-tapoviśeṣaviśeṣitāvidyasya sarvabhāvaviṣayā vidyā svayameva svātmanaiva upavartate, nāvidyamānā kutaścidānīyate, sā cānāgamavikalpetyata āha --anāgamavikalpā tu svayaṃ vidyopavartate . tathā cānyaḥ-- - [Previous: 2.225](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.225) - [Next: 2.227](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.227) - [Up: 2](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2) ## Linked texts (1) - [Dvādaśāranayacakra](https://indike.org/pramana/in.jaina.anuyoga.phil.nyaya.naya.dvadasaranayacakra.280) — Mallavādin, Sanskrit --- Source: [https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.226](https://indike.org/pramana/in.jaina.anuyoga.phil.nyaya.naya.dvadasaranayacakra!simhasuri.2.226) · Pramāṇa